Matius 11
11
Yohanes gato ras nje mo syur syogat bi pakon ge we mu ku Yefun Yesus
(Luk. 7:18-35)
1Yefun Yesus ki sukdu bok ne nai bi pakon ge musyu dik sop we, orete An mu kadit nat ne, An mu duno nje ete gwat Yefun Allah bi suktaru ki nai nje gato kem mo kota bok neya mo bur Galilea karowa mone.
2Yohanes gato ras nje mo syur ne, yeraja Herodes bok mo sel re. Mone Yohanes jam sukdu subot suk gato Yesus Kristus ben ne sa, an syogat an bi pakon ge bok yo mu me Yefun Yesus. Yohanes bi pakon ndobot Yefun Yesus do, 3”Nan anato Yekwesu gato Yefun Allah syogat ma mo bur ré wa nai men yetu kadit sukye ete jowa men bado, men eswa ye yi yo ma o e?”
4Yefun Yesus ki do, ”Nin satu mu ku Yohanes, ete nin ki subot suk gato nin dakai jam, nin ki subot suk gato nin me su nin gro sato ré: 5ye gato gro ndu, gro ndo satu; ye gato gwes út, mu ndo satu; ye gato i su suki borbuk, ge, án kaim ndo satu; ye gato dabe mbut, án dabe rer satu; ye gato kwop, mbau satu; ye gato yewa suk, án jam sukdu subot os ndo gato Yefun Allah fro wa yetu ne. 6Ye gato yo misyar Ji mo suk gato Ji ben ne nde, wo an onyar kem pe mo Ji it yo, bere ye ne mit at wa, we bere Ji ben sukndo su an.”
7Yohanes bi pakon mu kadit Yefun Yesus sa, Yefun Yesus ki subot Yohanes nai yé mwa gato sum mone do, ”Nin mu me suma mo pe gato kwe yo kom mo nde ne? Nin mu me es gato nofuf ti mo, bado? 8Sane nde. Nin mu me suma motu ne? Nin mu me yetu ge dik yo gato it san gato ndo, bado? Nde re, ye gato it san gato ndo kem mo nu sye gato ndo. 9Sane, nin mu me suma motu ne? Yenabi ge dik yo, bado? Sangge, Ji ki sare do, nin mu me yenabi sor nde, wo nin mu me Yohanes gato gum kok sye wai kadit ne o re. 10Yohanes anato ye gato ye krombot mo Yefun Allah bi sukdu sare do,
’Yefun Allah ki do, ye gato Ji syokom gwat Ji bi suktaru anare.
Ji syokom an mu nyim mo Nan gwem,
subere an fro os wa Nan.’
11Suk gato Ji ki ré suksangge anare, Yohanes gato ras nje mo syur ne ku gum sye wai kadit yetu mwa gato nggon pe mo bur ré sino kom mo kam ré. Sarewo kadit ne o, ye gato tepsu pa wokgan mo Yefun Allah bi rus-i, bere an ku gum sye wai kadit Yohanes o re. 12Kadit kam gato Yohanes duno nje kom mo kam ré, Ji duno nje subere án onyar kem mo Ji ete sok mo Yefun Allah bi rus-i. Yetu mwa o jammo Ji bi sukduno-i, sarewo yé bok yo ma ben sukye nai ye gato brek ete jammo Ji bi sukduno-i ne. Ye Farisi si yeguru gato duno nje su Musa bi sukduno-i ne anato wergat nje subere án misyar Ji bi sukduno-i ne or re. 13Kadit ketke yenabi bok ne sino si Musa ki sukdu subot suk gato bere bor sor kom mo bi kam gato Yohanes kem mo bur ré. 14Nin onyar kem mo sukdu ne yo, bere nin nut do, sangge, kwa yo gato bor su ré anato Yohanes tepsu yenabi Elia gato nin eswa ne. 15Nin brek nin dabe muya-muma kadit nde, wo nin jammo sukdu ne et!
