 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

ندٜنْ ݠِلَاتُ عُمْرِ يِمْࢡٜ مُمْ ࢡٜکٛوشَ عِيسَى، ࢡٜࢡٛشَّ مٛ؞ سٛوجٜعٜنْ مبَمِ مٜىٰتَلٜىٰوٛلْ غِعٜ، ࢡٜنجٛعِّنِ طُمْ دٛوْ حٛورٜ عِيسَى، ࢡٜمٛجِمٛ مٛجَارٜ وٛطٜىٰرٜ؞ ࢡٜࢡَدِتِمٛ، ࢡٜمبِعِ‏: «اَللَّه وٛونَنٜ، لَامِيطٛ يَحُودُعٜنْ‏!» ࢡٜمَارِمٛ؞
ݠِلَاتُ وُرْتِ ڢَحِنْ، وٛلْوَنِ يِمْࢡٜ، وِعِ‏: «ندَا، مِوُرْتِنَنْ مٛ حَا مٛوطٛنْ، نغَمْ حَا عٛنْ ݠَامَ مِتَوَايْ دَلِيلَ حِيتَاغٛ مٛ؞» ندٜنْ عِيسَى وُرْتِ، مٜىٰتَلٜىٰوٛلْ غِعٜ طٛنْ دٛوْ حٛورٜ مَاکٛ، عٛطٛنْ مٛجِ مٛجَارٜ وٛطٜىٰرٜ غٛ؞ ݠِلَاتُ وِعِ ࢡٜ‏: «ندَا مٛ؞» عَمَّا ندٜ لِمَنْعٜنْ عٜ عَيْنٛوࢡٜ نغِعِمٛ، ࢡٜنغٛوکِ، ࢡٜمبِعِ‏: «ࢡِلْ مٛ حَا لٜغَّلْ غَاڢَانغَلْ‏! ࢡِلْ مٛ‏!» ݠِلَاتُ وِعِ ࢡٜ‏: «کٛوشٜ مٛ عٛنٛنْ، ࢡِلٜ مٛ، نغَمْ مِنْ مِتَوَايْ دَلِيلَ حِيتَاغٛ مٛ؞» يَحُودُعٜنْ مبِعِمٛ‏: «مِنْ نغٛودِ عُمْرٛورٜ وٛورٜ؞ ڢٛدّٜ عُمْرٛورٜ مَنْ سٜيْ عٛمَايَ، نغَمْ عٛوَطِ حٛورٜ مَاکٛ عٛ ࢡِطّٛ اَللَّه ؞»
ندٜ ݠِلَاتُ نَنِ وٛلْدٜ ندٜعٜ، کُلٛلْ مَاکٛ ࢡٜسْدِ؞ عٛنَسْتِ سَارٜ ڢَحِنْ، عٛࢨَمِ عِيسَى‏: «تٛيْ عِوْطَا؟» عَمَّا عِيسَى جَابَاکِمٛ سَمْ؞ ݠِلَاتُ وِعِمٛ‏: «عَجَابَتَاکٛ يَمْ نَ؟ عَعَنْدَا مِوٛودِ بَاوْطٜ يٛوڢُغٛ مَ، مِوٛودِ بٛو بَاوْطٜ ࢡِلُغٛ مَ حَا لٜغَّلْ غَاڢَانغَلْ نَ؟» عِيسَى جَابِمٛ‏: «عَوَلَانٛ بَاوْطٜ دٛوْ عَمْ کٛو سٜطَّ، تٛ اَللَّه حٛکَّايْنٛ مَ طٜ؞ نغَمْ مَاجُمْ مٛ حٛکِّ يَمْ حَا جُنغٛ مَ، حَکّٜ مَاکٛ ࢡُرِ مَوْنُغٛ؞»
