Gʼaˬkʼehˇ 2

Muiˬ-eu shawˇ-eu Yaw sahˇ Miˬyehˇ zaꞈ le-euˬ

1Beˬdeˬgoˇdeˬ aˇ nah keuˆ le ngeh, jah-eu tsawˇ haˬ dawˬ tawˆ luꞈ, tiˬ gaˇ uiˬ leˇ-awˇ jawˇ-euˬ meh. 2Ja pyuˬ ni, jaˬ lehˇ lehˇ ma baw-eu loꞈ-ehˇ mˬ kʼoeˇ taˆ teˇ saˇ mahˇ doˆ laˇ-awˇ, aˬ yawꞈ maꞈ nuiˇ luꞈ-eu nymˇ nymˇ lah-ehˇ teˇ saˇ kʼoeˇ byah-iˇ-euˬ meh. 3Kʼoeˇ ngeh, miˬ dzaˬ miˬ lmˇ-ahˇ duˇ-eu mehˬ laˇ deuˬ-ahˇ aˬ yawꞈ maꞈ ya mawˇ-euˬ meh. Mehˬ laˇ kʼoeˇ deuˬ oe kʼawˬ gʼeh-awˇ, kʼoeˇ gaˇ kʼaˇ jawˇ-eu tsawˇ haˬ yawˬ gʼaˬ na luꞈ-ahˇ toeˬ ciˆ-euˬ meh. 4Aˬ yawꞈ maꞈ dawˬ tawˆ luꞈ-ahˇ Muiˬ-eu shawˇ-eu Yaw sahˇ Miˬyehˇ byah laˇ-awˇ, Yaw sahˇ Miˬyehˇ neh bi ngehˬ bi tmˇ-euˬ loꞈ-ehˇ, dawˬ gʼawˬ mya jeˬ ngehˬ-euˬ meh.

5Kʼoeˇ ngeh, miˇ tsaˬ kʼoeˇ taˆ jaˆ-eu miˇ kʼahˬ yawˬ kʼahˬ na luꞈ-ahˇ neh uiˬ laˇ taˬ-euˬ Miˬyehˇ-ahˇ yaw zeu baw dui dui-eu Yuˇdaˆ tsawˇ haˬ deuˬ, Yeˬluˇsaˬlehˬ meuˬ laꞈ kʼoeˇ jawˇ luꞈ-eu meh. 6Teˇ saˇ kʼoeˇ ya gaˬ ngeh, tsawˇ haˬ kʼoeˇ deuˬ baˬ maꞈ puˇ jeˬ-ehˇ uiˬ le bymˇ le-euˬ meh. Jah-eu tsawˇ haˬ kʼoeˇ deuˬ ngehˬ luꞈ-eu dawˬ kʼoeˇ, aˬ yawꞈ maꞈ yawˬ gʼaˬ na luꞈ-ahˇ yawˬ ha tsawˇ jeuˬ-euˬ dawˬ loꞈ-ehˇ gaˬ le-eu miˇ neh, aˬ yawꞈ maꞈ zahˬ leˇ-euˬ meh. 7Aˬ yawꞈ maꞈ zahˬ dui dui leˇ-eu laꞈ kʼoeˇ, heu loꞈ-ehˇ ehˇ-eu meh. “Dawˬ heu loꞈ-ehˇ ngehˬ luꞈ-eu tsawˇ haˬ heu deuˬ Gaˬliˬlehˇ tsawˇ haˬ deuˬ ngaˇ. 8Toˆ-ehˇ ngeuˇ naˇ, aˬ dui yawˬ gʼaˬ na luꞈ-ahˇ yawˬ ha tsawˇ jeuˬ-euˬ dawˬ-ahˇ neh aˬ joˆ-ehˇ gaˬ le-eu nga. 9Aˬ dui maꞈ-aˬ, Baˬtiˇ miˇkʼahˬ, Meˬdiˇ miˇkʼahˬ, Eˇlamˬ miˇ kʼahˬ, Maˬsoˬpoˬtaˬmiˇ miˇ kʼahˬ, Yuˇdaˆ miˇ kʼahˬ, Gaˬbaˬdawˇciˆ miˇ kʼahˬ, Boˬtuˆ miˆ kʼahˬ, Aˬshaˆ miˇ kʼahˬ, 10Puˬgiˇ miˇ kʼahˬ, Paˬbuˇliˇ miˇ kʼahˬ, Iˇjiˇtuˆ miˇ kʼahˬ, Kuˇleˬniˬ miˇ kʼahˬ dawˬ peh jaˆ-eu Liˆbyaˇ miˇ kʼahˬ, heu deuˬ doe ni tiˬ paw tiˬ gʼaˬ-ehˇ jawˇ-eu tsawˇ haˬ deuˬ ma. Aˬ dui tiˬ paˆ na deuˬ-aˬ, Loˇmaˆ meuˬ-ahˇ jawˇ-eu oe taˬ-euˬ meh. 11Yuˇdaˆ tsawˇ jeuˬ maˬ ehˇ, Yuˇdaˆ tsawˇ haˬ pyeuꞈ laˇ-euˬ aˬ cawˬ tsawˇ jeuˬ deuˬ maˬ ehˇ, aˬ dui laꞈ kʼoeˇ ahˇ-eu ma. Tiˬ paˆ na deuˬ-aˬ Gaˬlaˬdeˬ miˇ kʼahˬ hawˇ-eu Aˬleˬbyaˇ miˇ kʼahˬ-ahˇ jawˇ-eu ma. Ehˇ kʼawꞈ, Miˬyehˇ neh mˇ-euˬ huiˬ-eu gaˇ deuˬ gaˇ kawˆ aˬ yawꞈ maꞈ ngehˬ-eu kʼoeˇ, aˬ dui dawˬ tawˆ luꞈ yawˬ ha tsawˇ jeuˬ-euˬ dawˬ-ahˇ neh ya gaˬ-euˬ ma.” 12Aˬ yawꞈ maꞈ noeˬ maˬ doˆ-ehˇ zahˬ leˇ tsoˆ leˇ jiˇ-awˇ, “Aˬ joˆ-ehˇ maˇ diˇ gʼeh-eu nga teu” lehˇ, tiˬ gʼaˬ tiˇ gʼaˬ ehˇ-eu meh.

