The copyright is jointly and equally held by:Copyright© 2020 The Word for the World International All Rights Reserved Copyright© 2020 Konda Porja Translation Samithi, Dasamanthpur, Odisha. All Rights Reserved This creative commons license allows for redistribution, commercial and noncommercial, as long as it is passed along unchanged and in whole, with credit to the original author. Requests for revision/remix may be sent to translation.samithi@gmail.com or The Word For The World at www.twftw.org. Audio: ℗ 2024 Hosanna For church use only

Kondaporja 2020 TWFTW (NT) Non Drama

Kondaporja 2020 TWFTW (NT) Drama

The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020 

ୱାଦ୍‍ଏଣ୍‍ଗା ୱିଜୁଦିନ୍‌ ପାର୍‌ତନା କିନିକା ଜେ ପାଣି, ଇୟା ବିସୟ୍‌ତାନ୍‌ ଜିସୁ ୱାରିଙ୍ଗ୍‌ କାତାଦାନ୍‍ ୱେର୍‌ତାନ୍‌, ଉଣ୍ତ୍ରି ଗାଡ଼୍‌ତୁ ଅରେନ୍‍ ବିସାର୍‌ କିନିକାନ୍‍ ମାର୍‌ଆନ୍‌, ୱାନ୍‌ ମାପୁରୁଙ୍ଗୁଁ ତିଲାଏଜି ମାର୍‌ଆନ୍‌ କି ଲୋକାଙ୍ଗ୍‌ ମାନାଏଜି ମାର୍‌ଆନ୍‌ । ଆୟା ଗାଡ଼୍‌ତୁ ଅରେତ୍‌ ରାଣ୍ତି ମାର୍‌ଆତ୍‌, ୱାଦ୍‌ ରିଜାମୁଜା ୱାନି ଲାକ୍‌ତୁ ସଲ୍‌ସି ୱେର୍‌ସି ମାର୍‌ଆତ୍‌, ଲୋକୁ ନା ଉଣ୍ତିଙ୍ଗ୍‌ ଅନ୍ୟାୟ୍‍ କିଜିନାର୍‍ ନିନ୍‌ ନାଙ୍ଗିଁ ବିସାର୍‌ କିଆ । ମାରି, ୱାନ୍‌ ଏସ ସମୟ ଆତାତ୍‌ ରାଜିଆଏଜି ମାର୍‌ଆନ୍‌; ମାତର୍‌ ୱେନ୍‌କା ୱାନ୍‌ ମୋନ୍‌ତୁ ମୋନ୍‌ତୁ ଅଡ଼୍‍ବିତାନ୍‍, ଜଦିବା ନାନ୍ ମାପୁରୁଦିଙ୍ଗ୍‌ ତିଲାଏ ମାରି ଲୋକାଙ୍ଗ୍‌ ମାନାଏ, ମାତର୍‌ ଇୟା ରାଣ୍ତି ନାଙ୍ଗିଁ ଜେଲ୍‌ ସିଜିମାର୍‍ଆତ୍‍ଆକା ନାନ୍ ତାନେ ଉଣ୍ତିଙ୍ଗ୍‌ କିତିମାନି ଅନ୍ୟାୟ୍‍ ପାଣିଦି ଉଣ୍ତିଙ୍ଗ୍‌ ନାନ୍ ତାନେଙ୍ଗ୍‌ ସାକାକିନା, ଆଏତିଙ୍ଗ୍‍ ୱାଦ୍‌ ଦିନ୍‍କେ ୱାଜି ନାଙ୍ଗିଁ ବିଜାର୍‌ କିଜିମାନାତ୍‍ ।
ଆବେଟ୍‌ ପ୍ରବୁ ୱେର୍‌ତାନ୍‌, “ଇୟା ଅଦାର୍ମୁଦି ବିସାର୍‌କିନିକାନ୍‌ ଇନିକା ୱେର୍‌ସିନାନ୍‌, ଆକା ୱେଣ୍ତ୍ରୁ । ମାରି ମାପୁରୁଦି ଏମେ ସେବାକିନି ଲୋକୁ ୱେଡ଼େନାଡ଼ା ୱାନିଙ୍ଗ୍‌ କୁକ୍‍ସିମାନାର୍‍, ୱାନ୍‌ ନୋ ୱାରି ଉଣ୍ତିଙ୍ଗ୍‌ କିତିମାନି ତାଗ୍‌ଇ ପାଣିଦି ଉଣ୍ତିଙ୍ଗ୍‌ ୱାରିଙ୍ଗ୍‌ ସାକା କିଏନ୍‍ ନୋ, ୱାନ୍‌ ୱାରିଙ୍ଗ୍‌ ସାହାଜ୍ୟ କିଦେଙ୍ଗ୍‌ ୱେଡ଼ା କିନାନ୍‌ନୋ ? ନାନ୍ ମିଙ୍ଗିଁ ୱେର୍‌ସିନା, ୱାନ୍‌ ବେଗି ୱାରିଙ୍ଗ୍‌ କିତିମାନିମାନି ତାଗ୍‌ଇ ପାଣିଦି ଉଣ୍ତିଙ୍ଗ୍‌ ୱାରିଙ୍ଗ୍‌ ବିସାର୍‌କିନାନ୍‌ । ମାତର୍‌ ମନୁସ୍ୟପୁତ୍ର ୱାଜି ଦୁନିଆଦୁ ଇନିକା ବିସ୍‌ବାସ୍‌ ସୁଣାନ୍‌ ?”

ନିଜେ ନିଜେଦି ଦାର୍ମୁ ବୁଦି ମାନାତ୍‌ ଇଜି ଆଇ ୱିଜେରିଙ୍ଗ୍‍ ସେମାର୍‌ କିଜିମାନି ଏସ ନିଜେଦି ମୁସ୍‌କୁ ଆସା ଇଡ୍‌ନି ଲୋକାଙ୍ଗ୍‌ ଜିସୁ ଇୟା କାତାଦାନ୍‍ ଇର୍ହାନ୍‌, ରିଏର୍‌ ଲୋକୁ ପାର୍‌ତନା କିନି ଉଣ୍ତିଙ୍ଗ୍‌ ମନ୍ଦିର୍‌ତୁ ସରଆର୍‌, ଅରେନ୍‍ ପାରୁସି ମାରି ଆଇକାନ୍‍ ସିସ୍‍ଟୁ ଲସ୍‌ନିକାନ୍‌ ।
ପାରୁସି ଅରେନ୍‍ ନିରାଆନ୍‍ନୋ ନିଜେଦିମାନୁ ଇୟାୱାଜା ପାର୍‌ତନା କିଦେଙ୍ଗ୍‌ ଆସ୍‌ତାନ୍‌, ଏ ମାପୁରୁ, ନାନ୍ ନିଙ୍ଗିଁ ଦନ୍ୟବାଦ୍‌ ସିଜିନା ଜେ, ନାନ୍ ଆଇ ୱିଜେରି ଲୋକା ୱାଜା କାତ୍‍ନିକାନ୍‍, ଅଦାର୍ମୁ, ଦାରିପାଣି ବା ଇୟା ସିସ୍‍ଟୁଲସ୍‍ନିୱାନି ୱାଜାବା ଆଏ; ନାନ୍ ୱାରାମ୍‍ତୁ ରିନେଣ୍ତ୍‍ ଉପାସ୍‌ କିଜିନା ମାରି ନାନ୍ ଉଣ୍ତାକିନିକା ଦାସ୍‌ବାଗ୍‌ତାନ୍‌ ଉନ୍‌ଡ୍ରି ବାଗ୍ ସିଜିନା ।
