Marko 14
14
Ŵazukuru ŵara ŵapenja kumbaya Yesu
(Mateyu 26.1-5; Luka 22.1-2; Yohane 11.45-53)
1Kweni pavuli pa mazuŵa ghaŵi linguŵapo dghera la phaska, ndi la chiŵande chambura chimera: ndipo ŵazukuru ŵara ndi ŵalembi ŵapenjanga mo wambayiyenge, wachimko kwa uchenjezi: 2chifukwa watinge, “Mu dghera lo cha, vinu chingaŵapo chivulupi cha khamu lo.”
Wapakika mafuta ku Betaniya
(Mateyu 26.6-13; Yohane 12.1-8)
3Ndipo pakuŵa iyo mu Betaniya, mu nyumba yaku Simone wamakhate, wachija pa kurgha, kunguza munthukazi wakuŵa ndi supa ya sangarawe ya mafuta ghachema cheneko gha mtengo ukuru; ndipo wati waswa supa, wangupunguliya mafuta pa mutu waku Yesu. 4Kweni ŵengapo ŵanyake ŵakutundiriya mwaku ŵija, ŵakuti, “Chaŵiyanji chitayiku chaviyo cha mafuta gho? 5Chifukwa mafuta yagha ghangaziŵa kusaskika kwakuruska matambala machumi pe chumi ghatatu, ndi kupaskika ku ŵakavu.” Ndipo ŵajumiyanga paku iyo. 6Kweni Yesu wanguti, “Mlekeni; mumsuzgiyanji? Wandichitiya mlimu weneko. 7Pakuti nyengo zose mwe nawo ŵakavu pamoza namwe, ndipo penipo pose mukhumbiya muziŵa kuŵachitiya umampha; kweni kuti mwe ndi ine nyengo zose cha. 8Wachita cho wangukhumba kuchita: watukutizgiya limu liŵavu langu kwachindiŵika. 9Ndipo ndikuneneskiyani, kweniko kose limemezekenge evangeli mu charu chose, ichi nacho cho wachita uyu, chikataulikanga, uli nchikumbusku chaku cho wachita.”
Yuda wazomera kumkombo Yesu
(Mateyu 26.14-16; Luka 22.3-6)
10Ndipo Yuda mkeriote, yumoza wa chumi ndi ŵaŵi, wanguruta ku ŵazukuru ŵara, alinga wampachiriye kwaku wo. 11Ndipo ŵachivwa ŵangukondwere, ndipo ŵangupangana kumpaska ndrama. Ndipo ŵapenjanga mo ŵampachiriyenge pa nyengo yakwenere.
Yesu waturgha Njonesku ndi ŵasambizi ŵake
(Mateyu 26.17-35; Luka 22.7-14, 21-23; Yohane 13.21-30)
12Ndipo pa zuŵa lakudanga la chiŵande chambura chimera, penipo ŵabayanga phasku lo, ŵasambizi, ŵake ŵanguti kwaku iyo, “Mukhumba tikamrongosoleyeni nunkhu kuti mukarghe phaska?” 13Ndipo wangutuma ŵaŵi ŵa ŵasambizi ŵake, watiti kwaku wo, “Kaninga ku msumba wo, ndipo wakumanenge namwe munthu wakunyamuwa chiŵiya cha maji: murondoni; 14ndipo kweniko kose wangasere, muneniyeni mweninyumba yo, ‘Msambizgi watiti, Che pani chipinda changu cha ŵalendo, mwenimo ndingargha phaska pamoza ndi ŵasambizi ŵangu?’ 15Ndipo iyo wakukurongoni chipinda chamuchanya chikuru, chakuyarika ndi chakurongosolaka: ndimu tirongosoliyeni.” 16Ndipo ŵasambizi wo ŵangutuwa, ŵanguruta ku msumba wo, ndipo ŵangusaniya uli ndimo wanguŵanene: ndipo ŵangurongoso phaska. 17Ndipo ghanguti ghaza mazuro wanguza, pamoza ndi chumi ndi ŵaŵi wo. 18Ndipo wachija pa gome ndi kurgha, Yesu wanguti, “Ndikuneneskiyani, yumoza waku imwe wandipachiyenge yo nayo waturgha nane pamoza.” 19Wangwamba iwo kuŵa ndi chisungu, ndi kunena kwaku iyo yumoza ndi yumoza, “Kumbi ndine?” 20Kweni iyo wanguŵanene, “Njumoza wamu chumi ndi ŵaŵi, wakubwenga chiŵande mu mbali paoza nane. 21Pakuti Mwana wa munthu waruta viyo, uli ndimo kwalembeke paku iyo: kweni owe ku munthu mwaku mweniyo Mwana wa munthu wapachirika! Mphanyi kwenga kwamampha ku munthu yo, asani wengavi kupapika.”
