Jɔ̌n 21

Yesò sàꞋa a mbì bɔkatè bi a Galìlî

1Àfɨ̀Ꞌ a me wu, Yesò mè mpuula a mbì bɔkatè bi ko a ngèt èdzî Tìbelìàs. Ye ndɨ tà li mpùùlà la. 2Bɔkatè tò ko e li ngu abot bɔ bù̧ù̧tè la. Bèŋût li ngu Simùn wu èlen tò ko wu Pità la, bɔ̂ Tɔmasì wu bɔ̀ɔ ntɔ ane wabenyì la, nè Nàtanìà wu tà dzəa Kanà a èbem àlaꞋ a Galìlî la, bɔ̂ bɔ̧ Zebèdiì, ndɔ̀Ꞌ nè bɔkatè Yesò ko babe. 3Simùn Pità shu abua yɔb nê, “E tsiꞋa nga me baãaã basə bɔ̧.” Bɔkatè ko bu e nê, “Ba nè ba aa ghà nɔ̂.” Ale, bɔ dzəè ngà nyi a èbem ànkànuꞋ, ka ètsəꞋ e me laꞋ nê aà ntsìa, bɔ̀ ka baãaã ka wuê asəâ wemɔ̀Ꞌ.

4Mbɨ̀Ꞌɨ̀ ètsəꞋ àa ntsia la, Yesò kɨ̀Ꞌɨ̂ ntɨ̧ aguŋ, a ngèt èdzî wu, ka bɔkatè tò bu è ka lem nko nê wu tòà.

5ÀfɨꞋa mbɔŋ, Yesò bììte awɔb nê, “Bɨ bakà baãaã basə a bɔ̧ bà?”

Bɔ nê “ChaꞋ ba bakà baãaã àghɨ.”

6Yesò mè shu abua yɔb nê, “Bɨ̀ màꞋa tasat wu àbâ àbualu̧ ko bɨa baãaã basə.” Ale, bɔ màꞋà tasat wu, basə e nyi a èbèm, tè bɔ tsiꞋa səa a màntsàà a èbem ànkànuꞋ yu kekaŋ.

7ÀfɨꞋa mbɔŋ, wakatè wu Yesò taꞋa wua nkɔ̀ŋkà tò la shu abua Pità nê, “Wu Tè Yesò!” Mbɨ̀Ꞌɨ̀ Simùn Pità è zə nê wu Tè Yesò la, tà vi ndǐ ègwet zi tà ghɨ̂ me fàꞋa ale ntsì nɔŋe a si la, nkwaã mbɔ̂ nkȩ nteme a èbem *èdzî wu. 8Tà kȩ ale, bɔkatè ko bu e me səa tasat wu è lu̧u̧ ne basə la nɨa nkɔꞋɔ aguŋ a èbem ànkànuꞋ yu. Bɔ li bɔ ka tsi ngua èndɨ̌, è li ntsìꞋi wuê mbɔ̀ŋè èmaꞋà èghem yetà̧â̧ bɔ puula aguŋ. 9MbɨꞋɨ bɔ kɔꞋɔ tê ndzə aguŋ la, bɔ ye èwet bɔ tsəꞋte ane tènkìtewèt la, nè asəâ a ègwet bɔ̂ bled.

10Yesò shu abua yɔb nê, “Bɨ̀ nɨ basə ko bɨ baãaã àfɨ̀Ꞌ yaa la nɨŋ nkɨ̀Ꞌɨ̂.”

11Ale, Simùn Pità kɔꞋ nga a èbem ànkànuꞋ yu, səa tasat wu è lu̧u̧ ne basə nɨ̧ la nɨŋ nkɔꞋɔ aguŋ. Basə mbɔŋ e li ngu ènkɨ̀ nè èghem yetà̧â̧ ntsɔ̀b batat, mbàte me yaãaã ale, ka tàsat wu ka saalà. 12ÀfɨꞋa mbɔŋ Yesò shu abua yɔb nê, “Bɨ̀ kɨꞋɨ ntsàb.” Tà làꞋ ale, wòt kǒ ka wu ane bɔkatè tò bu tà baãaã èntɨ̧ɨ̧ vi tè mbììte atò nê, tà wu wàà leꞋ la. Bɔɔ ntù̧a kà bììte ale ngu ndɨ̀ wu bɔ ko nê wu Tè Yesò la. 13Ale, Yesò səèꞋtè àvi nkɨ̀Ꞌɨ̂ nɨa bled wu ŋǎ abua yɔb, mbɔ̂ mè nɨ̀ asəâ wu, ngɨ̀ wuê a èlɨ mbɔŋ. 14Eyaa li ngu ngò̧ tetat, Yesò pùùla a mbì bɔkatè bi mbɨ̀Ꞌɨ̀ tà yu̧u̧me la.

Yesò bɔ̂ Pità

15Mbɨ̀Ꞌɨ̀ bɔ jɨ èghɨjɨ bu tè ndɔ̀Ꞌ la, Yesò bììte Simùn Pità nê, “Simùn waã Jɔ̌n, tè à kɔ̀ŋke am tè ntsè bòt ba à?”

