Hwègbèèlì 7

7
Jòòhwì ema Rzìtehvànɛ à mà òhwe
1È Pìlìrzì e karzami e ma ijòwa Rzìtehvànɛ nanù ema, “Hwene hweyà ema hwa òhwa lì ò teŋgɛ̀nɛ̀ hwe hwèlì ndi e jɔ̀kɛ̀ e?” 2Rzìtehvànɛ rzìi a alàhwɛ̀ wòlìya wò mbòwa nanù ema, “Wònyamòwè na hwa tààtɛ̀, e nò òkànèyà tɛ. Lòohwà la èluhwe lì ma wurzeya rzàŋgò wa arzu Abràhamù e hvònda ema à mà hwɛ ò erzòòkà ya Mèrzòpòtemìyà ndèŋgànà mɔ̀ à e ɛ̀ndɛ ò lì lìya ò e mbòwa ya Halànì. 3Aŋga ndi Lohwɛ̀ à mà mò òhweyà nanù ema, ‘Hwɛmɛ lìtumba la aŋgɔ̀ na èkòmè ya aŋgɔ̀ ò ɛ̀ndɛ ò mɔ̀nyɛ̀ ema na hwɛnì lì ò uŋmɛ̀lɛ̀.’ 4O èŋgànɛ̀lɛ̀ mɔ̀ à mà lììya mɔ̀nyɛ̀ mò Chàldeyàni rzìi a ɛ̀ndɛ lì lìya ò mbòwa ya Harani. O mburzà kpelì ya ama Abràhamù rzaŋgɛ, Lohwɛ̀ rzìi a gbeyà Abràhamù a jà lì lìya ò mònò mɔ̀nyɛ̀ ema inyɔ e hwèlì nàŋgɛ̀. 5O eŋge hvònda Lohwɛ̀ a rzi ŋgbè Abràhamù tɔ̀ yòma, tɔ̀ lìtaŋga lɔ̀kɔ la mɔ̀nyɛ̀. Ndi Lohwɛ̀ à mà mò kàkɛnɛ nanù ema, mɔ̀ na e nyɔ̀ŋgɔ̀ni ya eni ema e ò jɛ̀ɛ̀ ò mburza ya eni, wò ò hwɛnɛ mòŋgò mɔ̀nyɛ̀. Tɔ̀ nɛ ò eŋge hvònda Abràhamù mɔ̀ à rzìi hwɛnɛ tɔ̀ ŋmanà. 6Èya ene ema Lohwɛ̀ à mà òhweyà Abràhamù, nanù ema, ‘O hwègbe hwenii hwe meya, e nyɔ̀ŋgɔ̀nì ya aŋgɔ̀ e ò hwɛ ndi hwàyɛ̀nì ò mò hvɛhvɛ mɔ̀nyɛ̀, ema hwa ò hwɛ ndi hwàkòmì ndèŋgànà hwa ò hwa tàkirzɛ̀. 7Ndi imba na ò kɔ̀kìrzɛ̀ eŋge èkòmè ema wɔ̀ hwa ò gbèeyà ndi nàa hwàkòmì. O mburza hvònda e nyɔ̀ŋgɔ̀nì ya aŋgɔ̀ e ò anjiya ò eŋge èkòmè ò lì ɛndɛ ò ene èki ndèŋgànɛ̀lɛ̀ hwa ò kanɛ̀lɛ̀lɛ̀ aŋga ò lìna la ami.’ 8Lohwɛ̀ rzìi a ŋgba Abràhamù hweyi ya lì endàhwa nàa embànèlì ya e hwèyi ya ama Lohwɛ̀ na hwatò hwa eni. O èŋgànɛ̀lɛ̀ Abràhamù à mà endà è ŋmanà wa eni Irzàkì ò mburza ya mèenyà lìrzamba me hwèŋyàhwèlì hwe eni. Irzàkì mɔ̀ hvɛ à mà endà è ŋmanà wa eni Jèkɔ̀bu, Jèkɔ̀bu hvɛ rzi a endà lìyòmɛ̀ la eni la hwàanà na hwàhwàkɛ̀ ema lì hwèlì imbamba ja arzu.
