Lik - 2013 WBT (NT) Non Drama

Lik - 2013 WBT (NT) Drama

Yahudi yala nang Kaplina ati Kwalina sum, el si ara Paskah sum ap, Nena Kum Roti ati Kwalin sum ap, dam ubuk. Yahudi yala nang Allah ati arena deiyok nang ap, Musa sekamuk yupu dobuka peterena deiyok nang ap, anang nirye arye, ‘Yesus optibye,’ tenenmek bukni, weik kwalin sum dam ubukura, ninye weik akunum bulupmek ati ara, ‘Sik anang arye eipsicak’ tenen, ilil ubuk. Ara, ‘Yesus obibipyeura, yuk nang arye wapsicak’ tenen, ilil ubuk. Ilil ubuka ati ara, yuk nang bikina kum ati, ‘Yesus yata wiribibya deice arye duknubuka opnamap do?’ tenenmek.
Ura Yesus wibuka deiamuk nang kan-kan ak bukni, tonoknye el si ara Yudas Iskariot, Isa Mutuku Dongonye arye el kanye talima pum tam wekuk. Wekuka nyapdeibukura, Yudas arye, ‘Anang arye Yesus olyanamak’ tenen, Allah arena ati deiyok nang ap, Yahudi yala nang arye Allah ati arilbalamik aik kaliklamik nang, sik deiyok nang ap, anang sik dam ninye yukulbiyuk.
Ara, ‘Sikce Yesus el ona ati, narye yata wiribuka Yesus dobuka sikti, areptinye do?’ tenen yupu sisikinmek. Nyalilbiyukopura, sik anang arye kanye deibikce, pin-pin ubuk ati, “Winipsiminyopura, yo bok weik arye arepnamkiabe,” nyabik. Nyabikura, Yudas arye, ‘Winipnamne,’ tenebukce, “Yo,” nyabuka ati, ‘Yata teleb lo uplye talak arye, yuk nang arye kum dinmanice talak aryuk, Yesus dobuka anang areptinye do?’ tenelamukce, dinauk ulamuk.

Sik Yahudi yala nang arye Nena Kum Roti deiyok koubuka kwalina sum ara, sik apu yapu Mesir mutuku batakuka binuyik talak ara, domba basam obuka buplan kup-kup tam dana-dana ining likibik ning ati, ‘Tuba tenepnamap’ tenen, asum arye domba basam tonok obuka Allah ati arilamik. Adomba basam el si ara Kaplina Domba nyalamik.
Winilamika ati, Nena Kum Roti deiyok koubuka kwalina sum deice arye, Yesus el mapu bitinye nang, Yohanes ap, Peterus ap ati, ayupu nyabuk. “Kaplina ati Kwalina nun nirya neika dipnamap ati, kintinilbisururume,” nyabuk. Nyabukura, sik bitinye arye Yesus ati asipderik. “Anda, Kaplina ati Kwalina ati kwalina ning dipnalam ning ara, dan aik kintinilbinunam do?” nyabuka asipderik. Asipderikura, Yesus arye el mapu bitinye nang ati, ayupu nyabuk.
Anggun Yerusalem asik dolamicak noutamak birumunye talak, ninye tonok mekwena weik makau takunya deice deibuka bobalibuk eibuka eibdanarurume. Eipdamunyopura, el aminyan tam birumunce, el weknulye aik wekuka, anyaik deiyoknye ati asipdenururume. “Nun Peterena deiyoknye birye asipdenmakile. ‘Na ap, na mapu ap, Kaplina Kwalina ati, kwalin ning dipnamap ati, an ninye asik nang wekce aik ara dan do?’ nyabuka asipdenamrurume.”
Asipderumunyeura, anye birye el ninye asik nang bun aik laka nyapnamsile. Anyaik, deice, pala lilibuka dobik aik deice alip aik ara, nun unamap ap, din ning dipnamapak ap, kintinipdeipmace ning ara, anggunce eipnamrurume. Anyaik pum nun Kaplina ati Kwalina dipnamap ning ara, kintinipnamrurume. Yesus arye el mapu bitinye nang ati nyabuk.
