Met 9
9
Zambe a bo élat a Noé
(Met 1:26-29; Nk 21:12-14,20; Nlb 35:18-21, 31-33)
1Zambe a nga botane Noé, nalé fe bobefame bé a jô be na: Bian a fôé a yiane si. 2Mia ye bo ékowoñ a angônda jam e mfa'a tit ése ya si, ônon ôse ya yôp, jôm ése ja woñe si a bekos bese ya mañ; be ne e mvean e mo menan été. 3Jôm ése ja woñ a é vee ja ye bo mia bidi; ma ve mia je avale fe me nga bo asu bilé. 4V'akôsa bo nalé, mia ye bo te di minsôn a ényiñe jap, nalé a ne na: A metyi. 5Nalé fe na, ma ye sili metyi menan, e ne na ényiñe jenan, ma ye sili me be tit ése; a ma ye sili môt ase ényiñe môt a ne monyañ.
6Nyô a kuli metyi me môt, metyi mé ma ye fe kuliban a e môte mbok.
7Amu Zambe a nga bo môt a éyeka'a jé; a mia, bian a fôé, jala'ane *si nyô a bôt, a bo'on abui été.
E ntutum, ndem élat e zañe Zambe a si
(Met 8:20-22; Eza 54:9-10; 2 Pi 3:6-7)
8Zambe a nga beta kobô Noé ba be bobefame bé a jô'ô na: 9E mfa'a wom, ma bo élate jam a mia a mvoñe bôte jenan é ne mvuse jenan, 10a bevevee bitétéa be ne a mia, to'o anoñ, biyem nge betite bese ya *si nyô, a ba bese be nga kui *ark atan, a betite bese ya si. 11Ma bo élate jam a mia, nsôn éziñ wo ye bo te beta jañ a mendime me ndôn, a ndôn ja ye bo te beta kui asu ya jiane si. 12Zambe nye na: E ndem élat ma telé e zañe jam a mia, nalé fe bevevee be biôme bese be ne a mia asu miaé mia zu e nje nyô: 13Ma telé ntutume wom e minkut été, a wo ye bo ndem e zañe jam a *si nyô. 14Eyoñe me maneya kôane minkute yôp, ntutum wo ye yené, 15a ma ye simesan élate jam é ne zañe jam a mia, nalé fe bevevee be biôme bese, a mendim ma ye bo te beta kôñelane ndôn asu ya jiane nsôn ôse. 16Ntutum wo ye bo e minkut a ma ye fombô wô asu ya simesan élate ya nnôm éto e zañe Zambe a bitétéa bi vee bi ne *si nyô. 17Zambe a nga jô Noé na: E ndeme y'élat ma bo e zañe jam a nsôn ôse ô nee *si nyô e nje le.
Noé a bobefame bé
(Mink 20:1; Ef 5:18; Nk 20:12; Dt 27:16)
18E bobefame be Noé be nga so *ark be mbe na: Sem, Kam a Yafet. Kam a mbe ésaa Kanaan. 19E bobefam belaa be Noé be nga beta jalé *si nyô a bôt.
20Noé a nga taté na a bé mefup a a nga bé afube mindi'i mi woon. 21A nga nyu woon, a kele sulé a bômbô soé ézezañe *nda éndelé jé été. 22Kam, ésaa Kanaan, a nga yene soé ésaa wé a kañete jame te atan e be bobenyañ. 23Eyoñe te Sem a Yafet be nga nyoñ alô'ô, be beté de bebaane bitule biap, be nga wulu mvumvua a buti soé ésaa wop; mbôlô mesu map me mbe nkôñelan, be nji ke yene soé ésaa wop. 24Eyoñe Noé a nga vee sulé jé, a nga nyoñe foé ya jame ébatane monafame jé é nga bo nye. 25Ane a nga jô na:
Kanaan a bo'o biyo'é!
A bo'o *ôlo belo
asu bobenyañe bé!
26A nga beta jô na:
Akéva e bo'o be Nti, e Zambe Sem,
Kanaan a bo'o *ôlo viap!
27Zambe a nene'e Yafet
a tabe'e menda bindelé bi Sem
a Kanaan a bo'o *ôlo viap.
28Noé a nga beta nyiñe mimbu 350 e mvuse ndôn.
29E nté ôse y'ényiñe jé ô mbe mimbu 950; wôna a nga wu.
Выбрано:
Met 9: BDCB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible en langue Bulu © L'Alliance Biblique du Cameroun, 2007, 2015.
