Akha - 2001 Edition (NT) Drama

Akha Bible Revision (Latin Script) © Thailand Bible Society, 2011.

Kʼoeˇ naˇ, Gaˬliˬlehˇ lah-euˬ nui baˬ-ahˇ Yeˬsuˇ tsehˆ-iˇ-euˬ meh. (Gaˬliˬlehˇ lah-ahˇ Deˬbeˬliˇ lah lehˇ kʼawꞈ kuˇ-eu meh.) Tsawˇ haˬ aˇ maꞈ maꞈ ma aˬ yawꞈ-euˬ mehˬ nah caw teh gʼeh-euˬ meh. Aˬ jeˬ miˇ neh ehˇ naˇ, aˬ yawꞈ neh mˇ-euˬ zahˬ leˇ paˬ-ehˇ gʼeh-eu naˇ-eu tsawˇ haˬ deuˬ-ahˇ laˆ taˬ nehˬ-euˬ jeˬ-ahˇ aˬ yawꞈ maꞈ ya mawˇ haw-euˬ meh. Yeˬsuˇ gawˬ duˇ tiˬ duˇ-ahˇ daˆ leˇ-awˇ, aˬ yawꞈ-euˬ zaˬ lahˇ deuˬ nehˬ-ehˇ nuiˇ-euˬ meh. Yuˇdaˆ tsawˇ haˬ deuˬ-euˬ bawˬ-iˬ pyeuꞈ-eu Baˬsaˬkaˬ Bawˬ-iˬ gʼeh-eu aˇ yamˬ keuˆ laˇ taˬ-euˬ meh. Yeˬsuˇ haw gʼeh ngeh, tsawˇ haˬ aˇ maꞈ maꞈ ma uiˬ laˇ luꞈ gaˇ ya mawˇ-awˇ, “Tsawˇ haˬ heu deuˬ-ahˇ bi dzaˬ bi dawˇ-eu gʼaˇ duˬ, dzaˬ dzaˬ dawˇ dawˇ aˬ gaˇ zeuˇ loꞈ laˬ-iˇ nmˇ” lehˇ, Piˇliˇpuˆ-ahˇ naˇ haˬ-euˬ meh. Piˇliˇpuˆ-euˬ nui ma-ahˇ lawˬ haw mawꞈ-eu miˇ neh, kʼoeˇ loꞈ-ehˇ naˇ haˬ-euˬ meh. Maˇ maˇ ni ehˇ naˇ, Yeˬ suˇ-aˬ, aˬ joˆ-ehˇ ya jahˇ-eu gaˇ kawˆ siˬ duˬ taˬ-awˇ jawˇ-eu meh.
Piˇliˇpuˆ ehˇ-eu, “Tsawˇ haˬ heu deuˬ-ahˇ tiˬ gʼaˬ ui cuiˆ ui cuiˆ bi dzaˬ-eu kaˬ muˇ zeuˇ kʼawꞈ, pyuˇ maˇ byaˆ nyiˬ yaˇ byaˆ neh maˬ zeuˇ loꞈ nya-aˇ.”
Yeˬsuˇ-euˬ zaˬ lahˇ yawˬ gʼaˬ yawˬ pyeuꞈ-eu Siˇmoˬ Beˬtuˆluˆ-euˬ aˬ nyiˇ Aˬdehˬlehˬ heu loꞈ-ehˇ ehˇ-eu meh. “Lawˬ loeˇ neh jahˇ taˬ-euˬ kaˬ muˇ ngaˬ yaˆ hawˇ-eu ngaˬ shaˬ nyiˬ mawˇ pi luꞈ-eu aˬ li tiˬ li jawˇ meh. Ehˇ kʼawꞈ, tsawˇ haˬ heu deuˬ-ahˇ aˬ joˆ-ehˇ jahˇ-awˇ biˇ oꞈ nehˬ nya nmˇ.”