Nyabukura, abitinye nang arye Yerusalem mutuku birikce, Yesus nyapdeipmok ning atonun ubuk ati, eiprikopura, Kaplina ati Kwalina ati dipnamek ning kintinibuka deiprik. Awinin marikura, sik din dipnamek keting akunum ubuk ati Yesus ap, elce wibuka deibuk mapu, sik taku barye 10 Rasul nang ap, Yerusalem mutuku yayik. Yayikce, sik din ning kintinibuka deipmekak, alip aik bukuka, din dinmek talak ara, Yesus arye el mapu 12 nang ati, ayupu nyabuk. “Na kanye imun min kum upmanilye talak, na ap, anggun ap neika, Kaplina ati Kwalina dina ati pia patalamnuk.
Ara talye ati kum nyapsine. Na dipkoprop nyapsine. Atalak arye dipdongobuka dotalak nirya ara, Kaplina ati Kwalina tonap kum dinamne. Winibuka daulamnye ani, Allah ninye weik lyeplirye, sik ap, aning-aning nirya ap talinamle talak, Kaplina ati Kwalina dilamice deiyok sirya daklirye, lak upnamle talakuk, na ila tonap dipnamne.” Yesus arye nyabuk.
Aminyan ara, Yesus arye anggur mek makau kwebuka, tonok kintinipdeipmek ning dobuka Allah ati, “Telebe,” nyabukopura, el mapu nirya ati nyabuk. “Amek makau dobuka arepdanin bamunce diplulume,” nyabuka aribukura, amakau tonok arye dipra banmek. Sik amek dipnuyik talak ara, ayupu ton nyabuk. “Anggun yuk anggur mek dipnulum bukni, nara atalak arye dipdongobuka, dotalak nirya anggur mek ton pia kum dinamne bukni, daulamnye ani, Allah arye ninye weik ap, aning-aning nirya ap talinamle talak akunum uplyopura, tonap anggur mek dipnamne,” Yesus arye nyabuk.
Nena Kum Roti dipnuyik talak ara, Yesus arye aroti dobuka Allah ati, “Telebe,” nyabukopura aroti tobuka, el mapu ati bokuka arinmokce ayupu nyanmok. “Anggun lyena ati na nong arepnamne touk, aroti ara, na nong atonun ati arepsine. Dobuka diplulume. Anyaripmasin roti ara, ‘Na nong tenebuka dinamlum’ tenen, arepmasina ati, dobuka diplulume,” nyabuk.
Aning winibuk touk, sik din ning dibuka dakalongoyikura, anggur mek makau arye kwebuka dobukce, ayupu nyabuk.
“Amek ara, na ining atonun ulule. Na ining deice arye, winiryuk nyalin yupu nyapdeipsine. Bukni, minop talak ara, Allah arye nyalilamsuk ning ara, akunum punuple. Winiryuk nyapdeipsin yupu ara, minop talak nyalin yupu akunum punupmale. Ara anggun ap, ninye mutuku-mutuku nirya ap ati, opnikceura, na ining saklya deice arye, Allah arye sik malye winin ning namin kiplirye, kum danipnamle. Ninye weik lyeplirye, sik kanye talima pia talinamle.
Bukni, minop talak nyalilamsuk touk kume. Wini talak Allah nyalisilye yupu yuk ulule. Ara, wini talak babye, aminyan talak babye, na ining deice arye ninye malye winin ning kum danipnamle. Ara, ninye weik lyena yupu ati, winiryuk nyalilye ning nyapne,” Yesus arye nyabuk. (Ara, “Ninye mutuku-mutuku nirya noutamak, kili sal weik, sik malye ulamice ning ap, malye tenelamak ning ap ati, kum daneipnirye na ining arye lyepnamne.” Yesus arye nyabuk.) Nyabukce, ayupu tonap nyabuk.
“Bukni, na ap bukmapce, din dinmalum nang kankan, tonoknye birye, na opnamaniaka ati, ninye yukulbinule. Allah yupu laka nyalamik nang arye, nati sekamnik touk, nara Ninye Mi Koprop Atonunye opnikceura, dipnamne. Sik laka nyalamnik touk winipnamniak bukni, nara Ninye Mi Koprop Atonunye yukupnamlanye bira, yukupnilibuk opnicopura, Allah arye anye bira, weika arye wenebuka opnamle ati, elda pia bicoe,” Yesus arye nyabuk.
