Nyùmə̀ Iteri ngə̀ŋ mə̀kara ne chəyi àfòrì inga ne mbe kàrà ane Iteri Chègun ya se tìnde. Itog bəd mbàn Ŋwiye, fɔrɔ mə̀chwitì mə̀nɔ̀ʼɔ̀ yaya kə̀bə̀ inɔnjì ni zweti Yeso. Mbi yaya kə̀bə̀ ni zweti aməd inə̀mbi imbə̀ʼ icheg ne mbi yaya bɔ gha bəd biri bùg ndum.


Ane, Sàtàn ya nyi inga fìŋ abə wə̀d mɔ̀ʼɔ abɔ̀ʼ mə̀mə̀nənùg mbe ìghum chɔ̀b ibe ne ikum məd ya Judàs Ikarìyɔ̀d. Judàs ya si ghò chùm tì itog bəd mbàn Ŋwiye fɔrɔ itog bəd abə mə̀sogyì mbe ne yaya kyèʼrè mbàn Ŋwiye, ni chuʼri icheg ne wì biri fḛ Yeso inɔb. Mbɔb ya gyendi, bə̀ bḛ gha mbi biri nàʼ ikab ibo. Judàs ya bḛ ni niŋ ikab, se ghɔ̀mɔ̀ apan ni ghì gha mbe gwìye Yeso asiŋi ne chəyi inɔ̰ bəd angu.


Aneg Iteri ni jəg ngə̀ŋ mə̀kara ne chəyi àfòrì inga ya pè ne mbi biri zweti ŋwan njə̀g ni jəg Iteri Chègun. Ane, Yeso ya tɔm Pità tì Jɔn, ghà inɔb gha, “Mbə̀ gho chuʼri nyɔd bə̀ tangi asiŋi ne tì biri jəg Iteri Chègun.”
Mbɔb ya biri ibo gha, “Àghò kə kə̀bə̀ gha tì chuʼri ighi bə̀ tangi isiŋi aya?”
Wì ya ywìtì inɔb gha, “Kwàʼ ane mbə̀ nyi nyi inga Jèrusalèm, mbə biri bɔ̀mbì tì wə̀d mɔ̀ʼɔ ne bèʼi akwighe mənib. Mbə̀ gho abɔ̀ʼ məd pè nyi inga nəb ze ne wì nyi, si ghà abə wə̀d ne beri nəb gha, ‹Àchwitìnùg gha, chwiti atog nəb bəd tìsɔ̀ʼ ne mə̀ biri jəg Iteri Chègun tì ìmbum mə̀mə̀nənùg.› Mbə̰ mə̀ ghà ane, wì biri chwi atog nəb ze ne yaʼi ikaŋ, ne ighi ijìm yaʼi inga. Mbə̀ tangi ighi Iteri inga angu.”
Mbɔb ya ghò bə̀ pè bàd inug ijìm kwàʼ icheg ne Yeso ya gha. Mbi si tàngi ighi Iteri Chègun angu.


Nyùmə̀ ni jəg Iteri ya kòʼ, Yeso tì bədtɔm məd ya chughi ni jəg. Wì ghà inɔb gha, “Mə ya kə̀ se ghɔ̀mɔ̀ ni jəg Iteri Chègun gho̰ tì inən bɔŋ se zə̰ ngəʼ. Mə gha tesiʼ inən gha, chəyi mə̀ biri ywiri jəg Iteri gho̰ tì inən anene pè ane aneg ne bəd inga anug ìfɔ̀n Ŋwiye biri kyeri aton imbə̀ʼ Iteri gho̰.”
Icheg ne wì ya gha ane, Wì ya niŋ itoʼ mənoʼ nyimi, si nàʼ məyakà abə Ŋwiye, ghà inɔb gha, “Mbə̀ no mbə̰ məjìm. Tesiʼ ya gha, chəyi mə̀ biri ywiri no mənoʼ vayìn anene pè ane aneg ne anug ìfɔ̀n Ŋwiye biri yeʼe.”
Wì ya bə̀ niŋ ngə̀ŋ mə̀kara ze nàʼ məyakà abə Ŋwiye, bə̀ʼri nàʼ inɔb, si gha, “Aŋa ya ìmə nyàmnyɔd ne mə nàʼi imbə̀ʼ awən. Mbə̀ ghì jə̀ghə anìŋ se wende mə.” Anyumə̀ ne mbi ya jəghi, wì ya bə̀ niŋ itoʼ mənoʼ ze, si gha, “Itoʼ ìzo̰ ya ikan feg ne Ŋwiye wàri tì inən ane àmə anəm ze ne tuyə imbə̀ʼ awən. Mbə̀ nḛ! Wə̀d we ne biri fḛ amə, tengàŋ we aŋa jə̀ghə abɔ̀ʼ inum. Ŋwan Wə̀d biri ku icheg ne Ŋwiye ya fə nɔ̀ŋi. Si ya gha, Ngəʼ kyen ze igun wə̀d we ne fḛ aməd.”
Bədtɔm Kristo ya ko se bìre mbɔb mbɔb gha, “Àkə we abɔ̀ʼ ina ne tì wì fàʼ iku anug gho̰?”

