Luk'k'aasa 20

Yesuusakokki odonnati Ayihuudiwun kaɂayeesisiro lee

(Mat. 21:23-27; Mar. 11:27-33)

1Arri tooyi Yesuusa gosa k'ulluukki min kawaayi agaalssisaanna odu taɂidan lallabaa giraan tuuk'aamolkokki woyichchaalna seera kamuse oɂagaalssisaranna jaarsolee kukkuɂameen usu tos emeeten. 2Isona, «Hikka ayees kakkofelatta eeki odonnatiyo noon segii. Kuun odonnati kasisera usu ayyoyya?» ameen hoosaten. 3Yesuusana, «Aninna hoosiin too isin hoosaro, alla iin abbaaba. 4T'ink'ata kayaannisa Waakkoya mu ibaaddokkoya?» ame.

5Isona haa ameeren isi isiɂorroo makkareen; «Waakkoya goɂaminne, ‹Hayya Yaannisa kaɂamero muun isin ammanana waatteen?› aminara. 6‹Ibaaddokkoya› goɂaminne gosa dubba Yaannisa kahegeroo laanokkeessaa mankkoɂammanataraan maraan eɂemoo no eeggiranwa.» 7Haanssun «Eetikkoyo noo laakansso» ameen abbaabeen. 8Yesuusana, «Goortta aninna hikka ayees eeki odonnati ani felaro ani isinuun lakkoseginaro» ame.

Kawoyinii akaakiltte otateen obaraarankokki masuussa

(Luk'. 20:9-18; Mat. 21:33-46; Mar. 12:1-12)

9Esekko abbaabatere Yesuusa haa ame hikka masuussa gosaawun segaano haggaɂabe. «Ibaaddoti koo akaakiltte kawoyinii abbarate, otateen obaraarewun kirayii sisegure ul kakkalee seetegure tanjjiin adallaate. 10Kaami takkokukkuɂamaro diginnii, tawoyinii ilkko usu tageyaatto mina goggofarrawun kahandaare otateen obaraareen tos fare, otateen obaraaren adeen kahandaaro boc'c'eeren gene taalaal gafareen. 11Debeenna kakkalee kahandaaro fare, otateen obaraareen usuna adeen boc'een, yeraasenen gene taalaal gafareen. 12Giddanna ade kaseedi kahandaarena fare, otateen obaraareen usuna addeen meeggayisen sarddeediseen shafeen.

13«Kawoyinii akaakilttekkokki odona, ‹Goortta misi yella? Alla adi kageelaataro erekkee farnnara, woddaasa usu okabajiiraan leeraan› ame.

14«Otateen obaaraaren goɂameen erekkeessa kakkodeyaanne goorata ‹Hikki kaɂeelnaroya,› Koyeen ‹Usu lagandda hitti rittiinna tattaani leetowa› ameen malaateen. 15Kawoyinii akaakiltte banɂekko sar beeseren lagadeen. Yesuusana.

«Goortta akaakilttekkokki odo misi yelinara? 16Emeeyire hanɂu otateen obaraareen lagadinara. Kawoyinii akaakilttekkotti banɂe kakkalee otateen kabbaraaroon sisinara.» Gosana hikka kakkomaalare goorata, «Hikka aankkikki arookkeeno» ameen.

17Yesuusana iso tos diyaa haa ame,

« ‹Hayya gimbbe omadaarataran kattuffateraan eɂemo

felo omineetun mete lee amame kas'aafamerokotti fureenna metta›?

18Hikka eɂemoo gutii kaɂiyaara dubba eɂebinara, eɂemona usu gutii kakkoɂiyaara dubba shiiɂaminara» ame.

Giira murano

(Mat. 22:15-22; Mar. 12:13-17)

19Seera kamuse oɂagaassisareenna tuuk'aamolkokki woyichchaalna hikka masuussa kakkoonɂayeesere isoon laano mankkoɂaddeeseen maraan, usu goratawa abin dootaa gireen. Ayesuun goɂameen gosa abssateen.

