Marko 15

15
Yesu watoreke kwaku Pilato
(Mateyu 27.1-2, 11-14; Luka 23.1-5; Yohane 18.28-38)
1Ndipo sosonukweni ku mlenji-lenji ŵangupanga upu ŵazukuru ŵara pamoza ndi ŵara ndi ŵalembi, ndi upu wose, ndipo ŵangumumanga Yesu ndi kuruta nayo, kwaku Pilato, 2Pilato wangumfumba, “Kumbi ndiwe Karonga wa ŵaYuda?” Ndipo wangwamuka, wangumnene, “Ukamba ndiwe.” 3Ndipo ŵazukuru ŵara ŵangumusumuwa vinandi. 4Ndipo Pilato wangumfumba so, wakuti, “Asi utamuka kanthu? Awona, ndi vinandi vyo ŵakusumuliya.” 5Kweni Yesu kuti wangwamukapo so kanthu cha; viyo kuti wanguzizwa Pilato.
Yesu wakomboreke ku nyifwa
(Mateyu 27.15-26; Luka 23.13-25; Yohane 18.39—19.16)
6Kweni pa dghere ŵanguziŵiriya kuŵafwatuliya wakumangika yumoza, mweniyo ŵangampempha. 7Ndipo wengako yumoza wakuzumbulika Baraba, wakumangika pamoza ndi ŵakugaruka, ŵeniwo mu chigaruka cho ŵanguchita umbanda. 8Ndipo mzinda unguza ungwamba kumromba kuti wawachitiye uli ndimo wanguziŵiriya. 9Ndipo Pilato wanguŵamuka wakuti, “Mukhumba kwari kuti ndikufwatuliyeni Karonga wa ŵaYuda?” 10Chifukwa wanguteska kuti pa chifukwa cha bina ndicho ŵazukuru ŵara ŵangumkombole. 11Kweni ŵazukuru ŵara ŵangusonkhezga mzinda, alinga kuti waŵafwatuliye Baraba. 12Ndipo Pilato wakwamuka wanguŵanene, “Viyo ndichitengenji ndi yo mutumzumbuwa Karonga wa ŵaYuda?” 13Ndipo iwo ŵangukambura so, “Mpayike!” 14Pilato wangunena nawo, “Kwati, wachita chiheni chakutunji?” Kweni iwo ŵangukambura ukongwa, “Mpayike!” 15Ndipo Pilato, pakukhumba kuŵakhorweska, wanguŵafwatuliya Baraba, ndipo wangukombo Yesu, wati wamukwechuwa, kuti wapayikike.
Ŵankhondo ŵanyoza Yesu
(Mateyu 27.27-31; Yohane 19.2-3)
16Ndipo ŵankhondo ŵangumgumizgiya mu mphara mukati, yo ndi Praitorio; ndipo ŵanguwunganiska pamoza liŵanja lose. 17Ndipo ŵangumuvwalika ropa, ndipo wati ŵapika ndumbu ya minga ŵangumuvwalika; 18ndipo wangwamba kumtauzga, “Mauleni, Karonga mwe wa ŵaYuda!” 19Ndipo wamkosonga ku mutu ndi dete, ndi kumfunyiya mata, ndipo pakujikama pasi makongonu ŵangumlambiya. 20Ndipo ŵati ŵamtombozga, ŵangumzuwa ropa lo, ŵangumuvwalika minjirira yake. Ndipo ŵangumgumizgiya kubwaro, kwachipayikika.
Yesu wapayikika pa mphinjika
(Mateyu 27.32-34; Luka 23.26-43; Yohane 19.17-27)
21Ndipo wangukakamizga mwenda-nthowa yumoza, wakutuwa ku viŵera, Simoni waku Kurene, uskeu waku Alekezandara ndi Rufu, kuti ŵanyamuwe mphinjika yake. 22Ndipo ŵangumtole ku malo Golgota, (ko nkhuti, pakung'anamuka, Malo gha bwaza). 23Ndipo ŵampaskanga vinyo wakukasiya muro: kweni iyo kuti wanguronde cha. 24Wangumpayika, ndipo ŵangugaŵana minjirira yake pakuchita mphenduzga mwakuti ŵapanikizge cho yumoza ndi yumoza wangato. 25Ndipo lenga ora lechitatu, po ŵangumpayikiya. 26Ndipo lembo la kafukwa kake lingulembekapo pachanya, “KARONGA WA ŴAYUDA.” 