Popular Bible Verses from মথি 21

Share

নাংরোরা চিইমা আক্যুং থাঃলো ছুউক তংগি, য়াংখা যা লুঃরিলি য়াংচা রাঃমি।”

আফ্রিমা যীশু তিবিরোগো প্রলিইরি, “ঙা নাংরোগো অামেইং প্ররি, নাংরো চিইমা মকং মেম্হেপ্রি, আক্যুং থাঃগি য়াংখা সাঃবুয়েসিই আপাংগো ঙা যা প্যাংলিইরি, নাংরোলি য়াংচা প্যাংনৈংফু। য়াংচারা সাসাক প্যাংনৈংফুব্যা মুহুক, ছুগি দিঃ তংগোলি প্রগি, ‘তংচা থাঃলো ম্রঃমা ক্যালিই,’ য়াংখা য়াংচা ফ্রইমি।

যাসুউরো যীশু নক্কানা হ্রিইগা লাঃগেতি য়াংসুউরোচা অলো প্রগেলিইরি, “হোশান্না, দায়ুদ আচৈং! ফোরাস্যাং নাঃমিনা যাসুউ লাঃরি, য়াংসুউ খিইম্যুয়েংবাজি। গংখাং ফুমালি হোশান্না!”

“সেংস্যাংস কেইংমা থাওরা ফোরা প্রলিইরি, ‘ঙা ইংগো ছুউক তংচা ক্যং প্রফু,’ ছুগি য়াং ক্যংগো নাংরোচা ডাম্রা নিংচা-চাচা প্যাংগেরি।”

“নাংরোচা সিয়োন সিমিংগো প্রফুচাগা, নাক মাং নাকবাদুঃ লাঃরি। মাংচা কংগং সুউদগং। মাংচা গাধা আথাকমা, গাধামা আশ্যি আথাকমা তাক লাঃরি।”

য়াংখা যীশু য়াংসুউরোগো প্রলিইরি, কুবাংরো সেংস্যাংস কেইং চাউমা তাখালি মেফেসিই লঃ, উক ইং লুকসারো যা ক্যককো মুসুংছুলো বলৈকেতি, য়াংচারা অালুংচা থাক আফুদেং ক্যক ফ্রইলিইরি; ফোরাস্যাংচা য়াংচাগো লুকলিইরি, অর য়াংচারো ঙুরো ম্যাকচিইমা কংগং এংঅফুয়ি ম্রাংরিলঃ’?

য়াংচা আতুওয়ক ঙা নাংরোগো প্ররি, থাওরা ফোরা নেংঙেংদগো নাংরো মাঃরা, য়াংচাগো দিঃ পুয়েং লুঃউ রাঃফু যাসুউরো বাওয়ামা য়াং নেংঙেংদ আতুওয়ক আকং অলুক লুককি।