Yoane 2
2
1Pacisila ca manda yaili, kwali uwinga ku Kana, muzi uwaku Galile. Nyina wakwe Yesu akuno wali, 2na Yesu pamwi na alondezi yakwe yaamilwe ku winga. 3Lino waini wino antu yamwanga wasila, nyina wakwe Yesu amunena ati, “Waini wasila.”
4Yesu amwaasuka ati, “Mayo, vivyo vitampazi. Kasita kane katali kafike.”
5Alino nyina anena aomvi ati, “Vyonsi vino amamunena kucita, mucite.”
6Ayuda yali ni ntambi zya mifulalile zya kuisangulula. Acino kwali kweneko yamuyeza mutanda a mawe akufulalilamo. Muyeza wenga wazulanga kulingana ni cipimo ca nsembo ziili nanti zitatu. 7Yesu anena aomvi ati, “Zuzyini manzi muli yamuyeza yaa.” Nao yazuzya na papela. 8Alino ayanena ati, “Tapinimo manzi yamwi mutwalile mukalamba wa winga.” Nao yatapamo yamutwalila, 9lyene mukalamba wa winga afimpulamo manzi yano Yesu wasenwile yaya waini musuma cuze. Atamanyile na kuno waini wafumile, (Lelo aomvi yano atafile manzi yene yamanyile.) Caleka aama siwinga, 10nga amunena ati, “Antu yonsi yakatandika kuleta waini musuma, nga pacisila lino antu yamwa cuze, yayaletela waini wino asi musuma. Lelo wemo watusunga waini musuma cuze kufika na ndakai!” 11Yesu wacisile cilangililo cii cakutandika mu Kana, muzi uwaku Galile. Muli cii amuno wasokolwile lulumbi lwakwe, nga na alondezi yakwe yataile munoli.
12 #
Mat 4:13
Pacisila cakwe cii Yesu, nyina, aina nga na alondezi yakwe yaya ku Kapenaumu, iikalako manda yanono.
Yesu wazinga aculuzi mu Ng'anda ikulu yakwe Leza
(Mat 21:12-13; Luk 19:45-46; Mk 11:15-17)
13 #
Kuf 12:1
Lino insita ya kuzevya Cimulo ca Ucilo ca Ayuda yapalama pipi, Yesu aya ku Yelusalemu. 14Lyene aya mu Ng'anda ikulu yakwe Leza, azanamo aculuzi ala yakukazya ng'ombe, mfwele ni nkunda, na yamwi ala yatenzi yakukauzyanya impiya. 15Lyene apanga swepu wa myando, nga azingila antu yonsi pamwi ni nyama zyao zyonsi panzi. Alino apenola vipango vyakwe yakakauzya ya mpiya, nga ni mpiya zyao zisansantika. 16Anena yano akazyanga nkunda, ati, “Zifumini, mutacita ng'anda yakwe Tata wa ng'anda ya uculuzi.” 17#Mas 69:9 Alondezi yakwe iusya vino calembwa mu malembelo cati, “Kucincila kwane kwa pa ng'anda yako ukulandya.”
18Lyene Ayuda yamunena yati, “Uzye cilangililo cii cino ungacita pakuti tumanye vino ukweti nsambu yakucita vii?”
19 #
Mat 26:61; 27:40; Mk 14:58; 15:29 Yesu nawe aasuka ati, “Omololini Ng'anda ii ikulu yakwe Leza, nani ndaikuula mu manda yatatu.”
20Ayuda yamunena yati, “Ng'anda ikulu yakwe Leza yakuzilwe pa myaka makumi yani na mutanda. Uzye wewe ungaikula mu manda yatatu?”
21Lelo Ng'anda ikulu yakwe Leza ino Yesu walandangapo umwili wakwe. 22Caleka lino wazyukwike kufuma ku afwe, alondezi yakwe iusya vino wavwanzile cii, nga yataila malembelo na mazwi yano Yesu wavwanzile.
Yesu wamanya antu onsi
23Lino Yesu acili mu Yelusalemu mu manda ya kuzevya Cimulo ca Ucilo, aingi yataila munoli lino yalola vilangililo vino wacitanga. 24Lelo atayataile pano wamanyile vino antu yaya. 25Nupya atalondanga kuti umwi amunene vino antu yaya, pano umwisikulu wamanya vyonsi ivyaya mu myenzo yao.
Yesu na Nikodemo
Выбрано:
Yoane 2: MamL13
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Mambwe-Lungu Bible © The Bible Society of Zambia, 2013
