If you have would like a copy of this version please contact info@davarpartners.org

Text: Ahirani New Testament, CC-BY-SA-4.0, The Love Fellowship. -- Audio: Ahirani New Testament Audio Bible, CC-BY-SA-4.0, Davar Partners International, The Love Fellowship, 2022

Ahirani New Testament

Ahirani Bible (आहिराणी) by The Love Fellowship is licensed under Creative Commons Attribution-ShareAlike 4.0 License.

येशु ह्या लोक समुदाय ले देखीसन डोंगर ना किनारा वर थोळा वरला कळे ग्या, आणि जव बठी ग्या, त येशु ना शिष्य तेना जोळे उनात. आणि येशु नि तेस्ले शिकाळाले चालू कर.


“धन्य शेतस ज्या वाटस कि तेस्ले परमेश्वर नि गरज शे, कारण कि स्वर्ग ना राज्य तेस्ना शे. धन्य शे त्या, ज्या दुख करतस, कारण कि परमेश्वर तेस्ले सांत्वना दिन. धन्य शे त्या, ज्या नम्र शेत, कारण कि परमेश्वर तेस्ले ती पृथ्वी दिन जी तो परत बनाईन. धन्य शे त्या, ज्या धार्मिकता ना जीवन जगानी खरी ईछ्या ठेवतस, कारण कि परमेश्वर तेस्ले तृप्त करीन. धन्य शे त्या, जे दयाळू शेत, कारण कि परमेश्वर तेस्ना वर दयावान हुईन. धन्य शे त्या, जेस्ना मन युध्द शे, कारण कि त्या परमेश्वर ले देखतीन. धन्य शे त्या, ज्या मेल करावणारा शे, कारण कि त्या परमेश्वर ना संतान सांगावतीन. धन्य शे त्या, जेस्ना धार्मिक जीवन जगा मुळे छळ होस, कारण स्वर्ग ना राज्य तेस्ना शे. धन्य शे तुमी, जव तुमले मना शिष्य होवाना मुळे लोक तुमनी निंदा करो आणि त्रास देवोत आणि खोट बोलीसन तुमना विरुद्ध मा सर्वा प्रकार ना वाईट गोष्ट सांगतीन.” आनंद आणि गैरी खुशी करज्यात, कारण कि तुमना साठे स्वर्ग मा मोठा ईनाम शे. जस कि तेस्नी त्या भविष्यवक्तास्ले ज्या गैरा पहिले होतात, ह्याच प्रमाणे छळ करेल होता.


तुमी ह्या जग ना लोकस साठे मीठ सारखा शेतस, पण कदी मीठ ना स्वाद खराब हुई जास, त परत कसा कणच तेले चवदार बनावू नई सकतस. मंग तो कोणताच काम ना नई, फक्त एना कि बाहेर फेकामा आणि माणसस्ना पाय खाले चेन्दामा येवो. तुमी पुरा जग ना साठे उजाया सारखा शेतस. जो नगर डोंगर वर बसेल शे ते दपू सकत नई. आणि लोक दिवाले पेटाळीसन तेले एक कटोरा ना खाले नई ठेवस, पण तेले दिवठणीवर ठेवतस, तव तेना कण घर मधला सर्वा लोकस्ले उजाय भिळस. त्या प्रकारे तुमना उजाया लोकस्ना मा समोर चमको कि त्या तुमना चांगला कामस्ले देखीसन तुमना बाप नि जो स्वर्ग मा शे तेना गौरव करो.

हय नका समजा कि मी मोशे ना नियम आणि भविष्यवक्तास्ना पुस्तक ज्या तेस्नी लिखेल होतात, रद्द कराले नयी पण पुरा कराले एयेल शे. मी तुमले खरज-खरज सांगस कि, एक दिन, आकाश आणि पृथ्वी नष्ट हुई जाईन. पण जठलोंग त्या शेतस, त परमेश्वर ना पुस्तक बी राहीन, येणा मधून धाकली तून धाकली गोष्ट टई नई सकाव, परमेश्वर ना पुस्तक तठलोंग राहीन, जठलोंग तेना मधून सर्व काही पूर नई हुई जात. एनासाठे जो कोणी हय धाकल्या-धाकल्या आज्ञा मधून कोणीही एक आज्ञा ले नई माणस, आणि तसच लोकस्ले शिकाळस तो स्वर्ग ना राज्य मा सर्वास्तून धाकला सांगामा ईन पण जो कोणी या आज्ञा ना पालन करीन आणि तेले शिकाळीन तोच स्वर्ग ना राज्य मा महान सांगामा ईन. मी तुमले खरज-खरज सांगस, कि जर तुमनी धार्मिकता, मोशे ना नियमले शिकाळनारा शिक्षक आणि परूशी लोक नि धार्मिकता तून वाढविसन नई शे, त तुमी स्वर्ग ना राज्य मा प्रवेश नई करिसकाव.