دِغَ سَاعِ مَنْ ݠِلَاتُ تٜڢِ دَبَرٜ يٛوڢُغٛ عِيسَى؞ عَمَّا يَحُودُعٜنْ نغٛوکِ، مبِعِ‏: «تٛ عَيٛوڢِمٛ، ندٜنْ کَمْ نَا عَ سٛوبَاجٛ کَيْسَرَ لَامِيطٛ رٛمَ؞ کٛو مٛيْ وَطِ حٛورٜ مُوطُمْ لَامِيطٛ، عٛ کٛنّٜىٰجٛ کَيْسَرَ لَامِيطٛ رٛمَ؞» ندٜ ݠِلَاتُ نَنِ بٛلّٜ طٜعٜ، عٛوُرْتِنِ عِيسَى ڢَحِنْ، عٛجٛوطِ دٛوْ کٛرٛمْوَلْ کِيتَ، حَا نٛکُّورٜ وِعٜتٜىٰندٜ بٜى عِبْرَنِنغْکٜىٰرٜ غَبَّتَ، وَاتٛ تَنغْکٛلْ-کَاعٜ؞ طُمْ ࢩَلَادٜ تَاسْکَرَ جُولْدٜ ݠَسْکَ ، دٜيْدٜيْ شَکَ ࢩَلَوْمَ؞ ݠِلَاتُ وِعِ يَحُودُعٜنْ‏: «ندَا لَامِيطٛ مٛوطٛنْ‏!» ࢡٜنغٛوکِ، ࢡٜمبِعِ‏: «مبَرْ مٛ، مبَرْ مٛ، ࢡِلْ مٛ حَا لٜغَّلْ غَاڢَانغَلْ؞» ݠِلَاتُ وِعِ ࢡٜ‏: «کَدِ مِࢡِلَ لَامِيطٛ مٛوطٛنْ نَ؟» مَوْࢡٜ لِمَنْعٜنْ نجَابِ‏: «مِنْ نغَلَا لَامِيطٛ ڢٜىٰرٜ، سٜيْ لَامِيطٛ کَيْسَرَ؞» ندٜنْ، ݠِلَاتُ حٛکِّ ࢡٜ عِيسَى حَا ࢡٜࢡِلَ مٛ حَا لٜغَّلْ غَاڢَانغَلْ؞ ࢡٜندِلِّرِمٛ؞


عِيسَى وُرْتِ يَاسِ بٜرْنِوٛلْ، عٛطٛنْ رٛونْدِ غَاڢَانغَلْ مَاکٛ، حَا عٛيٛتِّ نٛکُّورٜ وِعٜتٜىٰندٜ بٜى عِبْرَنِنغْکٜىٰرٜ غٛلْغٛتَ، وَاتٛ غُمْبَلْ-حٛورٜ؞ حَا تٛنْ سٛوجٜعٜنْ ࢡِلِ عِيسَى حَا لٜغَّلْ غَاڢَانغَلْ؞ ࢡٜࢡِلْدِ وٛرْࢡٜ طِطٛ بٜى عِيسَى، غٛوتٛ حَا وَکٜىٰرٜ ࢩَامْرٜ، غٛوتٛ بٛو حَا وَکٜىٰرٜ نَنْدٜ، عِيسَى طٛنْ حَا شَکَ؞ ݠِلَاتُ وِنْدِ دٛوْ عَلُّحَ، عٛࢡِلِ طُمْ حَا غَاڢَانغَلْ؞ ندَا کٛ عٛوِنْدِ‏: «عِيسَى مٛ نَسَرَتُ، لَامِيطٛ يَحُودُعٜنْ؞» يَحُودُعٜنْ طُوطْࢡٜ نجَنغِ طُمْ، نغَمْ نٛکُّورٜ مَنْ دَايَاکِ بٜى بٜرْنِوٛلْ؞ بِنْدِ مَنْ وِنْدَامَ بٜى عِبْرَنِنغْکٜىٰرٜ عٜ رٛمَنغْکٜىٰرٜ عٜ يُنَنِنغْکٜىٰرٜ؞ عَمَّا مَوْࢡٜ لِمَنْعٜنْ يَحُودُعٜنْ مبِعِ ݠِلَاتُ‏: «تَا وِنْدُ‏: لَامِيطٛ يَحُودُعٜنْ، عَمَّا وِنْدُ‏: عٛوِعِ عٛ لَامِيطٛ يَحُودُعٜنْ؞» ݠِلَاتُ جَابِ ࢡٜ‏: «کٛ مِوِنْدِ، طُمْ تَبِتِ؞»
ندٜ سٛوجٜعٜنْ تِمِّنِ ࢡِلُغٛ عِيسَى حَا لٜغَّلْ غَاڢَانغَلْ، ࢡٜکٛوشِ لِمْشٜ مَاکٛ، ࢡٜشٜنْدِ طٜ غٜࢡٜ نَيِ، سٛوجٜىٰجٛ ڢُو حٜࢡِ يٜࢡْرٜ وٛورٜ؞ ࢡٜکٛوشِ بٛو تٛغّٛورٜ مَاکٛ سَنْࢩَاندٜ دِغَ دٛوْ حَا لٜسْ بِلَا ࢩٛوغٛلْ؞ سٛوجٜعٜنْ مبِعِ حَکُّندٜ مُوطُمْعٜنْ‏: «تَا عٜنْ شٜىٰکَ تٛغّٛورٜ ندٜ، عَمَّا عٜنْ مبَطَ کُرْعُ نغَمْ عٜنْ ندَارَ مٛيْ حٜࢡَتَ ندٜ؞» بَنَ نِي کٛ دٜڢْتٜرٜ وِعِ، غٛونغْطِرِ‏:
«ࢡٜشٜنْدِ لِمْشٜ عَمْ حَکُّندٜ مَࢡّٜ،
ࢡٜمبَطِ کُرْعُ نغَمْ لِمْشٜ عَمْ؞»
بَنَ نِي سٛوجٜعٜنْ مبَطِ؞
دَادَ عِيسَى عٜ دٜىٰرْطُمْ دٜبّٛ عٜ مَرِيَمَ دٜبّٛ کٛلٛݠَسْ عٜ مَرِيَمَ مٛ مَغْدَلَ، ࢡٜطٛنْ ندَرِ کٛمْبِ لٜغَّلْ غَاڢَانغَلْ حَا ࢡٜࢡِلِ عِيسَى؞ عِيسَى يِعِ دَادَ مُوطُمْ عٜ ݠُکَرَاجٛ مٛ عٛيِطِ طُمْ، ࢡٜطٛنْ ندَرٛدِ تٛنْ؞ عٛوِعِ دَادَ مَاکٛ‏: «دٜبّٛ، ندَا ࢡِطّٛ مَ؞» ندٜنْ عٛوِعِ ݠُکَرَاجٛ مَنْ‏: «ندَا دَادَ مَ؞» دِغَ سَاعِ مَنْ ݠُکَرَاجٛ مَنْ حٛوشِ مَرِيَمَ حَا سَارٜ مُوطُمْ؞


ࢡَاوٛ مَاجُمْ، ندٜ عِيسَى عَنْدِ کُوجٜ ڢُو کٜبِّتِنَامَ، نغَمْ عٛغٛونغْطِنَ کٛ وِنْدَ ندٜرْ دٜڢْتٜرٜ، عٛوِعِ‏: «مِطٛمْطِ؞» وٛودِ مبُلْکُ تٛنْ، کٜبِّنَانغُ عِنَبٛوجَمْ لَمُّطَمْ؞ ࢡٜشُووِ عِرِنْ سٛوسٛ ندٜرْ مَاجَمْ، ࢡٜمبَطِ طُمْ حَا ࢨٛمْبَلْ عِسٛݠْ، ࢡٜࢡَنغْتِ طُمْ حَا حُنْدُکٛ عِيسَى؞ ندٜ عِيسَى مٜتِّ لَمُّطَمْ، عٛوِعِ‏: «طُمْ ڢُو طُمْ تِمِّدِ؞» ندٜنْ عٛتُرِ حٛورٜ مَاکٛ، عٛمَايِ؞

