Тхьэмафэм иапэрэ мафэм нэф къызэшъым, бзылъфыгъэхэм осэшхо зиӀэхэу, мэӀэшӀу зыпихырэ щыфэн дагъэхэу агъэхьазырыгъэхэр зыдахьхи, къэунэм кӀуагъэх, нэмыкӀ горэхэри ягъусэхэу. Зынэсхэм, мыжъошхор къэунэм ичӀэхьапӀэ ӀугъэукӀорэикӀыгъэу рихьылӀагъэх.
Ау къэунэм зычӀахьэхэм, Зиусхьан Исус ихьадэ чӀагъотыжьыгъэп. Ар зыфахьын амышӀэу щытхэзэ, зэплъэхэм, щыгъын фыжьыбзэкӀэ фэпагъэхэу лӀитӀу амышӀахэу апашъхьэ къиуцуагъ. Бзылъфыгъэхэр къэщтагъэхэу ашъхьэхэр чӀыгум зырагъэзыххэм, а лӀитӀумэ къараӀуагъ: – ЛӀагъэхэм адэжь псаум сыд пае шъущылъыхъура? Ар мыщ дэжьым щыӀэжьэп, лӀагъэхэм къахэтэджыкӀыжьыгъ. Ар Галилей хэкум щыӀэзэ, моущтэу къызэрэшъуиӀогъагъэр шъугу къэжъугъэкӀыжь: «ЦӀыф Лъэпкъым ы Къо псэкӀод зышӀэрэ цӀыфхэм аӀэкӀэхьэныр къыпыщылъ, къащыми тыраӀулӀэнышъ, ящэнэрэ мафэм лӀагъэхэм къахэтэджыкӀыжьын фай».
Ар къызаӀом, Исус игущыӀэхэр агу къэкӀыжьыгъэх.
Бзылъфыгъэхэр къэунэм къычӀэкӀыжьхи, Исус игъогу рыкӀорэ нэбгырэ пшӀыкӀузымрэ адрэ ягъусэгъэ пстэумрэ а зэкӀэри араӀотэжьыгъ. Апостолхэм ар языӀотагъэхэр мы бзылъфыгъэхэр арыгъэх: Магдалэ щыщ Мерэми, Иуани, Якъубэ янэ Мерэми, адрэ бзылъфыгъэхэу ахэмэ ягъусагъэхэри. Бзылъфыгъэхэм къаӀуагъэхэм зи къарымыкӀэу апостолхэм къащыхъугъ, ашӀошъи хъугъэп. Ау Петрэ тэджи, къэунэм чъагъэ. Зыриуфэхи, къэунэм зычӀэплъэм, чэфынхэм анэмыкӀ зи ылъэгъугъэп. Хъугъэр ыгъэшӀагъоу иунэ ыгъэзэжьыгъ.


А мэфэ дэдэм Исус игъогу рыкӀохэрэм ащыщхэу нэбгыритӀу километрэ пшӀыкӀузкӀэ Ерусалим пэчыжьэу щыт Эммаус зыцӀэ къуаджэм кӀощтыгъэх. КӀохэзэ, хъугъэ-шӀэгъэ пстэуми арыгущыӀэщтыгъэх. ЗэдэгущыӀэхэу, зэупчӀыжьхэу кӀохэзэ, Исус абгъодахьи, ягъусэу кӀуагъэ. Ау ахэмэ анэхэм техъо яӀэм фэдагъ, зэрэ Исусыр ашӀэжьыгъэп.
– Гъогум шъутетэу сыда шъузэрыгущыӀэхэрэр, сыд паий шъунэшхъэйра? – ариӀуагъ Исус.
– Мы мафэхэм Ерусалим къыщыхъугъэ Ӏофхэр ащ дэсхэм ащыщэу зымышӀэрэ закъор орыщтын, – ыӀуи, ахэмэ ащыщэу Клеопэ зыцӀэм Исус къыриӀожьыгъ.