13Ehˇ kʼawꞈ, tiˬ paˆ na deuˬ-aˬ, jah-eu tsawˇ haˬ kʼoeˇ deuˬ-ahˇ cehꞈ lehꞈ ka-eu laꞈ kʼoeˇ, “Aˬ gaꞈ dzaˇ uiˇ yaw shuiꞈ dawˇ yehꞈ-euˬ miˇ neh gʼeh-eu nga” lehˇ ja uiˇ niˇ gʼa-eu meh.

Beˬtuˆluˆ dawˬ mehˬ mehˬ-euˬ

14Kʼoeˇ ngeh, Beˬtuˆluˆ-aˬ, gʼaˬ kʼehˇ tseˇ nyiꞈ gʼaˬ nehˬ-ehˇ yawꞈ-awˇ, teˇ saˇ yaw kʼaˆ kʼaˆ-ehˇ guˇ-awˇ, tsawˇ haˬ aˇ maꞈ-ahˇ heu loꞈ-ehˇ ehˇ nehˬ-euˬ meh. “Aˬ yuiꞈ aˬ nyiˇ Yuˇdaˆ tsawˇ haˬ deuˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, gaˇ kawˆ heu ngaˇ ja gaˇ tiˬ poˆ naˇ haˬ sheˇ. 15Naw maꞈ noeˬ-eu loꞈ-ehˇ, tsawˇ haˬ heu deuˬ aˬ gaꞈ dzaˇ uiˇ yaw shuiꞈ dawˇ yehꞈ-euˬ maˬ ngeuˇ-a. Aˬ jeˬ miˇ neh ehˇ naˇ, nymˬ-mˇ uˬ shawˬ paw naˬ liˬ gʼoeˬ laꞈ keuˆ laˇ-euˬ tehꞈ-a siˬ.#2.15 Yu daˆ tsaw haˬ deuˬ-aˬ, uˬ shawˬ paw naˬ liˬ gʼoeˬ laꞈ-ahˇ guiˬ lahˬ shaˇ gʼaˬ miˇ tsa shawˬ hawˬ dzaˬ-eu meh. Dzaˬ ngeh dawˇ ngeh maˬ ngeuˇ naˇ dzaˬ gʼaˬ dawˇ gʼaˬ-awˇ neh tehꞈ-ehˇ aˬ yawꞈ maꞈ aˬ gaꞈ dzaˇ uiˇ dawˇ-eu meh. Beˬtuˆluˆ dawˬ ngehˬ-eu aˇ yamˬ kʼoeˇ-aˬ, naˬ liˬ gʼoeˬ laꞈ byah laˇ-euˬ tehꞈ miˇ neh, aˬ gaꞈ dzaˇ uiˇ dawˇ yamˬ maˬ keuˆ laˇ-euˬ gaˇ kawˆ Beˬtuˆluˆ ehˇ mawꞈ-eu jeˬ pyeuꞈ-eu meh. 16Gaˇ kawˆ heu-aˬ, Miˬyehˇ gʼaˇ duˬ ngeh dah-eu Yawˇlaˆ neh ehˇ taˬ-euˬ loꞈ-ehˇ pyeuꞈ laˇ-euˬ meh. Yawˇlaˆ neh ehˇ taˬ-euˬ dawˬ-aˬ, heu loꞈ-ehˇ meh.

