Tuk 7
7
Ben nyɔac
1Ɛ jɛn, cu Kuoth Nhial Nowa ku jiök i̱, “Wër rɛy ria̱a̱y, ji̱n yɛnɛ ji̱ gɔaalu diaal, kɛ ɣöö cä jɛ nɛn ɛn ɣöö ɛ ji̱n gua̱n cuŋni kärɔaadu rɛy ri̱cä mi mi. 2Ji̱n naŋni rɛw rɛy ria̱a̱y ni kä bärɔw kä le̱y diaal tin cä ji̱ nhök mi̱ethdiɛn, tuut kɛnɛ ŋuɔ̱ɔ̱tdɛ, kɛ rɛw kä le̱y diaal tin cä ji̱ gok mi̱thdiɛn, tuut kɛnɛ ŋuɔ̱ɔ̱tdɛ. 3Kɛ rɛw ni kä bärɔw kä diit diaal, tuut kɛnɛ ŋuɔ̱ɔ̱tdɛ, kɛ ɣöö ba cätdiɛn yop a tëk wi̱i̱ muɔ̱ɔ̱n kɛɛliw. 4La̱rä jɛ ji̱ inɔ kɛ ɣöö kɛ kɔr ni̱ni da̱ŋ bärɔw ɣän bä nhiaal jak kä dɛm wi̱i̱ muɔ̱ɔ̱n kɛ ni̱n ti jiɛn ŋuaan, kɛ wäär kɛnɛ cäŋdäär. Kä ɣän bä tin diaal tin tëk tin cä cak puɔc jɔ̱ɔ̱r wi̱i̱ muɔ̱ɔ̱n.” 5Kä cu Nowa tin diaal tin ci Kuoth kɛ la̱r jɛ la̱t.
6Kɛ gua̱a̱th ëë bäk kɛ nyɔc wi̱i̱ muɔ̱ɔ̱n Nowa tëë kɛ run ti kur bäkɛl. 7Kä Nowa kɛnɛ gaatkɛ kɛ ciekdɛ kɛ män gankɛ cukɛ wä rɛy ria̱a̱y kɛ jɛ kɛɛl, kɛ ɣöö bikɛ rɔ kɔl kä nyɔc. 8Kɛ ley diaal tin gɔw kɛ diaal tin jiäk, kɛ diit kɛ muɔɔl piɛny diaal, 9wäkɛ rɛc rɛw kɛɛl tuut kɛnɛ ŋuɔ̱ɔ̱t kɛɛl kɛ Nowa, ce̱tkɛ mëë ci Kuoth ɛ guɔ̱k Nowa. 10Kä kɛ kɔr ni̱ni da̱ŋ bärɔw cu nyɔc ben wi̱i̱ muɔ̱ɔ̱n.
11Mëë ci Nowa runkɛ a kur bäkɛl, kɛ cäŋ kä wäl bärɔw, kä pay rɛw, ɛn cäŋ ɛmɔ cu pi̱ bäpdiitni kac nhial kä cu pua̱a̱r rɔ lɛp. 12Kä cu nhiaal dɛ̈m wi̱i̱ muɔ̱ɔ̱n kɛ ni̱n ti jiɛn ŋuaan, kɛ wäär kɛnɛ cäŋdäär. 13Ni kɛ jɛn cäŋ ɛmɔ pa̱ny cu Nowa kɛnɛ ciekdɛ wä rɛy ria̱a̱y kɛɛl kɛ gaatkɛ ni Cɛm kɛ Ɣɛ̈m kɛ Ya-pɛth kɛ mänkiɛn da̱ŋ diɔ̱k. 14Kä cukɛ wä kɛɛl kɛ ley dɔaar diaal ce̱tnikɛ cätdiɛn, kɛ ley ciëŋ diaal ce̱tnikɛ cätdiɛn kɛ muɔɔl piɛny diaal ni kɛ cätdiɛn, kɛ diit nhial diaal nikɛ cätdiɛn. 15Cukɛ coth rɛc kɛɛl kɛ Nowa, rɛw kɛɛl tuut kɛnɛ ŋuɔ̱ɔ̱t kä ŋɔak diaal tin tëk. 16Cukɛ coth rɛc kɛn diaal ce̱tnikɛ mëë ci Kuoth ɛ gok. Kä cu Kuoth Nhial thi̱i̱k ria̱a̱y cu lɛ̈k thi̱n.
17Kä cu nyɔc te wi̱i̱ muɔ̱ɔ̱n kɛ ni̱n ti jiɛn ŋuaan, kä cu pi̱ rɔ̱ re̱p kä cukɛ riey ɣöth nhial a thɔaarɛ wi̱i̱ pi̱i̱ni. 18Kä cu pi̱ wä kɛ mi rëpkɛ rɔ̱, kä cukɛ luëŋ ɛlueŋ a thɔaar riey thi̱n. 19Kä cukɛ rɔ̱ re̱p ɛlɔ̱ŋ a cukɛ pääm tin ba̱r ba̱a̱r buɔny bä. 20Cukɛ wee kɛ wä a cukɛ pääm diaal buɔny a räth ni kä jua̱th tetni da̱ŋ wal wi̱cdɛ dhieec nhialiɛn. 21Ɛ jɛ nɔ, cu ŋɔak diaal tin tëk wi̱i̱ muɔ̱ɔ̱n cu li̱w, ti̱ti̱ kɛ diit, kɛ ɣɔ̱k, kɛ le̱y dɔaar, kɛ muɔɔl piɛny diaal, kɛ nɛy diaal tëë ci duɔth raar rɛy ria̱a̱y, 22ŋɔak diaal tëë te ko̱o̱tdä, kɛn diaal cukɛ li̱w, 23ŋɔak diaal tin tëk cua kɛ däk, tin diaal tëë te wi̱i̱ muɔ̱ɔ̱n, naath kɛ le̱y kɛ muɔɔl piɛny kɛ diit, cua kɛ jak kä thilkɛ ni kɛn diaal. Kä cu duɔth ni Nowa kärɔa kɛnɛ tëë tekɛ jɛ kɛɛl rɛy ria̱a̱y. 24Kä cu nyɔc te wi̱i̱ muɔ̱ɔ̱n kɛ ni̱n ti kuɔ̱r kɛl wi̱cdɛ jiɛn dhieec.
Currently Selected:
Tuk 7: nusNHB
Highlight
Share
Copy
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.