Yesus arye nyabukura, sik kekebikce, sik bidamang nanguk asipdayikce, “Yesus opnamaka ati, yukupnamlanye bira, yatanye do?” nyabuka asildanmek. Tonda, sik nyabuk yupu nyanmek talak ara, ‘Nun awekmap nang kankan noutamak arye, yatanye erebuka, nun deiyoknye akunum unamsil do?’ tenenmekce, yupu nyaldanmek.
Utenebuka nyaldanmekura, Yesus arye el mapu obarye 12 nang nirya ati bulub deibukce ayupu nyabuk. “Yahudi yala kum nang arye, ‘Nun deiyok nang ani,’ tenenyak nang ara, adeiyok nang arye sik amu tam nang ati, yu uplibuk anang yanibikirye, sik nong deice ikin ning deilinyake. Tonda, sik sisinanye nang, deice tam unyakce, sik amu tam nang ati, kanye imun ning sik nong deice delinyakbuk, sikce sik bidamang ati, ‘Nunda teleb nang arye, nun amu tam nang ati melinyabe,’ tenebuka talye yupu nyaltakanyake.” Yesus arye nyabuk. Nyabukce, ayupu ton dukdongobuka nyabuk.
Sik anang ara wininyak bukni, anggun na mapu ara aning atonun kum wininamlulume. Anggun awekmalum nang noutamak arye, yatanye do, ‘Na teleb deiyoknye unamne’ tenen, deiyoknye atonun uplinye bira, el kayapu amuak buklirye, sik kanye imun uplye ning ati, melinamle. Tonda, sik weiknye unamlanye bira, kanye erena kum arye, adiparyuk, sik amu tam buklirye, sik weit atonun unamle.
Anggun tenelulume. Weik mambulnye bira, danye do? Din ning deibuka dilamakak, ulirye, dilulnye do, din ning kintinibuka arilulnye do? Kume, din ning deibuka dilamakak minopce ulirye, dilulnye bira, weik mambulnye ulule. Bukni, nauk ara, weik mambulnye unyebuk, sik amu tam unirye, din ning kintinibuka arilamak nang atonun kanye lamapdongobuka unune. Anggunda, na ikin ulamnuk talak noutamak nirya, anggun ap melibuka neika banyabe.
Aning ati ara, na ni birye, ‘Aning nirya elce talinamle’ tenen, erepdeipnukce, ninye deiyok kin ning arepnuk touk, narye anggunti, erebuka deipsinyeura, anggunce na tenepse ning talinamlume. Ara, aning arepsinyeura, aning-aning nirya talibuka unamne mutuku ara, na ap, anggun ap, neika bukuka, din ning dibibirye, weik ninye deiyok nang bulamak ning deice bukmunce, Israel ninye 12 yala nang nirya ati, yupu bokolina deiyok nang unamlulume. ‘Wininamlum’ tenen, anggun erebuka deipnamsine. Yesus arye el mapu 12 nang ati nyabuk.
Nyabukopura, Simon Peterus ati ayupu nyabuk. “Simon, Simono, ninye arye deklanye dabikirye, ‘Kala kipman kum dipnuyap’ tenen, malye ning ati kala kokuka batakikirye, duk teleb ninguk dilamak atonun, Simon an babye, Isa Mutuku Dongonye arye, ‘Malye uptu tenen, pia diba tenenamle do, bataknamle do?’ tenen, winilden ning weik winipdenamkile. Winipnamkil bukni, ‘Diba tenebuk ning kum bataknamle’ tenen, Allah moropkise. Amenyan ara, na batak maniminya ani, tuba tamubuka na tam yana kipminyopura, an kayapu, aunmak nang nirya ati, kanye lamabuka yupu nyanamlyame.”
Yesus arye nyabukura, Peterus arye tamubuka nyabuk. “Kume naio, wenena aik dongopniting babye, na opnitinga babye, na kanye ara aning telebuka. Na ap an ap, neika unaname” nyabuk. Nyabukopura, Yesus arye Peterus ati tamubuka nyabuk. “Kao, dipkoprop nyapkine. Alukunyanak buk, min kum berekablye talak, yim ayam min kum kamupmalye talak ara, an babye, like winilye deice arye, ‘Anye Yesus ara, na walwale,’ nyabuka pilipnamanilame,” nyabuk.