9“Iŋgi mbamba ja arzu i ma nòneyà ŋmanyàŋgò wa awu mɔ̀kɔ Jòrzɛ̀hvù. O eŋgànɛ̀lɛ̀ hwà mà mò àhwirzɛ̀ nàa mòkòmì. Hwàtò ema hwà mà mò anda, hwà mà mò ɛ̀ndɛ̀nɛ̀ ò èkòmè ya Ìjiptò. Ndi Lohwɛ̀ à mà hwɛ ò mburza ya eni, 10rzìi a mò gbeyà ò lì akeyà mètàkà me eni me arzɛ ema à mà ùŋmànɛ̀lɛ̀. Lohwɛ̀ à mà gbeyà nanù ema Hvèro e Kiŋgɛ ya Ìjiptò ò lì òkana Yòrzɛ̀hvù mɔ̀nyɛ̀ŋgì, rzìi a ŋgba Jòrzɛ̀hvù lìhwiyè na òma à mà uke ò wòrzò wò ama e kiŋgɛ̀. Ène eyà e ma gbeyà Hvèro à mà ŋgba Jòrzɛ̀hvù e kònda ya lìkànèyà la èkòmè ya arzɛ ya Ìjiptò na erzaŋgò ya eni ya arzɛ ya kiŋgɛ.” 11Nàŋgɛ rzɔ ò ma jà njàwò ò hwèkòmè hwe Ìjiptò na Kenàanì ema e ma jànà lìtake rzayì-rzayì. Imbamba ja arzu i rzi tànɛyi lì lùwa mòlelì. 12Jèkɔ̀bu à mà hweye nanù ema ò hwèlì mòlelì, à mà òma hwàanà hwa eni aŋga. Hwanu hwàna hwa eni ndi hwa hwèlì imbamba ja arzu. È ŋgelì ya awu ya wòrzò yɔ eŋge ò wɔ̀ lì ɛndɛ aŋga. 13È hvònda ema hwàanà hwa ama Jèkɔ̀bu hwà mà ɛndɛ ò Ìjiptò e ŋgelì ema e ma ùkirzɛ̀ ihwakɛ, Yòrzɛ̀hvù à mà hwa àwùlùhwɛlɛlɛ̀ mɔ̀ ŋmìti. Aŋga ndi kiŋgɛ Hvèro a à rzɔ̀ŋgìtɛ̀nɛ̀ lìtumba la ama Jòrzɛ̀hvù. 14O mburza nanù, Jòrzɛ̀hvù rzìi a òhweyà wònyanyàŋgò wa eni ò lì òhweyà rzàŋgò hwa awu Jèkɔ̀bu ò lì jà ò Ìjiptò na lìtumba la eni la arzɛ. Wɔ̀ hwa arzɛ hwà mà hwɛ meni lìrzamba me hwatò na hwata. 15Aŋga ndi Jèkɔ̀bu a ɔ̀ndɔ̀nɔ lìtumba la eni la arzɛ ò èkòmè ya Ìjiptò aŋga ndi mɔ̀ na imbamba ja arzu i ma hwɛ natɛ̀ɛ hwa ŋwa. 16O mburza hvònda hwèembè hwe awu hwe ma hwanɛhwɛ ò lì timba ò mbòwa ya Rzɛ̀chɛ̀mì, hwà mà hwa imeya aŋga ò mɔ̀nyɛ̀ ema Abràhamù à mà àndane na wòlì wò eni ò hwàanà hwa lìtumba la ama Hàmɔ̀.
17“Nà òma e hvònda e ma kòmbɛ̀nɛ̀ ema Lohwɛ̀ à mà hwɛnɛ lì òndìrzɛ̀ lìkàkɛnɛ la eni na Abràhamù mɔ̀rzɔ̀ŋgì mò hwatò hwa arzu ema mò ma hwɛ ò èkòmè ya Ìjiptò mò ma hwɛ mò ma ahwatɛ rzayi-rzayi. 18O lìrzukù kiŋgɛ̀ hvɔ̀kɔ ema e rzi hwiyɛ tɔ̀ eyà lì hvòmɛ̀nɛ̀ Jòrzɛ̀hvù yɔ ndi e ma hwɛ ò lìkànèyà la Ìjiptò. 19Ène kiŋgɛ̀ e ma ɔnjɔ na lì tàkìrzɛ̀ imbamba ja arzu. A ma gbeyà ema hwa rzɔ̀njɛ̀lɛ̀ mɛ̀ɛŋgɛ me awu me hwàànà ò èwòka, aŋga nanù meŋge mɛɛŋgɛ me ŋwa. 20O eŋge hvònda ndi Mòrzè à mà ŋyahwe, à mà hwɛ ndi mòlòŋgà mò ŋmanà. A ma wòŋgòwahwa na lìtumba la eni ò ndawò ya ama rzàŋgɛ natɛ̀ɛ na ŋgbɛ̀ndɛ iyàwò. 21O mburza eŋge hvònda rzìi hwa mò rzɔ̀njɛlɛ ò ewòka. Aŋga ndi e ŋgɔ̀ndɔ̀ ya ama kiŋgɛ Hvèro ya a mò hvùlùwɛ̀, rzìi e mò wòwa nàa e ŋmanà wa eni a mò wòŋgòwa natɛ̀ɛ a kòka. 22Mòrzè à mà òkòlɛ̀hwɛ lìhwiyè la arzɛ la hwatò hwa Ìjiptò rzìi a ja yumɛ ya mòtò ò hwèyòhwèlì na hwègbèèlì.