ମାତର୍‌ ସିସ୍‍ଟୁ ଲସ୍‌ନିକାନ୍‌ ଆକ ନିଲ୍‍ସି ମୁସ୍‌କୁ ତରିନ୍‌ ସୁଡଦେଙ୍ଗ୍‌ ବା ସାସ୍‍କିଦେଙ୍ଗ୍‍ ଆଟ୍‍ଏତାନ୍‍, ମାତର୍‌ ନିଜେଦି ବକାଦୁ ଡାକାଜି ଇର୍ହାନ୍‌, ଏ ମାପୁରୁ, ନାନ୍ ପାପି, ନାଙ୍ଗିଁ ଦୟା କିଆ । ନାନ୍ ମିଙ୍ଗିଁ ଇଜିନାନ୍‌, “ଆୟା ପାରୁସି ଆଏନ୍‍, ମାତର୍‌ ଇୟା ସିସୁଟୁଲସ୍‌ନିକାନ୍‌ ଦାର୍ମୁ ଲୋକୁ ଆଜି ନିଜେଦି ଇଲ୍‌ତୁ ସର୍‌ଆନ୍‌; ମାତର୍‌ ଏମେକାନ୍‍ ନିଜେଦିଙ୍ଗ୍‍ ପେରିକାନ୍‌ ଇଜି ତର୍‍ଆନ୍‍, ୱାନିଙ୍ଗ୍‌ ଇସ୍ରିକାନ୍‌ କିନାର୍‍, ମାତର୍‌ ଏନ୍‌ ନିଜେଦିଙ୍ଗ୍‍ ଇସ୍ରିକାନ୍‍ କିନାନ୍‌, ୱାନିଙ୍ଗ୍‌ ପେରିକାନ୍‌ କିନାନ୍‌ ।”


ଜିସୁ ଏଣ୍ତେସ୍‌ ଇସ୍ରିକଡ଼ରି ମୁସ୍‌କୁ କିୟୁ ଇଡ୍‌ଜି ମୁଟ୍‍ନାନ୍‍, ଇୟାଉଣ୍ତିଙ୍ଗ୍‌ ଲୋକୁ ୱାରିଙ୍ଗ୍‌ ବା ଜିସୁଦି ଲାକ୍‌ତୁ ତାତେଙ୍ଗ୍‌ ଆସ୍‌ତାର୍‌; ମାତର୍‌ ସିସୁର୍‍ ଆକା ସୁଡ଼ୁଜି ୱାରିଙ୍ଗ୍‌ ଆଦ୍‌ରିସ୍‌ତେଙ୍ଗ୍‍ ଆସ୍‌ତାର୍‌ । ମାତର୍‌ ଜିସୁ ୱାରିଙ୍ଗ୍‌ ନିଜେଦି ଲାକ୍‌ତୁ କୁକ୍‌ତା ଇର୍ହାନ୍‌, ଇସ୍ରି କଡ଼ରିଙ୍ଗ୍‌ ନା ଲାକ୍‌ତୁ ୱାଦେଙ୍ଗ୍‌ ସିଦୁ, ମାରି ୱାରିଙ୍ଗ୍‌ ମାନା କିମାଟ୍‌; ଇରିଙ୍ଗ୍‌ ମାପୁରୁଦି ରାଜି ଇୟାୱାଜା କଡ଼ରିଦି ।
ନାନ୍ ମିଙ୍ଗିଁ ସତ୍‌ ଇଜିନା, “ଏନ୍‌ ଇସ୍ରିକଡ଼ୱାଜା ମାପୁରୁଦି ରାଜି ଆସ୍‍ଏନ୍‍, ୱାନ୍‌ ଏଣ୍ତେସ୍‍କିଜିବା ମୁସ୍‍କୁପୁର୍‌ ସଣ୍ଡ୍ରେଙ୍ଗ୍‌ ଆଟ୍‍ଏନ୍‍ ।”


ଅରେନ୍‍ ଜିହୁଦିର୍‌ ପେରିକାନ୍‌ ଜିସୁଙ୍ଗୁଁ ୱେନ୍‌ବାତାନ୍‌, “ଏ ସତ୍‍ ଗୁରୁ, ଏସ୍‌କାଙ୍ଗ୍‌ୱିଜିଇ ଜିବନ୍‌ ପୟ୍‌ନି ଉଣ୍ତିଙ୍ଗ୍‌ ନାନ୍ ଇନିକା କିନା ?”
