ኣይንት ወራቲዝ ጣምቀተ ይዃንስ፦ «ምጝግስተሰማያት ኣልትርኵችነ ንስኻ ጥውጥን» የው ሲቭካ ይዅዳቱ በራኸይዝ ፃቭ ተሩ። ነቭይ ይሳያስ፦
« ‹ኣደረት ጒደነድ ኣስልጥን!
ጥርግየድየንትም ጭቅ ሽጥን!›
ያ በራኸይስ ቓፀው እጅርዙ ድመ»
የው ዊግተውድ ጝማጥን የጝ።
ይዃንስት ኣልቨድ ግምለዙ ፅቭቀዝ ተሲተው ዊኑ፤ ጝይዊልም ኣኽር ከምራ ዊኑ፤ ጝዅረድም ኣብጠዝመ በራኸዙ ሳረዝ ዊኑ። ኣይንድ ኽዝቭ እየሩሳልየምስ፣ ድፍን ይዅዳ ኻግሪስ፣ ዮርዳኖስት ጅልወይል ፅበው ኻግሪስቅ ይዃንስ ትጐ ገይሽታ ዊኑ። ጝኽጥያትድም ነዚታ ዮርዳኖስ ዊርቨይል ይዃንስት ናኒዝ ጣምቅሻ ዊኑ።
ይዃንስም ንቕፀቍ ፈርሳንዝመ ሰዱቃንዝ ጣምቅሽጥጘ ጝጐ ተርጛንድ ቓላንድ፦ «እፈ ሲቭረዝ ቝር ክታትርነ! ተረው ቍጠይስ ኣምልጥትርነ ማጥን ክታት ኣው ማኽሩ? ነስየ ንስኻ ጥውርነጘ ቓሊሰው ሰቭ ሰራጭጥን። ክታእዘኒዝ፦ ‹ይን ኣቭርኻምት ቝር የጝ› የነውዝ ኣምልጥንቅ ይርን ኻስቭትርነ፤ እደረ እንዛይ ቕርጚስ ኣቭርኻምስ ዅል ጒሰነው ቸለኵ የኵን። እንወ ዘፋኒዝ ስሪል ባፅ ኣስልሽኩ፤ ነስየ ቀሰው ፍረ ፍርዛው ዘፍድቅ ቀቭሽት ልየዝ ቃጥልሽጡ። ያንስ ንስኻዝ ኣቓንስ ማጥን ክታት ኣቝዝ ጣምቀኵን፤ ይግረይል ተረውድ ግን ይጊስ ዲቈኵ፤ ያንም ጝፃብጣንድ እኳ ፃቅጨ ጥውጨቅም፤ ጘጝም ክታት መንፈስ ቅዱስዝመ ልየዝ ጣምቅጡ። ጝመሽንድየንት ጝናኒዝ ፃይኩ፤ ጝዋርነድየንትም ቐናዝ ዊር ሽጡ፤ ዚርወድየንት ጝቅፋነይል ድውጡ፤ ገለቨድየንት ግን ስታው ልየዝ ቃጥልጡ።»


ኣይንድ እየሱስ ይዃንስት ናኒዝ ጣምቅሽጠ ገሊለስ ዮርዳኖስ ትጐ ተሩ። ይዃንስ ግን፦ «እንስ ኣቓውም! ያን ክናኒዝ ጣምቅጨ ጥውሻመ ክት ይጐ ተትራ?» የው ኪልክልጠ ኪርሙ። እየሱስም፦ «በጭ ግድ እጅረር፤ ፅድቅድቅ እነሽን ፋፅምነ ጥውሸኵ» ዩ። ይዃንስም ቲስመም እየሱስት ጣምቁ። እየሱስም ጣምቅሽ ኣቚስ ፈጘ በውዝ ሲመይ ቢቱ፤ እደረት መንፈስድም እርግቨት ተክ ጊም እየሱስትል ጐያንድ ቓሉ። ኣይንድም፦ «እንወ! ያን ጝቍዝ ዲስ የው ይቀነው ይዅርድ ጘጝ የጝ» የው ድመ ሲመይስ ተሩ።

සවන් දෙන්න ማቲወስት ወንጌል 3