23“È hvònda Mòrzè à mà ùke mènìmenì me meya à mà lùtèyà ò lì hvɛ̀hvɛ̀ wònyànyàŋgò wa eni hwa wònyà Irzàyɛ̀lì. 24A ma ɛnɛ mòtò mɔ̀kɔ wa Ìjiptò a tàkìrzɛ̀ mòtò mɔ̀kɔ wa Irzàyɛ̀lì rzìi a ɛndɛ aŋga ò lì timbirzɛlɛlɛ. A ma ɛndɛ aŋga ò lì mò òŋgòwànà rzìi a òŋwa òŋgò mòtò wa Ìjiptò. 25Mòrzè à mà ɔ̀ŋgɛ̀lɛ̀ nanù ema, e hwa eni hwatò hwa ò embɛ nanù ema, Lohwɛ̀ a hwèlì a mò gbeyàna ò lì hwa kàrzòlɛ̀ ò màà mà hwatò hwa Ìjiptò, ndi wɔ̀ hwa rzi rzɔŋgìtɛ̀nɛ. 26Ènɛyi eka ya elele Mòrzè rzìi a ɛnɛ hvɛ hwatò hwa wònyà Irzàyɛ̀lì hwahwàkɛ hwa ana. Rzìi à keka lì hwa rzeeya ema hwa jèe ò ɛ̀yɔ̀lɛ̀. Rzìi à hwa òhweyà nanù ema, ‘È rza enje e jɔ̀kɛ̀ nanù ema inyɔ e yàhwi e? Mamɛ ndeŋgatɛ e arza lì àhwenìrzɛ̀nɛ̀ mɔ̀kɔ na ɔ̀nɛyi e?’ 27Ndi òŋgò ema à mà arza lì hwenirzɛ ɔ̀nɛyi, à mà kèma Mòrzè èhvàrzù yɔ̀kɔ rzìi à mò ijòwa nanù ema, ‘Njɛ̀nɛ à ò gbèyi è mòtìmbèlì nà è mòkàyìrzèlì hwa arzu e? 28Ò arza ndi lì nò òŋwa imba hvɛ nà òma ò mà òŋwe mòtò wà Ìjiptò ŋmɛ̀lɛ̀ e?’ 29Nà òma Mòrzè à mà hwèye nanù rzi à hwaŋga lì ɛ̀ndɛ lì lìya ò èkòmè ya Mìdìyànì. Aŋga ndi à mà lììyà natɛ̀ɛ à ŋya hwàna hwà wunyanà wà eni hwahwàkɛ.
30“Ò mburzà yà mènìmenìì mè mèya, è aŋgèlì yà ama Lohwɛ̀ è mà wùrzeyà Mòrzè ò mòrzanjɛ̀. À mà mò wùrzeyà ò tenì yà mùnyà ema mò mà hwɛ lì òŋweya ŋmanà gbèè. Ène eyà è mà kòmbɛ̀nɛ̀ ndi è hvàko yà Rzìnàyì. 31Nà òma Mòrzè à mà ɛnɛ nanù, rzìi à tàmeyà mamɛ yà arzɛ ema à mà ɛnɛ̀. Rzìi à ɛ̀ndɛ lì kòmbɛ̀nɛ̀ ò lì ɛnɛ̀ kɔ̀yi-kɔ̀yi, aŋga ndi à hweya lìlò là ama Rzàŋgò lì òhwa nanù ema, 32‘Imba ndi nà hwèlì Lòohwà là ama imbamba ja anyu, Lòohwà là ama Abràhamù, Irzàkì nà Jèkɔ̀bù.’ Mòrzè rzìi a à tùmeyà nà mòkambiya ema à rzi tànɛ hvɛ tɔ̀ lì ɔŋgɔ̀.