तुमी आयकी लीयेल शे, कि परमेश्वर नि आमना पूर्वजस्ले सांगामा एयेल होत, कि खून नका करज्यात, जो कोणी खून करीन तो त न्यायसभा मा दंड ना योग्य ठरीन. पण मी तुमले हय सांगस कि जो कोणी आपला भावू वर रागे भरीन, तेले न्यायसभा मा दंड दिन, आणि जो कोणी आपला भाऊ ले रिकामा सांगीन, तो महासभा मा दंड ना पात्र ठरीन, आणि जो कोणी सांगीन अरे मूर्ख तो नरक ना आग मा दंड ना पात्र बनीन. एनासाठे कदी तू वेदी वर परमेश्वर ले आपली भेट चळावनार शे, आणि तठे तुले आठवण एस कि तुना भावू ना मन मा तुना विरुद्ध काही शे. त आपली भेट वेदी ना समोर सोळी दे, आणि जायसन पयले आपला भाऊ संगे समजोता करी ले, मंग ईसन आपली भेट परमेश्वर ले चळाव. जठलोंग तू आपला विरोधी बराबर रस्ता वर शे तेनाशी फटकामा सहमती कर अस नई होवाव कि विरोधी तुले न्यायाधीश ना हात मा सोपीन, आणि न्यायधीश तुले शिपाईस्ले सोपीन आणि तुले बंदीगृह मा टाकामा येवो. मी तुले खर सांगस. कि जठलोंग तुमी तेना सर्व परत नई दि देतस, जे तुमना वर बाकी शे, तठलोंग तुमी बंदीगृह मधून कदीच नई निंघावत.

तुमले आदन्या माहिती शे जी सांगस, कि व्यभिचार नका करज्यात. पण मी तुमले सांगस कि, कोणी पराई बाई वर वाईट दुष्टी कण देखस तो आपला मन मा तेना संगे व्यभिचारी करी लीयेल शे. जर तुमी पाप करासाठे आपला डोया ना उपयोग कराना विचार मा शेतस त तेले काळीसन फेकी टाक. कारण तुना साठे हयच चांगल शे कि तुना आंग मधून एक नाश हुई जावो आणि तुना पूर्ण शरीर नरक मा जावा पेक्षा वाची जावो. जर तुमी पाप करासाठे आपला हात ले उपयोग कराना विचार मा शेतस, त येले कापी टाक. एक हात ना बिगर स्वर्ग मा प्रवेश करान कठीण लागू सकस, पण दोनी हात ले ठीसन आणि नरक मा प्रवेश करान गैरा वाईट शे.


तुमले आदन्या माहिती शे जी सांगतस, कि “जो कोणी आपली बाई ले फारकती देस मंग तिले सुट पत्र दे.” तुमले माहिती शे, कि जो कोणी आपली बायको ले व्यभिचार शिवाय कोणताही कारण वर फारकती देस तो तिले व्यभिचार करावस, आणि जो कोणी ती सोळेल बाई बराबर लग्न करस, तो व्यभिचार करस.

तुमले माहिती शे, कि परमेश्वर नि आमना पूर्वजस्ले सांगणा, कि खोटी शेप्पत घालू नका पण प्रभु साठे आपली शेप्पत ले पुरी करा. पण मी तुमले हय सांगस कि कव बी शेप्पत नका घालज्यात, नईत स्वर्ग नि, कारण ते परमेश्वर ना सिंहासन शे. नईत धरती नि, कारण कि तो तठे पाय ठेवस, नईत यरूशलेम शहर नि, कारण ते महाराजा ना नगर शे. आपला डोका नि बी शेप्पत घालू नको, कारण तू एक केस ले बी धव्या, आणि नईत काया करू सकस. पण तुमनी गोष्ट हा त हा, व नईत नई ऱ्हास, कारण कि जे काही एनातून जास्त होस ते सैतान पासून होस.


तुमले माहिती शे, कि “मोशे ना नियम मा लिखेल शे, डोया ना बदला मा डोया, आणि दात ना बदला मा दात.” पण मी तुमले हय सांगस, कि जो तुमना संगे वाईट करस, तेना पासून बदला नको लेयज्यात, पण जो कोणी तुना उजवा गाल वर थाप मारस तेना कळे दुसरा बी फिराई द्या. आणि कदी कोणी तुनावर दोष लाईसन तून वरला कपळा लेवान देखस, तेले लांबझगा बी ली लेवू दे. कदी एक शिपाई तुले आपला सामान एक किलोमीटर भर लीजावाले जबरजस्ती करस, त तेले दोन किलोमीटर ली चालना जावा. जो कोणी तुना कळून मांगस, तेले दे, आणि जो तुना कळून उधार मांगस, तेना कळून तोंड नको फिरावू.


तुमी लोकस्ले सांगतांना आयकी लीयेल शेतस, कि मोशे ना नियम मा लिखेल शे, कि आपला शेजारीस्वर प्रेम ठेवा, आणि आपला शत्रू वर व्देष कर. पण मी तुमले हय सांगस, कि आपला शत्रूस्वर प्रेम ठेवा आणि आपले त्रास देणारा साठे बी प्रार्थना करा. जेनाशी तुमी आपला स्वर्गीय बाप ना पोर ठरशान, कारण कि तो आपला सूर्य चांगला आणि वाईट लोकस्वर उगाळस, आणि धर्मी आणि अधर्मी लोकस्वर वर्षा करस. कारण कि जर तुमी आपला वर प्रेम ठेवणारास्वरच प्रेम ठेवश्यात, त परमेश्वर तुमले फय नई देवाव, काय कर लेणारा बी असा करतस? जर तुमी फक्त आपला भावूस्ले नमस्कार करतस, त तुमी कोणता मोठा काम करतस? आठ लोंग कि ज्या परमेश्वर वर विश्वास नई करतस त्या बी असाच करतस. एनासाठे अस पायजे कि असा काम करा कि ते आठे दाखाळोत कि तू सर्वास्वर प्रेम करस, कि तुमी सिद्ध बना जसा तुमना स्वर्गीय बाप सिद्ध शे.

සවන් දෙන්න मत्तय 5