Mə̀mə̀nənùg Yeso ya nɔ̀ʼ ko se sìmnè ìkyen, bìre gha, “Wə̀d kyen abɔ̀ʼ ina àkə we?” Yeso ya si ghà inɔb gha, “Məfɔn abə bəd ne kayi mə̀Ju ya sàʼa bəd ane ika. Ìmbɔb itog bəd ya nyə̀ʼə̀ bəd mbe ne mbɔb ya sàʼa, bə̀ ywìrè kiri gha mbɔb ya wètè awɔb weti. Àsi awən, kayi icheg ne ze koʼi ni yaʼ mbə inən. Inən, wə̀d ne yaʼi wə̀d kyen abɔ̀ʼ inən, tengàŋ niŋ ìwi nyɔd icheg wə̀d kwa. Wə̀d we ne sàʼa bəd bə̀ niŋ ìwi nyɔd icheg wə̀d ne fàʼà abə bəd. Wə̀d kyen kə iweg? Àkə wə̀d ne chùghə, mbi yeʼe nàʼ tijəg ibo, kə̀ wə̀d ne nàʼà tijəg te? Imbə̀ʼ à ya wə̀d ne chùghə mbi yeʼe nàʼà tijəg ibo? Mə yaʼ abɔ̀ʼ inən icheg wə̀d àfàʼì ne nàʼà tijəg.
Mbə̰ ya bəd mbe ne ya təmi tì inum anyumə̀ ne mbi yaya kwàʼrà mə. Mə biri nàʼ anug ìfɔ̀n inən kwàʼ icheg ne ìmə Mbaʼ fə nàʼi anug ìfɔ̀n inum. Ane, mbə̰ biri jəg bə̀ no inga àmə anug ìfɔ̀n. Mbə̰ biri bə chughi tì inum igun itən ifɔn se sàʼa tinəbi Izre te ìghum chɔ̀b ibe.”


Yeso ya gha, “Sayimùn, Sayimùn. Nḛ! Sàtàn fə biri abə Ŋwiye gha we nàʼ ika ibo wè kwàʼra awən, kùtə̀ awən icheg ne mbe kùtə̀ ngə̀ŋ. Si ya gha, mə fə chàʼra Ŋwiye imbə̀ʼ awe, àghò Sayimùn, gha imbə̀ʼ ìwe ibḛfiŋ nɔ̀ʼ bɔrɔ yi. Anyumə̀ ne àghò bəŋi fìŋ yeʼe abɔ̀ʼ inum, àghò ghìyə̀ ibḛfiŋ abə ìmbe məfi we təm kà.”
Pità ya ywìtì ibo gha, “Anɔŋisəg, mə fə chuʼri ìmə nyɔd ni gha kə̀ àghò kə nyḭ̀yḛ ndəŋ mə nyi tì ine, kə̀ àghò kə kùyə mə ku tì ine.”
Yeso ya ghà ibo gha, “Mə gha tesiʼ ine àghò Pità, bɔŋ inɔm ngub se tɔ̀ŋɔ tèchɔ̀ŋ, àghò biri fə to̰ awe aghəm atad gha chəyi àghò kyèri amə.”