17‘Miˬyehˇ neh ehˇ taˬ-euˬ dawˬ-aˬ,

Aˇ saˬ saˬ-eu aˇ nah keuˆ ngeh,

tsawˇ haˬ yawˬ gʼaˬ na luꞈ kʼoeˇ taˆ,

ngaˬ-euˬ Yaw sahˇ shehˆ daˆ nehˬ ma.

Naw maꞈ-euˬ aˬ buˇ aˬ li deuˬ,

ngaˬ-euˬ gʼaˇ duˬ ngehˬ dah tehꞈ-a.

Naw maꞈ-euˬ tsawˇ haˬ zaˬ guˬ deuˬ,

Yaw sahˇ mehˬ-eu jeˬ ya mawˇ-awˇ,

naw maꞈ-euˬ tsawˇ mawˬ tsawˇ kʼaˆ deuˬ,

yuꞈ maˆ gʼawˬ mya jeˬ maˆ tehꞈ-a.

18Aˇ nah aˇ yamˬ kʼoeˇ keuˆ le ngeh,

ngaˬ-euˬ zaˬ kʼaˆ deuˬ-euˬ kʼoeˇ taˆ,

zaˬ miˬ zaˬ yo maˬ tseˇ paˆ ni,

ngaˬ-euˬ Yaw sahˇ shehˆ daˆ nehˬ-awˇ,

ngaˬ-euˬ gʼaˇ duˬ bi ngehˬ dah ma.

19Mˬ maˬ mˬ taˆ yaw goˇ kʼoeˇ gaˇ,

kʼaˆ jeˬ-ehˇ gʼeh-eu mˇ mehˬ-awˇ,

Laꞈ oˆ miˇ maˬ heu kʼoeˇ taˆ kʼawꞈ,

zahˬ leˇ-eu jeˬ ngaˇ jahˇ mehˬ ma.

Shiˬ doˆ-awˇ miˬ dzaˬ puiˆ tehꞈ-a.

Uˬ kʼoeˬ naˆ uꞈ ni jaˆ tehꞈ-a.

20Yaw shehꞈ kʼahˬ sehˇ huiˬ dui dui-eu,

SahˬpaˬMiˬyehˇ-euˬ aˇ nah kʼoeˇ,

miˇ kʼoeˇ taˆ maˬ keuˆ le nmˇ kaˬ,

nahˇ ma zahˇ tsui ni pyeuꞈ-iˇ-awˇ,

ba la shiˬ neˇ neˇ-iˇ tehꞈ-a.

21Kʼoeˇ ngeh, ‘Caw ba nehˬ laꞈ-awˬ’ lehˇ,

SahˬpaˬMiˬyehˇ-ahˇ kuˇ-eu deuˬ,

ka kʼoꞈ nehˬ-eu jeˬ za tehꞈ-a.’