– Сыд Ӏофха? – яупчӀыгъ Исус. – Назарет щыщ Исус къехъулӀагъэр ары, – къыраӀуагъ ахэмэ. – Ар Тхьэмрэ цӀыф пстэумрэ адэжькӀэ игущыӀэхэмкӀи Ӏофхэу ышӀагъэхэмкӀи лъэкӀышхо зиӀэ пегъымбарыгъ. Дин пэщэшхохэмрэ Тхьэмэтэ Хэсэшхом итхьэматэхэмрэ Пилат укӀ тырырагъэлъхьаным пае, Пилат ар ӀэкӀагъахьи, къащым тырырагъэӀулӀагъ. Израил лъэпкъым шъхьафитыныгъэ къезытыщтыр ежь арэу тэ тыщыгугъыщтыгъ. Ащ нэмыкӀэу, а зэпстэури зыхъугъэр непэ мэфищ мэхъу, тибзылъфыгъэхэм ащыщхэми къэбар гъэшӀэгъон къытфаӀотагъ. Ахэр пчэдыжьым жьэу къэунэм кӀуагъэх, ау Исус ихьадэ къагъотыжьыгъэп. Къызагъэзэжьым, мэлэӀичитӀу къафэлъагъуи, Исус псаоу ахэмэ къараӀуагъэу къаӀотэжьыгъ. Тэ тщыщ зыгорэхэр етӀанэ къэунэм кӀохи, бзылъфыгъэхэм зэраӀуагъэм тетэу пстэури къагъотыгъ, ау Исус ышъхьэкӀэ алъэгъугъэп.
– Сыдэу къыжъугурыӀогъуай, пегъымбархэм аӀогъэ пстэури шъушӀошъ хъуныр сыдэу къин къышъуфэхъурэ! – ариӀуагъ Исус ахэмэ. – Христос ищытхъушхо иӀэ хъуным нэсыфэ, мы къинхэр ыщэчынхэ фэягъэба?
ЕтӀанэ Исус пегъымбар Мусэмрэ адрэ пегъымбар пстэухэмрэ къащегъэжьагъэу Тхьэм игущыӀэ тхыгъэ пстэуми ежь ехьылӀагъэу арытхэр зэхаригъэшӀыкӀыгъ.
Къуаджэу зыдакӀощтыгъэхэм игъунэгъу зэхъухэм, Исус къэмыуцоу блэкӀырэм фэдагъ. Ау ахэмэ къагъэуцуи, къыраӀуагъ: – Мафэр хэкӀотагъ, пчыхьи мэхъу пэт. Арышъ, тигъусэу къанэ. Ар къызаӀом, Исус адишти, адэжь къэнагъ.
ЕтӀанэ Исус ахэмэ ягъусэу шхэнэу Ӏанэм зыпэтӀысхьэм, хьалыгъур къыштагъ, Тхьэм щытхъу фишӀи, зэгуичи, аритыгъ. Джащыгъум анэхэр къэплъэжьхи, зэрэ Исусыр къашӀэжьыгъ. КъызашӀэжьым, Исус кӀодыжьи, анэхэмкӀэ алъэгъужьыгъэп.
– Гъогум тызытетым, Исус къыддэгущыӀэу Тхьэм игущыӀэ тхыгъэхэр къыдгуригъаӀо зэхъум, игущыӀэхэмкӀэ тызэригъэгушӀуагъэм пае, тыгухэр машӀом фэдэу къызэкӀигъанэщтыгъэба? – зэраӀожьыгъ ахэмэ.
Ардэдэм ахэр къэтэджыжьхи, Ерусалим агъэзэжьыгъ. Апостол пшӀыкӀузымрэ адрэ ягъусэхэмрэ зэрэугъоигъэхэу къагъотыгъэх.
