Kỹ kejẽn pã'i ũ ag tóg Jerusalém tá junjun mũ, Jesus tá, Topẽ vĩ to ẽg kanhrãn tĩ ag mré hã. Jesus mỹ ag tóg: “ã mré mũ tĩ ag ne tóg ẽg jykre si mranh tĩ',” he mũ. “Ẽg jykre si ki ẽg tóg ẽg jẽn ke jo nĩgpég tĩ. Jãvo ag tóg ag nĩgpég tũ ra jẽg tĩ, ã mré mũ tĩ ag“ he ag tóg.
Kỹ Jesus tóg ag mỹ: “ãjag hã vỹ Topẽ vĩ mranh tĩ, inhhã, ãjag tỹ ãjag jykre si han kỹ,” he mũ. “Topẽ tỹ ẽg mỹ tón hã vẽ, ha mẽ: “ã mỹnh fi mré ã panh kamẽg nĩ, fag jagãgtãn nĩ,” he ja tóg nĩ. Kỹ tóg tag tó mũ gé, ha mẽ: “ũ tỹ ti han mũ fag mỹ vĩ kónãn mũ ẽn tén jé ã tóg ke mũ,” he ja tóg nĩ gé, Topẽ ti. Ti jãvo ãjag tóg tag tó tĩ, ha mẽ: “ã panh mỹ nén ũ nĩm tũg nĩ, ã mỹnh fi mỹ nĩm tũg nĩ gé, ã tỹ fag mỹ: “sỹ ãjag mỹ nén ũ nĩm ke vẽ vẽ, hã ra sóg Topẽ mỹ nĩm sór mũ,” hen kỹ. “Ũ tỹ tag han kỹ tóg há tĩ,” he ãjag tóg tĩ. Hã kỹ ãjag tóg Topẽ vĩ tỹ tũ' he tĩ, ãjag tỹ ãjag jykre si hã han kỹ,” he tóg.
“Jykre régre ãjag nỹtĩ, ha mẽ. Hã kỹ Isaías vỹ ãjag to vĩ ja nĩgtĩ, ti tỹ tag tó kỹ, ha mẽ. “Povo tag vỹ ag nũnẽ hã tỹ inh mỹ vĩ há han tĩ, hã ra ag jykre pijé tỹ inh jykre nỹ',” he ja tóg nĩ. “Fagrĩnh mỹ ag tóg iso grĩnhgrĩnh ke tĩ, hã ra ag tóg ẽprã ke ag jykre to: Topẽ tỹ tón hã vẽ, he tĩ,” he ja tóg nĩgtĩ, Isaías ti. Ki hã tóg tó ja nĩ, ãjag to, ãjag jykre régre nỹtĩn kỹ,” he tóg, Jesus ti.


Kỹ tóg vẽnh kar jé prẽr mũ sir, ag tỹ ti rã hã nỹtĩ jé, ti vĩ jẽmẽ há han jé. Kỹ tóg ag mỹ: “ha mẽ, sỹ nén tó mũ ti, kỹ to jykrén nĩ gé,” he mũ. “Ẽg jẽn pijé ẽg kavénh tĩ'. Ẽg jẽnky kã ra ẽg tóg rãg tĩ, vẽjẽn tỹ. Nén ũ tỹ ẽg ki kãpa hã vỹ ẽg kavénh tĩ, ha mẽ,” he tóg.
Kỹ ti mré mũ tĩ ag tóg ti to kãmũ kỹ ti mỹ: “ha mẽ,” he mũ. “Pã'i ag vỹ ã to jũ nỹtĩ, ã tỹ ag mỹ: vẽjẽn pijé ẽg kavénh tĩ', hen kỹ,” he ag tóg ti mỹ.
Kỹ tóg ag mỹ: “ẽg jóg mág tỹ nén krãn ja tũ ẽn vãm kãn kỹ nĩnh ke vẽ, ẽg jóg tỹ kanhkã tá nĩ tỹ nén krãn ja tũ ẽn ti,” he mũ. “Ag pijé tỹ Topẽ krẽ nỹtĩ', pã'i ẽn ag, hã kỹ tóg ag vãm ke mũ,” he tóg. “Hã kỹ ag to jykrén tũg nĩ. Ũn kyvó ag mỹ ag tóg: “sỹ ã jãmĩ tĩg ke vẽ,” he tĩ, hã ra ag tóg ag kóm kyvó nỹtĩ gé, kỹ ũn kyvó tỹ ũn kyvó jãmĩ tĩg kỹ ag tóg kãgnó ki vár kãn ke mũ, ha vem nĩ,” he tóg. Ag tỹ nũgme ki vár ke to ken hã vẽ, hã vỹ: kãgnó ki vár, he mũ.
Kỹ Pedro tóg ti mỹ: “ẽg mỹ kãmén há han nĩ, ã vĩ tag,” he mũ. Kỹ Jesus tóg ag mỹ: “kỹ ãjag mỹ ver ki kanhrãn tũ'?“ he mũ. “Mỹ ãjag tỹ to jykrén tũ tĩ'?“ he tóg. “Ha vé, ẽg tỹ ẽg jẽn tỹ ẽg jẽnky kã ra rãg kỹ tóg ẽg nug kã ra rã mũ, kar ẽg tóg fón mũ sir. Nén tỹ ẽg ki kãpa mũ vỹ tỹ ẽg jykre nĩ, hã kỹ tóg ẽg kavénh tĩ. Nén tỹ ẽg ki kãpa mũn hã vẽ, ha mẽ: jykrén kónãn, ũ tén, ti prũ tũ fi mré nỹ, fi mén tũ mré nỹ, ũn mén tũ fag to én, nén ũ péju, ũ to ón, ũ to vĩ kónãn. Nén tỹ ẽg ki kãpan hã vẽ, ẽg kavénh tĩn hã vẽ. Ẽg tỹ nĩgpég tũ ra jẽn kỹ ti pijé ẽg kavénh tĩ',” he tóg, Jesus ti.


Kỹ Jesus tóg tá kãkutẽ kỹ ga ũ ra tĩ mũ, ẽmã tỹ Tiro ra, ẽmã tỹ Sidom ra. Ti tỹ tá jun kỹ fóg ũ fi tóg ti venh kãtĩ mũ. Ga tỹ Canaã tá ke fi vẽ. Kỹ fi tóg Jesus tá jun kỹ prẽr mũ. “!..Senhor, Davi krẽ'krẽ..!“ he fi tóg. “!..Inh jagãgtãn ra..!“ he fi tóg. “!..Inh kósin fi vỹ jagrẽ kórég tãvĩ nĩ, inh mỹ tóg ã tỹ fi mỹ kutẽm há tĩ..!“ he fi tóg, prẽr kỹ.
Hã ra Jesus tóg fi mỹ vĩ tũ nĩ. Kỹ ti mré mũ tĩ ag tóg ti mỹ: “ã mỹ fi ve sór tũ'? Ẽg nón fi tóg ẽg jé prẽr mũ, kỹ tóg ẽg mỹ e tĩ,” he mũ.
Hã ra tóg ag mỹ: “hỹ,” he mũ. “Topẽ vỹ inh jẽnẽ, sỹ Israel ag hã tỹ há' he jé, ũ tỹ Israel kã mĩ Topẽ vĩ mranh mũ ag tỹ,” he tóg. Hã ra fi tóg tỹ fóg nĩ, hã kỹ Jesus tóg fi ve sór tũ nĩ.
Ge ra fi tóg ti tá jun mũ sir. Ti krẽm fi tóg grĩnh ke mũ. Kỹ fi tóg ti mỹ: “Senhor,” he mũ. “Ã mỹ inh jagãgtãn ke tũ?“ he fi tóg.
Hã ra Jesus tóg fi mỹ: “há tũ tóg nĩ, ã tỹ nén to vĩ mũ ti,” he mũ. “Ẽg krẽ jamĩ vỹ tỹ ẽg krẽ tũ nĩ, kỹ ẽg tóg kasor mỹ fón tũ nĩgtĩ,” he tóg.
Kỹ fi tóg: “hỹ, hã ra kasor sĩ tóg ẽmĩ vár ko tĩ,” he mũ. “Hã kỹ inh mỹ ẽmĩ vár nĩm, hã vỹ: inh kósin fi tỹ há' henh ke, he mũ,” he fi tóg.
Kỹ tóg fi mỹ: “ã hã ne tóg inh ki rã há han'. Hã kỹ sóg ã mỹ han mũ,” he mũ. Ti tỹ tag tó kỹ fi kósin fi tóg há' he mũ, óra ẽn hã kã.