Yeso ya si bìri abə mə̀mə̀nənùg məd gha, “Anyumə̀ ne mə̀ ya tɔmi awən ne chəyi ikab, chəyi àbàn, chəyi bə̀ itami ndəŋ, mbə̰ ya cheʼi aghi mɔ̀ʼɔ?”
Mbi ywìtì gha, “Indèʼ!”
Wì ya si ghà inɔb gha, “Amad anìŋ, wə̀d ne beri ikab, we niŋ. Wə̀d ne beri àbàn, we niŋ. Wə̀d ne chəyi wì beri ibeg ibid, tengàŋ fḛ ìzi ndwi ze igun, zon ibeg ibid. A ze inga Àŋwàʼrì Ŋwiye gha, ‹Mbi ya niŋ aməd icheg wə̀d inug tibɔ̀ŋ.› Mə ya anìŋ ghà inən gha anug azo̰ mənyìʼ dù igun inum. E! À ya ane. Anug ze ne mbi ya ŋwàʼrì imbə̀ʼ amə ya anìŋ se dùwə̀.”
Mə̀mə̀nənùg mbe ya ghà ibo gha, “Anɔŋisəg, Nḛ! Məbeg ibid mbo̰ məbe.”
Wì ya ywìtì inɔb gha, “Mbe kòʼ.”


Yeso ya dù kɔʼ ghò ikaŋ iwum mə̀Olìf icheg ne wì yaya nḛ ni dù ghò. Mə̀mə̀nənùg məd ya beni ibo anjìm. Wì ya pè angu ghà inɔb gha, “Mbə̀ chaʼra Ŋwiye imbə̀ʼ àkwàʼrì nɔ̀ʼ nyi igun inən.”
Wì ya si nɔ̀ʼ kye, sùngì ghò imbìghè, gɔ̀m itog inwḭ aseg, chàʼra Ŋwiye. Wì ya chàʼra Ŋwiye gha, “Ìmə Mbaʼ, àghò mə kɔ̀ŋ, chì ngəʼ ìzo̰ igun inum. Faʼa anug ze ne àghò kə̀bi, kayi àze ne mə̀ kə̀bi.” Angirə̀ mɔ̀ʼɔ ikaŋ àbɔ̀ŋɔ ya dù ibo imbìghè nàʼ ika ibo. Icheg ne wì ya yaʼi inga ngəʼ kyen, wì ya taŋ chàʼra Ŋwiye ane ìzi fìŋ ijìm. Nìme yaya se dùwə̀ igun məd chə̀mbə aseg kwàʼ icheg anəm.
Anyumə̀ ne wì ya nɔ̀ʼi ni chàʼra Ŋwiye, wì ya ghò pè bàd mə̀mə̀nənùg məd ne mbi ya bɔri, se gwḛ ngəʼ. Wì ya biri inɔb gha, “Aton ne mbə gwḛ àkə gha?” Si ghà inɔb gha, “Mbə̀ nɔ̀ʼɔ chàʼra Ŋwiye imbə̀ʼ àkwàʼrì nɔ̀ʼ nyi igun inən.”


Anyumə̀ ne Yeso yaya kiri ghamà, inɔ̰ bəd ya yeʼe. Wə̀d ne yaya yḛ̀ inɔb imbìghè ya wə̀d mɔ̀ʼɔ abɔ̀ʼ mə̀mə̀nənùg mbe ìghum chɔ̀b ibe ne ikum məd ya Judàs Ikarìyɔ̀d. Wì ya kɔʼri yèʼe imbìghè ni nyɔŋ ndə̀ʼ abə Yeso. Yeso ya biri ibo gha, “Judàs, àghò kə nyɔ̀ŋɔ ndə̀ʼ abə Ŋwan Wə̀d ni fḛ aməd?”
Anyumə̀ ne mə̀mə̀nənùg ìmbi Yeso ya bàri anug ne se kə̀b dù, mbi biri ibo gha, “Anɔŋisəg, tè wa chɔʼ məbeg igun bəd mbo̰?” Mbi ŋa zə̰, wə̀d ifibì abɔ̀ʼ inɔb ya fə chwen aba àtɔ̀ŋi jəghi abə wə̀d àfàʼì ìwi atog wə̀d igun bəd mbàn Ŋwiye.
Yeso ya ton gha, “Indèʼ! ze kòʼ ane.” Wì ya bètì àtɔ̀ŋi abə wə̀d we, ghùyə̀ aməd. Yeso ya si ghà abə itog bəd mbàn Ŋwiye tì itog bəd mbe ne yaya kyèʼrè mbàn Ŋwiye fɔrɔ abə bəd kyen inga aben ne ya yeʼe ni gwì aməd gha, “Mə wa kə wə̀d kyen abə bəd ne ghìyə̀ ìkɔ̀b abə aben ne mbə̀ si yèʼe tì məbeg fɔrɔ mboʼ ni gwì amə? Mə ya kə̀ tì inən ineg ijìm inga ikam mbàn Ŋwiye, chəyi mbə̀ beti amə ane abo. Ìwən nyùmə̀ fə kòʼ. Nyùmə̀ ne ika afub fə che imbìghè mbə se ghìyə̀ inug tibɔ̀ŋ.”