ଆବେଟ୍‌ ଜିସୁ ୱାନିଙ୍ଗ୍‌ ଇର୍ହାନ୍‌, “ନାଙ୍ଗିଁ ନେଗିକାନ୍‍ ଇଜି ଇନିଦାନିଙ୍ଗ୍‌ ଇଜିନି ? ମାରି ମାପୁରୁଙ୍ଗୁଁ ଡ଼ିସ୍‍ତିଙ୍ଗ୍, ମାରି ଆଇକାନ୍‍ ଏନ୍‌ବା ସତ୍‌ ସିଲେନ୍‌ । ପ୍ରବୁଦି ନିୟମକୁ ୱିଜୁ ତୋ ନିନ୍‌ ନେସ୍‍ତିମାନି, ଦାରିପାଣି କିମାଟ୍‌, ଲୋକାଙ୍ଗ୍‌ ସାୟାମାର୍‌ଗା ଡାକ୍‌ମାଟ୍‌, ଡଙ୍ଗାଁ ପାଣି କିମା, ମିସ୍‌ସାକି ୱେର୍‍ମା, ନିଜେଦି ବୁବା ୟାୟାଏଙ୍ଗ୍‍ ମାନାଆ ।”
ୱାନ୍‌ ୱେର୍‌ତାନ୍‌, ଇୟାୱିଜୁ ନାନ୍ ମୁରୁଲିୱାଲେରାନ୍‍ ମାନାଜି ୱାଜିନା ।
ଜିସୁ ଇୟାକା ୱେନ୍‌ଜି ୱାନିଙ୍ଗ୍‌ ଇର୍‌ଆନ୍‌, ନି ଉଣ୍ତ୍ରିବିସୟ ଉଣାମାନାତ୍‌; ନିନ୍‌ ନିଜେଦି ୱିଜୁ ସମ୍ପତ୍ତି ପର୍‌ଜି କାକୁର୍ତି ଲୋକାଙ୍ଗ୍‌ ବାଟାକିଜି ସିଆ, ମାରି ନିନୁ ମୁସ୍‌କୁପୁର୍‌ତୁ ଦନ୍‌ ପୟ୍‌ନି; ମାରି, ୱାଜି ନା ୱେନ୍‌କା ରାଆ । ମାତର୍‌ ୱାନ୍‌ ଇୟାୱିଜୁ ମାଟା ୱେନ୍‌ଜି ନାଣ୍ତ୍‍ ଦୁଃକ୍‍ ଆତାନ୍‌, ଇରିଙ୍ଗ୍‌ ୱାନ୍‌ ପେରିମାଜନ୍‍ ମାର୍‌ଆନ୍‌ ।
ଆବେଟ୍‌ ୱାନି ଦୁଃକ୍‌ ଆନିକା ସୁଡ଼୍‌ଜି ଜିସୁ ନିଜେଦି ସିସୁରିଙ୍ଗ୍‌ ଇର୍ହାନ୍‌, ଏମେ ଲୋକ୍‌ତିଙ୍ଗ୍‌ ଦନ୍‍ ମାନାତ୍‌, ୱାର୍‌ ଏସ କାସ୍ଟୁଦାନ୍‍ ମାପୁରୁଦି ରାଜିଦୁ ସନାର୍‌ ! ଇରିଙ୍ଗ୍‌ ମାପୁରୁଦି ରାଜିଦୁ ମାଜନ୍‌ ଲୋକୁ ସନି ବାଦୁଲୁ ସୁଜିଦି ବର୍‌ ସିଜି ଉଟ୍‌ ଡ଼ୁଗୁନିକା ଉସାସ୍‌ ।
ଏମେ ଲୋକୁ ଇୟା ମାଟା ୱେର୍‌ଆର୍‌, ୱାର୍‌ ଇର୍ହାର୍‌, ଆର୍‌ତିଙ୍ଗ୍‌ ଏନ୍‌ ରକିୟା ପଇଦେଙ୍ଗ୍‍ ଆଟ୍‍ନାନ୍‍ ?
