Luka 21

Uwila wakwe mukamfwilwa

(Mk 12:41-44)

1Lyene lino Yesu wasanzula manso, alola akama yakuta mawila yao mu cipao ca mawila mu Ng'anda ikulu yakwe Leza. 2Alino alola mukamfwilwa mupina akusumbilamo tumakowili twiili. 3Nawe avwanga ati, “Cumi namunena vino mukamfwilwa wii, mupina, wata uwila mu cipao kuluta onsi. 4Pano yonsi yati yapela mawila pakuvulilwa kwao. Lelo wene mu upina wakwe, watapela vyonsi vino wali navyo, ivyange vimwazwe mu umi wakwe.”

Yesu wasowela komoolwa kwa Ng'anda Ikulu yakwe Leza

(Mat 24:1-2; Mk 13:1-2)

5Yamwi yavwanzyanyanga pamulandu wa Ng'anda ikulu yakwe Leza, vino yaemviwe na mawe ayembe nga ni vya wila vino antu yaletanga kuli Leza. Yesu avwanga ati, 6“Kasita kaliza kakwe vii vyonsi vino mukulola lino kutalaya iwe nanti lyonga ililasyala pi we lyuze. Yonsi kwene yalomoolwa.”

Yesu walanda pa macuzi nu kuzunyiwa

(Mat 24:3-14; Mk 13:3-13)

7Alino yuzya Yesu yati, “Kasambilizya, uzye cintu cii cilacitika lilaci? Nupya icani cilaya cilangililo cakulanga ukuti cintu cii cili pipi nu kucitika?”

8Yesu ayanena ati, “Cenjelini, mutaponziwa, pano antu aingi yalizila mwi zina lyane nu kuti, ‘Nene ndi Katuula uwalavilwe.’ Nga nu kuti ‘Insita yatifika!’ Lelo mutakayalondele. 9Lino muluvwa nkondo nga ni mpanzela, mutakasakamale. Vintu vii vilinzile kucitika nkolelo, lelo italaya ili mpelelekezyo.”

10Nupya ayanena ati, “Inko zilakatukilana, na mawene yalakatukilana. 11Kulaya vilundumusi vikulu, vipowe, nga ni mpungo konsi konsi. Kulaya vintu vyakoofya nga ni vilangililo kufuma kwiyulu. 12Lelo lino vintu vii vyonsi vitali vicitike, yalamulema nu kumuzunya. Yalamupeela ku ntunguluzi zyamu mang'anda ya mapepo nu kumuyalila mu mang'anda yaminyololo. Yalamuleta nkolelo yakwe yakateeka ni ntunguluzi pamulandu wane. 13Ii, ilaya insita isuma yakuti muye yakambone yane. 14#Luk 12:11 Caleka manyini ukuti lino nsita itali ifike mutakalanguluke pali vino mulavwanga, 15pano ndamupeela mazwi nga na mano kuti patakaye nanti wenga uwamu anisi inu alakana nanti kupilika vino mulavwanga. 16Akwasi inu, aina inu, akazi kinu na yacuza inu kwene, yalamukoopa, nga nu kukoma yamwi munomuli. 17Onsi yalamupata pamulandu wane. 18Lelo mutakasakamikwe nanti panono. 19Mukuposya kwinu, mulaya nu umi.

Yesu wasowela kononwa kwakwe Yelusalemu

(Mat 24:15-21; Mk 13:14-19)

20“Lino mulalola musumba wa Yelusalemu waliziwa ni vita, lyene mukamanye vino uli pipi nu kononwa. 21Lyene onsi ali mu Yudeya yakuutukile ku myamba. Na yao ali mu musumba yakafumemo. Na yao ali mu mpanga yatakaswilile mu musumba. 22#Ose 9:7 Pano yao yalaya manda ya cilanduzi, pakuti vyonsi ivyalembwa mu malembelo vifikiliziwe. 23Kalanda ku anaci alasenda indilwa na yano alaonsya mu manda yalya! Pano ucuzi ukulu cuze ulaponela mpanga ii, alino nu ukali wakwe Leza ulaponela antu yaa. 24Yamwi yalakomwa ku mpaanga nu kusendwa mu uzya ku nko zyonsi, nga na Yelusalemu alalyatolwa na antu atataila Leza kufika lino kasita kao kalasila.

Ukwiza kwa Mwana wa Muntu

(Mat 24:29-31; Mk 13:24-27)

25 # Eza 13:10; Eze 32:7; Yow 2:31; Umb 6:12 “Kulaya vilangililo vyakuzunguka pi lanzi, mwezi, ni ntanda. Muno nsi, antu amu nko zyonsi yaloofiwa nu kupelelwa pamulandu wakukatuka kwa maimbi nga nu kululuma kwakwe yemba. 26Antu yalafwa mutombo pamulandu wa ntete lino yakulolela vintu vino vilaponela insi yonsi, pano maka amu lwelele yalatenta. 27#Dan 7:13; Umb 1:17 Alino Mwana wa Muntu alaloleka, akwiza mwi kumbi na maka akulu nu lulumbi. 28Lino vintu vii vilatandika kucitika, mukimilile nu kwinula imitwe inu, pano kutuulwa kwinu kwati kupalama.”

Isambililo lya pa musamvu

(Mat 24:32-35; Mk 13:28-31)

29Lyene Yesu ayumila mulumbe uu ati, “Lolini musamvu nga ni miti yuze yonsi. 30Lino mwalola amafwa yalemba, mweisikulu mukamanya vino cisiku capalama. 31Mu musango uli onga, lino mulalola vintu vii vikucitika, mulamanya vino Uwene wakwe Leza uli pipi nu kwiza.

32“Cumi, namunena vino, vintu vii vyonsi vilacitika lino antu amu mukulo uu onsi yatali yafwe. 33Iyulu ni nsi vitalikalilila manda pe, lelo mazwi yane yene yalikalilila manda pe.

Cenjelini mwaiteyanya

34“Cenjelini pakuti imyenzo inu italaukilwa mu kupunuka, mu ukolesi na masakamiko amu umi uu, pano limwi uwanda uwa ungamupumikizya wa citeyo. 35Pano uwanda ulya ukoline wa citeyo nupya ulapumikizya antu yonsi pano nsi. 36Acino pempulini nu kupepa nsita zyonsi pakuti muye na maka a kuutuka ku vintu vyonsi iviliza vicitike, nga nu kwimilila pa manso ya Mwana wa Muntu.”

37Manda onsi Yesu wasambilizyanga mu Ng'anda ikulu yakwe Leza. Amanguzi lyonsi wayanga ku Mwamba wa Olivi akuno aikala. 38Lyene pa macaca, antu izanga ku Ng'anda ikulu yakwe Leza ku kumuvwa.

Выбрано:

Luka 21: MamL13

Выделить

Копировать