Pità shu abua tò nê, “Oò a Tè, à ko nê, maà nkɔ̀ŋkà awê.”

Yesò shu abua tò nê, “Me jɨɨ bɔɔnjɨ̀ bɔ̧.”

16Yesò mè mbììte atò nê, “Simùn waã Jɔ̌n, tè àà nkɔ̀ŋkà am?”

Pità shu abua tò nê, “Oò a Tê, à ko nê, maà nkɔ̀ŋkè awê.”

Yesò shu abua tò nê, “Me baabe njɨ̀ taã.”

17Yesò mè nkwetê mbììte atò nê, “Simùn waã Jɔ̌n, tè àà nkɔ̀ŋkà am?”

Tà biite ale, a saa Pità nkàà nê tàà mbììta ale è wu ngò̧ tetat tà biite atò nê, “tè àa nkɔ̀ŋkè am” la. Tà ghɨ̀ ale mbɔ̂ shu abua Yesò nê, “Tê, à ko ànəa àgème, à ko nê, maà nkɔ̀ŋkà wê.”

Yesò shu abua tò nê, “Me jɨɨ njɨ̀ taã. 18Ane nkûŋ, tsiꞋ è shu awê nê, è li ngu àfɨꞋa à bèlè wakèsà la, à ghɨ̀ à kwǎ̧ ndǐ tê, nga àdziꞋa à kɔ̀ŋkè la, ka aa me ghɨ̀ tê ndèn, ntsìꞋa nyààbà èbu bê, ka bòt tsa e zìà ndǐ a mbɨ̧̀ yê, mbɔ̂ nɨa wê nɨa nga àdziꞋa kà à kɔ̀ŋke eghǎ.” 19(Yesò nàà ndàꞋà anè ale, ngua shua èwuu èvə Pità nàa pfə lùà enɨ nyɨꞋte ènɨ̧ Mbɔ̧ɔ̧mà la.) Yesò ghɨ̀ ale, mbɔ̂ shu abua tò nê, “Kùŋe am.”

Yesò bɔ̂ wekǒ nè wakatè

20Pità ghèble avi ndzè wakatè kǒ wu Yesò taꞋa wua nkɔ̀ŋka tò la tàa nkùŋà àwɔb la. Eyaa wu wakatè wu tà li ntsèke a ngèt Yesò àfɨꞋa bɔ̀ɔ jɨa èghɨjɨ nyèmtèsi la, mbɔ̧̀ɔ̧̀nè àvi, mbììte atò nê, “Tê wòt wu nga efɨ̧ɨ̧ne àwê la wu wàà?”

21Mbɨ̀Ꞌɨ̀ Pità ye atò la, tà bììte a Yesò nê, “Tê àa wu na ane mbê wa à?” 22Yesò bɨ̀ɨ̀lè nê, “E nkɔ̀ŋkè nê, tà tseke yû̧ tè e ndi nkɨ̀Ꞌɨ̂, àyê adù̧ wu ghà à? Kùŋè am.” 23Èngà̧ waa Yesò shu la e bùà a kètsìà bɔnyɨ bu nê, tà laꞋnê wakatè waa ka li tsi epfəa, mbɔ̂ me làꞋ ale, Yesò kà lem nê, wakatè mbɔŋ ka li epfəa. Tà li shu wuê nê, “E kɔ̀ŋkà nê tà tseke yû̧ tè è ndi nkɨ̀Ꞌɨ̂, àyê adù̧ wu ghà à?”

24Wu wakatè Yesò waa ka tà ye mènəè maa, ndàꞋà ànəa mùà la; è mè ngu tòà ka tà shɨ mùà a èbem àkatè yaa la. Ba ko nê ànəa tà shɨ la wu nkûŋ.

25Mbɔ̂ èghɨ ko tsa e taꞋa wu Yesò li ngɨ̀ la. Mâ ye nê bɔ li ngɨ̀ ale shɨ bùà ègème, ko betsiꞋa ngɔ̀ŋ yaa kà bɔ àdziꞋa nàa nɔ̀ŋè èkatè ngaa la.

දැනට තෝරාගෙන ඇත:

Jɔ̌n 21: mnf

සළකුණු කරන්න

බෙදාගන්න

පිටපත් කරන්න

ඔබගේ සියලු උපාංග හරහා ඔබගේ සළකුණු කල පද වෙත ප්‍රවේශ වීමට අවශ්‍යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න

Mundani පිළිබඳ වැඩිදුර දැනගන්න

Jɔ̌n 21

Jɔ̌n 21
වෙතින් ජනප්‍රිය බයිබල් පද

බයිබලය:

Mundani

නිකුතුව: Mundani - mnf

Jɔ̌n 21

Jɔ̌n 21

Jɔ̌n 21වෙතින් ජනප්‍රිය බයිබල් පද

බයිබලය:

Mundani

නිකුතුව: Mundani - mnf

Jɔ̌n 21

Jɔ̌n 21
වෙතින් ජනප්‍රිය බයිබල් පද