Йе дие оьжо, дие малъ-хъайлана шоваъла̄къа,
дие амрована йакӀиъ йоваха.
Гьолло дибо оьмро бихалокӀца,
дул сагъ-саламатлъина насиб йо̄с.
Гургьел-цӀобна божилъина тӀутӀа̄къа,
гьоллол билъалъ абоцацой йеᵸйахела,
йакӀила лӀибакьана ча̄ха.
Гьолълъогъа муьгъатта̄ Аллагьна аьдамлана рази ба̄хъца дӯкьа,
кӀетӀо ца̄на гулца дӯкьа.

ЙакӀо йоᵸкъонна БетӀергьалликьа ми бож,
дибола аᵸкъло-лъайликьа божна эᵸкье-гова̄къа.
Нӣйо гьино йохдана, Аллагь икъелал икье-аькье ми –
дул кӀетӀо гьино йегалца Гьолцо.
Мизу дул аᵸкъил гейлӀо гицӀа̄къа.
БетӀергьаллихъа гьичӀе, кешлъиладойс ата̄к;
Дибола магъол дарулъилаъ йахъца гьули,
дибо бицодана къуватабла йовагьца гьолълъо.
БоцӀи-ризкъилас бутӀана, гьула̄зу мицалъ гуцӀойо аьᵸйдда̄ш муькъона
ми БетӀергьаллил назро йова.
Бета дибо баькьла муькъодаш йовацца,
кӀейана ицӀцӀа гъинолис нитоназу гъоьдо богьна боцца.
БетӀергьаллис адло-тадбир ми боха, дие оьжо,
Гьолцо дӯкьа аьйиб гуллъо ми данде эца̄къа.
Гьинил аццала сукӀол бо̄с БетӀергьалли адло;
абол аццала оьждисцой гьолцос тӀалабна бо̄с.

Гьардараб гаьъад аᵸкъиллъи гьинил йиᵸхъойо сукӀо,
гьула̄зу гьинил аᵸкъло-лъай михъойо сукӀона!
Аᵸкъиллъи йиᵸхъо̄лъи кӀетӀо гей йаᵸцойо окколас аьᵸга михъовагъа,
йаᵸцова меседлигъа кӀетӀо гей гьолълъоъкьа̄ йиᵸхъоцас жона.
Жавгьар-якъутлигъана багьаяб гей гьули,
дул йакӀил йаццас къацӀцӀо жо гьолълъол данде йоᵸкъойхъаъас.
Гьолълъола кӀетӀакьала каъ гей оьмролаш йихалолъи,
оᵸкьакьала каъ гей бечелъина къадро-къиматна.
ЙакӀил раьгьат бахъцас кӀетӀа̄ гьинода гей гьолълъос,
къацӀцӀола гьолло гьинода̄на рекъеллила гьид бейажеш.
Аᵸкълолакьа муьхо-маьхецала̄л оьмролаш хоьхо гей гьоло,
гьолълъол михъа̄ тил тухъилла̄на талигьабла гей.

Аᵸкъиллъилаъкьа̄ БетӀергьалли вагьалӀо ракьлил бигъа гулло,
аᵸкълолаъкьа̄ гьасна йилӀакъолло.
Гьолцола лъайлиъкьа̄ мицакьа эᵸхейа йеᵸйагьийо,
гьаса-мусаъкьа̄ мицакьа водо гуйиллийо.

Йе дие оьжо, къона жо гьаьгъа аьᵸйда̄ш йолъола̄къа ми –
аᵸкълолакьа оᵸкъо-тохъийолъина кӀетӀо-цаццо батӀа йовал йикъейолъина:
вагьли йахъца дибола оьмролал чӀаголъи,
гьула̄зу билъалъ йеᵸхелцас кӀетӀо тетена.
Гьолълъогъа муьгъатта̄ ми гьоᵸсна гьичӀечӀе эᵸкьеш дибола гьидлакьа̄,
хаьбана хаьлӀе муьхъаъаш дибо.
УтӀал аᵸко эᵸкьелъна ми гьицӀаъас,
утӀна йоᵸкъойо малӀона кӀетӀо йахъца.
ЙакӀкьа гаьчӀел мокъова балагьлихъана гьицӀа̄къа,
мунагьла тели гаьгьийа̄кьа йоᵸкъоцала къарилъилахъана гьицӀа̄къа.
БетӀергьан Аллагь ахъца дул михъа̄ тигъа тухълал йоᵸсоцой,
дибо хаьба къорлиъ михъанна мейаъас Гьолцо.
Дӯхъа йогьна йахъцас кӀетӀослъина,
вере, рес гаьчча сукӀол йойчӀе йечаннейа̄къа.
Гьицала мадугьаллил йатӀийо жо дӯхъа зогъда,
гьолцохъа ниса̄къа ми же ата̄ олъолӀо,
бета гогьлӀо, хиса нилӀаллӀо нисона.
Дӯъ божилъи гаьгьийа мадугьаллил кешлъилал иᵸгьолда̄къа.
Дул кешлъи йойэшла сукӀогъой аьдада даьъба бова̄къа.
Зулмо-сукӀол йахъийакьа ми йакӀо йагъолла̄къа,
гьолцола гьинода̄ъас гьоᵸсна кьодос гьино гьакӀа̄къа.
Мекълъи-тӀекълъи йогьцас сукӀо БетӀергьаллил атӀаъас,
валийа Гьолцо гьиндой гьицадаба̄кӀца.
Кешлъи йогьцала сукӀола билӀокьа БетӀергьаллис наьъана мокъос,
муъмилла̄ла билӀо-аᵸхакьа Гьолцо баркат мокъолца.
КӀетӀосинабликьа лъоᵸвабацала аьдамла̄кьа Гьули лъоᵸвас,
мутӀиъ бахъийа̄кьа Гьули рази ахъца.
Аᵸкъилла̄л ирслиъ къадро-къимат михъос,
аьбдалла̄л инжитлъи-гьаькъирлъи телилъца.

සවන් දෙන්න Акълова 3