Àsi kwàʼ isusu Sɔndè, bɔ̀ŋ ituʼ ya se chə̀ghə, mə̀yi mbe ya niŋ titeti te ne mbɔb ya tangi ghò atog iseg. Anyumə̀ ne mbi ya pè atog isèg, mbi ya bàd gha mbi fə bəŋi iteg we ne kə̰ ichug iseg chì. Ane, mbi ya nyi nèn inga, chəyi mbi bàri awu ze Anɔŋisəg Yeso. Anug ya chè awɔb. Icheg ne mbi yaya jə̀mə̀, mbi ŋa zə̰, mbaŋà mɔ̀ʼɔ tibe təm iban inɔb tì ndwi fu fu ne njàndi njandi. Mbi ya binde se bɔ, si gùndi itog aseg. Bəd mbe ya ghà inɔb gha, “Aton ne mbə̰ mbe kə̀bə̀ wə̀d zɔm inga iwu bəd àkə gha? Chəyi məd aŋa. Wì fə zwème. Mbə̀ wendi anug ze ne wì ya gha inən anyumə̀ we ne wì ya yaʼi tì inən a Galìli. Wì ya gha, ‹Mbi mənyìʼ nàʼ Ŋwan Wə̀d abə bəd inug tibɔ̀ŋ, mbi kɔ̀mbi aməd igun azed abaʼri, àsi ane ineg itad, wì zwème.›”
Ane, mə̀yi mbe ya wendi ìngam məd. Anyumə̀ ne mbi ya nɔ̀ʼi a atog iseg bə̀ndì, mbi ya mə̀tì inug mbo̰ ijìm abə mə̀mə̀nənùg məd mbe ìghum chɔ̀b imɔʼ fɔrɔ abə mbin tì bəd. Mə̀yi mbe ya mə̀tì anug ne ya du abə bədtɔm Kristo. Mə̀yi mbo̰ yaya Mèri Màdàlen tì Jòwanà fɔrɔ Mèri we ne ya ngɔb wì Jem tì mə̀yi ndəŋ. Chəyi bədtɔm Kristo ya bḛ anug ne mbi ya gha imbə̀ʼ icheg ne ze ya yaʼ icheg anug anen. Pità ya nɔ̀ʼ sḛ, nòrò ghò atog iseg ni nèn. Wì ya pè, gundi nèn, chəyi wì bàd aghi mɔ̀ʼɔ chèyi ane ndwi linèn te ne mbi ya nipi awu ze Yeso inga. Anug ya chè aməd, wì si nɔ̀ʼ bə̀ndì.

Kwàʼ igun aneg ze, mə̀mə̀nənùg məd mɔ̀ʼɔ məbe yaya yḛ̀ ghò inga aben mɔ̀ʼɔ ne ikum ya Emawòs. Emawòs ya icheg mə̀kìlometà ìghum chɔ̀b imɔʼ ni nɔ̀ʼ a Jèrusalèm. Mbi yaya yḛ̀ nè ghàmà mbɔb mbɔb imbə̀ʼ inug ijìm mbe ne dùwə̀. Icheg ne mbi yaya yḛ̀ ne ghàmà inug mbe ane, Yeso ya kɔ̀ti awɔb, mbi se fɔrɔ yḛ̀. Mbi ya jiʼì bàd aməd, si ya gha, aghi mɔ̀ʼɔ ya ghì awɔb gha imbə̀ʼ mbi Kyeri awɔb gha à ya Yeso we yḛ̀ tì inɔb.
Yeso ya si bìri inɔb gha, “Anug ne mbə yḛ̀ nè ghàmà, àkə aghə?”
Mbi ya təm, bɔ, tiwḛ gwì awɔb. Ìwi mɔ̀ʼɔ abɔ̀ʼ inɔb ne ikum məd ya Klopàs ya biri ibo gha, “Àghò kə wə̀d tìsɔ̀ʼ inga Jèrusalèm ne chəyi àghò kyèri inug ni du angu inga ineg mbo̰?”
Yeso ya bìri inɔb gha, “Inug kə mbeg?”
