Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወዐሪጎ ውስተ ሐመር ዐደወ ወበጽሐ ሀገሮ። ወአምጽኡ ኀቤሁ ድዉየ መፃጕዐ እንዘ ይጸውርዎ በዐራት ወርእዮ እግዚእ ኢየሱስ ሃይማኖቶሙ ይቤሎ ለውእቱ መፃጕዕ ተአመን ወልድየ ተኀድገ ለከ ኀጢአትከ። ወሰሚዖሙ ጸሐፍት ወፈሪሳውያን ይቤሉ በበይናቲሆሙ ዝንቱሰ ይፀርፍ። ወአእሚሮ እግዚእ ኢየሱስ ኅሊናሆሙ ይቤሎሙ ለምንት ትኄልዩ እኩየ በአልባቢክሙ። ምንት ይቀልል እምብሂለ ተኀድገ ለከ ኀጢአትከ ወእምብሂለ ተንሥእ ወንሣእ ዐራተከ ወሑር ቤተከ። ከመ ታእምሩ ከመ ብዉሕ ሎቱ ለወልደ ዕጓለ እመሕያው ይኅድግ ኀጢአተ በዲበ ምድር ወእምዝ ይቤሎ ለውእቱ መፃጕዕ ተንሥእ ወንሣእ ዐራተከ ወእቱ ቤተከ። ወተንሢኦ ነሥአ ዐራቶ ወሖረ ቤቶ። ወርእዮሙ ሕዝብ አንከሩ ወአእኰትዎ ለእግዚአብሔር ዘወሀበ ዘከመዝ ሥልጣነ ለሰብእ።

ወኀሊፎ እግዚእ ኢየሱስ እምህየ ረከበ ብእሴ ዘስሙ ማቴዎስ እንዘ ይነብር ውስተ ምጽባሕ ወይቤሎ ትልወኒ ወተንሢኦ ተለዎ። ወእንዘ ይረፍቅ ውስተ ቤት ናሁ መጽኡ ብዙኃን መጸብሓን ወኃጥኣን ወረፈቁ ምስለ እግዚእ ኢየሱስ ወአርዳኢሁ። ወርእዮሙ ፈሪሳውያን ይቤልዎሙ ለአርዳኢሁ ለምንት ይበልዕ ሊቅክሙ ምስለ መጸብሓን ወኃጥኣን። ወሰሚዖ እግዚእ ኢየሱስ ይቤሎሙ ሕሙማን ይፈቅድዎ ለዐቃቤ ሥራይ ወአኮ ጥዑያን። ሑሩ ወአእምሩ ምንት ውእቱ ዘይቤ «ምጽዋተ አበድር እመሥዋዕት» እስመ ኢመጻእኩ እጸውዕ ጻድቃነ አላ ኃጥኣነ ለንስሓ።

ወእምዝ መጽኡ ኀቤሁ አርዳኢሁ ለዮሐንስ ወይቤልዎ ንሕነ ወፈሪሳውያን ንጸውም ብዙኀ ወአርዳኢከሰ በእፎ ኢይጸውሙ። ወይቤሎሙ እግዚእ ኢየሱስ ኢይክሉ ደቂቁ ለመርዓዊ ጸዊመ ወላሕዎ አምጣነ ሀሎ መርዓዊ ምስሌሆሙ ወባሕቱ ይመጽእ መዋዕል አመ ይነሥእዎ ለመርዓዊ እምኔሆሙ አሜሃ ይጸውሙ። ወአልቦ ዘይጠቅብ ግምደ ድርግሐ ልብስ ውስተ ስጠተ ልብስ ብሉይ እስመ ይትማላእ ሕያዎ ለልብስ፥ ወያዐብዮ ለስጠቱ። ወኢይወድዩ ወይነ ሐዲሰ ውስተ ዝቅ ብሉይ ወእመአኮሰ ዝቁሂ ይነቅዕ ወወይኑሂ ይትከዐው ወዝቁሂ ይትኀጐል ወባሕቱ ለወይንሰ ሐዲስ ውስተ ዝቅ ሐዲስ ይወድይዎ ወይትዓቀቡ ክልኤሆሙ በበይናቲሆሙ።

