Matiu 14
14
Kamatena Yohane Toperiu
(Mrk. 6:14-29; Luk. 9:7-9)
1I tempo iti topoparenta i Galilea, iami Herode Antipas. Nahadi Herode apa au nababehi Yesu, 2ido hai nauliangaahe topobagona, “Yesu iami Yohane Toperiu au tuwo hule hangko i kapate. Ido hai ara kuasaNa mobabehi tanda au metingkarai.”
3-4Idemi tuntukana kamatena Yohane Toperiu. Datu Herode moala Herodias napotambia. Herodias iti iami towawinena halaluna au rahanga Pilipu. Bosa belana Yohane mokambaroa Herode hangko i babehiana iti, nauliangaa, “Barako peisa mampotambia towawine iti! Babehiamu iti moliungi Aturana Musa!” Ido hai Herode motudu surodadona mohaka Yohane, rahilu hai rapopesua i lalu tarunggu. 5Katouana, napeinao peami Herode mopapate Yohane, agaiana mampokalanga tauna bosa, lawi rauli tauna bosa ia hadua nabi.
6Hangko inditi, i tempona Herode mopaara susa mokatuinao alo karapoanakana, anana Herodias au towawine motaro i lindonda torare. Matana mpuu Herode mampeita potarona. 7Anti kamatanana, modandimi hai mosumpa i anantowawine iti, nauliangaa, “Apa pea au nuperapi, ina kuweiko!”
8Kanahadina Herodias lolitana, ia moatei anana bona mamperapi waana Yohane Toperiu. Mewali, nauli anantowawine iti i Herode, “Merapina waana Yohane Toperiu rawoli i wongko dula ide!”
9I kanahadina Herode pamperapina, masusami laluna. Agaiana sumpana barapi peisa nadii hule, lawi rahadimi torarena. Ido hai Herode mohawami bona pamperapina anantowawine iti rapabukei. 10Natudumi surodadona lao i lalu tarunggu mobohoki tambolona Yohane. 11Waana Yohane raanti i wongko dula, hai rawei anantowawine iti, hai naanti lao irinana. 12Karahadina topeguruna Yohane apa au mewali, laomi raala watana hai ratawu. Roo indo, laomi rabambaria Yesu.
Yesu mopaande lima sabuna tauna
(Mrk. 6:30-44; Luk. 9:10-17; Yoh. 6:1-13)
13Kanahadina Yesu bambari kana i kamatena Yohane, liliu padumi hangko inditi. Ia mesawi i duanga lao mopatani i paidaa au boa. Tunggaiana Yesu bona mopalehi tauna bosa. Agaiana tauna bosa mohadi kapaduna Yesu, ido hai mopalehimohe boeanda hai mekulelehe moula rara au metalinti i rano. 14Pendauluna Yesu hangko i duanga, Ia moita tauna bosa indo. Maahi laluNa moitahe, hai Napakaohahe au mahai.
15Kalumbami, maimohe topeguruNa mohungkuki Yesu, rauliangaa, “Guru, ide paidaa au boa, hai ina tampumi alo. Agina Nutudumohe tauna bosa iti lao i boea au hungku bona moholohe paandenda.”
16Nauli Yesu, “Ineemi, Ikamumi au mopaandehe.”
17Rahanai topeguruNa, “Bara huba apa au ara irikami, batena pea lima oguna roti hai rombaa ikane.”
18Nahanai Yesu, “Nianti mai.” 19Hangko indo, Natudumohe tauna bosa mohuda i hehi. Mohudamohe i hehi, Naalami Yesu roti au lima oguna hai ikane au rombaa, hai mengoa i langi mekakae i Pue Ala. Roo indo, Nabise-bisemi roti iti, pane Naweihe topeguruNa bona rakira-kiraahe tauna bosa. 20Maandemohe ope-ope duunda mabuhu. Karoonda maande, topeguruNa moguluhe pentarana, hampulomani hai rombingka. 21Kabosanda au maande i tempo iti, ba aratohe pae lima sabuna tobalilo, bara mani teimba towawine hai anankoi.
Yesu molumao i wongko owai
(Mrk. 6:45-52; Yoh. 6:16-21)
22Roo indo, Yesu motuduhe topeguruNa moduanga moioru lao ntanda i orupena rano, hai motuduhe tauna bosa mesule. 23I pesulenda tauna iti, mempanaimi Yesu lao i bulu, hai mekakae haduduaNa. Ina kaindimi inditi mani Ia haduduana.
24I tempo iti, topeguruNa i tanga ranomohe, karaomi hangko i lore. Duanganda narumpa balumba, lawi rumihi ntepuu himburu au mewui hangko i lindo duanganda. 25Hungku mabaa, Yesu molumao i wongko owai monontohihe. 26Karaitana topeguruNa ara tauna au molumao i wongko owai, langamohe, pane rauli, “Olou mai tanoana!” Monganga-ngangamohe anti kalanganda.
27Agaiana Nakambaroahe Yesu, Nauli, “Pakaroho lalumi! Ikoto dide! Ineekau langa.”
28Nauli Peturu, “Ane Oioto diti Pue, Nukakio worina molumao i wongko owai.”
29Nahanai Yesu, “Maimoko!” Mendaulu mpuumi Peturu hangko i duanga, hai molumaomi i wongko owai monontohi Yesu.
30Agaiana kanahadina himburu kebuu i rano, langami hai mepongkami tiri. Mekakio, nauli, “Tulungi wongkoia Pue!”
31Naonami Yesu taieNa mohintaki Peturu, Nauliangaa, “Makura mani pepoinalaimu! Moapa hai bata-bata mani lalumu?”
32Mesawimohe i lalu duanga, liliu mengkaroo himburu. 33TopeguruNa au i lalu duanga iti menombahe Iria, rauli, “Tou mpuu, AnanaKo Pue Ala!”
Yesu mopakaoha bosa tauna au mahai i Genesaret
(Mrk. 6:53-56)
34Kahawenda ntanda i orupena rano, mendaulumohe lao i tampo au rahanga Genesaret. 35Karaisana ampu boea kaarana Yesu i boeanda, rabambarimi i boea au hungku, alana ope-ope tomahai raanti i Yesu. 36Merapihe i Yesu, rauli, “Ane peisa, huba wuntu baduMumi kipetobo.” Mewali ope-ope tauna au motobo baduNa, liliu maoha mpuumohe.
Выбрано:
Matiu 14: NPY
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
@LAI 2016
