Хьели Гьание ягъмиш дыъыр маа йийцӀыр на кьӀваӀр шагырт, кьӀо-кьӀоне сидилгара гьабыр сиене шегьерма на мукъӀма, джуды улихьде, Выдж руъус гъилыы гъадухъунды джигима. Гьание рухьура гьабишде:
– Еш бала и, ладжбарар адиш.
Бес гьихьяъ ешилды Иессиеде,
Ешиле маа ладжбарар сихъидгыхь!
Дырых! Гадакъ. За ваӀ гелер ублешды нехирдик кал сидиргара а. ЛаӀмаӀбуш я кудкун, я хваб, я гъилыыдыбыр, я гьалысна салам рыкъӀа мылвыцӀ. Гьалды-га хала дыхьыйне, суьхьде йихьяъ: «Ассаламу гьӀалейкум!» Нагагь гьади салам выс лейихды эдеми анахъун, выхьды салам гьанийхьван абгаси, диш – хъувургъур, ваӀхӀде хъивикьаси. Гьа хала сыкьӀаӀ, уле, рагъ, гьабишихда шыв ади ки. Гьис хьуйне, ладжбарас кире вын лазим и. Халаа хала мадугъӀ. Нагагь ваӀ гьилды-га шегьерди йидкьыр анахъун, гьади ваӀ кьабыл дыъыр анахъун, уле ваӀс выдбыйды, хъадаъ гъабишды гьӀузир кидбыр, гьихьяъ: «Йинчид ПагьӀчаалыгъ бейде виъи!» Нагагь ваӀ йидкьыр шегьерди, гьади ваӀ кьабыл джыдыъыхьвна, гьадид шееримаа хьуъ дырых, рухьура: «Выхьды шегьердаа ихьды гъилабак киджидхъыд руг ки кине ваӀде суда хъыъыр хъывылцӀара. Амма гьацӀ: Йинчид ПагьӀчаалыгъ бегеде виъи!» Рухьура ваӀде, гьа Йыгъа Содомдис рагьӀат йикиси ми шегьердыхъаъ!
Хаджалат вас, Хоразин!
Хаджалат вас, Вифсаида!
Тирди не Сидонди
Выхьды джигиди йишид калды
йиширий гьӀаламатбыр
Гьабише мысъиди, батӀалма на рыхъӀа аӀчӀур,
ГьӀумир кывырхӀа ваъасий,
Гьадыыла Эхир-Кьияматас Тирес не Сидондис ваӀхъӀаъ рагьӀат йикиси!
Ва ки, Капернаум, вы вирзед хьур фикир ваъарама?
Вы джегьеллемди ывхӀыси!
– ВаӀхӀде хъабцудбыйды Захда хъабцуд гьӀасаб и,
ВаӀ гъӀасаба джыдыъыдбише Зы гьӀасаба джаъадаана и.
Зы гьӀасаба джаъание Аллагь гьӀасаба джаъадаана и.
ЙийцӀыр на кьӀваӀр шагырт хъуьдуьргъуьр хъӀудире, шадна.
– Илагьи, – рухьура гьабише, – е Выды дур хакьыр бииругъ гьыъыйне, иблисмар ки кине ес икьрар руъурай!
– Зас гьагур ай, Иблис ХӀаляа цӀай рапыд кал саъ либхьур ай, – рухьура ГьӀасара. – Гьагварама За ваӀде выр а яхӀ ггарашыы на акьрабмыы мыкӀ сывхӀыйнеки, душманашихьван ара йыдхӀыйнеки – гьидирене ваӀс зарар джывысды. Амма ваӀ иблисмар ваӀс икьрар руъура хьур шад мадугъӀ, выхьды дурубыр хӀалик кихьир а хьур шад диш.
Гьааса гьухьур мадана Илагьиед РухӀ аӀчӀури ГьӀасад ЙикӀе. Гьание рухьура:
– Дид, хӀалды на чӀирид Иесси!
Гьакьаллыдбишыыла дагулды
Ва кьул кьухьваӀлик кидишдыбишис не кӀаъдыбишис ачых гьыъыдыхъаъ
Вас аферин!
Ий, Дид, гьаасад виъий выды йыхды ихтияр!
Изды Диде сиенедид ихтияр Зада выр а,
Гьалысна гьацӀаардиш Дид, духарыыла гъайри,
Са ки Духара ачых гьаъадбишыыла гъайри.
Хьели, ругъур мутагьӀлимешихда. ГьӀасара са гьабишде рухьура:
– Шадамерд йишин лазим и улабыр, ваӀс гьагудбыйды гьагуйне.
Инаамиш диш Заа, балад пайгъампарашис не пагьӀчаагьашис ваӀс гьабгудбыйды гьагур йигара ай,
йидж гьагурдиш,
ваӀс ун адбыйдыдид ун йишир йигара ай,
йидж ун хъӀыхӀырдиш.