Yesus arye nyabukopura, ayupu tonap nyabuk. “Narye dopkwetepsibuk, anggun ‘Na’ tenen ning lilalum baju ap, talye din ning lin aling ap, yan ongona ap, kum bopmancuk, na yupu peterepra balalum talak nirya ara, yata ning ton, tonok ning kum upsukura, patalamsuk do?” Yesus arye asipdeyukura, sikce tamubuka, “Nunda aning-aning nirya ara, min kum uamuka ati, kum patalamsuke,” nyabik.
Nyabikura, Yesus arye tamubuka nyabuk. “Unamlum bukni, wini talak ara, yuk ning nyapnusine. Anggun na tenen ning lin aling ap, talye din ning lin aling ap, awaplyopura, aning dobuka peterepra banamlulume. ‘Nun aruksilyak’ tenen, bupu kina ati, deice tam ongon baju ara, ‘Aning ara, weik mambul,’ tenelulum bukni, aongon baju dobuka, yo bok dekmunce, ayo bok dobuka parang ya uk dekelbinululume. Ara, yata ning do nirya min arye, ‘Aning mambul,’ tenelamlum ning nirya ara, ‘Aning mambul,’ tenena kum, batakmunce, dipkoprop weik mambul ninguk kintinipnamlulume. Amenyan ara, kanye imun ning, pia weik yanamle atia.” Yesus arye nyabuk.
Nyabukce, ayupu ton nyabuk. “Na dipkoprop nyapsine. Allah yupu laka nyalamik nang, nabi nang arye, nyalilamnik touk, ‘Anye bira, pia malye unanye,’ tenebikirye, dipkoprop malye un nang ap, neika dobuka opnamake. Aning nyapmasin tok, Allah yupu laka nyalamik nang, nabi nang arye, ‘Winipnamle,’ nyabuka sekeiyamnik tok, dipkoprop upnamnile. Aning nirya sirya dakna talak akunum dam uple,” Yesus arye nyabuk.
Nyabukura, el mapu obarye 12 nang arye, ‘Deiyok ani’ tenen, bita bikna kum ubik ati, sikce tamubuka nyabik. “Nai, dipdelyame. Nun parang ya bitinye kintinipmap ara ani,” nyabik. Nyabikura, Yesus arye tamubuka, “Aning ara, akunuma,” nyabuk.

Yesus arye nyabukopura, el ap, el mapu ap, sikce asum-asum nirya winilamik touk alip aik Yerusalem mutuku sik bukmek aik batakuka, banmeka ani, Zaitun mutuku dup biyik. Zaitun mutuku dup welebuka biyikce, Yesus el mapu 12 nang ati nyabuk. “Anggun abukapmunye talak arye, na yukak Allah morolbinune anye arye, ‘Isa Mutuku Dongonye arye anggun kanye talima pum tam weklirye, malye updeipsilyak’ tenen ati, Allah moronululume,” nyabuk. Nyabukopura, sikda asukumuk unmekbuk, el mitikto yukak biyukce, gutam tuku deice dipdongobuka Allah morobuk. Moronmok talak ara, ayupu nyanmok. “Naio, na opnamaniyak talak ikin upnilibuk, donmanya dipnaman ning ara, ‘Ance lyepnutumura, aning kum winipnamniak’ tenen, moronmakine. Bukni, na patanmanil ati tenenman ninguk kume. An minop arye tenelamnuluma atonunuk winipnilyame,” Yesus arye nyabuka moronmok.
Allah morobuk talak noutam ara, ‘Opnikceura, dipnaman ning ara, Allah arye lyepnutuura, kum diptinye’ tenen, pia ikin kanye bobuka, Allah moronmok. Wininmok akarye, Allah moronmok talak ara, malaikat im deice talye karin arye tikilyayukce, Yesus el kanye talima melibuk. El opnamik ning ati, kanye imun upmokce, malye kanye bobuka, mikip arye Allah moronmokura, el nong mek bongobukce, mek tuku deice sakanmok ning ara, ninye opdakceura, ining weik balamle touk, nong mek weik bongobukce sakanmok.