Yeˬsuˇ aˬ yawꞈ maꞈ-ahˇ ehˇ nehˬ-eu, “Tsawˇ haˬ dawˬ tawˆ luꞈ bi nuiˇ jiˇ-awˬ.” Jawˇ duˬ kʼoeˇ tsahˇ-aˬ, daˬ zawˬ deh pyeuꞈ-awˇ, tsawˇ haˬ dawˬ tawˆ luꞈ kʼoeˇ gaˇ nuiˇ jiˇ-euˬ meh. Kʼaˬ dzeˇ zaˬ deuˬ tehꞈ-ehˇ ngaˬ heˇ gʼaˬ dawˬ peh byah-eu meh. Yeˬsuˇ kaˬ muˇ kʼoeˇ yuˇ-awˇ, Miˬyehˇ-euˬ guiˬ lahˬ-ahˇ ja ceuˬ-awˇ, kʼoeˇ gaˇ nuiˇ luꞈ-eu tsawˇ haˬ kʼoeˇ deuˬ-ahˇ bi biˇ nehˬ-euˬ meh. Ngaˬ shaˬ kʼoeˇ kʼawꞈ, kʼoeˇ loꞈ-ehˇ bi biˇ nehˬ-euˬ meh. Tsawˇ haˬ dawˬ tawˆ luꞈ tiˬ dehˆ dzaˬ-euˬ meh. Aˬ yawꞈ maꞈ dzaˬ dehˆ gʼaˬ jiˇ ngeh, “Kʼaˇ dzehˬ laˇ-euˬ dawˬ tawˆ luꞈ tiˬ pawꞈ-iˬ maˬ bi cawˆ-iˇ ni gʼoˆ uiˬ jiˇ-awˬ” lehˇ, zaˬ lahˇ deuˬ-ahˇ aˬ yawꞈ ehˇ nehˬ-euˬ meh. Kʼoeˇ naˇ, lawˬ loeˇ kaˬ muˇ kʼoeˇ ngaˬ yaˆ-ahˇ tsawˇ haˬ kʼoeˇ deuˬ dzaˬ dehˆ gʼaˬ-awˇ, dzeˇ laˇ-euˬ deuˬ paˇ gʼoˆ uiˬ ngeh, kʼaˆ puˬ tseˇ nyiꞈ puˬ byah laˇ-euˬ meh.
Yeˬsuˇ neh mˇ-euˬ zahˬ leˇ paˬ-ehˇ gʼeh-eu kʼoeˇ-ahˇ tsawˇ haˬ kʼoeˇ deuˬ ya mawˇ ngeh, “Tsawˇ haˬ heu gʼaˬ-aˬ, maˇ maˇ ni miˇ tsaˬ kʼoeˇ taˆ oe meh lehˇ ehˇ taˬ-euˬ Miˬyehˇ gʼaˇ duˬ ngehˬ dah-eu kʼoeˇ gʼaˬ ngaˇ” lehˇ ehˇ-eu meh. Aˬ yawꞈ maꞈ aˬ yawꞈ-ahˇ nyehꞈ-awˇ, sahˬ paˬ maˬ geuꞈ-ehˇ maˬ juˬ ni jahˇ tehꞈ-a lehˇ Yeˬsuˇ siˬ duˬ taˬ-euˬ miˇ neh, gawˬ duˇ paw paˇ le daˆ leꞈ-euˬ meh.


Uˬ ciꞈ ciꞈ le ngeh, Yeˬ suˇ-euˬ zaˬ lahˇ deuˬ lah-ahˇ gʼoꞈ ka le-euˬ meh. Aˬ yawꞈ maꞈ lawˬ-ahˇ dziˬ leˇ-awˇ, lah nui baˬ paw jaˆ-eu Gaˬbeˬneˬoˬ meuˬ-ahˇ gʼoꞈ tsehˆ-iˇ-euˬ meh. Uˬ ciꞈ zahˇ le-euˬ kʼawꞈ, aˬ yawꞈ maꞈ jawˇ gaˇ Yeˬsuˇ maˬ gʼoꞈ doˆ le-a. Kʼoeˇ naˇ, jaˬ lehˇ lehˇ ma baw laˇ-awˇ, iˇ luˆ dzeh dui dui-eu meh. Aˬ yawꞈ maꞈ lawˬ heu gʼeh leꞈ-euˬ smˬ laˇ oeˬ laˇ ehˇ gʼaˬ ni byah laˇ ngeh, Yeˬsuˇ iˇ cuꞈ kʼoeˇ taˆ gaˇ ma cah cah-ehˇ aˬ yawꞈ maꞈ jawˇ gaˇ oe luꞈ-eu ya mawˇ-awˇ, guˆ dui dui-iˇ-euˬ meh. “Taˬ guˆ. Ngaˇ ma.” lehˇ aˬ yawꞈ maꞈ-ahˇ Yeˬsuˇ ehˇ nehˬ-euˬ meh. Kʼoeˇ naˇ, aˬ yawꞈ maꞈ laˬ kʼaˬ tiˬ cehˇ aˬ yawꞈ-ahˇ lawˬ laꞈ kʼoeˇ bi uˇ laˇ-euˬ meh. Tiˬ kʼehˇ laˇ kʼehˬ laꞈ kʼoeˇ, aˬ yawꞈ maꞈ iˇ luꞈ-eu lawˇ deh kʼoeˇ tsahˇ-ahˇ iˇ keuˆ-euˬ meh.