33“Rzàŋgò a ma mò òhweyà nanù ema, ‘Rzòlòwa hwetambi hwe aŋgɔ̀ èhwanja èki ema ò tɛmì nanù e hwèlì ndi mɔ̀nyɛ̀ mò Wòtani. 34Nà mà ɛnɛ nɛ hwatò hwa ami hwa tàkìrzɛ̀hwɛ ò èkòmè ya Ìjiptò. Nà hwèya na òma hwa ɔnyɔ ɔ̀ndeŋgàtɛ̀ na jelì ò lì hwa òŋgòwàna. O naŋgɛ jà nà ò òma ò èkòmè ya Ìjiptò.’ 35Mònò Mòrzè mɔndi wònyà Irzàyɛ̀lì hwà mà ndinde, nà òma à mà ijòwàhwè nanù ema, ‘Njɛ̀nɛ à mà ò gbeyà è mòkànèlì nà è mòkàyìrzèlì ò ŋmanyu yà arzu è?’ Lohwɛ̀ ŋmìti ndi à mà mò òma ò lì hwɛ è mòtìmbèlì nà è mòrzùŋgèlì wà awu. Ène eyà è mà gbèyɛ̀nɛ̀ è hvònda ema è aŋgèlì è mà mò wùrzeyà rzìi gbèè wà òŋwa mùnya. 36Oŋgò Mòrzè ndi à mà wùrzànà hwatò hwa Irzàyɛ̀lì ò èkòmè ya Ìjiptò, à mà gbeyà hweyà hwe mànyakà nà hwembànèlì ò èkòmè ya Ìjiptò, ò ŋmànja ema mò teyàà. À mà gbeyà hwembànèlì hwe mànyakà ò mènìmenì mè mèya ema hwa mà lììyà ò mòrzanjɛ̀. 37Onò Mòrzè ndi à mà hwɛ è mɔ̀ ema à mà òhweyà wònyà Irzàyɛ̀lì nanù ema, ‘Lohwɛ̀ à è òmèya mòòhwèlì wà èlìŋgɛ̀, ema à ò uwɛ̀lɛ̀lɛ̀yi ndi ò ìtììtènì jà anyu, nyayi hvɔ̀kɔ nà òma à nò òmi.’ 38Mònò Mòrzè mɛnɛ ndi mò ma hwɛ na hwatò hwa arzu ò mòrzanjɛ̀. A ma hwɛ aŋga na imbamba ja arzu e hvònda ema e aŋgèlì ema Lohwɛ̀ à mà òme na ŋmɛ̀ndì ò e hvàko ya Rzinàyi à mà hwa òhwirzɛnɛ. Mònò ŋmɛ̀ndì ema Mòrzè à mà wòwane eŋge aŋgèlì, mɔ̀ ndi irzɔ i hwèlì i gbeyàna natɛ̀ɛ na yawònò.
39“Ndi imbamba ja arzu i rzi hweyàne Mòrzè. Ndi wɔ̀ hwà mà mò ndinda èhvarzù yɔ̀kɔ rzi hwa a lùtèyà ndi nanù ema òma hwa timbe ndi ò èkòmè ya Ìjiptò. 40È hvònda ema Mòrzè à mà hwɛ ò hvàko ya Rzinàyi, wònya Irzàyɛ̀lì rzi hwa òhweyà ŋmanyàŋgò wa eni Arɔ̀nì nanù ema, ‘O jò wèkeyà hwema ema hwe hwèlì nàa Lohwɛ̀ ema hwe jò timba, èhwanja i rza hwi eyà ema e ma gbèyɛ̀nɛ na Mòrzè ema à mà jò wurzana ò èkòmè ya Ìjiptò.’ 41Èŋge hvònda ndi hwà mà gbèye ikùmu ema i ma akɛ̀nɛ ŋguma nyàkà. Rzìi hwa wòteyà lì òŋweya iŋgi ikùmu hwèembè nàa jàhwèyà. Hwà mà gbeyà hvɛ ndèma ò lì lìŋgàna iŋgi ikùmu ema hwà mà gbeyàne na màà mà awu. 42Aŋga ndi Lohwɛ̀ à mà hwa kumbɛlɛlɛ e mburza rzi a hwa hwɛmɛ ò lì kanɛ̀ iŋginyà ema i hwèlì ò lìwòhwɛ̀ là ŋmanyu. È ma gbèyɛnɛ na òma e tìlahwì ò kààtì ya hwà-òhwèlì hwa hwèlìŋgɛ nanù ema,
‘Hwàtò hwa Irzàyɛ̀lì imba ndi e ma rziikeya na lì tumbɛlɛlɛ hwèembè ò lì ŋgba jàhwèyà e hvònda ema e ma hwɛ ò mòrzanjɛ ò mènìmenì me meya e? 43Lìwòndò la lòòhwà ema lì hwɛ̀lɛ̀hwɛ̀ Mòlɛ̀ki lɔ ndi inyɔ e ma hwanɛ.
