If you would like a copy of this version please contact info@davaraudiobibles.org

Ladakhi New Testament, CC-BY-SA-4.0, The Love Fellowship. Ladakhi New Testament Audio Bible, CC-BY-SA-4.0, Davar Partners International, The Love Fellowship, 2022.

Ladakhi New Testament

Ladakhi Bible by The Love Fellowship is licensed under Creative Commons Attribution-ShareAlike 4.0 License.

تینّا توسلا کالون ہیرودِیس لا حضرت عیسیٰ مسیح چھاگلاسگونّی سکورلا تشورتے کھوے، کھوا کھادا تانگکھانگونلا زیرس، ”ای میبو غوتا سالکھان حضرت یُوؔحنّا ٰ اینوگ، کھونگ شیکھانگونّی ٹونے سونتیا لانّگا زاد پاسانگ کھونّگا کھیود یودتے اینوگ۔“
ہیرودِیسی حضرت یُوؔحنّا ٰ زومستے لچاگتھاگا تاگستے تسونکھانّگا کاگچوگستے اِنپین۔ کھوے تیبو کھورانگی فونو فِلپُسی ناما ہیرودیاسی پھیا چوس، چیازیرنا یوحنّانی ہیرودالا مولّادپین، ” کھیرانگی فونو سی ناما نیامپو ناما چوچیسپو خُدے شریعتی گیابگال اینوگ۔“ ہیرودالا حضرت یُوؔحنّا ٰ سادنیین یودپین، اِین نانگ میتشوگسلا جیگسّادپین چیازیرنا کھونگونی حضرت یُوؔحنّا ٰ پیغمبر سیادپین۔
اِین نانگ ہیرودِیس سکییجاگی جاگّا، ڈونپوگونّی لدُونلا ہیرودیاسی بوموے سیستانگتے ہیرودِیس ثانٹے تھاد چوگسپا، کھوے بوموا چی گوسنانگ تانگین زیرتے نا کھورس۔ بوموے امے زیرکھان نانگجین، ”نگا غوتا سالکھان یوحنّانی گو تھالّیجیکّیکا سال“ زیرس۔ گیالپو تشیر اِین نانگ ڈونپوگونّی لدُونلا ناکھورکھانبوے جاستے بوموا گوسکھانبو تونگ زیرتے کا تانگس۔ تینے تسونکھانگی نانّگا یوحنّانی گو چادتے تھالّیکا کھیونگستے ہیروداسّی بوموا تانگس۔ بوموے تیبو کھورانگی اما یودسا کھونگس۔ یوحنّانی لوبٹوگسگون یونگستے کھونگی جنازہ بو کھیرتے سوبس۔ تینے کھونگون سونگتے حضرت عیسیٰ سی شادس۔

حضرت عیسیٰ مسیح تے چونگکھانبو سانّاچیگ کھونگرانگی لوبٹوگسگون نیامپو ٹُھوزینگجیکّی نانّگا ژونتے سوانگ میدسے ناسّاجیکّا سکیودس۔ میتشوگسّی تیبو تشورّاچیگ ڈونگکھیرگونّے بینگتے حضرت عیسیٰ سی سکیودسے ناسّا ڈولتے سونگ۔ ٹُھوزینگنے بابستے حضرت عیسیٰ سی میتشوگس چھینمو زیگسّاچیگ، کھونّگا کھونگّونّیکا سنینگرجے سکییا زادتے نادپاگون گیالچوگّا زادس۔
نییما نوب زانے لوبٹوگسگون کھونگ یودسا یونگستے زیرس، ”گامیولگونلا سونگتے کھورانگونّی پھیا زان نیوچیسلا میتشوگسپو لامچوگا زادّانگ چیازیرنا نگاتانگون چانگ میدسے ریستونگی نانّگا اینوگ یانگ مونچوانگ روبکییس دوگ۔“
حضرت عیسیٰ سی لانسالس، ”کھونگون چھاگوس مید۔ کھیوجے کھونگونلا زاچیس تونگ۔“
کھونگونی زیرس، ”نگاجے لاگا تاگی ثنا تانگ نیا نیس مانے مید۔“
حضرت عیسیٰ سی مولس ”تیگون نگیکا کھیونگ۔“ تینے میتشوگسپوا سیکا دوگچیسلا مولس۔ تاگی ثنا تانگ نیا نیسپو چھاگّا نامس یانگ نامکھا زیگستے خُدا شُکر جْوس ، تاگی چاگستے میتشوگسلا گوچیسّی پھیا لوبٹوگس گونلا سالّا زادس۔ کھونگ تشانگما ڈانگس ڈانگس زوس یانگ لوبٹوگسگونّی لاگلوسگون لدوسپا پاگتسے چوگنییس گانگ۔ بومو تانگ ٹھوگوگون ماتھیا ستونگ ثنا زامشیگ تیرو زان زاکھان یودپین۔