Lah lah dzeˇ lawˬ tiˬ laˇ tehꞈ-ehˇ jaˆ-awˇ, lawˬ kʼoeˇ laˇ-ahˇ zaˬ lahˇ deuˬ nehˬ-ehˇ Yeˬsuˇ maˬ dziˬ-ehˇ, zaˬ lahˇ deuˬ tehꞈ-ehˇ dziˬ-awˇ doˆ-iˇ-euˬ gaˇ kawˆ, lah nui baˬ-ahˇ jawˇ yaꞈ-euˬ tsawˇ haˬ aˇ maꞈ kʼoeˇ maꞈ yawˬ nah yawˬ siˬ duˬ-euˬ meh. Ehˇ kʼawꞈ, Sahˬpaˬ Yeˬsuˇ neh Miˬyehˇ-euˬ guiˬ lahˬ-ahˇ ja ceuˬ-awˇ aˬ yawꞈ maꞈ kaˬ muˇ dzaˬ-euˬ jawˇ duˬ kʼoeˇ tsahˇ-euˬ dawˬ peh, Deˬbeˬliˇ meuˬ-ahˇ neh lawˬ tiˬ deuˬ oe-euˬ meh. Yeˬsuˇ maˬ ehˇ, aˬ yawꞈ-euˬ zaˬ lahˇ deuˬ maˬ ehˇ, kʼoeˇ gaˇ maˬ paˇ jawˇ-euˬ gaˇ tsawˇ haˬ aˇ maꞈ kʼoeˇ maꞈ ya mawˇ ngeh, Yeˬsuˇ-ahˇ poˆ-iˇ-eu gʼaˇ duˬ, lawˬ kʼoeˇ deuˬ-ahˇ dziˬ-awˇ Gaˬbeˬneˬoˬ meuˬ-ahˇ iˇ-euˬ meh.

Lah kʼoeˇ baˬ-ahˇ tsawˇ haˬ kʼoeˇ deuˬ Yeˬsuˇ-ahˇ poˆ mawˇ ngeh, “Saˬ laˬ-oˇ, nawˇ heu gaˇ aˬ myah oe keuˆ teˬ” lehˇ naˇ haˬ-euˬ meh.
Yeˬ suˇ aˬ yawꞈ maꞈ-ahˇ ehˇ nehˬ-eu, “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Naw maꞈ kaˬ muˇ tiˬ dehˆ ya dzaˬ-euˬ miˇ neh ngaˬ-ahˇ poˆ-eu meh. Ngaˬ neh mˇ-euˬ zahˬ leˇ paˬ-ehˇ gʼeh-eu jeˬ-euˬ dawˬ tsuiꞈ gʼoˆ shaw-euˬ miˇ neh poˆ-eu maˬ ngeuˇ-a. Buꞈ-iˇ cehˇ-iˇ nya-eu dzaˬ dzaˬ dawˇ dawˇ gʼaˇ duˬ maˬ leh jeh ni, mˬ maˬ maˬ byaˆ zaˇ ziˇ bi dehꞈ-eu dzaˬ dzaˬ dawˇ dawˇ gʼaˇ duˬ leh jeh-awˬ. Tsawˇ haˬ-euˬ Zaˬmaˇ pyeuꞈ-eu ngaˇ naw maꞈ-ahˇ dzaˬ dzaˬ dawˇ dawˇ kʼoeˇ jeˬ biꞈ ma. Aˬ jeˬ miˇ neh ehˇ naˇ, Aˬda Miˬyehˇ ngaˬ-ahˇ nui ma tsaˬ-awˇ juˬ diˬ taˬ-euˬ meh.”
