N. Eoin 2

II. CAIB.

Criosta tionndadh uisge gu fion; ʼsa tilgeadh an luchd-reic us ceannach a mach as an teampull.

1Agus air an treas latha bha bainis ann an Cana Ghalile; ʼs bha mathair Iosa an sin.

2Agus fhuair Iosa fhein ʼsa dheisciopuil cuireadh thun na bainnse.

3ʼS am fiona teireachduinn, thuirt mathair Iosa ris: Cha n-eil fion aca.

4Us thuirt Iosa rithe: Ciod e sin domhsa us dutsa, a bhoirionnaich? cha n-eil mʼ uair-sa air tighinn fhathast.#2.4 II. CAIB., 4. Ciod e sin domhsa, &c. Chaidh am facal so thuigsinn le cuid de luchd-mineachaidh nan sgriobtur mar fhacal searbh, le cion sealtuinn air an rann a leanas: Ni air bith a their e ribh, dianaibh, a tha fiachuinn gu glan gum bʼ aithne dha mhathair a mhiarailt a bha e gu oibreachadh, agus gur h-ann air a h-iarratas a dhʼ oibrich e i; a bharrachd air an doigh sna labhradh na briathran, bu choir fuaim a ghuth agus fiamh ʼaodainn, nichean a bha ain-fhiosrach ach do ʼn fheadhainn a bha san eisdeachd, bhith air aire, air neo mar rinneadh as an deigh: oir facal a thuigteadh an seol feargach le aon sheorsa fuaim gutha, thuigteadh le caochla fuaime ann an seagh eile.

5Thuirt a mhathair ris an luchd-riarachaidh: Ni sam bith a their e ribh, dianaibh.

6A nis bha sia poitean-uisge de chloich air an cur an sin a reir gnath glanaidh nan Iudhach, a chumadh a dhà no tri de thoimhsean gach aon.

7Thuirt Iosa riu: Lionaibh na poitean le uisge. Agus lion iad suas gus am bial iad.

8Agus thuirt Iosa riu: Tarruinnibh a nis, agus thugaibh e gu ard-riaghladair na cuilme. Agus thug iad e.

9ʼS nuair a bhlais ard-riaghladair na cuilme an t-uisge a chaidh thionndadh gu fion, ʼs e gun fhios aige co as a bha e, ach bha fios aig an luchd-riarachaidh a tharruinn an t-uisge, ghairm an t-ard-riaghladair fear-na-bainnse,

10Us thuirt e ris: Tha h-uile duine cur sios an toiseach fiona mhath; ʼs nuair a dhʼ olas daoine gu pailt, an sin fiona nas miosa: ach ghleidh thusa am fion math gu so.

11Bʼ e so toiseach miarailtean Iosa ann an Cana Ghalile: us rinn e ghloir follaiseach, agus chreid a dheisciopuil ann.

12An deigh so chaidh e sios do Chapharnaum, e fhein, ʼsa mhathair, ʼsa bhraithrean, agus a dheisciopuil; ʼs cha dʼfhan iad an sin moran laithean.

13Agus bha càisg nan Iudhach aig laimh, ʼs chaidh Iosa suas gu Ierusalem;

14Agus fhuair e san teampull luchd-reic dhamh us chaorach us chalaman, agus luchd-malairt airgid ʼnan suidhe.

15ʼS nuair rinn e sgiursa de chuird chaola, dhʼfhuadaich e mach as an teampull iad uile, na caoraich mar-aon agus na daimh, agus thaom e sios airgiod an luchd-mhalairt agus leag e na buird.

16Us thuirt e riusan a bha reic chalaman: Thugaibh iad sin á so, ʼs na dianaibh tigh mʼ Athar ʼna thigh marsantachd.

17An sin chuimhnich a dheisciopuil gun robh e sgriobhte: Dhʼith eud do thighe suas mi.

18Uime sin fhreagair na h-Iudhaich, us thuirt iad ris: Ciod an comharradh a dhʼ fhiachas tu dhuinn, a thaobh gu bheil thu dianamh nan nichean so?

19Fhreagair Iosa, us thuirt e riu: Leagaibh an teampull so, agus togaidh mi suais e an tri latha.

20An sin thuirt na h-Iudhaich: Dà-fhichead bliadhna ʼsa sia bhathas a togail an teampuill so, agus an cuir thusa suas e an tri latha?

21Ach bha esan a labhairt mu theampull a chuirp.

22Air an aobhar sin nuair dhʼeirich e bho na mairbh, chuimhnich a dheisciopuil gun tuirt e so, agus chreid iad an sgriobtur, agus am facal a thuirt Iosa.

23A nis, nuair a bha e ann an Ierusalem aig a chàisg, air latha na feille, chreid moran ʼna ainm, ʼs iad a faicinn nam miarailtean a bha e dianamh.

24Ach cha dʼ earb Iosa e fhein riu: a thaobh gum bʼ aithne dha daoine uile,

25ʼSa thaobh nach robh feum aige gun tugadh neach air bith teisteanas air duine: oir bʼ aithne dha fhein ciod a bha anns an duine.

දැනට තෝරාගෙන ඇත:

N. Eoin 2: MacETN

සළකුණු කරන්න

බෙදාගන්න

පිටපත් කරන්න