22“Aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ-oˇ, ngaˇ ehˇ gaˇ yaw muiˬ paˬ-ehˇ naˇ haˬ sheˇ. Naˬzaˬlehˇ tsawˇ haˬ Yeˬsuˇ-aˬ, maˇ maˇ ni Miˬyehˇ neh bi oe-euˬ gʼaˬ pyeuꞈ-eu gaˇ kawˆ, aˬ yawꞈ-ahˇ gʼoe-eu laꞈ kʼoeˇ Miˬyehˇ neh mˇ-euˬ zahˬ leˇ paˬ-ehˇ gʼeh-eu gaˇ kʼoeˇ deuˬ saˇ kiˇ kamˬ luꞈ meh. Gaˇ kawˆ kʼoeˇ deuˬ naw maꞈ-euˬ mehˬ shi pyeuꞈ dzeuˇ yaꞈ-euˬ miˇ neh, naw maꞈ yaw muiˬ paˬ-ehˇ siˬ duˬ meh. 23Miˬyehˇ-aˬ, yaw beh neh aˬ yawꞈ neh lehˬ hmˬ taˬ-euˬ loꞈ-ehˇ, Yeˬsuˇ-ahˇ naw maꞈ-euˬ aˬ laꞈ laꞈ kʼoeˇ a nehˬ-eu gʼaˇ duˬ, naꞈ ngeh neh noeˬ tsehˆ taˬ gʼaˬ-euˬ meh. Kʼoeˇ naˇ, iˬ baˇ mˇ-eu tsawˇ haˬ deuˬ neh laꞈ yaꞈ kʼoeˇ taˆ bi taꞈ tehˬ-eu laꞈ kʼoeˇ, naw maꞈ aˬ yawꞈ-ahˇ sehꞈ-euˬ meh. 24Ehˇ kʼawꞈ, aˬ yawꞈ-ahˇ Miˬyehˇ neh paˇ bi gʼoꞈ dehꞈ laˇ-eu laꞈ kʼoeˇ, shiˇ-eu jeˬ-euˬ baoˬ uˬ moˆ bi dzeuˇ-iˇ-euˬ meh. Aˬ jeˬ miˇ neh ehˇ naˇ, shiˇ-eu jeˬ aˬ yawꞈ-ahˇ maˬ paꞈ tawꞈ nya-a. 25Aˬ yawꞈ-euˬ gaˇ kawˆ Daˬbiˇ neh heu loꞈ-ehˇ ehˇ taˬ-euˬ jaˆ-eu meh.

‘Ngaˬ-euˬ mehˬ shi yawˬ jawˇ na luꞈ,

SahˬpaˬMiˬyehˇ-ahˇ mawˇ luꞈ ma.

Ngaˬ-euˬ dawˬ peh aˬ yawꞈ jawˇ-awˇ,

ngaˇ kʼahˬ lahˇ duˬ maˬ paˇ jaˆ ma.

26Ngaˬ-euˬ nui ma nui saˇ za-awˇ,

laˬ kʼaˬ tiˬ cehˇ dawˬ ngehˬ-eu ma.

Shiˬ shaˬ gʼawˇ mawˇ maˬ gmˬ-eu kʼawꞈ,

noeˬ tmˬ taˬ-euˬ ziꞈ dah jaˆ ma.

27Aˬ jeˬ miˇ neh ehˇ naˇ,

shiˇ-eu jeˬ-euˬ miˇ kʼahˬ laꞈ kʼoeˇ,

nawˇ ngaˬ-ahˇ maˬ byehˇ dzeh yaꞈ-aˇ.

Saˇ jaˇ ziꞈ-eu zaˬ kʼaˆ-ahˇ nawˇ,

lmˬ bymˇ-ahˇ maˬ bi buꞈ shoˆ-aˇ.

28Dehꞈ-eu gaˇ ma nawˇ mehˬ laꞈ-awˇ,

nawˇ ngaˬ nehˬ-ehˇ jawˇ-eu miˇ neh,

ngaˇ laˬ kʼaˬ cehˇ-eu jeˬ byah ma.’