Inyɔ e hwèlì lì ahwànà èrzìrzà ya lòòhwà la rzòmbe ema lì hwɛ̀lɛ̀hwɛ̀ Rɛ̀hvànì.
Hwerzumbu hwa ene ema inyɔ e ma wòndɛnɛ na màà mà anyu rzìi e a rzùumanà màwɔ̀ŋgɔ̀ŋgɔ̀ ma anyu ò lì hwe kànɛ.
O èŋgànɛ̀lɛ̀ rzɔ na e òma hvòò ò ehvɛhvɛ èkòmè lì aka Babìlɔ̀nì.’”
44Rzìtehvànɛ à mà ɛndɛ ò wòrzò hvɛ ò lì òhwa nanù ema, “È hvònda ema imbamba ja arzu i ma hwɛ ò mòrzanjɛ, wɔ̀ hwà mà òhva lìwòndò la ama Lohwɛ̀, eŋge ŋgàna e uŋmɛ̀lɛ̀ ndi nanù ema Lohwɛ̀ à mà hwɛ na wɔ̀. Hwà mà òŋga lìŋgi lìwòndò e ŋgàna ema Lohwɛ̀ à mà òhweyà Mòrzè ò lì òŋga. Èmɛnɛni ema Lohwɛ̀ à mà ŋgbe Mòrzè, yɔ ndi Mòrzè à mà òŋgame. 45O mburzà ya hvònda, imbamba ja arzu i ma ŋgbààhwà lìŋgi lìwòndò na i tààtɛ̀ ja awu. Hwà mà hwanɛ lìŋgi lìwòndò ò nyò na òma hwà mà hwɛ lì hvɔ̀ɔ̀tɔnɔ hwèkòmè mèyɔ̀nyɛ nà Jòrzùwà ema Lohwɛ̀ à mà hvaye hwatò ò lì hwa ŋgba. Liŋgi lìwòndò, lì ma hwɛ aŋga natɛ̀ɛ na e hvònda ya ama Dàhwitì. 46È ndèli ya ama Lohwɛ̀ e ma òŋgama Dàhwitì. O eŋgànɛ̀lɛ̀ rzɔ mɔ̀ à mà akòhwana Lohwɛ̀ nanù ema a mò ŋgbe e wònja ò lì òŋgeya Lohwɛ̀ ema Jèkɔ̀bu à mà gbèeyà ndawò. 47Ndi Rzòlòmɔ̀nì e ŋmanà wa munyanà wa ama Dàhwitì mɔ̀ ndi à mà mò òŋgeya eŋge ndawò.
48“Ndi lìŋgi Lohwà lì karzami lì rza lìya mawòŋgi ema mà òŋgahwi na màà mà hwatò hwa hwènàma. È hwèlì ndi nanù ema, na òma mòòhwèlì mɔ̀kɔ wà hwèlìŋgɛ̀ a òhwi nanù ema, Lohwɛ̀ a òhwi nanù ema,
49‘È ŋmanyu ya Lohwà yɔ ndi e hwèlì e kònda ya ami,
hwèlìyelì hwe ami, e rze ya mɔ̀nyɛ̀ hvɛ ekì ema na ika màtaŋgà mà ami.
Ima lìtumba la ndawò ema inyɔ e tànɛyi lì nò òŋgeya e?
Tɔ̀ òne ekì ya ami ya lì arziyòlɛ e hwɛ e?
50Rzeke màà mà ami ndi ma weki hwene hwema hwe arzɛ e?’”