Ай гьади са Диндид магьӀалим, гьание ГьӀасад амзыр гьаъас хьур, рухьура Гьанийде, лаъ лузур:
– МагьӀалим, за шыв гьыъыр йигара, таабатаа йыкьамаъ ешемиш йикис агын бадаана?
– Шыв киниъи гьадиклаа Диндид Дахьвтарак? – хулкара гьанийдаа ГьӀасара. – Шыв кьыле гьаъара ва гьадаа?
– «Хъыгара йиш йикӀидаана выды Илагьи, сиене джандаа, сиене кьууветехьван, сиене выды фикирмыхьван». Са ки «выды бейде хад хъыгара йиш вас вы кал», – рухьура тиние.
– Ва дуьзене джываб хъывыри, – рухьура ГьӀасара. – Гьааса гьаъ – вы мыс-га ешемиш йикиси.
Тиние хьуйне, выдж ГьӀасад улихьде темиз хъаъас хьур, хулкара ГьӀасадаа:
– Изды бейде хад выши?
ГьӀасара джываб рухьура:
– Йиъина ай эдеми Иерусалимдаа Иерихонди, хьели ылхӀаре гьа хъачахашды хыле. Мибише гьа етир, хадбыр ки хӀаашур, хъӀудире, йикьисды гьӀаляа гъана ми гетыр. Гьааса руъура, гьеми рыкъӀаа хьуъ йиъина ай дибир, амма ми гъариб гьагур, рыкъӀыд ти суруу гаагъӀуре. Гьааса гьаъара левите ки: гьа джигиди лийкьыр, яраллы гьагур, ти суруу аӀгъӀабчӀура. Самаритянара, хьуйне, гьа рыкъӀа ад, бегеде йыхьыр, гьагур, гьӀаюхь гьаъара, уула хьура руъура тинийды, йыхӀынбыр темиз гьыъыр чахырахьван, гьаммыс хӀаред йыхӀыр, йитӀе гьаъара. Хьели джуды къатираа лагъур, гыргара мийманханади. Гьади ки гьанийды аӀйлуьг гьаъара, инсаф выъыр. Джыбра хъуд йыгъа, выдж хъӀугъӀуди, вылцӀара гьание мийманханыдид иессиеде кьӀваб манут, рухьура: «Дерде ийиъ гьанийды, нагагь ва миммыхъаъ баладбыр хардж гьыъыхьвна, хъиъиди за вада хъывыси».
Хьибнийиклаа гьилды руъура, выды чӀилмыхьван, хъачахаше йыгъ йыгынийис бейде?
– РагьӀим выъыдбыйды, – рухьура тиние.
– Рых, ва ки гьааса гъаъ, – рухьура ГьӀасара.

РыкъӀа аӀхъӀачӀур, ГьӀаса мутагьӀлимер ки хъуна руъура са мукъӀа.
Гьади Гьа джуды хала сес ваъара са «Марфа» хьур хьыдыние. Гьанийихда ай «Майрам» хьур риши. Гьа, ГьӀасад гъилябада суркьур, хъарабцура ай Гьанийды чӀилмыхда. Марфа хьуйне, улесды-рагъасды гьӀазыр гьаъара, телесых риъий. Гьание бегеде йиркьыр, рухьура:
– Гьай Иесси, вас ришире сиене гвалахбыр заа лийир ад гьабгурдишме? Гьанийде зас куьмег гьаъ хьур гьис джурухьуд?
– Гьай Марфа, гьай Марфа, – рухьура гьанийде ГьӀасара, – вы баладмыд дерде а, аа суджуркьур, амма лазимды са кар йиъи. Майрама гьа ара кидбыйды кар кеэтӀир а, гьа гьалдаана гьанийдаа хӀаашус йикисдиш.

සවන් දෙන්න Лукара йибкьыд Шадды Хабар 10