Utandiko 8
8
1Lelo Leza atilile Nowa ni nyama zyonsi zyamu mpanga, nga ni viteekwa vino wali navyo mu cange. Caleka Leza akatusya cipunga mu nsi, na mulamba atandika ukupwa. 2Ala watayala tufukoka utwa manzi utukufuma pansi pansi ni vipongo vya mwiyulu ni mvula ita ukutonya. 3Mu manda 150 amanzi yakama panono panono. 4Pa wanda uwalenga ikumi na cinimbali mu mwezi wakwe cinimbali icange cisika papela ya myamba ya Alalati. 5Amanzi yatwalilile ukupwa, nga pa wanda wakutandika umwezi uwalenga ikumi, nsongo zya myamba zitandika kuloleka.
6Pacisila ca manda makulu yani Nowa ayula inzota ya cange. 7Alino atuma mwankole. Mwankole nawe atawezile, alukulelemba mpaka amanzi yasuka yakama. 8Lyene Nowa atuma inkunda ukuyalengula ndi amanzi yatiyakama mu nsi. 9Lelo inkunda iposiwa kuzana pa kwikala pano amanzi ala yatali yakame. Caleka iswilila kuli Nowa nga nawe atambika ikasa aingizya mu cange. 10Nowa alolela pa manda cinimbali nga nupya atuma inkunda ukufuma mu cange. 11Lino inkunda yawela kunoli manguzi ala isenzile ifwa lyamu olivi ku mulomo, Nowa amanya ukuti lyene amanzi yatiyakama. 12Alino alolela amanda nayauze cinimbali, nga nupya atuma inkunda, lelo yene itawezile kunoli.
13Lino Nowa wali ni myaka 601, pa wanda wakwe conga wakwe Tende, umwezi wakutandika mwaka, amanzi yalanga ala yatiyakama. Alino Nowa ayula inzota ya papela ya cange alolekesya kuzinguluka konsi, alola vino musili wati utandika ukuma. 14Pa wanda uwalenga amakumi yaili na cinimbali mu mwezi wakwe ciili umusili ala umalilike ukuma.
15Lyene Leza anena Nowa ati, 16“Fuma mu cange nu wako na ana yako aonsi na aci yao. 17Fumya na vyonsi vya umi ivili mu cange nawe, ivyunyi vyonsi, inyama zyonsi pakuti vivyalane vivule vilimbe insi yonsi.”
18Caleka Nowa afuma mu cange pamwi nu muci na ana yakwe na aci yao. 19Inyama zyonsi ni vyunyi vyonsi vifuma mu cange mu maumba maumba cila musango wakwevyo.
Nowa wapeela impolelwa
20Lyene Nowa akuulila Yawe kavuwa nga atoola conga ca musango onsi wa nyama ni vyunyi visangululwe avipela impolelwa ya mawila yakoca pa kavuwa. 21Lyene lino Yawe wanunsya umununko, nga umwisikulu avwanga ati, “Ntalatala ntipe insi nupya, pamulandu wa vicitwa vya muntu. Amelenganyo ya antu yaya ankota ukufuma ku civyalilwa. Ntalonona insi ni vyaumi vyonsi nupya, wakwe vino natincita.”
22“Ndi vino insi ilaya pe,
avino kumayanga insita
ya kukomela ni ya kuzombola,
kuzuka nu kukaya,
cisanya ni cisiku,
kasanya nu usiku.
Vii, vitalasila.”
Выбрано:
Utandiko 8: MamL13
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Mambwe-Lungu Bible © The Bible Society of Zambia, 2013