Kỹ Jesus tóg ẽmã ẽn tá kãkutẽ kỹ goj nig mág tỹ Galiléia ẽn fyr jagma tĩ mũ. Kỹ tóg krĩ to tãpry kỹ tá nĩ mũ. Kỹ ũn tỹ hẽn ri ke ag vỹ tá junjun mũ, ũn kagyga ag ke gé, ũn kãnhgrĩ ag ke gé, fag mré hã. Ti ki ag tóg junjun mũ, kỹ tóg ag tỹ há' he kãn mũ. Kỹ tóg vẽnh kar ẽn mỹ e tĩ. Ũn vĩ vãnh ag tóg vĩ há nỹtĩ, ũn kãnhgrĩ ag tóg mũ há nỹtĩ, ũn kyvó ag tóg ẽvãnh há nỹtĩ gé. Kỹ ag tóg Topẽ mỹ vĩ há han mũ sir.


Kỹ Jesus tóg ti mré mũ tĩ ag jé prẽr mũ. Kỹ tóg ag mỹ: “inh mỹ ag tóg jagtar nỹtĩ, ũn e tag ag,” he mũ. “Kurã tãgtũ han ag tóg huri ẽg mré. Hã ra ag tóg ver vẽjẽn vég tũ nĩ. Kỹ tóg sỹ ag jẽg tũ ra ag jẽgnẽ jãvãnh tĩ, ag jamã ra. Ag mũn kỹ ũ ag hỹn kãgter ke mũ, kókĩnkĩr kỹ,” he tóg.
Kỹ ti mré mũ tĩ ag tóg ti mỹ: “ki tóg ẽmã tũ nĩ, ki tóg ga kórég nĩ,” he mũ. “Ẽg hỹn hẽ tá vẽjẽn venh mũ, ẽg tỹ ũn e tag ag jẽn jé?“ he ag tóg ti mỹ.
Kỹ Jesus tóg ag mỹ: “ẽmĩ tỹ hẽ ri ke vỹ ki nỹtĩ ge?“ he mũ. Kỹ ag tóg: “ũ tỹ 7 (ke) vẽ, kãkufár pipir ke gé,” he mũ.
Kỹ tóg ũn e ẽn ag mỹ: “nĩgnĩ ra, ga kri,” he mũ. Kỹ tóg ẽmĩ tỹ 7 (ke) mãg mũ, pirã mré, kỹ tóg to Topẽ mré vĩ mũ. Kỹ tóg vẽnh kãkugpãg mũ, ẽmĩ ti. Kỹ tóg ti mré mũ tĩ ag mỹ vin mũ, ag tỹ vẽnh e ẽn ag mỹ kãnhkrén jé. Kỹ ag tóg ko kãn mũ, funfór ag tóg mũ, hã ra tóg kén mũ. Kre tỹ 7 (ke) fãn tóg mũ sir, Jesus mré mũ tĩ ag tỹ génh kỹ. Ũ tỹ ko mũ ag vỹ tỹ ũ tỹ 4 mil (ke) nỹtĩ, ag tãvĩ, ũn tỹtá mré tó tũ, ag krẽ mré tó tũ. Hã ra fag tóg tá e nỹtĩ gé.
Kỹ Jesus tóg ag jẽgnẽg mũ, ag jẽn kar kỹ, ag jamã ra. Kỹ tóg canoa ki rã mũ sir, ẽmã tỹ Magadã tá ga ra tĩg jé, ti mré mũ tĩ ag mré.

සවන් දෙන්න Mateus 15