Shitatiko 11
11
Kapeshi kaku Mbambiloni
1Ha kutatika, bantu ba hano hanci nimwabo bekalile na lulimi lumo kami bambilenga mazu amo. 2Oho bantu bayambangilile ku mushamuko, bawanine mbuwa mu litunga lya Shina, niho bazikilemo.
3Balyambashanine umo na wamina ngayi, “Yekenu, Tubumbe mashintina na kuwayoha.” Pe bekalile na mashintina kupitakana mamanya, baliyavwishile lingongwe lya ku kwatisha mashintina hamo kupitakana ntiti. 4Niho bambile ngayi, “Haya, tuyenu tu li zikilenu munzi uli na kapeshi kakatali kakakuma muyilu, ngayi mwanga tuye mpupo na kutina tupanzanina hano hanci nimwaho.”
5Ngoboni Nyambi ya Ngula, wezile hanci mu ku mona munzi na kapeshi ebye batendele aba bantu. 6Pe Nyambi ya Ngula wambile ngayi, “Haya ndi bantu aba banengi bamo kami bakwamba lulimi lumo, eshi shinengi mabalikilo tuhu shanebye bakatenda, haya shikenga shawangu kutenda ebye bakafunga kami kowa ebye bikakwangana. 7Nohobene, tuyenu hanci tukaluwishe lulimi lwabo ngayi mwanga babule kuliyuvwashana mukati kabo.” 8Niho Nyambi ya Ngula abapanzanishilile hanci nimwaho, pe baya bantu balehelesho kuzika uya munzi. 9Uya munzi bawutumbile ngayi Mbambelu#11:9 Mbambelu lizu elye likuyuvwanika ngo lizu lya mu Shihebelu likutontolola kulifungila., ndaba kuyo niko Nyambi ya Ngula aluwanganishile zindimi za bantu nimwabo. Kami niko abapanzanishilile hano hanci nimwaho.
Bazukulya Shemu
(1 Byambo 1:24-27)
10Aba nibo bazukulya Shemu, munyima ya myaka yibili ya libazi, Shemu oho ekalile na myaka 100 wabelekele mwana wa mulume, lizina lyendi Alipakishandi. 11Kunyima yanebye wekalile kami myaka 500, pe wabelekele bana babalume naba bambuyama.
12Alipakishandi wekalile na myaka 35, wabelekele mwana wa mulume lizina lyendi Shela, 13Alipakishandi oho ekalile na myaka 403 wabelekele kami bana babalume naba bambuyama.
14Shela oho ekalile na myaka 30, wabelekele mwana wa mulume lizina lyendi Emba. 15Shela wekalile na myaka 403 pe kami wabelekele bana babalume na babambuyama.
16Emba oho ekalile na myaka 34, wabelekele mwana wa mulume lizina lyendi Pelengi. 17Emba wekalile na myaka 430 pe kami wabelekele bana babalume naba babambuyama.
18Pelengi wekalile na myaka 30, wabelekele mwana wa mulume lizina lyendi Leu. 19Pelengi oho ekalile na myaka 209 pe kami wabelekele bana bamina babalume naba bambuyama.
20Leu wekalile na myaka 32, wabelekele mwana wa mulume lizina lyendi Shelungi. 21Leu oho ekalile na myaka 207, pe kami wabelekele bana babalume na babambuyama.
22Shelungi wekalile na myaka 30, wabelekele mwana wa mulume lizina lyendi Nahole. 23Shelungi oho ekalile na myaka 200, pe kami wabelekele bana babalume naba bambuyama.
24Nahole wekalile na myaka 29, pe wabelekele mwana wa mulume lizina lyendi Tela. 25Nahole oho ekalile na myaka 119, pe kami wabelekele bana babalume na babambuyama.
26Tela oho ekalile na myaka 70, wabelekele Abulama, Nahole na Halani.
Bazukulya Tela
27Aba nibo bazukulya Tela. Tela wabelekele Abulama, Nahole na Halani. Halani wabelekele Lote. 28Halani wafwililile mu munzi wendi wakuhemuwila wa Ule waku Mbambiloni. Wafwile oho Tela tatiyendi ushili kuyoya. 29Abulama wayekele Shalai, pe Nahole wayekele Milika mwana Halani, ou wengile kami tata Ishika. 30Shalai kaliha wekalile na bana ndaba wengile mumba.
31Tela wakatukile na mwanendi Abulama, hamo na muzukulyendi Lote na mukowendi mukaza Abulama, pe bafumine ku munzi wa Ule mu litunga lya Mbambiloni na kuya ku litunga lya Kenaani. Ngoboni bayile ku Halani na kuzikako. 32Tela wafwile ku Halani hinga ekala na myaka 205.
Выбрано:
Shitatiko 11: LLK
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Libuka Lya Kuyela © Bible Society of Zambia, 2020.