تینّامالّا حضرت عیسیٰ مسیح میتشوگسپو لوگستے لامچوگا زاد زانے کھونگی لوبٹوگسگون کھونگرانگی سانگ سنگونلا ٹُھوزینگی نانّگا تشوے چھوگسلا لامچوگا زادس۔ میتشوگس لوگتے لامچوگ تشارّاچیگ حضرت عیسیٰ سی چیگپو ریکا دُعا جوا سکیودس۔ کھونگ تیرو چیگپو یودی توس مونچوروب۔
تینّا توسلا ٹُھوزینگبو ساکیادنے تھاگرینّگا لیبتے یود زانے، گولوگ چھوگسنے لونگسپو ٹاگپو یونگسپا چھولباگ ٹُھوزینگا گیابس۔ ہالام نگاتوگ چھوتشود سومپاجیکّیکا حضرت عیسیٰ سی تشوے کانے ڈولین لوبٹوگسگون یودسا سکیود۔ لوبٹوگسگونّی کھونگ تشوے کانے جابڈُولّا سکیودین تھونّگاچیگ ماثانٹے جیگستے، کُوچو تانگین، ”شینڈے اینوگ“ زیرس۔
اِین نانگ تینّامالّا حضرت عیسیٰ سی کھونگونلا مولس، ”جیگس ماجیگس نگا این۔ ہامپا چوس۔“
حضرت پطرؔس سی لانتانگس، ”مسیح نیرانگ اینّا نگا چھویکا ڈولتے نیرانگ یودسا یونگ مولّانگ۔“
حضرت عیسیٰ، ”یونگ“ مولس۔
حضرت پطرؔس ٹُھوزینگنے بابستے چھویکا ڈولین حضرت عیسیٰ سی یودسا سونگ۔ اِین نانگ لونگسپو ثانٹے تانگ چھولباگ تھونّگاچیگ کھو جیگس یانگ نوبچیس گوزوگپا کُوچو تانگستے زیرس، ”مسیح لے، نگا سکیوبّا زاد۔“
تینّامالّا حضرت عیسیٰ سی چھاگ کیانّگا زادتے کھو زومس، ”ایمان چھونگون یودکھان کھیرانگی تھےژومس چیا چواد“ مولس۔
کھونگ نیسکو ٹُھوزینگی نانّگا ژونّاچیگ لونگسپوبو چھاد۔ ٹُھوزینگی نانّگا یودکھانگونّی کھونّگا چولین زیرس، ”لدینبا، نیرانگ خُدےبوژا اینوگ۔“
کھونگون تشوے چھوگسلا سکیودس یانگ چھوی تھاما گنّیسرت ڈونگکھیرلا لیب۔ تے ڈونگکھیرپاگونّی حضرت عیسیٰ سی اینکھانبو نگوشیسپا نییکھورّی ناسّا تشانگمالا حضرت عیسیٰ سی سکیودتے دوگ زیرتے لون کالس۔ میگونّی زُومو یودکھان تشانگما کھونگ یودسا کھیونگس۔ کھونگونی زُومو یودکھانگونلا حضرت عیسیٰ سی نامزے ٹُوجیکّا لاگپا سے چوگّا زادچیسلا جوجو زیرین جُووا پھولس، یانگ کھونگی نامزا لاگپا سیکھان تشانگما پھان۔

සවන් දෙන්න مادتھا 14