27Ndipo pamoza nayo ŵangupayikika ŵakupoka ŵaŵi: yumoza ku janja lake lamarghe, ndi yumoza ku maze, [28Penipo lingufiskika nenedu lamwaku mchimi, “Wangupendeke pamoza ndi waziradangu.”] 29Ndipo ŵakudumuwapo ŵamtukanga, ŵakupuking'a mitu yawo, ŵakuti, “Aha! Wakubwanganduwa kasopi we, ndi wakumuzenga mu mazuŵa ghatatu; 30ujipozomoske, ndi upawukeko ku mphinjika yo!” 31Viyo so ŵazukuru ŵara nawo, ŵakumtombozga pamoza ndi ŵalembi, ŵanenanga, “Wangupozomoska ŵanyake; kweni kuti ngwanthazi kujipozomoska cha. 32Kristu yo, Karonga waku Yisraele, wasike sono ku mphinjika yo, alinga tiwone ndi tivwane.” Ndipo wo ŵangupayikika pamoza nayo nawo ŵamuweranga.
Nyifwa yaku Yesu
(Mateyu 27.45-46; Luka 23.44-49; Yohane 19.28-30)
33Ndipo linguti laza ora lachinkhonde ndi chimoza, panguŵa mdima pa charu chose mpaka ora lachinkhonde ndi chinayi. 34Ndipo pa ora lachinkhonde ndi chinayi Yesu wangubongo ndi mazu ghakuru, “Eloi, Eloi, lama sabaktani?” Ghenigho pakung'anamuwa ghatiti, “Chiuta wangu Chiuta wangu, mwandisiyanji?” 35Ndipo ŵanyake ŵaku wo ŵanguma kweniko, ŵanguti ŵavwa, ŵatinge, “Awonani, wadana Eliya.” 36Ndipo wanguchimbiya yumoza, wanguzaza buwura ndi vinyo wakusasa, wanguweska ku dete wamumweskanga, wakuti, “Dekani, tiwone asani watuza Eliya kuzachimpawuska.” 37Kweni Yesu wangukambura mazu ghakuru, ndipo wangumara mtima. 38Ndipo saru yakuchinga mu kasopi yinguparuka pakati, kutuwa pachanya pasi mbwitu. 39Ndipo wachiwona Kenturione, yo wanguma pakuthyana nayo, kuti wamara mtima viyo, wangutamulizga, kuti, “Nadidi munthu uyu wenga Mwana waku Chiuta.” 40Ndipo kwenga so ŵanthukazi ŵakulereska patari, mwaku ŵeniwo ŵenga Mariya waku Magdala, Mariya nyina waku Yakobe mumana, ndi waku Yose, ndi Salome, 41ŵeniwo, po wenga mu Galile, ŵendanga nayo pamoza ndi ŵamteŵetiyanga; ndi ŵanthukazi ŵanyake ŵanandi wo ŵangukwere nayo ku Yerusalemu.
Kuŵikika kwa thupi laku Yesu
(Mateyu 27.57-61; Luka 23.50-56; Yohane 19.38-42)
42Ndipo ghanguti ghaŵa mazuro, pakuti lenga la Chirongoso, lo ndi zuŵa lakudanga ndi Sabata, 43kunguza Yosefe waku Arimatiya, waupu wa mbiri yakuvwika, mweniyo nayo wenga wakulereze ufumu waku Chiuta; wangusere kwachiganga kwaku Pilato, ndipo wangupempha thupi laku Yesu. 44Pilato wanguzizwa asani wafwadi: ndipo wati wadana Kenturione, wangumfumba kuti vinu wafwa kale. 45Ndipo wanguti wavwa kwaku Kenturione kuti wafwa, wanguninkha thupi lo kwaku Yosefe. 46Ndipo wangugulasaru ya bafuta, ndipo wati walipawuwa wangulivunga mu bafuta yo, ndipo wanguliŵika mu muunda, wo unguchongeka mu jarawe; ndipo wangugadabuliyako mwa ku khomu la muunda. 47Ndipo Mariya waku Magdala ndi Mariya nyina waku Yose wawonanga po wanguŵikika.

Выбрано:

Marko 15: TongaMw

Выделить

Поделиться

Копировать

None

Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь