Marko 16
16
Chiyuka chaku Yesu
(Mateyu 28.1-8; Luka 24.1-12; Yohane 20.1-10)
1Ndipo lati laruta Sabata, Mariya waku Magdala, ndi Mariya nyina waku Yakobe, ndi Salome ŵangugula vyema alinga kuti ŵazichimtukutizga. 2Ndipo ndi mlenjilenji pa zuŵa la chimoza la lisabata ŵatuza ku muunda wo, lati latuwa dazi. 3Ndipo ŵanenerananga mwaku ŵija, “Njani watikunkhuzgiyenge mwa wo kuwutuzgako ku khomu la muunda?” 4Ndipo wachiyunuska maso ŵanguwona kuti mwa watuzgikako: chifukwa wenga weniukuru. 5Ndipo wangusere mu muunda, ŵanguwona jaha laja pasi ku marghe, lakuvwara khanju lituŵa, ndipo ŵangurwitiskika. 6Ndipo iyo wanguti kwaku wo, “Mungarwitiskikenga cha: mupenja Yesu waku Nazarete, mweniyo wangupayikika. Wayuka: kuti we panu cha: alereni, malo po ŵangumuŵika. 7Kweni kaninga, kaŵaneniyeni ŵasambizi ŵake ndi Petro, wakudanjiriyani ku Galile; kweniko mwamkumuwona, ulaka ndimo wangukuneniyani.” 8Ndipo ŵangutuwamo, ŵanguthaŵa ku muunda wo; chifukwa chitenthe ndi kuzizwa vinguŵako: ndipo kuti ŵanguneniyapo yumoza kanthu cha, chifukwa wopanga.
Yesu wawoneka kwaku Mariya Magdala
(Mateyu 28.9-10; Yohane 20.11-18)
[9Wati wayuka ndi mlenjilenji pa zuŵa lachimoza la lisabata, wanguwoneka danga kwaku Mariya Magdala, mwaku mweniyo wangutuzga ŵademone ŵankhonde ndi ŵaŵi. 10Wanguruta iyo ndipo wangwachitauliya wo ŵenga pamoza nayo, wachitenje ndi kuliya. 11Ndipo iwo, ŵachivwa kuti ngwamoyo, ndi wamuwoneke iyo, ŵengavi kuvwana.
Yesu wawoneka ku ŵasambizi ŵaŵi
(Luka 24.13-35)
12Ndipo pavuli paku vyenivyo mu kawonekedu kamwenga wanguwoneke ŵaŵi ŵaku wo, ŵachitembeya ndi kuruta ku viŵera. 13Ndipo ŵachiruta ŵenaŵa, ŵangutauliya ŵakujapo: kweni kuti ŵanguvwana cha chingana ndiwo.
Yesu watijirongo ku ŵasambizi ŵake chumi ndi yumoza (11)
(Mateyu 28.16-20; Luka 24.36-49; Yohane 20.19-23; Machitidu gha Ŵakutumika 1.6-8)
14Ndipo pavuli penipo wanguŵawoneke chumi ndi yumoza ŵija, ŵachija pa kurgha; ndipo wanguchenya uwura-chivwanu wawo ndi unononu wa mtima, pakuti ŵengavi kuvwana ndi ŵeniwo ŵangumuwona wati wayuka. 15Ndipo wanguŵanene, “Kaninga mu charu chose; ndipo memezani evangeli ku ulengi wose. 16Yo wavwana ndi wabatizika wataskikenga; kweni yo wareka kuvwana wasuskikenge. 17Ndipo visimikizgu vyenivi vikarondonga ŵeniwo ŵavwana: mu zina langu ŵakatuzgiyanga ŵademone; ŵakarongoronga ndi malilime ghafya; 18ŵakasoskanga zinjoka, ndipo asani ŵangamwa kanthu karwani, kuti kakaŵapwetekanga cha; ŵakaŵikanga manja pa ŵarwali, ndipo ŵakachiranga.”
Yesu wakwera kuchanya
(Luka 24.50-53; Machitidu gha Ŵakutumika 1.9-11)
19Viyo ndipo Ambuya Yesu, pavuli pa kurongoro nawo, wangurondeke kuchanya, ndipo wangujariya pasi ku janja lamarghe laku Chiuta. 20Kweni ŵenaŵa ŵangutuwa, ndipo ŵangumemeza kosekose, Ambuya iwo ŵakutataliya pamoza nawo, ndi ŵakukhozga mazu ndi visimikizgu vyakurondo. Ameni.]
Выбрано:
Marko 16: TongaMw
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible Society of Malawi