Njonesku ya Ambuya
(Mateyu 26.26-30; Luka 22.15-20; 1 ŴaKorinte 11.23-25)
22Ndipo ŵachirgha iwo, wanguto chiŵande, wati watumbika, wangumenya, ndipo wangupaska kwaku wo, ndi wanguti, “Rondani: ichi ndi liŵavu langu.” 23Ndipo wanguto nkhombo, wati wawonga, wangupaska kwaku wo: ndipo ŵangumwapo wose. 24Ndipo wanguŵanene, “Chenichi ndi ndopa zangu, za phanganu, zakudikiya pa ŵanandi. 25Ndikuneneskiyani, kuti nkhamwangapo so cha vya chipasi cha mphereska, mpaka zuŵa leniliya, penipo ndikamwanga lifya mu ufumu waku Chiuta.”
26Ndipo wanguti wamba lisumu wangutuliya ku phiri la Olivete.
Yesu wakamba ndi kumkana kwaku Petro
(Mateyu 26.31-35; Luka 22.31-34; Yohane 13.36-38)
27Yesu watiti kwaku wo, “Mose muguŵiskikenge; pakuti kwalembeka, ‘Ndipumenge mliska, ndipo ziparghang'ikenge mberere.’ 28Kweni nditakuti ndayuka ine, ndamkukudanjiriyani ku Galile.” 29Petro wanguti kwaku iyo, “Chingana wose ŵangaguŵiskika, ine pe cha.” 30Ndipo Yesu wangumnene, “Ndikuneneske kuti le, usiku uno, tambala wandakokoŵereke kaŵi, iwe undikanenge katatu.” 31Kweni iyo warongoronga kwanthazi ukongwa, “Asani nkhufwa nkhafwanga pamoza namwe, ndipo kuti nkhakananga imwe awa.” Kwakukozgana nako ŵakambanga wose.
Yesu waromba mu Gesemane
(Mateyu 26.36-46; Luka 22.39-46)
32Ŵanguza ku malo, zina lake Gesemane; ndipo watiti ku ŵasambizi ŵake, “Tekani panu, mpaka ndaromba.” 33Ndipo wato pamoza nayo Petro, Yakobe ndi Yohane, ndipo wangwanda kusuzgika ukongwa, ndi kukoŵeke limu. 34Watiti kwaku wo, “Mzimu wangu ngwachisungu ukongwa mpaka ku nyifwa; jani panu, ndipo cherezgani.” 35Ndipo wangurutiriya kamanavi, wanguwa pasi, ndipo wanguromba wakuti, asani kungachitika, ora lo limurutiiriye. 36Ndipo watinge, “Atate, Ada, vyose vyamachitika ndi imwe; mutuzgepo pangu nkhombo iyi; ndi kweni cho ndikhumba ine cha, kweni cho mukhumba imwe.” 37Ndipo wachiza, wanguŵasaniya ŵara tulo, ndipo watiti kwaku Petro, “Simoni, ura kumbi? Asi wenga ndi nthazi kwa chicherezga ora limoza? 38Cherezgani ndi rombani mwakuti mureke kusere mu kesedu; mzimu nadi ngwakukhumba kuromba, kweni liŵavu ndakutomboroka.” 39Ndipo wanguruta, so ndi wanguromba, wakukamba mazu ghenigho pe. 40Ndipo wachiza so, wanguŵasaniya ŵaratulo, chifukwa maso ghawo ghanguzitiskika ndipo ŵaziŵanga cha cho ŵangamwamuka. 41Ndipo watuza kachitatu, ndipo watiti, kwaku wo, “Kumbi mweche kura kuti mujipumuzge? Mbwenu sono, ora lo laza; Mwana wa munthu wapachirikiya mu manja gha ŵalakwi, 42yukani, tirutenge: onani, wakundipachiya yo waŵandika.”
Yesu wakoreka
(Mateyu 26.47-56; Luka 22.47-53; Yohane 18.3-12)
43Ndipo sosonukweni, wacharongoro iyo wanguza Yuda, yumoza wa chumi ndi ŵaŵi wo, ndi pamoza nayo mzinda ndi malipanga ndi zindodo, wakutuliya ku ŵazukuru ŵara ndi ŵalembi ndi ŵara. 44Kweni wakumpachiya yo wanguŵapaska chisimikizgu, wakuti, “Mweniyo ndimufyofyonthenge, ndiyo: mukoni, ndi mugumizgeni!” 45Ndipo wachiza, sosonukweni wangufika kwaku iyo, ndipo watiti, “Rabi”; ndipo wangumufyofyontha. 46Ndipo wanguŵika manja paku iyo, ndipo wangumko. 47Kweni ngana, yumoza wa ŵakumapo, wanguwewepuwa lipanga lake, ndipo wangukoso muŵanda wa mzukuru mura, wangudumuwa gutu lake. 48Yesu wangwamuka, wanguŵanene, “Kumbi mwaza nge mpha wakupoka, malipanga ndi zindodo kundiko? 49Zuŵa ndi zuŵa ndaŵanga namwe ku kasopi, wakusambizga; ndipo kuti mungundiko cha: kweni nkhuti malembo ghafiskike.” 50Ndipo wose ŵangumsiya, ndipo ŵanguthaŵa.