Aˬ yawꞈ maꞈ aˬ yawꞈ-ahˇ naˇ haˬ-eu, “Miˬyehˇ-euˬ gaˇ mˇ-eu lehˇ nga maꞈ aˬ geuˬ jeˬ ya mˇ ta.”
Yeˬsuˇ ehˇ-eu, “Miˬyehˇ-euˬ gaˇ-aˬ, aˬ yawꞈ neh kʼehˇ gʼeh leꞈ-euˬ gʼaˬ-ahˇ naw maꞈ jah-eu kʼoeˇ meh.”
Aˬ yawꞈ maꞈ ehˇ-eu, “Nga maꞈ nawˬ-ahˇ jah laˇ ni nawˇ zahˬ leˇ paˬ-ehˇ gʼeh-eu aˬ geu jeˬ mˇ mehˬ nmˇ. Nawˇ aˬ geu jeˬ mˇ mehˬ-eu gʼeh te. ‘Aˬ yawꞈ neh aˬ yawꞈ maꞈ-ahˇ mˬ taˆ-euˬ kaˬ muˇ bi dzaˬ-euˬ meh’ lehˇ Jaˇliꞈ laꞈ kʼoeˇ ehˇ taˬ-euˬ loꞈ-ehˇ, nga maꞈ-euˬ aˬ poeˬ aˬ bawˇ deuˬ bawˇ tsahˬ bawˇ dahˇ kʼaˇ shuiꞈ deh yaˇ-ahˇ cah ngeh, maˬ naˆ kaˬ muˇ ya dzaˬ-euˬ meh.”
Yeˬsuˇ ehˇ-eu, “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Moˇseˬ neh naw maꞈ-ahˇ bi dzaˬ-euˬ kʼoeˇ-aˬ, mˬ taˆ-euˬ kaˬ muˇ maˬ ngeuˇ-a. Naw maꞈ-ahˇ maˇ maˇ ni gʼeh-eu mˬ taˆ kaˬ muˇ biꞈ-eu gʼaˬ-aˬ, ngaˬ Da meh. Aˬ jeˬ miˇ neh ehˇ naˇ, Miˬyehˇ neh biꞈ leꞈ-euˬ kaˬ muˇ lehˇ ehˇ-eu kʼoeˇ-aˬ, mˬ kʼoeˇ taˆ neh zaꞈ ka le-awˇ, miˇ tsaˬ zaˬ-ahˇ dehꞈ-eu saꞈ laˇ biꞈ le-euˬ gʼaˬ-ahˇ ehˇ-eu meh.”
Aˬ yawꞈ maꞈ ehˇ-eu, “Saˬ laˬ-oˇ, kaˬ muˇ kʼoeˇ jeˬ nga maꞈ-ahˇ aˬ myah luꞈ bi dzaˬ laꞈ-awˬ.”
