Yoane 4
4
1Afaliseo yuvwa ukuti Yesu waluta Yoane mukulenga antu aingi kuya alondezi nga nu mukuwatizya. (2Lelo Yesu umwisikulu wene atawatizyanga suka sile alondezi yakwe awatizyanga.) 3Caleka lino Yesu uvwa vino yakulanda, afuma mu Yudeya nga aswilila ku Galile. 4Lino aciliya, apita impanga pakasi mu Samaliya.
5Lyene afika ku Sika muzi uwaku Samaliya, pipi ni calo cino Yakobo wapile Yosefu mwana wakwe. 6Kuku ukwali ni cifula cakwe Yakobo. Yesu walanga watatonta nu lwendo, nga aikala pipi na pa cifula. Cali manye lino ilanzi lyafika umutwe papela (12 koloko).
7Lino umwanaci umwi uwaku Samaliya wiza ku kusemba manzi, Yesu amunena ati, “Mpele manzi imwe.” 8Alondezi yakwe yene ala yati yaya ku muzi kukukala vyakulya.
9Umwanaci uwaku Samaliya amunena ati, “Wemo wewe Muyuda nga nani nene Musamaliya. Uzye lyene ungalenga uli manzi kunondi?” (Pano Ayuda yasyamwela mu ngako zino Asamaliya yakamwelamo.)
10Yesu nawe amwaasuka ati, “Ndi wamanyile uwila wakwe Leza, na wino akukulenga manzi ya kumwa, nawe wange umulenge, nga wene wange akupeele manzi akapeela umi.”
11Umwanaci ati, “Musambazi nga vino wemo utakweti cakusembela, nga ni cifula naco icizike, uzye lyene manzi kwene yayo akapeela umi umayafumya kwi? 12Uzye wemo waluta Yakobo cikolwe citu, wino uwatupile cifula cii, cino umwisikulu pamwi na ana yakwe nga ni viteekwa vyakwe yamwanga mwenemo?”
13Yesu nawe aasuka ati, “Wino wensi akamwa manzi yaa wene aluvwa lusala nupya. 14Wino wensi alamwa manzi yano nemo ndamupeela wene ataluvwa lusala nupya. Manzi yano ndamupeela yene yalaya wa kafukoka ka manzi munoli, yano akapeela umi wape.”
15Umwanaci nawe amunena ati, “Musambazi, mpela manzi yao, nani ntaluvwa lusala nupya, na kuti ntaiza kuno ku kusemba.”
16Yesu nawe amunena ati, “Yanga ukaame uwako, wize nawe kuno.”
17Umwanaci nawe amunena ati, “Ntakwata uwane.”
Yesu amunena ati, “Watuvwanga ningo lino wati, utakwata uwako. 18Wemo watwitwe ku onsi yasano nga mucumi nu monsi wino uli nawe ndakai wene asi uwako.”
19Umwanaci amunena ati, “Musambazi, lyene namanya vino wewe kasema. 20Vikolwe vitu vyapepanga Leza pa mwamba uu, lelo mwe Ayuda mukalanda ukuti, Yelusalemu ali cifulo sile ukwa kupepela Leza.”
21Yesu amunena ati, “Kaciwe, taila vino nkukunena ukuti kasita kaliza lino mutalapepa Tata pa mwamba uu, nanti mu Yelusalemu kwene. 22Mwe Asamaliya mukapepa wino mutamanya, lelo swemo swe Ayuda tukapepa wino twamanya, pano ufyusi walailwe kupitila mu Ayuda. 23Lelo kasita kakwiza, nupya kati kafika, lilyo lino yakapepa acumi yalapepa Tata mu Mupasi nu mu cumi, pano ali ndi yaa, ayano Tata watemwa kuti yamupepa. 24Leza u Mupasi, na yano akamupepa, yalinzile kumupepela mu Mupasi nu mu cumi.” 25Mwanaci nawe amunena ati, “Namanya vino Katuula uwalavilwe aliza nga lino wiza alatunena vyonsi.” 26Yesu ati, “Anene kwene ne muno nkuvwanga nawe.”
27Lilyo kwene na alondezi yakwe Yesu yawela, nga yazunguka pa kuzana akuvwanga nu mwanaci. Lelo patali umuntu uwakuti amuzye ati, “Uzye ukulonda cani ku mwanaci?” Nanti uwakuti amuzye ati, “Uzye ukumuvwanzizya cani?”
