मत्ती 7

दिहरा पोर दोष मा लागाडो

(लूका 6:37,38,41,42)

1“दोष लागाडू मा तुमु पोर भी दोष नाय लागाडाय. 2काहाकाय ज्या जीही केरीन दोष लागाडहु, तिहीच तुमरे पोर दोष भी लागाडनेमाय आवी, एने जा मापासे तुमु मापहु ताच मापासे तुमरे केरता भी मापाय.”

3“तू काहा आपणा बायाकान डोला माय वालो कोचराह देखणे, एने आपणा डोला माय वालो होट्यो तुवाह देखाणे नाहं? 4ताराच डोलाम कोचरू हि, ते तू आपणा बायाक किहिक केय सकीह, का लाव मी तार डोलावालो कोचरो निकाल बोगवानान” 5“हे कोपटी, पेल आपणा डोला मायरीन होट्यो काड ली, तेवी तू आपणा बायाकान डोलान केचरो हास केरीन काड साकही.” 6“पवित्र वस्तु चिताह आपी मा, एने आपणी मोती डुकराओगाण जगारहु मा, काकहाकाय ता ती वोस्तु पायामा चेंदती एने फिरीन तुमूह फाड टाकति.”

मानगु ते जुडी

(लूका 11:9-13)

7“मांगु ते तुमूह आपाय जाय; होदू ते तुमूह सापडी, ठोकु ते तुमरीकेरता उगाडी जाय 8काहाकाय जो कूण मांगणे ताह जुडीह, एने जो कूण होदिह ताह सापडणे, जो कूण ठोकी तान केरता उगाडणे माय आवी.” 9तुमरे माय ओहलो कूण हि, जो आपणो तान सोरो रोटू मागी ते ताह देगडा आपी? 10एने मासा मागी ते ताह गेयळेक आपी? 11जर तुमु खराब रेयने भी, आपणा सोराह हाजाली वस्तु आपणेन जाणतेह, ते तुमरो स्वर्गावालू आबुक तुमूह हाजाली वोस्तु काहा नेय आपी? 12एने ज्या कारण से तुमूह लागी का माणहे तुमरे हेरया वागणे जुवी तोहोलोच तुमु भी तासहेऱ्यो वागु, काहाकाय व्यवस्था एने भविष्यवक्ता ज्योच हिकाडेल हेते.

चोव्डी एने हाकडी वाट

(लूका 13:24)

13“चोवडा दरवाजामा रिगणेन होदुमा, काहाकाय चोवडो हि ती वात जी सिदो नाशमा लीन जाथी, एने ती सिडिक पोर चालणारा जादा माणहे हेते. 14पुण हाकडो हि ती सिडिक जी जीवनावोर लीन जाथी, एने थोडोच माणहे हेते जा ती सिडिक पोर जातेह.”

जोहलो झाड तुहलो फोल

(लूका 6:43,44-46; 13:24-27)

15जुठा भविष्यवक्ता से सावधान रीवू, जा मेंढरांन वेह मा आवती पुण मायरीन फाडीन खाणारे कोल्यो रेणू. 16तान फोला पोररीन ताह तुमूह ओलखाणे, काय माणहे काटावालो झाडाउपेर अंगूर एने उटकटरान झाडा पोररीन अंजीर तोड्णु काय? 17इहीच हाजो झाड हाजो फोल आपणे, पुण खराब झाड खारब फोल आपणे. 18हाजो झाड खराब फोल आप सकीत नाहं, एने खारब झाड हाजो फोल आप सकीत नाहं 19हर एक झाड जो हाजो फोल नाय आपी तो आकठाम टाकणेम आवी. 20ज्यासे तुमु तान फोला पोररीन ओलखाणे.

21हर एकजाण जो माहु हे प्रभु, हे प्रभु, केथी, ता आखा स्वर्गान राज्यामाय प्रवेश नाय केरती, पुण जो मारा स्वर्गीय आबाकने ईच्छान पोर चाली तोच स्वर्गान राज्यामाय प्रवेश जाय. 22ती दिह जुलुम माणहे माहु केती, प्रभु! हे प्रभु! आमु तारा नावा से भविष्यवाणी किरील, तारा नावा से दुष्ट आत्मा काडील, एने तारा नावा से कोलाक आश्चर्यान काम नाह केऱ्या काय? 23तेवी मी ताह केह, “मी तुमूह केधीच ओलखित नाह” हे कुकर्म केरणारा माहुरीन सेटा एवू.

घेर बोणावणारा दुय माणहे, बुद्धिमान एने मूर्ख

(लूका 6:47-49)

24“केरीन जो कूण मारी वातू होम्लीन वचनान पोर चाली, तो ता बुद्धिमान माणहान होस हि, जो आपणो घेर सापरापुर बांधीलह. 25एने पाणी पोडनो, एने नदी आवो, वादूण भी आवो एने ता घेराह लागिल तेभी तो घेर पोडयो नाहं, काहाकाय तान पायु सापरापुर बांधील इतू. 26पुण जो कूण मारो वचनाह होमलीन, एने तान पोर चाली नाय, तो ता मुर्खान होस हि जो आपणो घेर रेटापूर बांदयो. 27एने पाणी पोडयो, नदी आवी, वादूण भी आवो एने ता घेराह लाग्यो, तेवी तो घेर पोड गीयो एने आखो एतो काम नाह एतो ओहलो एय गीयो.”

28जेवी, यीशु ज्यू वातू केतालू, तेवी तावली गेर्दी तान हिकाडणे पोर भोगलाय गीयी 29काहाकाय तो ताह शास्त्री गेतुच नाहं पुण अधिकारीन गेतुच हिकाड तालो.

Выбрано:

मत्ती 7: NLXNT

Выделить

Копировать