ወእንዘ ዘንተ ይነግሮሙ ናሁ መጽአ አሐዱ መኰንን ወሰገደ ሎቱ እንዘ ይብል ወለትየ ይእዜ ሞተት ወባሕቱ ነዓ አንብር እዴከ ላዕሌሃ ወተሐዩ። ወተንሥአ እግዚእ ኢየሱስ ወተለዎ ወአርዳኢሁኒ።

ወናሁ ብእሲት እንተ ደም ይውኅዛ እም ዐሠርቱ ወክልኤቱ ክረምት መጽአት ወቆመት እንተ ድኅሬሁ ወገሠሠት ጽንፈ ልብሱ። እንዘ ትብል በልባ እምከመ ገሠሥኩ ጽንፈ ልብሱ አሐዩ። ወተመይጠ እግዚእ ኢየሱስ ወርእያ ወይቤላ ተአመኒ ወለትየ ሃይማኖትኪ አሕየወተኪ ወሐይወት ይእቲ ብእሲት በይእቲ ሰዓት። ወበዊኦ እግዚእ ኢየሱስ ቤቶ ለውእቱ መኰንን ርእየ መብክያነ ወሰብአ እንዘ ይትሀወኩ ወያስቈቅዉ። ወይቤሎሙ ተገኀሡ እስመ አኮ ዘሞተት ሕፃን አላ ትነውም ወሰሐቅዎ። ወእምዘወፅኡ ሰብእ ቦአ ወአኀዛ እዴሃ ወተንሥአት ሕፃን። ወወፅአ ስሙዓተ ነገሩ ውስተ ኵላ ምድር።

ወኀሊፎ እግዚእ ኢየሱስ እምህየ ተለውዎ ክልኤቱ ዕዉራን እንዘ ይጸርሑ ወይብሉ ተሣሀለነ ወልደ ዳዊት። ወበዊኦ ቤተ መጽኡ ኀቤሁ እሙንቱ ዕዉራን ወይቤሎሙ እግዚእ ኢየሱስ ተአምኑሁ ከመ እክል ዘንተ ገቢረ ወይቤልዎ እወ እግዚኦ። ወገሠሦሙ አዕይንቲሆሙ እንዘ ይብል በከመ ሃይማኖትክሙ ይኩንክሙ። ወሶቤሃ ተከሥታ አዕይንቲሆሙ ወገሠጾሙ እግዚእ ኢየሱስ ወይቤሎሙ ዑቁ ኢትንግሩ ወኢ ለመኑሂ። ወወፂኦሙ ነገሩ ለኵሉ በሓውርት።

ወእምዘወፅኡ እሙንቱ አምጽኡ ኀቤሁ ብእሴ ዘጋኔን ጽሙመ ወበሃመ። ወወፂኦ ጋኔኑ ነበበ ውእቱ በሃም ወሰምዐ ውእቱ ጽሙም ወአንከሩ ሰብእ እንዘ ይብሉ ግሙራ ኢያስተርአየ ዘከመ ዝ በውስተ እስራኤል። ወፈሪሳውያንሰ ይቤሉ በመልአኮሙ ለአጋንንት ያወፅኦሙ ለአጋንንት።

ወአንሶሰወ እግዚእ ኢየሱስ ውስተ ኵሉ አህጉር ወበሓውርት እንዘ ይሜህር በምኵራባቲሆሙ ወይሰብክ ወንጌለ መንግሥት ወይፌውስ ኵሎ ድዉያነ ወኵሎ ሕሙማነ ዘውስተ ሕዝብ። ወርእዮ ብዙኃነ ሰብአ አምሐርዎ ወተሣሀሎሙ እስመ ስሩሓን እሙንቱ ወግዱፋን ከመ አባግዕ ዘአልቦ ኖላዊ። ወይቤሎሙ ለአርዳኢሁ ማእረሩሰ ብዙኅ ወገባሩ ኅዳጥ። ሰአልዎ እንከ ለበዓለ ማእረር ከመ ይወስክ ገባረ ለማእረሩ።

සවන් දෙන්න ወንጌል ዘማቴዎስ 9