طُمْ ࢩَنْدٜ تَاسْکَرَ ࢩَلَادٜ سِوْتٛرْدٜ ؞ يَحُودُعٜنْ نغِطَا ࢡَلِّ لُتَّ دٛوْ لٜطّٜ غَاڢَاطٜ ࢩَنْدٜ سِوْتٛرْدٜ نغَمْ ࢩَلَادٜ سِوْتٛرْدٜ مَنْ لَاتِ ࢩَلَادٜ مَوْندٜ حَا مَࢡّٜ؞ نغَمْ مَاجُمْ ࢡٜتٛرِ ݠِلَاتُ عٛعُمْرَ ࢡٜنغٜوَ کٛسْطٜ ࢡِلَاࢡٜ، ࢡٜنجِݠِّنَ ࢡَلِّ مَࢡّٜ؞ ندٜنْ سٛوجٜعٜنْ نغَرِ، ࢡٜنغٜوِ کٛسْطٜ عَرَنٛ، ندٜنْ ࢡٜنغٜوِ طٜ طِطَࢡٛ حَا ࢡِلْدَاࢡٜ بٜى عِيسَى دٛوْ لٜطّٜ غَاڢَاطٜ؞ ندٜ ࢡٜنجٛتِّ حَا عِيسَى، ࢡٜتَوِ عٛمَايِ، نغَمْ مَاجُمْ ࢡٜنغٜوَايْ کٛسْطٜ مَاکٛ؞ عَمَّا غٛوتٛ ندٜرْ سٛوجٜعٜنْ يُوِمٛ وُتُّدُ بٜى لَبّٛ، لَوْ ࢨِيࢨَمْ عٜ ندِيَمْ نغُرْتِ؞ غِعْطٛ سٜىٰدِ طُمْ، سٜىٰدَمْکُ مَاکٛ غٛونغَ، کَنغْکٛ بٛو عٛعَنْدِ غٛونغَ عٛوٛلْوِ، نغَمْ حَا عٛنٛنْ بٛو عٛنْ نُطِّنَ؞ طُمْ لَاتِ نٛنْ نغَمْ حٜبِّتِنغٛ کٛ دٜڢْتٜرٜ وِعِ‏: «ࢡٜنغٜوَتَا عِعٜ مَاکٛ کٛو غٛوتَلْ؞» عَايَارٜ ڢٜىٰرٜ بٛو وِعِ‏: «ࢡٜندَارَنْ مٛ ࢡٜنجُوِ؞»


ࢡَاوٛ مَاجُمْ، يُوسُڢُ مٛ وُرٛ عَرِمَتِيَ تٛرِ ݠِلَاتُ دُنغَيٜىٰرٜ حٛوشُغٛ ࢡَنْدُ عِيسَى؞ يُوسُڢُ بٛو لَاتِنٛ ݠُکَرَاجٛ عِيسَى، عَمَّا بٜى سِرِّ، نغَمْ عٛطٛنّٛ حُلَ يَحُودُعٜنْ؞ ݠِلَاتُ دُنغَنِمٛ؞ عٛيٜحِ، عٛحٛوشِ ࢡَنْدُ عِيسَى؞ نِکٛدٜمُسْ مٛ يٜحِنٛ حَا عِيسَى جٜمَّارٜ وٛطْندٜ، کَنغْکٛ بٛو عٛوَرِ، عٛوَدِّ جِلِّنْدِرَاطُمْ عُورْدِ بَطَادِ عٜ لٜطّٜ عُورْطٜ، بَاکِنْ کِلٛ شَݠَّنْطٜ تَتِ؞ کَمْࢡٜ طِطٛ ࢡٜکٛوشِ ࢡَنْدُ عِيسَى، ࢡٜشَاوِ ندُ بٜى لٜݠِّ، ࢡٜندُڢِ نٜبَّمْ عُورْطَمْ دٛوْ مَارُ، بَنَ يَحُودُعٜنْ مبٛووِ وَطُغٛ تٛ ࢡٜطٛنْ عُوَ مَايْطٛ؞ حَا کٛمْبِ نٛکُّورٜ ࢡٜࢡِلْنٛ عِيسَى، وٛودِ جَرْنٜ تٛنْ؞ ندٜرْ جَرْنٜ مَنْ وٛودِ يٜنَاندٜ حٜسْرٜ ندٜ ࢡٜمٜىٰطَايْ وَلِّنْغٛ مَايْطٛ ندٜرْ مُوطُمْ؞ حَا تٛنْ ࢡٜمبَلِّنِ ࢡَنْدُ عِيسَى، نغَمْ طُمْ ࢩَلَادٜ تَاسْکَرَ سِوْتٛرْدٜ يَحُودُعٜنْ عٜ يٜنَاندٜ مَنْ بٛو دَايَاکِ؞

සවන් දෙන්න يُحَنَّ 19