Yeˬsuˇ aˬ yawꞈ maꞈ-ahˇ ehˇ nehˬ-eu, “Ngaˇ-aˬ, saꞈ laˇ bi dehꞈ-eu kaˬ muˇ ma. Ngaˇ jawˇ gaˇ kʼaˇ laˇ-eu tsawˇ haˬ-aˬ, tiˬ jawˇ-iˬ hawˬ maˬ paˇ mehꞈ-aˇ. Ngaˬ-ahˇ kʼaˇ jah-eu tsawˇ haˬ-aˬ, tiˬ jawˇ-iˬ iˇ cuꞈ maˬ paˇ mehꞈ-aˇ. Naw maꞈ ngaˬ-ahˇ mawˇ-euˬ kʼawꞈ maˬ jah-aˇ lehˇ, naw maꞈ-ahˇngaˇ ehˇ nehˬ-euˬ ma. Ngaˬ Da neh ngaˬ-ahˇ kʼaˇ biꞈ laꞈ-euˬ tsawˇ haˬ yawˬ gʼaˬ yawˬ na luꞈ ngaˇ jawˇ gaˇ laˇ tehꞈ-a. Ngaˇ jawˇ gaˇ laˇ-eu tsawˇ haˬ aˬ geu gʼaˬ-ahˇ maˬ kaˬ, ngaˇ maˬ ha geuꞈ nehˬ ni maˬ byehˇ. Aˬ jeˬ miˇ neh ehˇ naˇ, ngaˇ mˬ kʼoeˇ taˆ neh oe-euˬ-aˬ, ngaˬ-euˬ nui kʼahˇ mˇ le-euˬ maˬ ngeuˇ. Ngaˬ-ahˇ kʼehˇ gʼeh leꞈ-euˬ gʼaˬ-euˬ nui kʼahˇ mˇ le-euˬ ma. Ngaˬ-ahˇ kʼehˇ gʼeh leꞈ-euˬ gʼaˬ-euˬ nui kʼahˇ-aˬ, ngaˬ-ahˇ kʼaˇ biꞈ laꞈ-euˬ dawˬ tawˆ luꞈ, tiˬ gʼaˬ-iˬ maˬ ya byoˆ-iˇ-eu uˬ taꞈ, aˇ saˬ saˬ ngeh nah yawˬ gʼaˬ yawˬ na luꞈ bi gʼoꞈ dehꞈ laˇ-eu gʼaˇ duˬ pyeuꞈ-eu meh. Ngaˬ Da-euˬ nui kʼahˇ-aˬ, Zaˬmaˇ-ahˇ mawˇ-awˇ kʼaˇ jah-eu tsawˇ haˬ dawˬ tawˆ luꞈ, mˬ maˬ maˬ byaˆ zaˇ ziˇ dehꞈ-eu jeˬ bi za-eu gʼaˇ duˬ meh. Aˇ saˬ saˬ ngeh nah, aˬ yawꞈ maꞈ-ahˇ ngaˇ bi gʼoꞈ dehꞈ laˇ ma.”
“Ngaˇ-aˬ, mˬ kʼoeˇ taˆ neh oe-euˬ kaˬ muˇ ma” lehˇ aˬ yawꞈ ehˇ-eu miˇ neh, tsawˇ haˬ kʼoeˇ deuˬ aˬ yawꞈ-ahˇ toˇ-eu meh. Aˬ yawꞈ maꞈ ehˇ-eu, “Tsawˇ haˬ teu gʼaˬ Yoˇsehˆ-euˬ aˬ li Yeˬsuˇ maˬ ngeuˇ-a loˇ. Aˬ yawꞈ-euˬ aˬ da aˬ ma-ahˇ aˬ dui maꞈ siˬ nya ma. Aˬ yawˇ yawꞈ mˬ kʼoeˇ taˆ neh oe-euˬ ma lehˇ aˬ joˆ-ehˇ ehˇ nya-eu nga.”
Yeˬsuˇ ehˇ-eu, “Naw maꞈ ngaˬ-ahˇ maˬ toˇ ni naˬ leˇ sheˇ. Aˬda neh sheuˬ ha laˇ-euˬ maˬ ngeuˇ naˇ, tsawˇ haˬ tiˬ gʼaˬ-iˬ ngaˇ jawˇ gaˇ maˬ laˇ nya-a. Aˬda neh sheuˬ ha laˇ-euˬ tsawˇ haˬ-ahˇ, aˇ saˬ saˬ ngeh nah ngaˇ bi gʼoꞈ dehꞈ laˇ ma.