16Yetu gato kem mo bur ré su ré ne te, tepsu suma ne? Sare, án tepsu pa wokgan gato kem mo pasar. Ge bok yo saiye nai ge bok yo o do, 17’Men ba syek nin mo suksara, sarewo nin yo sara su men nde, nin bariwa re. Men wo men jimnot, sarewo nin yo wo su men nde, nin bariwa re.’ 18Ye gato ma ete ben sato ba syek nin ne anato Yohanes si Yetu bi Pa ne sino. Yohanes ma sa, an git sugit nde, an da nau nde, ete yé ki an do, ’Semda ben an re.’ 19Yetu bi Pa to Ji ré ma sa, Ji git e, Ji da nau ete yé ki Ji do, ’Ye ré git sugit mwa ndo nde, An rim An syokwa kwo, An yenau, An bi yesyim mo yé gato ben sukibit sato yé gato nai sugum kadit nje wa pemerintah e neya.’ Yé ki sane, sarewo ye gato kem mo bur ré su kam ré jam nde suk. Yefun gato jam suk mwa ne sino fro os gato ndo ne, ete bere yé me os ne bor re, ete yé ki do, sangge, os ne sa, os ndo.”
Yetu mo kota bok yo gato bariwa jammo Yefun Yesus
(Luk. 10:13-15)
20Orete Yefun Yesus kiket nje mo kota gato An ben suk mwa gato ben nje yeket mone, sarewo yé ne yo kwet kadit sukibit gato yé ben ne nde, ete án yo jammo Yefun nde. 21Yefun Yesus kiket án do, ”Ji ben ye gato i mo kota Korazim si kota Betsaida ne ge re, Ji syun semda titi wé kadit nje mone dom, sarewo yé yo kwet kadit sukibit gato yé ben ne nde. Sane bere Yefun Allah ben sukye nai nje mo kota we ne, we Ji do ben suk mwa gato ben yé yeket mo kota Tirus si kota Sidon yo, bergan sor, ete yé mone kwet kadit sukibit gato yé ben ne kekro, orete án it san gato te, ete án krer bofuf mo án su subere yé jam do, án kwet kadit sukibit ne it. 22Sarewo Ji ki sare do, su kam gato bere Yefun Allah ma ndobot yetu mo bur ré sino, nin yé gato kem mo kota Korazim si kota Betsaida, bere nin ku sukye wai kadit yé mo kota Tirus si Sidon o re. 23Sane dom, nin yé gato kem mo kota Kapernaum, bere yé bes nin gum kok wai kadit nje mo kota yi neya bado? Sane nde, bere Yefun Allah bare nin mo bot gesyos. Suk mwa gato Ji ben kota Kapernaum gato ben nje mone yeket ne, Ji do ben mo kota Sodom suga nyim ne yo, yé mo kota Sodom kwet kadit sukibit gato án ben ne, ete su ré kota ne mó tó. 24Sarewo Ji ki sare do, su kam gato bere Yefun Allah ma ndobot yetu mo bur ré sino, nin ku sukye wai kadit yé mo kota Sodom ne o re.”
Yefun Yesus ki do, nin ma mo Ji et
(Luk. 10:21-22)
25Yefun Yesus ki sukdu ne or sa, An ki o do, ”Ji bi Ai, Nan anato Yekwesu mo gu nim ne si bur ré, Ji ki ndo mo Nan, we Nan gurik sukdu gato Ji ki ne bi sukjimnut-i kadit yepasye gato jam suk mwa, ete Nan kadum sukjimnut ne nai ye gato ben nggwa sato pa wokgan. 26Ji bi Ai, Nan dakai iwa Nan ben Nan bi suk-i sane it.”
27Orete Yefun Yesus ki do, ”Ji bi Ai mo gu syo suk mwa ne sino gato Ji mitmo nai Ji subere Ji tepsu Yekwesu mo Yefun Allah bi rus-i. Yefun Allah sor anato jam An bi Gan to Ji ré, yetu jam nde. Ji dakai sor anato jam Yefun Allah, Ji bi Ai, kom mo mit, yetu jam nde. Sarewo ye gato Ji iwa Ji kadum Ji bi Ai nai ne, bere ye ne jam Ji bi Ai dom.
28Nin yé gato syim syu ete sam sukde, nin ma mo Ji, ete Ji ós nin kem not. 29Ji ben Ji bi suk-i njep, Ji yo bes Ji nggwa kok nde, sane nin bi nin nggwa mo Ji tepsu nin bi Yekwesu, nin jammo Ji bi sukduno, sane bere Ji ós nin kem not. 30We sare, suk gato Ji duno nin su ne ndo, nin benbot ndaf re. Sukduno ne yo tepsu sukde wa nin sam nde.”
Выбрано:
Matius 11: KGR
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
@LAI 2004, 2014
