मत्ती 18
18
सरग चो राज ने बड़े कोन?
1हुन समया चेलामन ईशु चो लगे ऐऊन भाती पचारूक मुरयाला, “सरग चो राज ने बड़े कोन आय?” 2ऐ थाने हुन गोटक लेका के लगे हाग देऊन भाती हुनमन चो मंजी उबा करलो, 3आउर बल्लो, “मय तुमचो ले सते बलें सें कि जिदलदाय ले तुमी नी फिरास आउर लेकामन चो असन नी बनास, तुमी सरग चो राज ने ओलुक नी सका से। 4जोन कोनी आपन खुद के ऐ लेका चो असन नानी करेंदे, हुन सरग चो राज ने बड़े होयेदे। 5आउर जोन कोनी मोचो नाव ले गोटक असन लेका के गरहन करू आय हुन मोके गरहन करू आय।
ठोकरना खुआतो बितामन उपरे हाय
6“मान्तर जोन कोनी ऐ नानीमन थानले जोन मोचो उपरे बिश्वास कर सोत गोटक के ठोकरना खुआ ओत, हुनचो काजे अच्छा होती कि बड़े जता चो पाट हुनचो टोडरा ने ओराया जाति, आउर हुन गड़ीयां समुन्द ने बुड़ाया जातो। 7ठोकरनामन चो लागुन जगत उपरे हाय! ठोकरनामन चो लगतोर जरूरी आय; मान्तर हाय हुन माने चो उपरे जेचो लागुन ठोकरना लगु आय।
8“अगर तुचो हाथ नाहले तुचो पाँय तुके ठोकरना खुआ ये दे, तो हुनके गोंदुन भाती पकाऊन देस; कोला नाहले खोड़ीया होऊन भाती जीवना ने ओलतोर तुचो काजे ऐचो ले अच्छा आय कि दुय हाथ नाहले दुय पाँय रते-रते तुय नी सरतो आईग ने पकाया जासे। 9अगर तुचो आँईक तुके ठोकरना खुआ ये दे, तेबे हुनके निकराऊन भाती पकाऊन देस; काना होऊन भाती जीवना ने ओलतोर तुचो काजे ऐचो ले अच्छा आय कि दुय आँईक रते-रते तुय नरक चो आईग ने पकाया जासे।
भुलकलो मेंडा चो कहनी
10“दका, तुमी ऐ नानीमन थानले कोनी के तुच्छ नी जाना; कसनबल्लोने मय तुमचो ले बलेंसें कि सरग ने हुनमन चो दूत मोचो सरग चो बुआ चो थोमना हरमेशा दकु आत। 11कसनबल्लोने माने चो बेटा हाजलो लोग के बचाऊक ईलो से।
12“तुमी काय बिचारेसास? अगर कोनी माने चो सव मेंडामन रओ, आउर हुनमन थानले गोटक भुलकुन जाओ, तेबे काय हुन निन्यानबे के छांडुन भाती, आउर डोंगरीमन थाने जाऊन भाती, हुन भुलकलो बिती के नी डगरा ये? 13आउर अगर असन होओ कि हुनके मिराओ, तेबे मय तुमचो ले सते बलेंसें कि हुन-हुन निन्यानबे मेंडामन चो काजे जोन भुलकुन नी रला, ईतलो हरिक नी होये जितरो कि ऐ मेंड़ा चो काजे होऊ आय। 14असने ची तुमचो बुआ चो जोन सरग ने आसे ऐ इच्छा नुआय कि ऐ नानीमन थानले गोटक बले नष्ट होओ।
अपराधिमन काजे बेवहार
15“अगर तुचो भाई तुचो बिरूद अपराध करो, तेबे जा आउर ऐकला ने गोठ बात करून हुनके समजाव; अगर हुन तुचो सुने दे तेबे तुय आपलो भाई के मिरालिस। 16अगर हुन नी सुने दे, तेबे गोटक नाहले दुय झान के आपलो संगे आउर धरून जा, कि ‘हर कोनी गोठ दुय नाहले तीन गोहईमन चो मुंह ले तय करा जाओ।’ 17अगर हुन हुनमन चो बले नी माने दे, तेबे कलीसिया ले बोलुन देस, मान्तर अगर हुन कलीसिया चो बले नी माने दे तेबे तुय हुनके दुसर जाति आउर कर धरू बितामन असन जान।
अनुमती देतोर आउर अनुमती नी देतोर