– Зиусхьаныр шъыпкъэ дэдэу лӀагъэхэм къахэтэджыкӀыжьыгъ, Симони зыкъыригъэлъэгъугъ, – аӀуагъ апостолхэм. Ежьхэми гъогум къыщяхъулӀагъэри, Исус хьалыгъур зызэгуечым, къызэрашӀэжьыгъэри къаӀотэжьыгъ.


Ахэмэ мы Ӏофхэр къаӀуатэзэ, ежь Исус азыфагу къиуцуи, къариӀуагъ: – Гупсэф шъуиӀэу шъопсэу.
Ахэр къызэрэщтагъэхэм пае, агучӀэ изыгъэу, хьэдэджадэ алъэгъоу къашӀошӀыгъ.
– Сыд пае шъугумэкӀыра? – къариӀуагъ Исус. – Сыд пае шъугу щэч къихьэра? Сэ сӀэхэмрэ слъакъохэмрэ шъукъяплъ. Сэр дэдэр ары. ШъукъыстеӀаби, шъуеплъ, сыда пӀомэ, хьэдэджадэм шъори, лыри, къупшъхьэри иӀэхэп, ахэр сэ сиӀэу зэрэшъулъэгъурэм фэдэу.
Мы гущыӀэхэр къызеӀохэм, ыӀэхэмрэ ылъакъохэмрэ аригъэлъэгъугъ. ГушӀуагъом къыхэкӀэу ашӀошъ мыхъоу агъэшӀагъо зэхъум, къариӀуагъ: – Мыщ дэжьым шхын горэ щышъуиӀа?
Пцэжъые гъэжъэгъэ ныкъо ратыгъ. Ар къаӀихи, апашъхьэ щишхыгъ.
– Сызышъухэтым къышъуасӀощтыгъэр мыры: пегъымбар Мусэ и Тэурат хабзи, адрэ пегъымбархэм ятхылъхэми, Орэд ЛъапӀэхэм сэ къысэхьылӀагъэу арыт пстэури къысэхъулӀэхэзэ, къэшъыпкъэжьынхэ фаех, – къариӀуагъ Исус ахэмэ.
ЕтӀанэ Тхьэм игущыӀэ тхыгъэхэм арытхэр зэхаригъэшӀыкӀхэзэ, къариӀуагъ: – Тхьэм игущыӀэ тхыгъэхэм арыт: Христос къин ыщэчын фаеу къыпыщылъ, етӀани лӀэнышъ, ящэнэрэ мафэм лӀагъэхэм къахэтэджыкӀыжьын фае. Сэ сцӀэкӀэ мы къэбарыр Ерусалим къыщегъэжьагъэу дунаим тет лъэпкъ пстэуми арагъэӀущт: шъуипсэкӀодшӀагъэхэм шъуафыкӀэгъожьи, Тхьэм ахэр къышъуфигъэгъущтых. Шъо а Ӏоф пстэуми шъуряшыхьат. ШъукъэдаӀу, сэ ся Тэ шъукъызэригъэгугъагъэр къышъуфезгъэхыщт. Ау уашъом къикӀэу кӀуачӀэ къышъуфехыфэ, къалэу Ерусалим шъукъыдан.


ЕтӀанэ Исус ахэр Ерусалим дищыхи, къуаджэу Бет-Ание игъунэгъоу ыщэхи, ыӀэхэр къыӀэти, Тхьэм ынэшӀу къащифэнэу афелъэӀугъ. Тхьэм афелъэӀузэ ахэкӀи, Тхьэм ар уашъом дищэежьыгъ. Аущтэу зэхъум, ежь щытхъу фашӀэу, лъэгонджэмышъхьэкӀэ тӀысыгъэх. ЕтӀанэ гушӀогъошхом хэтхэу Ерусалим агъэзэжьыгъ. Тхьэм щытхъу фашӀэу, Тхьэм иунэшхо чӀэт зэпытыщтыгъэх. Амин.

සවන් දෙන්න Лука 24