ମାତର୍‌ ଜିସୁ ଇର୍ହାନ୍‌, “ଆମା ପାଣି ଲୋକାମାଣାନ୍‌ ଆଏତ୍‍, ଆୟା ପାଣି ମାପୁରୁ କିନାନ୍‌ ।”
ଆବେଟ୍‌ ପିତର୍‌ ଇର୍ହାନ୍‌, “ସୁଡୁଆ, ମାପୁ ନିଜେ ନିଜେଦି ୱିଜୁ ଡ଼ିସ୍‌ସି ନି ୱେନ୍‍କା ୱାତା ମାନାପ୍‌ ।”
ଜିସୁ ୱାରିଙ୍ଗ୍‌ ଇର୍‌ଆନ୍‌, ନାନ୍ ମିଙ୍ଗିଁ ସତ୍‌ ୱେର୍‌ସିନା, ଏମେ ଲୋକୁ ମାପୁରୁଦି ରାଜିଦି ଉଣ୍ତିଙ୍ଗ୍‌ ଇଲୁ କି ନିଜେଦି ଆଡ଼ି କି ତଡ଼ାନ୍‌ କି ବୁବାୟାୟା କି କଡ଼କକ୍‍ରା ଡ଼ିସ୍‍ତି ମାନିଦେର୍‌ । ଇୟା ଦୁନିଆଦୁ ନାଣ୍ତ୍‍ଗୁଣ୍‍ ମାରି ୱେନ୍‌କାରି କାଡ଼ାଦୁ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପୟ୍‌ନାନ୍‌, ଇୟାୱାଜା ଲୋକୁ ଏର୍‌ ସିଲେର୍‌ ।


ୱେନ୍‌କା ଜିସୁ ବାର୍‍ଲୋକ୍ ୱେର୍‌ଏ କିଜି ୱାରିଙ୍ଗ୍‌ ୱେର୍‌ତାନ୍‌, “ୱେନ୍‌ଡ୍ରୁ, ମାପ୍‌ ଜିରୁସାଲମ୍‌ତୁ ସଲ୍‍ସିନାପ୍‍, ମାରି ମନୁସ୍ୟପୁତ୍ରଦି ବିସୟ୍‌ତାନ୍‌ ବାବବାଦିରି ଆମାୱିଜୁ ରାସ୍‌ତାମାନାର୍‌, ଆୟାୱିଜୁ ପୁରା ଆନାତ୍‌; ଇରିଙ୍ଗ୍‌ ୱାନ୍‌ ଅଣଜିହୁଦି କିୟୁଦୁ ସର୍‍ପେ ଆନାନ୍‌, ମାରି ୱାର୍‌ ୱାନିଙ୍ଗ୍‌ ସେମାର୍‍ କିନାର୍‌, ୱାନିଙ୍ଗ୍‌ ଅପ୍‍ମାନ୍‍ କିନାର୍‌ ୱାନି ମୁସ୍‌କୁ ପୁସ୍‍କାଡ଼ାଙ୍ଗ୍‍ ପୁସ୍‍ନାର୍‍, ୱାନିଙ୍ଗ୍‌ କର୍‌ଡା ଡ଼େଇଜି ସାୟାମାର୍‌ଗାଡାକ୍‌ନାର୍‌, ମାରି ମୁନେଟି ୱେନ୍‌କା ୱାନ୍‌ ମାରିଡ଼େସି ଜିବନ୍‌ଆଜି ନିଙ୍ଗିଁନାନ୍‌ ।”
ମାତର୍‌ ୱାର୍‌ ଇୟାୱିଜୁ ବିସୟ୍‌ ଇନିକାବା ନେସ୍‌ଏତାର୍‌; ଇୟା ବାକ୍ୟ ୱାରିମାନ୍‍କୁ ମାର୍‍ଗିତା ତେବାତାତ୍‌, ମାରି ଇନିକା ଇନିକା ଇଜିମାର୍‌ଆର୍‌, ଆୟାୱିଜୁ ୱାର୍‌ ନେସ୍‍ଏଜି ମାର୍‌ଆର୍‌ ।