“‘Tsawˇ haˬ yawˬ gʼaˬ na luꞈ-ahˇ Miˬyehˇ mehˬ nehˬ tsoˆ nehˬ tehꞈ-a’ lehˇ, Miˬyehˇ gʼaˇ duˬ ngehˬ dah-eu tsawˇ haˬ deuˬ neh boꞈ taˬ-euˬ jaˆ-eu meh. Aˬda-euˬ dawˬ ya gaˬ-awˇ dzaw geuꞈ-eu tsawˇ haˬ aˬ geu gʼaˬ maˬ kaˬ, ngaˇ jawˇ gaˇ laˇ tehꞈ-a. Heu loꞈ-ehˇ ehˇ-eu-aˬ, tsawˇ haˬ tiˬ gʼaˬ na Aˬda-ahˇ mawˇ haw-euˬ meh lehˇ ehˇ mawꞈ-eu maˬ ngeuˇ. Miˬyehˇ jawˇ gaˇ neh oe-euˬ gʼaˬ tehꞈ-ehˇ Aˬda-ahˇ mawˇ haw-euˬ meh. Ngaˇ naw maꞈ-ahˇ maˇ jawˆ ni ehˇ nehˬ nyaˇ. Jah-eu tsawˇ haˬ mˬ maˬ maˬ byaˆ zaˇ ziˇ dehꞈ-eu jeˬ za-eu meh. Ngaˇ-aˬ, saꞈ laˇ bi dehꞈ-eu kaˬ muˇ ma. Naw maꞈ-euˬ aˬ poeˬ aˬ bawˇ deuˬ bawˇ tsahˬ bawˇ dahˇ kʼaˇ shuiꞈ deh yaˇ-ahˇ cah ngeh, maˬ naˆ kaˬ muˇ ya dzaˬ-euˬ ngeuˇ meh. Ehˇ kʼawꞈ, aˬ yawꞈ maꞈ tiˬ jawˇ-iˬ maˬ shiˇ ni dehꞈ-euˬ maˬ ngeuˇ-a. Mˬ kʼoeˇ taˆ neh oe-euˬ kaˬ muˇ heu-aˬ, kʼaˇ dzaˬ-eu tsawˇ haˬ-ahˇ tiˬ jawˇ-iˬ maˬ shiˇ ni bi dehꞈ-eu meh. Ngaˇ-aˬ, mˬ kʼoeˇ taˆ neh oe-euˬ dehꞈ luꞈ-eu kaˬ muˇ ma. Kaˬ muˇ heu-ahˇ kʼaˇ dzaˬ-eu tsawˇ haˬ-aˬ, mˬ maˬ maˬ byaˆ zaˇ ziˇ dehꞈ tehꞈ-a. Ngaˇ biꞈ-eu kaˬ muˇ-aˬ, ngaˬ-euˬ gʼawˇ mawˇ ma. Miˇ tsaˬ zaˬ deuˬ saꞈ laˇ dehꞈ-eu jeˬ za ni biꞈ-eu ma.”
Yeˬsuˇ kʼoeˇ loꞈ-ehˇ ehˇ gaˇ tsawˇ haˬ kʼoeˇ deuˬ nui ma pehˇ laˇ-awˇ, aˬ yawꞈ maꞈ yaw kaˬ ja dui dui-awˇ ehˇ-eu, “Tsawˇ haˬ teu gʼaˬ aˬ yawꞈ-euˬ gʼawˇ mawˇ aˬ dui-ahˇ biꞈ-awˇ aˬ joˆ-ehˇ bi dzaˬ nya-eu lehˇ ehˇ ta.”