18“मय तुमचो ले सते बलेंसें, जोन काई तुमी धरतनी ने बान्दा से, हुन सरग ने बान्दा जायेदे आउर जोन काई तुमी धरतनी थाने खोला से, हुन सरग ने खुले दे। 19फेर मय तुमचो ले बलेंसें, अगर तुमचो थानले दुय झान धरतनी थाने कोनी गोठ चो काजे गोटक मन होऊन भाती हुनके मांगोत, तेबे हुन मोचो बुआ चो बाटले जोन सरग ने आसे, हुनमन काजे होऊन जायेदे। 20कसनबल्लोने जोन थाने दुय नाहले तीन मोचो नाव ने रूंड़ा होऊ आत, हुता मय हुनमन चो मंजी ने होऊ आय।”
छमा नी करतो बिता दास चो कहनी
21तेबे पतरस लगे ऐऊन भाती हुनचो ले बल्लो, “हे परबु, अगर मोचो भाई अपराध करते रये दे, तो मय कितलो हार हुनके छमा करेंदे? काय सात हार तक?” 22ईशु हुनचो ले बल्लो, “मय तुचो ले ऐ नी बोलें कि सात हार तक मान्तर सात हार चो सत्तर गुना तक।”
23“ऐईकाजे सरग चो राज हुन राजा चो असन आय, जोन आपलो दासमन ले लेखा धरूक चाह लो। 24जिदलदाय हुन लेखा धरूक मुरयालो, तेबे गोटक झान हुनचो पुरे आना गेलो जोन दस हजार तोड़ा चो लागा-लागु रलो। 25जसन कि पटातो काजे हुनचो लगे काई नी रली, तेबे हुनचो मालिक बल्लो, ‘ऐ आउर ऐचो बायले आउर पिला झिलामन आउर जोन काई ऐचो आय सपाय बिका जाओ, आउर करजा चुकाया जाओ।’ 26ऐ थाने हुन दास घसरुन भाती हुनके जुहार करलो, आउर बल्लो, ‘हे मालिक धीरज धर, मय सपाय काई भरून देयेंदे।’ 27तेबे हुन दास चो मालिक जीव दुकाऊन भाती हुनके छांडुन दिलो, आउर हुनचो करजा बले छमा करून दिलो।”
28“मान्तर जिदलदाय हुन दास बाहरे निकरलो, तेबे हुनचो संगवारी दासमन थानले गोटक हुनके मिरलो जोन हुनचो सव दीनार चो लागा-लागु रलो हुन हुनके धरून भाती हुनचो टोडरा पिचक लो आउर बल्लो, ‘जोन काई तुचो उपरे करजा आसे भरून देस।’ 29ऐ थाने हुनचो संगवारी दास घसरुन भाती, हुनचो ले गुहारुक मुरयालो; कि धीरज धर मय सपाय भरून देयेंदे। 30हुन नी मानलो, मान्तर जाऊन भाती हुनके जयलघर ने डालुन दिलो कि जिदलदाय तक लागा भरून नी देये, हुदलदाय तक हुताय रओ। 31हुनचो संगवारी दास ऐ जोन होऊ रली दकुन भाती खुबे मुरमुरा होला, आउर जाऊन भाती आपलो मालिक के पुरा हाल सांगुन दिला। 32तेबे हुनचो मालिक हुनके हाग देऊन भाती हुनचो ले बल्लो, ‘हे दुष्ट दास, तुय जोन मोचो ले गुहारलिस, तेबे मय तुचो हुन पुईतराय करजा छमा करून दिले। 33ऐईकाजे जसन मय तुचो उपरे दया करले, असने ची काय तुके बले आपलो संगवारी दास उपरे दया करतोर नी रली?’ 34आउर हुनचो मालिक रीस ने ऐऊन भाती हुनके डण्ड देतो बितामन चो हाथ ने सोपुन दिलो, कि जिदलदाय तक हुन सपाय लागा भरून नी देयेंदे, हुदलदाय तक हुनमन चो हाथ ने रओ।
35“असने परकार अगर तुमचो थानले सपाय गोटक आपलो भाई के मन ले छमा नी करेंदे, तेबे मोचो बुआ जोन सरग ने आसे, तुमचो संगे बले असने ची करेंदे।”
Выбрано:
मत्ती 18: HLBNT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Halbi Bible by The Love Fellowship is licensed under Creative Commons Attribution-ShareAlike 4.0 License.
