Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወወፂኦ እግዚእ ኢየሱስ እምቤተ መቅደስ ሖረ ወቀርቡ አርዳኢሁ ወአርአይዎ ንደቀ ሕንጻሁ ለቤተ መቅደስ። ወአውሥአ ወይቤሎሙ ትሬእዩኑ ዘንተ ኵሎ አማን እብለክሙ ኢይትኀደግ ዝየ እብን ዲበ እብን ዘኢይትነሠት። ወእንዘ ይነብር እግዚእነ ውስተ ደብረ ዘይት ቀርቡ ኀቤሁ አርዳኢሁ እንተ ባሕቲቶሙ ወይቤልዎ ንግረነ ማእዜ ይከውን ዝንቱ ወምንት ተአምሪሁ ለምጽአትከ ወለኅልቀተ ዓለም። ወአውሥአ እግዚእ ኢየሱስ ወይቤሎሙ ዑቁ ኢያስሕቱክሙ። እስመ ብዙኃን ይመጽኡ በስምየ እንዘ ይብሉ አነ ውእቱ ክርስቶስ ወያስሕትዎሙ ለብዙኃን። ወሀለወክሙ ትስምዑ ቀትለ ወድምፀ ጸባኢት ዑቁ ኢትደንግፁ እስመ ግብር ይከውን ከማሁ ወባሕቱ አኮ በጊዜሃ ዘየኀልቅ። ወይትነሥኡ ሕዝብ ዲበ ሕዝብ ወነገሥት ላዕለ ነገሥት ወይመጽእ ረኃብ ወብድብድ ወድልቅልቅ ወሀከክ በበ በሓውርቲሁ። ወዝንቱ ኵሉ ቀዳሚሁ ለሕማም። አሜሃ ይትባጽሑክሙ ወይሜጥዉክሙ ለምንዳቤ ወይቀሥፉክሙ ወይቀትሉክሙ ወይጸልኡክሙ ወትከውኑ ጽሉኣነ በኀበ ኵሉ ሰብእ በእንተ ስምየ። ወአሜሃ የዐልዉ ብዙኃን ሃይማኖቶሙ ወይጻልኡ በበይናቲሆሙ ወይትቃተሉ። ወብዙኃን ሐሳውያነ ነቢያት ይመጽኡ ወለብዙኃን ያስሕትዎሙ። ወእምብዝኀ ዓመፃ ወእከይ ትሴኵስ ፍቅር እምብዙኃን። ወዘሰ አዝለፈ ትዕግሥቶ ውእቱ ይድኅን። ወይሰበክ ዝ ወንጌለ መንግሥት ውስተ ኵሉ ዓለም ከመ ይኩን ስምዐ ላዕለ ኵሉ አሕዛብ ወይእተ አሚረ ይበጽሕ ኅልቅት። ወእምከመ ርኢክሙ ትእምርተ ርኵስ ዘምዝባሬ ዘተብህለ በዳንኤል ነቢይ «እንዘ ይቀውም ውስተ መካን ቅዱስ ዘያነብብ ለይለቡ።» አሜሃ እለ ውስተ ይሁዳ ይጐዩ ውስተ አድባር። ወዘሂ ሀሎ ውስተ ናሕስ ኢይረድ ይንሣእ ዘውስተ ቤቱ። ወዘሂ ውስተ ገራህት ሀሎ ኢይትመየጥ ድኅሬሁ ይንሣእ ልብሶ። ወባሕቱ አሌ ሎን ለፅኑሳት ወለእለ የሐፅና በውእቱ መዋዕል። ወጸልዩ ባሕቱ ከመ ኢይኩን ጕያክሙ በክረምት ወበሰንበት። እስመ ይከውን ይእተ አሚረ ዐቢይ ሕማም ወምንዳቤ ዘኢኮነ ከማሁ እምአመ ተፈጥረ ዓለም እስከ ዮም ወኢይከውንሂ። ወሶበ ኢኀጽራ እማንቱ መዋዕል እምኢድኅነ መኑሂ ኵሉ ዘሥጋ ወባሕቱ በእንተ ኅሩያኒሁ የኀጽራ እማንቱ መዋዕል። አሜሃ እመቦ ዘይቤለክሙ ነዋ ዝየ ሀሎ ክርስቶስ ወነዋ ከሃክ ኢትእመኑ። እስመ ይትነሥኡ ሐሳውያነ መሲሕ ወሐሳውያነ ነቢያት ወይገብሩ ተአምራተ ወመንክራተ ዐበይተ ለአስሕቶ ሶበሰ ይትከሀሎሙ ለኅሩያንሂ እምአስሐትዎሙ። ናሁ አቅደምኩ ነጊሮተክሙ። እመቦ ዘይቤለክሙ ነዋ ገዳመ ሀሎ ኢትፃኡ ወነዋ ውስተ አብያት ኢትእመኑ። እስመ ከመ መብረቅ ዘይወፅእ እምጽባሕ ወያስተርኢ እስከ ዐረብ ከማሁ ምጽአቱ ለወልደ ዕጓለ እመሕያው። ኀበ ሀሎ ገደላ ህየ ይትጋብኡ አንስርት። ወበጊዜሃ እምድኅረ ሕማሞን ለእማንቱ መዋዕል ፀሐይኒ ይጸልም ወወርኅኒ ኢይሁብ ብርሃኖ ወከዋክብትኒ ይወድቁ እምሰማይ ወያንቀለቅል ኀይለ ሰማያት። ወይእተ አሚረ ያስተርኢ ተአምሪሁ ለወልደ ዕጓለ እመሕያው በሰማይ አሜሃ ይበክዩ ኵሎሙ አሕዛበ ምድር ሶበ ይሬእይዎ ለወልደ ዕጓለ እመሕያው እንዘ ይመጽእ በደመና ሰማይ ምስለ ኀይል ወስብሐት ብዙኅ። ወይፌንዎሙ ለመላእክቲሁ ምስለ ቃለ ቀርን ወስብሐት ዐቢይ ወያስተጋብእዎሙ ለኅሩያኒሁ እምአርባዕቱ ነፋሳት እምአጽናፈ ሰማይ እስከ አጽናፊሃ። ወእምበለስ አእምሩ አምሳሊሁ እምከመ ኮነ ዐጽቃ ድኩመ ወቈጽላ ልምሉመ ተአምሩ ከመ ቀርበ ማእረር። ከማሁኬ አንትሙሂ እምከመ ርኢክሙ ዘንተ ኵሎ አእምሩ ከመ ቀርበ ወሀሎ ኀበ ኆኅት። አማን እብለክሙ ከመ ኢተኀልፍ ዛቲ ትውልድ እስከ ዝ ኵሉ ይትገበር። ሰማይ ወምድር የኀልፍ ወቃልየሰ ኢየኀልፍ።

ወበእንተሰ ይእቲ ዕለት ወኪያሃ ሰዓት አልቦ ዘየአምራ ኢመላእክተ ሰማይ ወኢወልድ ዘእንበለ አብ ባሕቲቱ። ወበከመ ኮነ በመዋዕለ ኖኅ ከማሁ ይከውን ምጽአቱ ለወልደ ዕጓለ እመሕያው። በከመ ይእተ አሚረ እምቅድመ አይኅ ይበልዑ ወይሰትዩ ያወስቡ፥ ወይትዋሰቡ እስከ አመ ቦአ ኖኅ ውስተ ንፍቀ ታቦት። ወኢያእመሩ እስከ አመ መጽአ ማየ አይኅ ወአጥፍአ ኵሎ ከማሁኬ ይከውን ምጽአቱ ለወልደ ዕጓለ እመሕያው። አሜሃ ክልኤቱ ይሄልዉ ውስተ አሐዱ ገራህት አሐደ ይነሥኡ ወካልኦ የኀድጉ። ወክልኤቲ የሐርጻ በአሐዱ ማሕረጽ አሐተ ይነሥኡ ወካልእታ የኀድጉ ወክልኤቱ ይሰክቡ ውስተ አሐዱ ዐራት አሐደ ይነሥኡ ወካልኦ የኀድጉ። ትግሁ እንከ እስመ ኢተአምሩ በአይ ሰዓት ይመጽእ እግዚእክሙ። ወዘንተ ባሕቱ አእምሩ ሶበሁ የአምር በዓለ ቤት ጊዜ ይመጽእ ሰራቂ እምተግሀ ወእምኀለወ ወእምኢኀደገ ይክርዩ ቤቶ። ከማሁ አንትሙሂ ድልዋኒክሙ ሀልዉ እስመ በጊዜ ኢተሐዘብክሙ ይመጽእ ወልደ ዕጓለ እመሕያው። መኑ እንጋ፥ ገብር ምእመን፥ ወጠቢብ ዘይሠይሞ እግዚኡ ውስተ ቤቱ ከመ የሀቦሙ ሲሳዮሙ በጊዜሁ። ብፁዕ ውእቱ ገብር ዘመጺኦ እግዚኡ ይረክቦ እንዘ ዘንተ ይገብር። አማን እብለክሙ ከመ ዲበ ኵሉ ንዋዩ ይሠይሞ። ወእመሰ ይቤ ውእቱ ገብር እኩይ በልቡ ይጐነዲ አቲወ እግዚእየ። ወይዘብጥ አብያጺሁ አግብርተ ወይበልዕ ወይሰቲ ምስለ ሰካርያን። ወይመጽእ እግዚኡ ለውእቱ ገብር በዕለተ ኢተሐዘበ ወበጊዜ ኢያእመረ። ወይሠጥቆ እማእከሉ ወይሬሲ መክፈልቶ ምስለ መደልዋን ኀበ ሀሎ ብካይ ወሐቅየ ስነን።

සවන් දෙන්න ወንጌል ዘማቴዎስ 24