Yeˬsuˇ aˬ yawꞈ maꞈ-ahˇ ehˇ nehˬ-eu, “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Naw maꞈ Tsawˇhaˬ-euˬ Zaˬmaˇ-euˬ shaˬ jiˇ maˬ dzaˬ-ehˇ, aˬ yawꞈ-euˬ shiˬ maˬ dawˇ naˇ, dehꞈ-eu saꞈ laˇ maˬ za nya-a. Ngaˬ-euˬ shaˬ jiˇ dzaˬ-awˇ ngaˬ-euˬ shiˬ kʼaˇ dawˇ-eu tsawˇ haˬ-aˬ, mˬ maˬ maˬ byaˆ zaˇ ziˇ dehꞈ-eu jeˬ za-eu meh. Aˇ saˬ saˬ ngeh nah, aˬ yawꞈ-ahˇ ngaˇ bi gʼoꞈ dehꞈ laˇ ma. Aˬ jeˬ miˇ neh ehˇ naˇ, ngaˬ-euˬ shaˬ jiˇ-aˬ, maˇ maˇ ni gʼeh-eu dzaˬ-eu jeˬ pyeuꞈ-awˇ, ngaˬ-euˬ shiˬ-aˬ, maˇ maˇ ni gʼeh-eu dawˇ-eu jeˬ pyeuꞈ-eu ma. Ngaˬ-euˬ shaˬ jiˇ dzaˬ-awˇ ngaˬ-euˬ shiˬ dawˇ-eu tsawˇ haˬ-aˬ, ngaˬ-euˬ laꞈ kʼoeˇ jawˇ-eu tsawˇ haˬ pyeuꞈ-awˇ, ngaˇ kʼawꞈ, aˬ yawꞈ-euˬ laꞈ kʼoe jawˇ-eu ma. Dehꞈ luꞈ-eu Aˬda neh ngaˬ-ahˇ kʼehˇ gʼeh leꞈ-euˬ meh. Ngaˇ kʼawꞈ, aˬ yawꞈ baˬ da neh dehꞈ luꞈ-eu ma. Kʼoeˇ gaˇ duˇ ni, ngaˬ-ahˇ kʼaˇ dzaˬ-eu tsawˇ haˬ-aˬ, ngaˇ baˬ da neh dehꞈ tehꞈ-a. Heu-aˬ, mˬ kʼoeˇ taˆ neh oe-euˬ kaˬ muˇ meh. Kaˬ muˇ heu-aˬ, naw maꞈ-euˬ aˬ poeˬ aˬ bawˇ deuˬ neh dzaˬ-euˬ kaˬ muˇ kʼoeˇ-ahˇ maˬ duˇ-a. Aˬ yawꞈ maꞈ-aˬ, kaˬ muˇ kʼoeˇ dzaˬ-euˬ kʼawꞈ shiˇ-euˬ meh. Ehˇ kʼawꞈ, kaˬ muˇ heu-ahˇ dzaˬ-eu tsawˇ haˬ-aˬ, mˬ maˬ maˬ byaˆ zaˇ ziˇ ya dehꞈ meh.”
Gaˬbeˬneˬoˬ meuˬ-ahˇ jaˆ-eu Yuˇdaˆ tsawˇ haˬ-euˬ uˬ duˬ tahˬ nymˇ laꞈ kʼoeˇ Yeˬsuˇ mehˬ nehˬ tsoˆ nehˬ ngeh, kʼoeˇ loꞈ-ehˇ ehˇ-euˬ meh.

Yeˬsuˇ kʼoeˇ loꞈ-ehˇ ehˇ gaˇ ya gaˬ ngeh, aˬ yawꞈ-euˬ zaˬ lahˇ gʼawˬ mya gʼaˬ ehˇ-eu, “Aˬ yawꞈ mehˬ-euˬ gaˇ kawˆ teu hmˬ teu naˆ naˆ-ehˇ kʼaˆ-eu beu tawˇ. Aˬ suˇ gʼaˬ ha geuꞈ coeˇ paˬ nga.”
