Marko 13
13
Yesu wakamba ndi kupasuka kwa Yerusalemu
(Mateyu 24.1-2; Luka 21.5-6)
1Ndipo wachiporota iyo kutuwa ku kasopi, yumoza wa ŵasambizi ŵake watiti kwaku iyo, “Msambizgi, awonani, vimya navyo ndi mazengedu kunozga!” 2Yesu wangumnene, “Uwona kumbi mauzengi ghenigho ghakuru? Kuti usiyikengepo panu cha mwa pa mwa, wo urekenge kupong'eka pasi.”
Visuzgu ndi viŵembu
(Mateyu 24.3-14; Luka 21.7-19)
3Ndipo wachija iyo pa phiri la Olivete pakuthyana ndi kasopi, Petro, Yakobe, Yohane ndi Andreya wangumfumba pa ubende, 4“Tineniyeni, vyenivyo vikaŵangapo zuŵanji? Ndipo chisimikizgu chikaŵanga chine chakuti vyenivyo vyose vitenere kufiskika?” 5Ndipo Yesu wangwamba kuŵanene, “Cheŵani vinu yumoza wangakurandizgani. 6Wanandi ŵakaziyanga mu zina langu ŵakuti, ‘Ndine iyo’; ndipo wamrandizga ŵanandi. 7Kweni muchivwa zinkhondo ndi mbiri za mahomwa, mungopanga cha: vitenere kuŵapo vyenivyo; kweni umari wo undaze. 8Chifukwa mtundu ukayukiyanga pa mtundu, ndi ufumu pa ufumu vikaŵangapo viyeuyeu malo ghanandi vikaŵangapo vilala: vyose nchiyambu cha maurwirwi.
9“Kweni juchenjeriyeni: chifukwa ŵakakombolenga imwe ku maupu; ndipo mukakwechulikanga mu masinagoge; ndipo paurongo pa mafumu ndi ŵakaronga mukamiyanga pa chifwa changu, uli nchisimikizgu kwaku wo. 10Ndipo mu mitundu yose kutenere danga kumemezeka evangeli, wo. 11Ndipo penipo ŵamkukugumizgani kwachikukomboni, mungakweŵekanga ndi cho mwamurongoro cha: kweni chose cho chingapskika kwaku imwe mu ora leniliya, chenicho rongoroni. Chifukwa kuti ndimwe cha mwamurongoro, kweni Mzimu Wakupaturika ndiyo. 12Ndipo mbali wapachiyenge mbali ku nyifwa, ndi wiske mwana wake: ndipo ŵana ŵayukiyenga pa ŵapapi; ndipo ŵaŵabayiskenge. 13Ndipo mukaŵanga ŵakutinkhika ndi wose chifukwa cha zina langu. Kweni yo wakunthiyengepo mpaka umari, mweniyo wakataskikanga.
Chimutimbaheka chakofya
(Mateyu 24.15-28; Luka 21.20-24)
14“Kweni penipo muwona unyakazi wa phasulu kuma pa malo gho kuti utenere kumapo cha (wakuŵerenga yo wawemo) sono wamu Yuda wathaŵiye ku mapiri; 15ndipo yo we pa bagha pachanya wangasika cha, chingana nkhusere kwachito kanthu mu nyumba yake: 16ndipo waku ulimi wangawere ku nyumba cha kwachito munjirira wake. 17Kweni owe kwaku wo mbakuŵa ndi nthumbo ndi ku ŵakonkheska mu mazuŵa gho! 18Viyo rombani kuti chingaŵapo ichi mu chipwepwe cha. 19Chifukwa mu mazuŵa ghenigho kuŵenge suzgu, yakuti yindaŵepo yaviyo kutuwa ku mtendeku wa ulengi wo wangulenga Chiuta, mpaka ku sono, ndi kuti yikaŵangapo so cha. 20Ndipo asani Ambuya awurengevi kufupikiska mazuŵa gho, mphanyi kuti yatinge yipozomoskekenge cha nyama ye yose: kweni pa chifwa cha ŵakusankhika wo ŵakusankha, ŵakufupikiska mazuŵa gho. 21Ndipo penipa asani yumoza wanganene imwe, ‘Awonani, panu pe Kristu yo’; pamwenga, ‘Awonani, we kuwa’; mungavwananga cha. 22Chifukwa ŵakayukanga ŵanthu ŵanyake wo ŵajiŵikengemo kuti ndiwo Kristu, ndi ŵanyake kuti mbamchimi, ndipo ŵapaskenge visimikizgu ndi minthondwi kwachirandizga ŵakusankhika nawo (asani nchamachitika). 23Kweni cheŵani imwe, awonani, ndakukambiyani limu vyose.
Kuza kwa Mwana wa munthu
(Mateyu 24.29-31; Luka 21.25-28)
24“Kweni mu mazuŵa ghenigha, pavuli pa suzgu iya, dazi likafipiskikanga, ndi mwezi kuti ukapaskanga uŵali wake cha, 25ndipo nyenyezi zikambotokanga kuchanya, ndi vyanthazi vyamu machanya vikasukung'ikanga. 26Ndipo sono ŵakawonanga Mwana wa munthu wakuziya mu mitambo ndi nthazi yikuru ndi unkhankhu. 27Ndipo sono ŵakatumanga ŵangelo, ndipo ŵakawungang'iskanga ŵakusankhika ŵake ku mphepu zinayi, kutuwa ku chigoti chapasi mpaka ku chigoti chakuchanya.
Chisambizgu cha mkuyu
(Mateyu 24.32-35; Luka 21.29-33)
28“Kweni ku mkuyu wo sambiraniko ntharika: penipo mphanda yake sono yiri tefwatefwa, ndipo yivwalira mane, muziŵa kuti chihanya che pafupi. 29Viyo namwe so, penipo mwazamuwona vyenivyo kuŵapo, muziŵe kuti we kufupi, pa khomu yipu. 30Ndikuneneskiyani, mgonezi uno kuti ukarutanga waka cha, vyenga vindaŵepo vyose ivi. 31Kuchanya ndi pasi vikarutanga: kweni mazu ghangu kuti ghakarutanga cha.
Palivi yumoza waziŵa zuŵa pamwenga ora
(Mateyu 24.36-44)
32“Kweni vya zuŵa liya pamwenga ora lo palive yumoza waziŵa, chingana mbangelo kuchanya, chingana ndi Mwana yo, kweni Ada pe. 33Cheŵani, khazgani ndi rombani, chifukwa kuti muziŵa cha kufika kwa nyengo yo. 34Uli ndimo munthu wakuŵa pa ulendo, wachisiya nyumba yake, ndi wachipaska mtufu ku ŵaŵanda ŵake, ku yumoza ndi yumoza nchitu yake, walanguliya mlindakhomu nayo kuti wakhazge. 35Khazgani viyo: chifukwa kuti muziŵa cha po mweni-nyumba wakaziyanga, manyi nkhu mazuro, manyi ndi usiku pakati, pamwe pa tambala kokoŵereka, pamwe ku mlenji, 36vinu pakuza kwambuchibuchi wangakusaniyani mwara tulo. 37Kweni chenicho ndinene imwe, ndinene wose: Khazgani.”
Выбрано:
Marko 13: TongaMw
Выделить
Поделиться
Копировать

Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible Society of Malawi