ଜିସୁ ଜିରିହୋଦି ଲାକ୍‌ତୁ ଆଜିମାରି ୱାଲେ ଅରେନ୍‍ କାଣା ସାରି ପାଡ଼ି ବାସ୍‌ତାନ୍‌ ବିକ୍‍ୟା ଲସ୍‌ସି ମାର୍‌ଆନ୍‌ । ୱାନ୍‌ ଲୋକୁ ବୁଲାନି ସେଉଡ଼ୁ ୱେନ୍‌ଜି ମାଟା ଇନିକା ଇଜି ୱେନ୍‍ବାଦେଙ୍ଗ୍‍ ଆସ୍‌ତାନ୍‌ ।
ୱାର୍‌ ୱାନିଙ୍ଗ୍‌ ଇର୍ହାର୍‌, ନାଜରିୟତିୟ ଜିସୁ ଇୟା ସାରି ସିଜି ସଲ୍‌ସିନାନ୍‌ ।
ଆବେଟ୍‌ ୱାନ୍‌ ନାଣ୍ତ୍‍ ଆଉଲି ଆଜି ଇର୍‌ଆନ୍‌, “ଏ ଜିସୁ, ଦାଉଦ୍‌ତି ମାରିନ୍‍, ନାଙ୍ଗିଁ ଦୟା କିଆ ।”
ମାତର୍‌ ଆଗିଡ଼ି ସଲ୍‍ସିମାରି ଲୋକୁ ୱାନିଙ୍ଗ୍‌ ଆଲେଜ ମାନ୍‌ଡ଼୍ରେଙ୍ଗ୍‌ ଇଜି ଆଦିରିସ୍‌ତେଙ୍ଗ୍‍ ଆସ୍‌ତାର୍‌, ମାତର୍‌ ୱାନ୍‌ ମାରି ନାଣ୍ତ ଆଉଲି ଆଜି ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, “ଏ ଦାଉଦତି ମାରିନ୍‍, ନାଙ୍ଗିଁ ଦୟା କିଆ ।”
ଆବେଟ୍‌ ଜିସୁ ନିଲ୍‍ଜି ୱାନିଙ୍ଗ୍‌ ନିଜେଦି ଲାକ୍‌ତୁ ତାତେଙ୍ଗ୍‌ ଇଜି ଆଦେସ୍‌ ସିତାନ୍‌; ମାରି, ୱାନ୍‌ ଲାକ୍‌ତୁ ୱାତାନ୍‍ଆକା, ଜିସୁ ୱାନିଙ୍ଗ୍‌ ୱେନ୍‌ବାତାନ୍‌, “ନାନ୍ ନି ଉଣ୍ତିଙ୍ଗ୍‌ ଇନିକା କିନା ଇଜି ନିନ୍‌ ବଦା କିଜିନି ?” ୱାନ୍‌ ଇର୍‌ଆନ୍‌, “ଏ ପ୍ରବୁ, ନାନ୍ ଏଣ୍ତେସ୍‌ମାରି ସୁଡ଼ୁଦେଙ୍ଗ୍‌ ଆଟ୍‍ନା ।”
ଜିସୁ ୱାନିଙ୍ଗ୍‌ ଇର୍‌ଆନ୍‌, “ଆରିଙ୍ଗ୍‌ ସୁଡ଼ୁଆ; ନି ବିସ୍‌ବାସ୍‌ ନିଙ୍ଗିଁ ନେଗେନ୍‍ କିତାମାନାତ୍‌ ।”
ଆୟାଦାପ୍ରେ ୱାନ୍‌ ସୁଡ଼ୁଦେଙ୍ଗ୍‍ ଆଟ୍‍ତାନ୍‍ନୋ ମାପୁରୁଙ୍ଗୁଁ ଦନ୍ୟବାଦ୍‌ କିଜି କିଜି ୱାନି ୱାଲେୱାଲେ ବୁଲାଦେଙ୍ଗ୍‌ ଆସ୍‌ତାନ୍‌ ମାରି ଲୋକୁ ୱିଜେରେ ଆକା ସୁଡ଼ୁଜି ମାପୁରୁଦି ପ୍ରସଂସା କିତାର୍‍ ।

සවන් දෙන්න ଲୁକ 18