Mbi ya gwì Yeso, niŋ aməd ghò inga nəb abə atog wə̀d igun bəd mbàn Ŋwiye. Pità ya beni abɔ̀ʼ se yḛ̀ anjìm, kwàʼ agha agha Anyumə̀ ne mbi ya feti iywid inga ikam angu, chughi aseg ane inɔ̰, Pità ya bə̀ chùghi aseg abɔ̀ʼ inɔb. Ŋwan àyi mɔ̀ʼɔ ne ya wə̀d àfàʼì inga ikam angu ya bara Pità ichughi iban iywid, nḛ məd kwàʼ angu ife, si gha, “Wə̀d gho̰ we kə̀ bə̀ abɔ̀ʼ Yeso.”
Pità ya to̰ yi gha, “Àyi gho̰! Chəyi mə̀ kyeri aməd.” Chəyi agha sà, wə̀d ndəŋ ywìrì bàd aməd gha, “Àghò ya bə̀ wə̀d mɔ̀ʼɔ abɔ̀ʼ.”
Pità ywìtì ibo gha, “Mbe gho̰! Kayi mo.”
Agha ya to sà, wə̀d ndəŋ ywìri ghà kɔ̀mbì gha, “Kwàʼ tesiʼ, mbaŋà ìzo̰ ze kə̀ tì Yeso imbə̀ʼ icheg ne à ya wə̀d a Galìli.”
Pità ya ywìtì gha, “Mbe gho̰! Chəyi mə̀ kyeri anug ne àghò ya ghà.”
Kwàʼ icheg ne Pità yaya kiri ghamà, inɔm ngub ya tɔŋ. Anɔŋisəg ya ghabri nḛ̀ Pità kwàʼ inga aghə. Pità ya si wèndi ìngam ne Anɔŋisəg ya ghàmi ibo gha, “Bɔŋ inɔm ngub se tɔ̀ŋɔ tèchɔ̀ŋ, àghò biri to̰ awe aghəm atad gha chəyi àghò kyeri amə.” Pità ya wendi ane si dù isəg dèg, mèʼì məchə.


Bəd mbe ne yaya kyèʼrè Yeso ya ko se chàpà aməd bə̀ sɔ̀mɔ məd. Mbi ya kɔd aghə məd ane aba ndwi, se kɔ̀mɔ̀ aməd ghà ibo gha, “Mə̀tə! Wə̀d ne kɔ̀mi awe àkə wə̀d?” Mbi ya bə̀ màʼ fitam izɔmbì igun məd.


Anyumə̀ ne ituʼ ya chəghi, itog bəd məjìm ya fete: bəd mbe ne saʼa aben tì itog bəd mbàn Ŋwiye fɔrɔ mə̀chwitì mə̀nɔ̀ʼɔ̀ ya fete, ghì mbi niŋ Yeso yèʼe inɔb imbìghè.
Mbɔb ya ghà ibo gha, “Àghò mə yaʼ Wə̀d we ne Ŋwiye zɔ̀ʼi, gha ina.”
Wì ya ywìtì inɔb gha, “Mə mə̀ ghà inən, chəyi mbə biri bḛ. Mə mə̀ bə̀ bìri anug mɔ̀ʼɔ inən, chəyi mbə biri ywìtì. Si ya gha, ni ko amad anìŋ, Ŋwan Wə̀d biri chughi aba abo jəghi Ŋwiye we ne beri ika ijìm.”
Mbɔb məjìm ya biri ibo gha, “Ane ya gha àghò ya Ŋwan Ŋwiye?”
Wì ya ywìtì inɔb gha, “Mbə̀ fə ghà àzən aghi gha mə̀ ya ìwi awən.”
Mbi ya si gha, “Tè kə ywìrè kə̀bə̀ ni zug aghə? Tì fə zug kwàʼ mba mba anug ne wì gha ane ìwi ichug.”

සවන් දෙන්න Lug 22