Yesus arye Allah moronmoka ani, sirya dakukura, el mapu unmekak tamubuka binuka dinmokbuk, ‘Nun ni Yesus obiceura, dipnamale,’ tenenmeka ati, bouku sukun mok ati sik nong mitang upmoka ati manauk manmekak eibuk. Eibukce, el mapu ati ayupu nyabuk. “Anggun mapmaluma ara, yata ati do? Anggunda buklulume. Isa Mutuku Dongonye arye talima pum tam weksilirye, ‘Nun malye ubibyak’ tenen, kanye wisipdopmunce Allah moronauk unamalulume.” Yesus arye el mapu ati nyabuk.

Yesus arye ayupu tuba nyanmok talak ara, Yesus arye wipdeiyamuk nang sik 12 nang kan-kan bukni, anye el si Yudas menekmokura, Yesus el tapu kupnamek nang weik arye aminyan yanganmek. Yanganmekura, Yudas arye, ‘Yesus mutupnun’ tenen, el dam tikilyayukura, Yesus arye Yudas ati asipdeyuk. “Yudaso, nara Ninye Mi Koprop Atonunye ati, tenepnilamce, ‘Mutuna deice arye yukupnaman’ tenen, yanmanilama ara, yata ati do?” Yesus arye nyabuk. Yesus el mapu arye, ‘Anang ara, Yesus tapu kupnuyaka ati, yanganmaka,’ tenebuka bikikce, Yesus ati nyabik. “Naio, nun parang ya dobuka, anang opnuyap do?” nyabuka asipdeyik.
Asinmek talak ara, Yesus el mapu kan-kan arye tonoknye el parang ya doprakuka, Allah arena deiyok nang, sik weik deiyoknye, anye el amu tam pil melinanye, el amul sirik tam ning takipkwetebuk. Takipkwetebukura, Yesus arye, “Akunum bataklyame, akunuma,” nyabuka yupu sekuk. Nyabukopura, amul takipkwetepmoka, ara morupdongbukce kwetebukura, min arye yum uamuk touk ubuk.
Atalak ara, Yahudi yala nang sik Allah arena ati deiyok nang ap, Allah arilbalamik aik kalikin nang, sik deiyok nang ap, Allah arena ati deiyok nang ap, sik Yahudi yala nang yuk deiyok wisi nang ap ara, ‘Yesus tapu kupnuyap’ tenen, yanmek nang ati, Yesus arye nyabuk. “Anango, anggunce nati, ‘Amutuku talinyak nang opbisipnamle ati, el deiyok koubuka el mapu bobinmale,’ tenepmanulumce parang ya ap, ninye on yo kama ap, dobuka tomolyanmanulum do? Asum-asum nirya, Allah ati arilulum aik dam peterelamsi bukni, kum tomamnulume. Ara, Allah arye tenyamnuk touk, winipnula ati, isa el mikip deice pil donmasil talak aryuk winipnamanulume.” Yesus arye el tomolyanmek nang ati nyabuk.

Yesus arye nyabukopura, Yesus adiparyuk talibik. Talibikce, tomobuka Allah arena ati, weik deiyoknye el aik bobiyik. Yesus bobanmek talak ara, Peterus arye aminyan dipnin banmok. Yesus min bobanmekopura, Peterus ara, aminyan Allah arena ati weik deiyoknye, el asik dam yayukce, yin talin nang uku sekuka peikinmekak yanuka bukuk. Bukukce, el babye, uku peikinmok. Peterus uku peikinmok talak ara, anyaik weik deiyoknye, el pil melibuka dolamuk kil tonok, Peterus unmokak yanuka dinmok.
Yayukopura, Peterus uku peikinmok ati, akil arye Peterus dinmokce, el urasin ati maka meinmok. Dipdeyukce, ‘Anye bira, Yesus el melinanye, akunuma,’ tonok arye ayupu nyabuk. “Anye ap, aNasaretnye ap, neika ulamrike,” nyabuk. Nyabukura, Peterus arye tamubuka akil ati nyabuk. “Anyapmanilamnye bira, na walwale,” nyabuka pilibuk.