Mbɔb ya ywìtì gha, “Inug imbə̀ʼ Yeso we Nazarèd. Məd yaya kwàʼ Wə̀dkə̀n Ŋwiye. Wì yaya fàʼà àfàʼì Ŋwiye ane ika bə̀ ghàmà tesiʼ imbìghè abə Ŋwiye fɔrɔ abə bəd məjìm. Itog bəd mbàn Ŋwiye fɔrɔ itog bəd inga aben ya gwì aməd nàʼ abə Payilèd gha wì sɔb isaʼi gha mbe zweti. Mbi ya kɔ̀mbì aməd igun azed abaʼri, wì ku. Tì yaya kɔ̀ndɔ gha à ya məd ne biri zeri bəd Izre. Tèchɔ̀ŋ ya ghì ineg itad ne inug mbo̰ du. Ni yeti igun, mə̀yi mɔ̀ʼɔ inga ìwa ifeti ghà anug ne buʼri ibo ina. Mbɔb kə̀ ghò pè atog iseg məd tèchɔ̀ŋ, kwàʼ isusu izimi izimi. Chəyi mbɔb bàri awu məd. Mbɔb bə̀ndì si gha mbe bàd mbè angirə̀ ne ghà inɔb gha məd we izɔm. Ane, bəd mɔ̀ʼɔ abɔ̀ʼ ina kə̀ bə̀ ghò atog iseg məd bə̀ bàd gha chəyi awu məd angu kwàʼ icheg ne mə̀yi mbe kə gha.” Yeso ya ghà inɔb gha, “Mbə̀ kə poʼro anìŋ ane aghə? Ìtən fìŋ kə tùyə anìŋ ni bḛ inug ne bədkə̀n Ŋwiye ya ghàmi imbə̀ʼ aghə? Àkə chəyi Wə̀d we ne Ŋwiye zɔ̀ʼi koʼi ni zən ngəʼ ìzo̰ ijìm bɔŋ nyi inga anug ìfɔ̀n ìzḛzḛ məd?” Wì ya si ko ane mə̀nɔ̀ʼɔ̀ Muse ghò ane ìŋwàʼrì bədkə̀n Ŋwiye tòʼrì inug ijìm ni Ìngam Ŋwiye ya ghàmi imbə̀ʼ aməd. Mbi ya ghò se pè a Emawòs, asiŋi ne mə̀mə̀nənùg mbe yaya ghò angu. Yeso ya si ghì icheg wə̀d ne chè yi che. Si ya gha, mbi ya boʼ ibo ibo, ghà ibo gha, “Ituʼ fə se fḭ̀yḛ, nyùmə̀ fə bə̀ chè, àghò yeʼe tì neg.” Ane, Yeso ya beni abɔ̀ʼ inɔb ghò inɔb achan. Anyumə̀ ne mbi ya chughi aseg ni jəg, Yeso ya niŋ ngə̀ŋ mə̀kara, nàʼ məyakà abə Ŋwiye, si bə̀ʼri, ghàpì tì inɔb. Kwàʼ anyumə̀ we, àzɔb aghə ya fìʼè, mbi si kyèri gha à ya Yeso, wì nim yi. Mbi ya gàd təm, se ghàmà mbɔb mbɔb gha, “Imbə̀ʼ fìŋ ina kə̀ nɔ̀m icheg iywid anyumə̀ ne we kə ghàmà ina, bə̀ tòʼrì Ìngam Ŋwiye ina igun inɔnjì?”
Mbi ya nɔ̀ʼ kwàʼ ati bə̀ndì ghò a Jèrusalèm. Mbi ya pè a angu bàd mə̀mə̀nənùg ìghum chɔ̀b imɔʼ tì bəd ndəŋ ne mbi fete asiŋi afibì. Anyumə̀ ne mbɔb pe mə̀mbin ne ya fete ya ghà inɔb gha, “Anɔŋisəg fə zweme. We chwi ìwi ìfe abə Sayimùn.”
Mə̀mə̀nənùg mbe məbe ne ya bə̀ndì a Emawòs ya si mə̀tì anug ne du inɔb inɔnjì bə̀ mə̀tì icheg ne wì ya bəʼri ngə̀ŋ mə̀kara ghàpì tì inɔb, mbi kə si kyèri gha à ya məd.