51Rzìtehvànɛ rzìi a hwatɛ hvɛ ò lì òhwa nanù ema, “Inyɔ hwatò hwa maniya, mèèmà me anyu ma eti. È ma umba matò ma anyu ò lì hweyà ŋmɛ̀ndì mò ama Lohwɛ̀. È gbèyi ndi nàa imbamba ja anyu, e teŋgɛ̀nɛ̀yi Èlìŋgɛ̀ yà Wòtani. 52O ma hwɛ tɔ̀ mòòhwèlì wà èlìŋgɛ̀ tɔ̀ mɔ̀kɔ ema imbamba ja anyu, i rzi tàkirzɛ̀ e? Wɔ̀ hwà mà òŋwa irzuhwɛlɛ ja ama Lohwɛ̀ ja arzɛ ja kòhwa, ema hwà mà hwɛ lì òhwa lì hvòmɛ̀nɛ̀ hwejèelì hwe ama e mɔ̀ ema a gbèeyà hweyà ema hwe hvòmɛ̀nɛ̀. O naŋgɛ rzɔ inyɔ e ma mò àhwirzɛ̀ na lì mò òŋwa. 53Inyɔ ndi e hwèlì e wɔ̀ ema e ma luwa imbenda ja ama Lohwɛ̀ ema i ma ŋgbahwa lì akeyà na i aŋgèlì, ndi tɔ̀ nanù inyɔ e rza ji gbeyana.”
Hwà mà aŋgba Rzìtehvànɛ màŋyàyi
54Nà òma wòlìya wò mbòwa hwà mà òkànèyà hweyà ema Rzìtehvànɛ à mà hwɛ lì òhwa, wɔ̀ hwà mà òhva hwetatò rzayi-rzayi rzìi hwa a kɔ̀kɔ̀ mehvehve me awu. 55Ndi kanatɛ Rzìtehvànɛ à mà ònde nà Èlìŋgɛ̀ yà Wòtani, à mà ɔŋgɔ̀ ò ŋmanyu yà lohwà, rzi à ɛnɛ ŋmàye mò òma Lohwɛ̀, nà Yerzù ema à tɛ̀mì ò ehvàrzu yà lìya là mòmɛ̀ là ama Lohwɛ̀. 56À mà hwa òhweyà nanù ema, “È ɔŋgɔ̀ tɛ, nà ɛni è ŋmanyu yà lohwà è lìhvòwelì. Ndeŋgànɛ̀lɛ̀ hvɛ è Ŋmanà wà è Mòtò wà Hwènàmà, à tɛ̀mì ò ehvarzù yà lìya là mòmɛ̀ là ama Lohwɛ̀.” 57Nà òma wòlìya wò mà hweye nanù, rzìi hwa umba matò mà awu nà màà mà awu, rzìi hwa wòteyà lì tɛ̀ɛ̀ ò ŋmanyu nà lìlò lì karzamì rzìi hwa arzɛ hwa urzùweyà Rzìtehvànɛ. 58Rzìi hwa mò kòòhwa ò lì mò anjiyana ò tènì yà mbòwa rzìi hwa wòteyà ò lì mò aŋgba màŋyàyi. Hwàtò ema hwa mà tɛ̀mɛ̀ imbòŋgi ò è kɔ̀kìrzɛ̀ yà ama Rzìtehvànɛ, hwa mà rzòlòwà ikòti jà awu rzìi hwa ɛndɛ hwa jì aŋgbeyà mberza hvɔ̀kɔ ema è mà hwɛ̀lɛ̀hwɛ̀ Rzàwòlò ò wòrzò wò eni ò lì hwa ɔ̀ŋgeyà è jɔ̀.
59Nà òma hwà mà hwɛ lì aŋgba Rzìtehvànɛ màŋyàyi mɔ̀ à mà hwɛ lì kanɛ̀ nanù ema, “Ìi Rzàŋgò Yerzù, wòwa èlìŋgɛ̀ ya ami.” 60Aŋga ndi a à rzùma màwɔ̀ŋgɔ̀ŋgɔ̀ ma eni ò rze, rzìi a eyà na lìlò lì kàrzàmi nanù ema, “Ìi Rzàŋgò, ò hwa làkìrzɛ̀ ò wònò wòhwe ema hwa gbeyà.” Nà òma à mà kulɛ ò lì òhwa nanù, rzìi a ŋwa.

Выбрано:

Hwègbèèlì 7: bri

Выделить

Поделиться

Копировать

None

Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь