First published by the British and Foreign Bible Society 1876-1877.

Ka̔ nesoo kesikak e̔tukwun we̔ko̔toowin passover, ka itumee̔k, mena āka ka oo̔pisee̔k ayu̔konaw: ākose ke̔che ayumehāwekemawuk mena oomussina̔hikāwuk nutoonumwuk tanse kitta ke̔ isse kemooch wuyāse otinatchik, ākose kitta nippa̔hatchik. Maka omisse itwāwuk, Numoweya ā we̔ko̔toowe kesikak, āka ayiseyinewuk kitta nayā̔tawāye̔tu̔kik.
Ākose ā ayat Bethanyi̔k pee̔che we’kee̔k Simon ka peekoopuyewe itaspināt, mākwach ā uppit ā mechesoot, pā itoo̔tāo iskwāo ā ayat tumuskoowin ussineewuti̔k spikenardi̔k o̔che naspitch ā a̔kwuke̔tāyik; ākose paskinum unima ussineewut, mena seekinumwāo oo’ stikwaneyee̔k. Mena atee̔t numoweya meywāye̔tumwuk pee̔che oo mitoonāye̔chekunewa̔k, mena omisse itwāwuk, Tanā̔kā oma wā̔che māstinumee̔k oma tumuskoowin? Chikāma kitta ke̔ utawakanewunopun owusimā nistoo metatu̔to metunow sooneyawapiskwuk o̔che, mena kitta ke̔ meeya̔tyuk ookitimakissewuk. Ākose nayā̔tawe itāwuk. Ākose Jesus omisse itwāo, Āka tota̔k; tanā̔kā wā̔che mikooskachehāk? ne ke̔ totāstumak meyo utooskāwin. Chikāma mosuk ke wechāwawawuk ookitimakissewuk, mena piko tu̔twaw kā itāye̔tumāk ke ga ke̔ meyototowawawuk; maka neya numoweya mosuk ke wechātinawaw. Ke̔ totum ā isse kuske̔tat: pā itoo̔tāo neyakuna kitta toominu̔k ne’ yow kitta na̔hinikowewuk. Tapwā k’ ititinawaw, Piko ittā oma meyo achimoowin kā we̔tumee̔k missewā uskee̔k, oma ussitche ka ke̔ totu̔k kitta atochekatāo kitta kiskissetota̔t.
Ākose Judas Iscariot, pāuk metatu̔t nesoosap o̔che, natāo ke̔che ayumehāwekemawa, ā we̔ utamat we’yoweyew. Ākose ispe peyā̔tu̔kik, muma̔takoo̔sewuk, ākose usootumwuk kitta meeyatchik sooneyawa. Ākose nutoonum tanse kitta ke̔ isse na̔hepuyeyik kitta utawakāt.
Ākose nistum kesikaw āka oo̔pissinoowe ayu̔konaw, ispe nāppa̔tatchik passover, oo kiskino̔humowakuna omisse itik, Tantā ātāye̔tumun kitta nutowe kwyache̔taya̔k kitta ke̔ mecheyun passover? Ākose siswātissa̔wāo nesoo oo kiskino̔humowakuna, mena omisse itāo, Itoo̔tāk ke̔che waskahikuneska̔k, ākose ke ga nukiskakoowaw pāuk napāo ā pimoo̔tutat kwapekakun ā sakuskināyik nippe o̔che: pimitissa̔hoo̔k. Mena piko itta kā pee̔tokwāt, omisse itee̔k ka tipāye̔tu̔k waskahikun, Ookiskino̔humakāo omisse itwāo, Tanewā mantāwekumik, itta kā mecheyan passover ussitche ne kiskino̔humowakunuk? Ākose ke ga wapu̔teyikoowaw ā misayik piskee̔tche waskahikun ispimi̔k ā ayayik ā kwyatuneyik: ākota kwyache̔tak keyanow o̔che. Ākose oo kiskino̔humowakuna sipwā̔tāyewa, mena pā itoo̔tāyewa ke̔che waskahikuneska̔k mena miskumwuk ā ke̔ isse itikootchik: ākose kwyache̔tawuk passover. Ākose ā ootakoosineyik pā tukoosin ussitche metatu̔t nesoosap. Mena mākwach ā uppitchik mena ā mechesootchik, Jesus omisse itwāo, Tapwā k’ ititinawaw, Pāuk oma keyawaw ka weche mechesoomeyāk kitta utawakāo ne’ yow. Ākose utte mache numma na̔āye̔tumwuk, mena omisse isse mache itāwuk pa̔pāuk, Neya na? mena kotuk omisse itwāo, Neya na? Ākose nuskwāwusehāo mena omisse itāo, Pāuk metatu̔t nesoosap o̔che, una ka weche isseniskāmit ooyakuni̔k. Napāwe‐Koosisan atesoweya tapwā itoo̔tāo, ā ke̔ isse itussina̔hoo̔t: maka maye ayaw una napāo napāwe‐Koosisan ka o̔che utawakā̔k! owusimā kitta ke̔ meywasineyepun una napāo o̔che keespin āka we̔kach ke̔ ne̔taweke̔pun.
Ākose mākwach ā mechesootchik, Jesus otināo ayu̔konawa, ākose meywukimāo, mena pu̔kwānāo, mena meeyāo, mena omisse itwāo, Otinee̔k, moowee̔k: āwuko oma ne’ yow. Ākose otinum mini̔kwakun, ākose ka̔ mākit nunaskoomoowina, meeyāo: ākose ka̔keyow ke̔ mini̔kwāwuk ākota o̔che. Ākose omisse itāo, Āwuko oma ne’mi̔k ooske isse̔twawini̔k, ka seeka̔hikatāk me̔chāt o̔che. Tapwā k’ ititinawaw, Numoweya owusimā ne ga mini̔kwatumwan oo meenisima meenisa̔tik, peyis unima kesikaw kā ooske mini̔kwāyan oot otānowini̔k Muneto.
Ākose ka̔ nikumootchik pāuk nikumoon, itoo̔tāwuk wutchee̔k Olivei̔k. Ākose Jesus omisse itāo, Ka̔keyow keyawaw ke ga nayā̔tawāye̔tānawaw chikāma neya o̔che unoo̔ch ka tipiskak: chikāma omisse itussina̔hikatāo, ne ga ootama̔waw ookunowemayutchi̔kwāo, ākose mayutchi̔kwuk kitta nunanis ayawuk. Maka ke̔ wuniskayane, ke ga nekanoo̔tatinawaw Galileei̔k isse. Maka Peter omisse itāo, Keyam ata ka̔keyow nayā̔tawāye̔tu̔kwawe, āyewā̔k neya numoweya. Ākose Jesus omisse itāo, Tapwā k’ ititin, Oma ka kesikak, oma ote ka tipiskak ā moyā napāpakaha̔kwan kitoot neswaw, nistwaw ke ga anwā̔towin. Maka owusimā peekiskwāo ā we̔ tapwāt, Keespin ata weche nippeemitane, numma wawach ke ga anwā̔tatin. Ākose isse neestawaw ka̔keyow ātwātchik.