Daunmeka ani, mitik yuk talak yuknye ton eibukce, Peterus ati ayupu nyabuk. “Anda, aNasaretnye el melibuka ulamik nang ap, ulamlumnye, an abukmalame,” nyabuk. Nyabukura, Peterus ayupu kekebukce, “Na kume. Anye bira, na walwale,” nyabuka duknubuk. Duknubukura, sik nirya daunmeka ani, Peterus ap tikmek nang kan-kan tonoknye birye, Peterus ati, elce tonap nyabuk. “Anda, Galilea tam ulyamnye ati, anye bira el melibuka balamlumnye bira, an akunuma,” nyabuk. Nyabuk bukni, Peterus yupu mikip arye tonap nyabuk. “Anyapmanulumnye bira, dipkoprop pia na walwale,” nyabuk. Peterus el ayupu tuba nyanmok talak ara, adiparyuk yim ayam arye, kamubuk.
Ayam yupu nyabukopura, adiparyuk, Yesus arye Peterus ati dinmokba Peterus arye, Yesus mince nyapmok yupu ara, ila tonap tenebuk. Tenebukce, “Se, Yesus arye, ‘Yim ayam like bitinye min kum kamupmalye talak, anye bira na walwale,’ nyabuka, like winilye deice arye pilipnamanilame,” nyapmanu touk, ‘Na akunum winipne,’ tenebuk. Utenebukce, buru tam binuka el kanye talima pia ikin ubukura, weik arye engenmok.

Aminyan ara, ‘Yesus ati bilyak’ tenen, Yesus ati, kalikinmek yin talin nang arye, nalinmekce sik taruk pinin arye, Yesus el nong deice sibuka onmek. Ton nang arye, Yesus el asing, cang kain arye kitibuka lilipdongopmekce, taruk pinin arye onmek talak ara, Yesus ati ayupu nyanmek. “Allah yupu ap, Allah arye aminyan winipnamle ning ap, laka nyananye nabi ninye ulyama anye arye, laka nyapsilyame. Allah yupu laka nyananye ulyama anye arye, yatanye birye, el taruk arye onmakil do?” Nyanmek. Tonda ayupu atonun yupu weik arye, tonap nyanmekce, Yesus ati, malye yupu nyabuka nalinmek.

Sik winipmekce daunmeka ani, berekukopura, sik Yahudi yala nang, sik weik deiyok nang ap, Allah arena ati weik deiyok nang ap, Musa sekamuk yupu peterena ati deiyok nang ap, ‘Nun nirya arye yupu sisikibirye, Yesus yupu bokipnuyap’ tenen, bulupmek. Bulupmeka ati, yuk nang arye, Yesus dobuka anang dam bobiyik. Bobiyikura, anang arye Yesus ati asipdeyik. “Anda, nyapsilyame. Allah arye wibuka dopkwetebukura, ninye weik lyeplirye, pia talinamsilamnye, Mesias ara, an aulyam do, kum do?” nyabuka asipdeyik. Asipdeyikura, Yesus arye, “Asipdenulum ning ara, nyapsitinye babye, diba kum tenepnamanulume.
Tonda, ‘Nara, Ninye Lyena Deiyoknye, Mesiasnye unun do, kum do?’ nyabuka asipdesitinye babye, anggunce tamubuka kum nyapnamanulume. Bukni, na dipkoprop nyapsine. Atalak arye dipdongobuka, dotalak nirya ara, nara Ninye Mi Koprop Atonunye, Allah el pia Mikipnye birye ereipnilyopura, el sirik taruk tam arye, aning-aning nirya talibuka pia unamne.” Yesus arye nyabuk.
Nyabukopura, sik nirye arye Yesus ati asipdeyik. “Aning ati ara, anda, Allah el Mi Koprop ulyam do, kum do?” nyabuka asipdeyik. Asipdeyikura, Yesus arye tamubuka, “Anggunda dipkoprop nyanmalume, nara Allah el Mi Koprop unun ani,” nyabuk. Nyabukura, sik nirye arye nyabik. “Kume, yuk nang arye tonap nyapnukiak yupu ara, nun patana kume. El bidamnye arye, ‘Allah el Mi Koprop unune,’ nyapmasil anyak, kekepmapa ati, aning ara, akunuma. Ayupu nyapmala deice arye opnamabe,” nyabik.

සවන් දෙන්න Lukas 22