Aˬ yawꞈ maꞈ kʼoeˇ loꞈ-ehˇ toˇ luꞈ-eu gaˇ kawˆ aˬ cawˬ Yeˬsuˇ-ahˇ maˬ ehˇ nehˬ-euˬ kʼawꞈ, Yeˬsuˇ siˬ nya-awˇ, aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “Ngaˇ heu loꞈ-ehˇ ehˇ-eu miˇ neh, jah-eu jeˬ-ahˇ naw maꞈ byehˇ dzeh mawꞈ-eu nya loˇ. Toˆ-ehˇ maˇ-iˬ, Tsawˇhaˬ-euˬ Zaˬmaˇ aˬ yawꞈ-euˬ jawˇ duˬ-ahˇ paˇ daˆ gʼoꞈ leˇ naˇ, naw maꞈ aˬ joˆ-ehˇ jahˇ nmˇ. Naw maꞈ-ahˇ dehꞈ-eu saꞈ laˇ biꞈ-euˬ-aˬ, Miˬyehˇ-euˬ Yaw sahˇ meh. Tsawˇ haˬ zaˬ-euˬ baoˬ neh tiˬ jeˬ-iˬ maˬ gʼeh nya-a. Ngaˬ neh naw maꞈ-ahˇ ehˇ-euˬ gaˇ kawˆ heu-aˬ, dehꞈ-eu saꞈ laˇ biꞈ-eu Miˬyehˇ-euˬ Yaw sahˇ-ahˇ naw maꞈ bi za nya-eu gʼaˇ duˬ pyeuꞈ-eu ma. Ehˇ kʼawꞈ, naw maꞈ laꞈ kʼoeˇ tiˬ paˆ na deuˬ maˬ jah nga siˬ.” (Aˬ geu deuˬ maˬ jah-eu tsawˇ haˬ pyeuꞈ-awˇ, aˬ geu gʼaˬ aˬ yawꞈ-ahˇ ahˬ dzaˬ tehꞈ-a lehˇ, naꞈ ngeh neh Yeˬsuˇ siˬ nya taˬ-euˬ meh.) Aˬ yawꞈ paˇ ehˇ-eu, “Kʼoeˇ miˇ neh, Aˬda neh bi laˇ-euˬ maˬ ngeuˇ naˇ, tsawˇ haˬ tiˬ gʼaˬ-iˬ ngaˇ jawˇ gaˇ maˬ laˇ nya-a lehˇ, naw maꞈ-ahˇ ngaˇ ehˇ nehˬ-euˬ ma.”
Kʼoeˇ loꞈ-ehˇ ehˇ-euˬ baˬ da neh, Yeˬsuˇ-euˬ mehˬ nah caw teh-eu tsawˇ haˬ gʼawˬ mya gʼaˬ gʼoꞈ-iˇ-awˇ, aˬ yawꞈ-euˬ mehˬ nah maˬ paˇ caw teh ni byehˇ-euˬ meh. Kʼoeˇ ngeh, “Naw maꞈ gʼeh byehˇ-awˇ gʼoꞈ-iˇ mawꞈ-eu nya loˇ” lehˇ, zaˬ lahˇ tseˇ nyiꞈ gʼaˬ-ahˇ Yeˬsuˇ ehˇ nehˬ-euˬ meh.
Siˇmoˬ Beˬtuˆluˆ ehˇ-eu, “Sahˬpaˬ-oˇ, mˬ maˬ maˬ byaˆ zaˇ ziˇ dehꞈ-eu jeˬ biꞈ-eu dawˬ nawˇ jawˇ gaˇ jaˆ ngeh keuˆ keuˆ-ehˇ-aˬ, nga maꞈ aˬ suˇ gʼaˬ jawˇ gaˇ paˇ iˇ nmˇ. Nawˇ-aˬ, Miˬyehˇ jawˇ gaˇ neh oe-euˬ Muiˬ-eu Shawˇ-eu Gʼaˬ meh lehˇ nga maꞈ siˬ duˬ jah duˬ gʼaˬ-euˬ ma.”
Yeˬsuˇ ehˇ-eu,“Naw maꞈ tseˇ nyiꞈ gʼaˬ-ahˇ ngaˬ neh tseˇ doˆ-euˬ maˬ ngeuˇ-a loˇ. Ehˇ kʼawꞈ, naw maꞈ laꞈ kʼoeˇ tiˬ gʼaˬ-aˬ, Nehꞈsahˬpaˬ meh.” Yeˬsuˇ kʼoeˇ loꞈ-ehˇ ehˇ-eu-aˬ, Siˇmoˬ Iˇsaˬgaˬliˬoˆ-euˬ aˬ li Yuˇdaˆ Iˇsaˬgaˬliˬoˆ-ahˇ ehˇ mawꞈ-eu meh. Aˬ jeˬ miˇ neh ehˇ naˇ, Yuˇdaˆ-aˬ, zaˬ lahˇ tseˇ nyiꞈ gʼaˬ laꞈ kʼoeˇ ahˇ-eu kʼawꞈ, Yeˬsuˇ-ahˇ ahˬ dzaˬ-eu lehˇ gʼeh-eu meh.

සවන් දෙන්න Yoˇhaˬ 6