28Lyene umwanaci asya insembo yakwe, aya ku musumba, anena antu, ati, 29“Ndi mukalole umuntu wino wali wanena vintu vyonsi vino nacita. Uzye wii angaya ali Katuula uwalavilwe?” 30Nao yafuma mu musumba yaya ukwali Yesu.
31Pa kasita kwene kaka alondezi yamupapata yati, “Kasambilizya, silyanga!”
32Lelo wene ayanena ati, “Nemo nkweti cakulya cino mwemo mutamanyile.”
33Lyene alondezi nao yatandika kuuzyanya yati, “Uzye ale umuntu umwi watamuletela cakulya cino alile?”
34Yesu nawe ayanena ati, “Cakulya cane, ukucita ukulonda kwakwe wino uwantumile, nu kumalila milimo yakwe ino wampeela kuti ncite. 35Uzye mwemo musyavwanga muti, ‘Kwasyala myezi ini, ale insita ya uzombozi yafika?’ Lelo nkumunena ukuti lolekesyini ivyalo. Vizao vyati vica nupya vikulolela kuzombolwa. 36Na ndakai kazombola akulipilwa malipilo yakwe nga nu kukoozya vizao ku umi wape. Caleka kata wa mbezu na kazombola kwene, oili yalazangila pamwi. 37Pano muvwango uu uwa cumi, uwakuti, ‘Umwi akakomela, nga muze nawe akazombola.’ 38Mwemo namutuma ku kuzombola mu vyalo vino mutalimile. Yauze ayano yalimile, nga namwe mukazana muzano pali vino yaomba.”
39Lyene mu musumba ulya Asamaliya aingi yataile Yesu pamulandu wa mazwi yano umwanaci wayanenyile ati, “Wali wanena vintu vyonsi vino nacita.” 40Caleka lino Asamaliya iiza kuli Yesu, yamupapata kuti aikale nao, nga aikala nao manda yaili.
41Na yauze aingi yataile pamulandu wa mazwi yano Yesu wavwanzile. 42Lyene yanena umwanaci yati, “Ndakai twataila, pasi pa mazwi yano wali wavwanga, lelo pano sweisikulu twati tuyuvwila kunoli, nupya twati tumanya vino wi kwene ali Katuula wa amu nsi.”
Yesu wapozya mwana musika
(Mat 8:5-13; Luk 7:1-10)
43Pacisila ca manda yaili, Yesu afumako aya ku Galile. 44#Mat 13:57; Mk 6:4; Luk 4:24 Pano Yesu umwisikulu wavwanzile ati, “Kasema asyacindikwa mu mpanga ya kumwao.” 45#Yoa 2:23 Lino wafika mu Galile, aina Galile yamuzengela, pano yaweni vintu vyonsi vino wacisile mu Yelusalemu pa nsita ya kuzevya Cimulo ca Ucilo, lino yaile kweneko.
46 #
Yoa 2:1
Nupya kwene aswilila ku Kana muzi uwaku Galile, kuko kuno wasenwile manzi yaya waini. Kwali musika umwi uwa kwi sano wino mwana wakwe umonsi walwile mu Kapenaumu. 47Lino uvwa vino Yesu watafuma mu Yudeya ali ku Galile, aya kunoli, amupapata kuti aye akapozye mwana wakwe uwalwile pipi nu kufwa. 48Yesu nawe amunena ati, “Kusi umwi uwa munomuli angataila, suka ndi walola vilangililo ni vizungusyo.”
49Musika nawe avwanga ati, “Mwene, leka tupite swensi likwene lino mwanane atali kuti afwe.”
50Yesu nawe amunena ati, “Pitanga mwana wako amaya umumi.”
Musika nawe ataila mazwi yano Yesu wavwanzile kunoli, nga apita. 51Lyene lino acili umu nzila akuya aomvi yakwe yamukomanya, yamunena yati, “Mwana wako umumi.”
52Alino nawe ayauzya kasita kano mwana wakwe watandike kuvwa ningo. Nao yamunena yati, “Cali mutondo musanya ni nsita yakwe 1 koloko alino impepo yamutile” 53Lyene isi amanya vino cali pa kasita kaka kwene lino Yesu wamunenyile ati, “Umwana wako amaya umumi.” Caleka wene pamwi na amu ng'anda yakwe yataila.
54Cii cili cilangililo cakwe ciili cino Yesu wacisile, lino wafumile mu Yudeya kwiza ku Galile.
Yesu wapozya umuntu pa ciziya
Выбрано:
Yoane 4: MamL13
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Mambwe-Lungu Bible © The Bible Society of Zambia, 2013