51Ndipo jaha ngana wangurongozgana nayo, wakuphemeska bafuta pa liŵavu lake; ndipo wangumko. 52Kweni iyo wakusiya bafuta lo, wanguthaŵa wankhuli.
Yesu wateruzgika ndi upu wa ŵaYuda
(Mateyu 26.57-68; Luka 22.54-55, 63-71; Yohane 18.13-14, 19-24)
53Ndipo ŵangumugumizgiya Yesu ku mzukuru mura: ndipo ŵanguwugana kwaku iyo wose ŵazukuru ŵara ndi ŵara ndi ŵalembi. 54Ndipo Petro wangumrondo kutaliku, mpaka mukati mu mphara ya mzukuru mura; ndipo wanguja pamoza ndi ŵalinda, wakota moto. 55Ndipo ŵazukuru ŵara wo ndi upu wose ŵapenjanga ukaboni paku iyo, wakumukombole kunyifwa; ndipo kuti ŵanguwubowozga cha. 56Chifukwa ŵanandi ŵangupereka ukaboni wa utesi paku iyo, ndipo maukaboni ghawo ghengavi kuyana. 57Ndipo ŵanyake ŵangusoka ŵakambanga utesi paku iyo, ŵakuti, 58“Ifwe tingumuvwa wachikamba kuti, ‘Ine nkhabwanganduwanga kasopi uyu wakuzengeka ndi manja, ndipo mu mazuŵa ghatatu nkhazenganga munyake wambura kuzengeka ndi manja.’ ” 59Ndipo chingana ndi viyo kuti ukaboni wawo unguyana cha. 60Ndipo mzukuru mura wangusoka mukati mo, wangumfumba Yesu, wakuti, “Asi utamuka kanthu? Nchine cho ŵatukusimikizgiya yaŵa?” 61Kweni wanguchetama iyo, kuti wangwamukapo kanthu cha. Mzukuru mura yo wangumfumba so, watiti kwaku iyo, “Kumbi iwe ndiwe Kristu, Mwana wa Mtumbikiki Yo?” 62Ndipo Yesu wanguti, “Ndine: ndipo mukawonanga Mwana wa munthu kuja ku janja la marghe la Nthazi, ndi kuza pa mitambo ya kuchanya.” 63Ndipo mzukuru mura wanguparuwa munjirira wake, ndi wanguti, “Teche so kukavukiyanji ŵakaboni? 64Mwavwa kutuka ko: mutitinji imwe?” Ndipo wose ŵangumsuska kuti wangwenere nyifwa. 65Ndipo wangwamba ŵanyake kumfunyiya mata, kumujara ku maso, kumpafuwa, ndi kumnene, “Loskanga”: ndipo ŵalinda ŵangumronde ndi inakofe.
Petro wakana Yesu
(Mateyu 26.67-75; Luka 22.56-62; Yohane 18.15-18, 25-27)
66Ndipo wachija Petro mu mphara yo, wanguza yumoza wa ŵasungwana ŵa mzukuru mura; 67wachiwona Petro wakotha moto, wangumlereska, ndipo wali, “Iwe nawe wenga ndi muNazarete yo, Yesu.” 68Kweni wangukana iyo, wakuti, “Kuti ndiziŵa, chingana nkhuwamu cha, cho ukamba.” Ndipo wangutuliya ku khonde; 69ndipo msungwana wangumuwona, ndi wangwamba so kuŵanene ŵakumapo, “Mwenuyu njumoza wa mwaku wo.” 70Kweni iyo wangukana so. Jepu kamanavi wakumapo wangunena so ndi Petro, “Kwakuneneska iwe we waku wo; chifukwa ndiwe muGalile.” 71Kweni wangwamba iyo kutemba ndi kurapa, “Kuti ndimziŵa cha munthu uyu, yo ukamba.” 72Ndipo soso nukweni tambala wangukokoŵereka kachiŵi. Sono Petro wangukumbuka nenedu lo, mo wangumnene Yesu, “Wandakokoŵereke kaŵi tambala, undikanenge katatu.” Ndipo wangusweka mtima, wanguliya masozi.
Выбрано:
Marko 14: TongaMw
Выделить
Поделиться
Копировать

Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible Society of Malawi