Ākose otee̔tumwuk itta Gethsemane ā isseni̔katāyik: ākose omisse itāo oo kiskino̔humowakuna, Uppik keyawaw ota, ā āskwa ayumehayan. Ākose wechāwāo Petera mena Jamesa ussitche Johna, mena mache naspitch mikooskatāye̔tum, mena mache koosikwamu̔chehoo; Ākose omisse itāo, Net a̔cha̔k naspitch kukwatukamu̔chehoo nippoowini̔k isse: ota ayak keyawaw, mena ussowapik. Ākose utte yu̔koo̔tāo upisees, mena pu̔kissin uskee̔k, mena ayumehaw, keespin kā ke̔ e̔kineyikwā, tipa̔hikun kitta ke̔ muyaskakoot. Ākose omisse itwāo, Abba, N’ o̔tawe, ka̔keyow kākwia ke kuske̔tan keya; ākutānumowin oma mini̔kwakun: āyewā̔k maka numoweya neya ā itāye̔tuman, maka keya ā itāye̔tumun. Ākose pā itoo̔tāo, mena miskowāo ā nipayit, ākose omisse itāo Petera, Simon, ke nipan che? numma wawach na pāuk tipā̔hikun ke ke̔ ussowapin? Ussowapik mena ayumehak, āka kitta itoo̔tāyāk kootāye̔toowini̔k. Ācha̔k tapwā kwyachissew, maka meyas nāsoowun. Ākose mena sipwā̔tāo, mena ayumehaw, mena ayumew kāyapitch āwukwunee ayumewina. Ākose ispe keyewāt, miskowāo ā nipayit mena, (weya oo’ skesikoowawa ā koosikwuneyikee,) mena numoweya kiskāye̔tumwuk tanse kitta isse nuskwāwusehatchik. Ākose pā itoo̔tāo ākwa nistwaw, mena omisse itāo, Ākwa nipak, mena otinumook ket aywāpewinewaw: ākooyekoo̔k, tipa̔hikun ooche̔chepuyew; matika, napāwe‐Koosisan utawakanewun oo’ chee̔cheewa̔k isse oomuchatissewuk. Wuniskak, sipwā̔tātan; cheest, una ka utawakāt ne’ yow kissewak ayaw.
Ākose sāmak, mākwach kāyapitch ā ayumit, pā itoo̔tāo Judas, pāuk metatu̔t nesoosap o̔che, mena ā wechākoot ookistukāwe ayiseyinewa semakuni̔koomana mena pukumakuna ā kekeeyit, ke̔che ayumehāwekemawa mena oomussina̔hikāwa ussitche kāsāyinee̔ku̔tumeyit o̔che. Mena una ka ke̔ utawakāwat we’yoweyew oo ke̔ meeyā̔ty kiska̔hikun, omisse ā itwāt, Piko una kā̔ ochāmuk, āwuko una; āwuko otinee̔k, mena sipwā̔tahee̔k pāu̔tuk. Ākose sāmak tākoosee̔k, kwiuskoonak utte natāo, mena omisse itwāo, Ookemaw, ookemaw; ākose ochāmāo. Ākose otee̔tināwuk, mena otināwuk. Ākose pāuk unekee ka nepowitchik ākota oochipitum semakuni̔kooman, mena ootama̔wāo oot utooskāyakuneyewa ke̔che ayumehāwekemawa, mena munewāpa̔humwāo oo̔’ towukuyew. Ākose Jesus nuskwāwusehāo mena omisse itāo, Tapiskooch che kimootisk ā pā natāk, semakuni̔koomana mena pukumakuna ka kekeeyāk kitta otineyāk? Ke ke̔ wechātinawaw tu̔to kesikaw pee̔che ke̔che ayumehāwekumikoo̔k ā kiskino̔humakāyan, mena numoweya ke ke̔ otininawaw: maka ke̔che mussina̔hikāwina kitta tipepuyewa. Ākose ka̔keyow nukutāwuk, mena tupuseewuk. Ākose pimitissa̔hook pāuk ooskeneekewa, ā ukwuna̔hooyit wapiske pupukewuyan moosāweyoweyee̔k; ākose ooskeneekewuk otee̔tināwuk: Ākose nukutum wapiske pupukewuyan, mena tupusehāo moosāskut.