20Yesuusana karoomi mootiwun roorisi sisin hiɂikko kabiyaaro haafuraa usu abin dootaa gireen. Haanssun karrummii aani lii ogabbalamiraan kimbir kayeen. 21Kimbir leen oseeterenna haa ameen usu hoosaten. «Kaɂagaalssisatto, ati likkiikki ayees goggoɂayeesattona goggoɂagaalssisatto usumalee raa kawaa karrummii goggoɂagaalssisattona maayyoonna kaɂululisoon laano noo kanssowa. 22Amiinna K'eesaariwun giira murano seerakkaani feɂi sisara mu lakkosisaroya?»

23Yesuusa goɂameen meellanettisoo addeesere haa ame. 24«Alla dolchchii too iyyeen tusa, gutii tagitta taayyo middina mege kaayyoya?» Isona tak'eesaritta ameen abbaabeen.

25Yesuusana, «Goortta kak'eesari K'eesaariwun, kawaanna Waawuun sisa» ame.

26Haanssun usu kaɂayeesero haafuraa gosa horee usu abin lakkodaanddeen, abbaabikkeessaa mameengureen c'alɂi ameen.

Goyikko kiyaanokotti hoosin

(Mat. 22:23-33; Mar. 12:18-27)

27Goyikko kiyaano laagiro oɂamaraan Sodok'aawilkko kookkoo Yesuusa tos emeetengurene hoosin hoosaten. 28Haanna ameen, «Kaɂagaalssisatto,» Ibaaddoti koo oori atayigure yiis haɂumulooni goggoye, abbi ese galttaatteti atayire yiis umuli abbikkeessawun sannii banɂee goggokayiroo «Muse noon s'aafera. 29Hayya, abbilaal todoba gitte. Kahoree oori atategure yiis haɂumulooni goye. 30Kallamin usumalee. 31Kaseedina ade atate, todoba dubba usumalee atatengureene yiis haɂumulooni goyeen. 32Haarrena heleelttiti goote. 33Goortta todoba ese mankkoɂatatere maraan, tagoyikko keyaano arri ese oori taayyo linnatta?»

34Yesuusana abbaabere, «Hikka alamikokki ibaaddo atataraan, keesaran. 35Kaɂemeetaro alamiinna goyikko kiyaano okkoondootisara goɂameen lakkoɂatataraan, lakkonakeesamaraan. 36Erggichcha aani mankkollinnaraan maraan esekko danbbeebaan lakkogoyinaraan, goyikko mankkokeen maraan yiis kawaayaan. 37Muse gara kahurisekotti tas'aafanttetto jirtti orro Goottanne, kaɂabraame Hedo, kayissaak'a Hedo, kayayik'ooba Hedo amano ogoyeraan kakkinnaraan laano tusara. 38Dubbana usuun arddonɂi mankkoleen maraan, usu arddonɂikkokki Hedo kuwaarre goyikokki Hedo lakkoyo.»

39Kookkoo seera kamuse oɂagaalssisareenna «Kaɂagaalssisatto, taɂidan ayeesse, ameen.» 40Esekko abbaabateren odo koonna duuddo usu hoosayin lakkodaanddee.

Kiristoosa ere kaayyoya?

(Mat. 22:41-46; Mar. 12:35-37)

41Esekko abbaabatere Yesuusa haa ame, «Ibaaddo Kiristoosa misii ere kadaawuteya amara? 42-43Aalanttina daawute metekkeessan mazamurikokki mas'aafayi haa amera,

« ‹Waa Goottakkeewun,

diinakkaa lukittaayi ani taadaddarisiroo

«Merggetteeyi hamas's'ii» › ame.

44Goortta Daawute, ‹Goottaa› ami usu goɂuumiro misii erekkeessa laara?»

Yesuusa seera kamuse oɂagaalssisaraankko gosa seerisano

(Mat. 23:1-36; Mar. 12:38-40)

45Yesuusa gosa dubba maalaa giraan usukko oɂagaalssataranne haa ame. 46«Kaɂeerkki sarssi sarssateeren maraamurano ogeelaataran, taggiyyaa banɂee nogodda aatin odootataraanna, Ayihuudikokki min kaɂebii kakkabajaa barc'uma, banɂe taɂaamoyinna takabajaa banɂe, odootataraankko isiɂoottisin oorayeen. 47Isona kagalttantteel min ohiyyumisaraanyan. Mutin ameeren ebikakkisoo eeraasataran, kameellan firdda iso ooratara.»

Выбрано:

Luk'k'aasa 20: BayNT

Выделить

Копировать