Anyumə̀ ne mə̀mə̀nənùg mbe məbe yaya kiri ghàmà inug mbe inɔb, mbi ŋa zə̰, Yeso təm abɔ̀ʼ inɔb, si ghà inɔb gha, “Ŋwiye ziye àbɔrɔ̀bɔd igun inən.”
Mbɔb ya binde, bɔ, nèn gha à ya àziŋ wə̀d. Si ya gha, Yeso ya biri inɔb gha, “Aton ne anug ze chè awən àkə gha?” Wì ya bə̀ ywìrì bìri inɔb gha, “Aton ne mbə̰ mbe jə̀mə̀ inga ìtən fìŋ kə ghà?” Wì ya biri ane, si ghà inɔb gha, “Mbə̀ nḛ ìmbum ibo fɔrɔ ìmbum ighog. Mbə̀ biri bàd gha à ya kwàʼ mo. Mbə̀ bete amə, mbə biri kyeri gha à ya mo imbə̀ʼ icheg ne chəyi àziŋ wə̀d ze bèrè nyàmnyɔd icheg ne mə beri.”
Wì ya ghàm ane, si chwi ìmbi ibo fɔrɔ ìmbi ighog inɔb. À ya anug ne ya ka inɔb ni bḛ. Ane, mbi ya se gyènde. Wì ya si bìri inɔb gha, “Mbə̀ bèrì aghi mɔ̀ʼɔ aŋa ni jəg?” Mbi ya niŋ su tɔ̰ nàʼ ibo. Wì ya niŋ bə̀ kud kwàʼ inɔb imbìghè.
Wì ya kud ane si ghà inɔb gha, “Aŋa ya inug mbe ne mə̀ yaya ghà inən anyumə̀ ne mə̀ ya yaʼi tì inən. Inug ijìm mbe ne Muse ya gha inga mə̀nɔ̀ʼɔ̀ tì inug ijìm mbe ne bədkə̀n Ŋwiye ya gha, fɔrɔ inug ijìm mbe ne àŋwàʼrì mə̀Sam gha, mbi mənyìʼ dù.”
Yeso ya si fìʼì ìmbɔb itog ni ghì gha mbe kyeri anug ne Àŋwàʼrì Ŋwiye gha. Wì ya si ghà inɔb gha, “Aŋa ya anug ne Àŋwàʼrì Ŋwiye gha, Wə̀d we ne Ŋwiye zɔ̀ʼi biri zə̰ ngəʼ, ku, si zwème igun aneg ne pè ane itad. Mbi ya bə̀ ŋwàʼrì gha, ikən chɔm gho̰ ya mbi biri chètì ane ikum məd, ni ko a Jèrusalèm ghò pè inga iben ijìm gha, Ŋwiye biri waʼ inug tibɔ̀ŋ abə bəd mbe ne bəŋi ìtɔb fìŋ sìkì inug tibɔ̀ŋ. Mbə̀ ya bəd ne bàri inug mbo̰ ijìm. Ane, mbə̀ chete abə bəd ndəŋ. Mə biri nàʼ Azwighi Ŋwiye ze ne ìmə Mbaʼ ya kàʼi gha zìye biri nàʼ inən. Si ya gha, mbə̀ chughi a Jèrusalèm aŋa ghɔ̀m, pè ane nyùmə̀ ne Azwighi Ŋwiye yeʼe ikaŋ àbɔ̀ŋɔ igun inən si nàʼ ika inən.”

Yeso ya si niŋ awɔb ghò a Betanì, pè nɔ̰ ìmbi ibo ikaŋ, zì àbɔrɔ̀bɔd igun inɔb. Icheg ne wì yaya zìyè àbɔrɔ̀bɔd igun inɔb ane, Ŋwiye ya niŋ aməd ikaŋ àbɔ̀ŋɔ. Mə̀mə̀nənùg mbe ya se ghùmnə aməd. Mbi ya bə̀ se taŋ gyènde ghò a Jèrusalèm. Mbi ya se ghò inga mbàn Ŋwiye ineg ijìm ni ghùmnə Ŋwiye.

සවන් දෙන්න Lug 24