Text: © Wycliffe India Audio: ℗ Hosanna 2024 and WPT

Pangwali 2023 WBT (NT) Drama

“अपफ हेरी बिशे! तुस मेह्‍णु हरालण जे धरमे कम न करे। न त तुसी अपु स्वर्गे बोउ केआं कोई फल न मेता। तोउं त, जपल बि तुस केस गरीब कें धे दान दियेल त सोबी जे प्रचार न करे, जीं कपटी मेह्‍णु अराधनालय, ग्राओंट अन्तर त दुआरोड़ी कते, ताकि मेह्‍णु तेन्के इज्जत करियेल। अउं तुसी जे बोता कि तढ़ि फल तेन्हि मेई बि गो असा। पर जपल तुस दान करियेल त तुं यक हथे देण, होरे हथ पता न लौता लगो, ताकि तुं दान नियको रेहाल। तोउं तुं स्वर्गे बोउ, जे नियोक कइ सोब किछ हेरता, से तेन्धे तसे फल देन्ता।”


“जपल तुस प्रार्थना करियेल त कपटी के ईं न करे, किस कि से मेह्‍णु हरालण जे अराधनालय त बथ खड़ भोई प्रार्थना करण चहन्ते। अउं बोता कि तेन्हि तसे फल मेई बि गो असा। पर जपल तुस प्रार्थना करियेल त अपु अन्तर घिए, त दुआर बन्न कर कइ अपु बोउ जे प्रार्थना करे। तोउं, तुं बोउ, जे नियोक कइ सोब किछ हेरता तसे फल तुं धे देन्ता। प्रार्थना करणे टेम होरी के ईं बक बक न करण, किस कि से समझते कि सुआ बोलुणे बेलि तेन्के प्रार्थना शुणिन्ति। तोउं त तुस तेन्के ईं ना बणे, किस कि तुं बोउ मगण केआं पेहलाई जाणता कि तुसी केस केस चीजी जरूरत असी।”


तोउं त, तुस ईं प्रार्थना करे।
“ए में बोउआ, तु जे स्वर्ग अन्तर असा;
सम्हाई तें नओं शुचु जाण कइ इज्जत करे।
धरती पुठ तें राज्य एईए,
तें इच्छा जीं स्वर्ग अन्तर पूरी भुन्ति, तिहांणि धरती पुठ बि भुओ लौती।
हें दन भइ रौठि आज हेन्धे दे।
जीं अस अपु कसुरवार माफ कते,
तिहांणि तुस बि हें पाप माफ करे।
होर असी परीक्षा अन्तर ना छड़े,
होर पाप करण केआं त
तेस दुष्ट केआं बचाई रखे।
[किस कि राज करणे हक, सम्हाई शक्ति त महिमा हमेशा तेन्धेरी असी। आमीन]”
“अगर तुस मेह्‍णु के गलती माफ करियेल त तुं स्वर्गे बोउ बि तुसी माफ कता। अगर तुस मेह्‍णु के गलती माफ न करियेल त तुं स्वर्गे बोउ बि तुसी माफ न कता।”

यीशु हउ बोलु, “जपल तुस ब्रत रखियेल त होरे कपटी के ईं मुंह बणाई कइ न रखुंण, किस कि से मेह्‍णु मुंह बणाई रखते ताकि सोबी पता लगियेल कि एन ब्रत रखो असा। अउं तुसी जे बोता कि तेन्हि तसे फल मेई गो असा। पर जपल तुस ब्रत रखियेल त सन्हुण शदाण करे त मगिर जोई तेल लाए, ताकि मेह्‍णु ना, बल्कि तुं स्वर्गे बोउ, जे सोब किछ नियोख कइ हेरता, जाणियेल कि तुसी ब्रत रखो असा त से तुं धे तसे फल देन्ता।”


त यीशु फि बोलुण लगा, “अपु लिए धरती पुठ धन कठा न करे, किस कि इठि कुण लगते, शड़ुआ लगता त चोरी के चोरणे डर रेहन्ता। पर अपु लिए स्वर्ग अन्तर धन कठा करे, जेठि न त कुण लगते, न शड़ुआ लगता, होर न चोरी के चोरणे डर रेहन्ता। किस कि जेठि तें धन असा, तठि तें मन बि लग घेन्ता।”


तोउं यीशु बोलु, “जिसमे दीया टीर भो। तोउं त, अगर तें नजर ठीक असी त तें पूरा जिसम बि टगड़ा भुन्ता। अगर तें नजर बुरी असी त तें पूरा जिसम बि अन्हारा भुन्ता। तोउं त, जे टगड़ियार तोउ अन्तर असी, अगर से अन्हारी भोई घियेल त सच्चे से सुआ अन्हारु भुन्तु।”


“कोई बि मेह्‍णु दुई मालिकी के सेवा न कइ सकता, किस कि से यक जेईं नराज त होर जेईं खुश कता। तिहांणि तुस परमेश्वरे त धने दुहि के सेवा न कइ सकते। त अउं तुसी जे बोता कि अपु प्राणी चिन्ता न करे कि असी की खाण, की पीण, होर असी की डबुण। बोले त धिक रौठि केईआं कि प्राण, होर झिणि केईआं कि जिसम बध कइ नेईं ना? हेरे, चड़ी चखुरु हेरे! से न त बांते, होर न लुणते, होर न से केंचार अन्तर किठेरते। तोउं बि तुं स्वर्गे बोउ तेन्हि रज्जि खिलान्ता। त कि तुस तेन्हि केआं बि बध नेईं ना?”
“तुसी अन्तर कि कोउं ईं असा ना जे चिन्ता कर कइ यक पल बि अपु उमर बधाई सकता? अपु झिणि लिए किस चिन्ता कते? धारे फियुड़ हेरे कि से कीं बोडीन्‍ते; से न मेहनत कते, होर न कातते। अउं त बोता कि तोउं बि राजा सुलैमाने अपु सम्हाई अमीरी जुए बि एन्हि धारे फियुड़ के ईं अब्बल झिणे लाई ना बटे। तोउं त, परमेश्वर घास जे, जे आज असु त शुई फुकी घेन्तु अगर अतु अब्बल सजान्‍ता त ए कमजोर विश्वासी! से तुसी तढ़िया बध कइ न डबान्‍ता ना? तोउं त तुस ईं चिन्ता न करे कि असी की खाण, की पीण या की लाण? किस कि अविश्वासी मेह्‍णु ईं अस चीजी तलाश अन्तर रेहन्ते। पर तुं स्वर्गे बोउ जाणता कि तुसी इन्हि सोब चीजी के जरूरत असी। तोउं त, तुस पेहले परमेश्वरे राज्य त तसे इच्छा तोपीण दिए। तोउं ए सोब चीज बि तुसी मेई घेन्ति। त तुस शुकुण चिन्ता न करे; किस कि शुकणे रोज अपु चिन्ता अपफ कता। आजे लिए आजकणे चिन्ता रज्जि असी।”

සවන් දෙන්න मत्ती 6