Ākose itoo̔tahāwuk Jesusa itta mawutche ke̔che ayumehāwekemawa ā ayayit: ākose ākota ā wechākoot ka̔keyow ke̔che ayumehāwekemawa mena kāsāyinee̔ku̔tumeyit ussitche oomussina̔hikāwa. Ākose Peter wa̔yow isse pimitissa̔wāo, a̔po ke̔che ayumehāwekemawa w’ekeeyee̔k isse: ākose weetuppimāo utooskāyakuna, mena owusoo iskootā̔k. Ākose ke̔che ayumehāwekemawuk mena ka̔keyow ooyussoowāwin nutoonumwuk itta kitta o̔che misimatchik Jesusa kitta nippa̔hatchik; ākose numma wawach miskumwuk. Chikāma me̔chāt nuspach isse mise̔kāmoowuk, maka oo mise̔kāmoowinewaw numoweya tapiskooch ke̔ isse na̔hepuyeyew. Ākose atee̔t pussikoowuk, mena nuspach isse misimāwuk, omisse ā itwātchik, Ne ke̔ pā̔towanan ā itwāt, Ne ga nissewunache̔tan oma ke̔che ayumehāwekumik ka ose̔chikatāk me’chee̔cheeä o̔che, ākose nistwaw kesikakee ne ga ooyusketan kotuk numoweya me’chee̔cheeä o̔che. Maka neestawaw oo mise̔kāmoowinewaw numoweya tapiskooch ke̔ isse na̔hepuyeyew. Ākose mawutche ke̔che ayumehāwekemaw nepowew tātawitch, ākose kukwāchimāo Jesusa, omisse ā itwāt, Numma wawach na ke nuskwāwuse̔twan? kākwan oma okoo ka we̔ o̔che misimiskik? Maka numoweya kitoo, mena numma wawach nantow itwāo. Mena mawutche ke̔che ayumehāwekemawa kukwāchimik, mena omisse itik, Keya che una Christ, oo’ Koosisa Sāwāye̔takosit? Ākose Jesus omisse itwāo, Neya āwuko: mena ke ga wapumawaw napāwe‐Koosisan ā uppit soo̔katissewin oo ke̔che‐niski̔k, mena ā pā itoo̔tāt wuskoo̔k kesikoo̔k. Ākose mawutche ke̔che ayumehāwekemaw peekoopitum oot ayoowinisa, mena omisse itwāo, Kākwan owusimā mise̔kāmoowina nātowāye̔tumu̔k? Ke ke̔ pā̔tānawaw pastamoowin: tanse keyawaw ātāye̔tumāk? Ākose ka̔keyaw itussoowatāwuk kitta nippa̔himee̔t. Ākose atee̔t mache see̔kwatāwuk, mena ā ukwuna̔kwā̔watchik, mena ā ootama̔watchik, mena omisse ā itatchik, Kiskewāhikā: ākose utooskāyakunuk ootama̔wāwuk oot ayukuskechee̔chanewawa o̔che.
Ākose mākwach Peter nee̔che ā ayat ke̔che waskahikuni̔k, pā itoo̔tāyewa pāuk mawutche ke̔che ayumehāwekemawa oot utooskāyakuniskwāmeyewa: Ākose ispe weäpumat Petera ā owusooyit, kunowapumāo, mena omisse itwāo, Mena keya ussitche ke ke̔ wechāwaw Jesus Nazarethi̔k ka o̔cheet. Maka anwā̔tum, omisse ā itwāt, Numoweya ne kiskāye̔tān, mena numoweya ne nisseto̔tān tanse ātwāyun. Ākose wuyoweew ā piske̔che ayayik isse; ākose napāpakaha̔kwana kitooyewa. Ākose utooskāyakuniskwāwa mena wapumik, mena omisse mache itāyewa unehee ka nepoweyit ākota, Āwukwawa pāuk weyawaw o̔che. Ākose mena anwā̔tum. Ākose mena ukunuk, unekee ka ke̔ nepowitchik ākota omisse itāwuk mena Petera, Neyaman keya pāuk weyawaw o̔che: chikāma ke Galileanewin, mena ākose ātee̔takooseyun. Maka mache weyu̔kwāo mena ke̔che itwāo, omisse isse, Numoweya ne kiskāyimaw owa napāo ka ayimomāk. Ākose ākwa neeswaw napāpakaha̔kwan kitoo. Ākose Peter kunookiskissew unima ayumewin Jesusa ka ke̔ itikoot, Ā moyā kitoot napāpakaha̔kwan neeswaw, ke ga anwā̔towin nistwaw. Ākose ispe meyamitoonāye̔tu̔k āwuko, matoo.

සවන් දෙන්න OO MEYO ACHIMOOWIN ST MARK 14