29“A yuiꞈ aˬ nyiˇ deuˬ-oˇ, tsawˇ myahˇ doˆ dui dui-eu aˬ dui-euˬ aˬ poeˬ sahˬ paˬ Daˬbiˇ gaˇ kawˆ, ngaˇ naw maꞈ-ahˇ kʼaˬ duˬ ni ehˇ nehˬ nyaˇ. Aˬ yawꞈ shiˇ-awˇ, aˬ yawꞈ-ahˇ baꞈ pahˬ-euˬ lmˬ bymˇ iˬ nah keuˆ ni aˬ dui maꞈ jawˇ gaˇ jaˆ luꞈ meh. 30Aˬ yawꞈ-aˬ, Miˬyehˇ gʼaˇ duˬ ngehˬ dah-eu tiˬ gʼaˬ pyeuꞈ-awˇ, Miˬyehˇ neh aˬ yawꞈ-ahˇ saˇ jaˇ dzaˬ taˬ-euˬ jeˬ-ahˇ aˬ yawꞈ siˬ nya meh. Daˬbiˇ-euˬ zaˬ deuˬ uˆ deuˬ laꞈ kʼoeˇ, Daˬbiˇ-ahˇ duˇ-eu sahˬ paˬ tiˬ gʼaˬ bi doˆ laˇ ma lehˇ, Miˬyehˇ saˇ jaˇ dzaˬ taˬ-euˬ meh. 31Mehˬ hu paw Miˬyehˇ aˬ joˆ-ehˇ jahˇ-eu lehˇ lehˬ hmˬ taˬ-euˬ gaˇ kawˆ Daˬ biˇ haw mawˇ-euˬ miˇ neh, Ka li gʼoꞈ dehꞈ laˇ-eu gaˇ kawˆ-ahˇ aˬ yawꞈ heu loꞈ-ehˇ ehˇ taˬ-euˬ meh.

‘Shiˇ-eu jeˬ-euˬ miˇ kʼahˬ laꞈ kʼoeˇ,

aˬ yawꞈ-ahˇ maˬ byehˇ dzeh yaꞈ-ehˇ,

lmˬ bymˇ-ahˇ maˬ bi buꞈ shoˆ-aˬ.’

32Yeˬsuˇ heu gʼaˬ-ahˇ Miˬyehˇ neh bi gʼoꞈ dehꞈ laˇ-euˬ meh. Gaˇ kawˆ heu aˬ diˇ aˬ maˇ pyeuꞈ laˇ-euˬ aˬ dui yawˬ gʼaˬ na luꞈ siˬ duˬ mawˇ duˬ-euˬ saˇ kiˇ pyeuꞈ-eu ma. 33Aˬ yawꞈ-euˬ Aˬda pyeuꞈ-eu Miˬyehˇ-euˬ aˇ maˇ paw aˬ yawꞈ-ahˇ ciˬ huiˬ ciˬ mahˇ keuˆ nehˬ-awˇ, Miˬyehˇ neh saˇ jaˇ dzaˬ taˬ-euˬ jaˆ-eu loꞈ-ehˇ, Yaw sahˇ Miˬyehˇ za-euˬ meh. Nymˬ-mˇ naw maꞈ ya gaˬ ya mawˇ luꞈ-eu heu-aˬ, a yawꞈ neh Yaw sahˇ Miˬyehˇ shehˆ daˆ nehˬ laꞈ-euˬ jeˬ pyeuꞈ-eu meh. 34Mˬ kʼoeˇ taˆ daˆ gʼoꞈ leˇ-euˬ gʼaˬ-aˬ, Daˬbiˇ maˬ ngeuˇ-a. Daˬbiˇ aˬ yawꞈ neh ehˇ taˬ-euˬ heu loꞈ-ehˇ jaˆ-eu meh.

‘SahˬpaˬMiˬyehˇ neh heu loꞈ-ehˇ,

ngaˬ-euˬ Sahˬpaˬ-ahˇ ehˇ-euˬ meh.

Ngaˬ-euˬ aˇ maˇ paw nuiˇ laˇ-awˬ.

35Nawˬ-ahˇ muiˇ-eu tsawˇ haˬ deuˬ-ahˇ,

nawˇ aˬ kuiˇ bi cawˬ daˆ-eu lehˇ,

nawˬ-euˬ aˬ kuiˇ pehˬ zaˬ uˬ moˆ,

ngaˇ nyehꞈ taˬ ngeh keuˆ ni nuiˇ-awˬ.’

36“Kʼoeˇ miˇ neh, Iˇsaˬleˬlaˆ tsawˇ haˬ dawˬ tawˆ luꞈ heu loꞈ-ehˇ ya siˬ duˬ meh. Naw maꞈ neh laꞈ yaꞈ kʼoeˇ taˆ taꞈ sehꞈ-euˬ Yeˬsuˇ heu gʼaˬ-aˬ, Miˬyehˇ neh Sahˬpaˬ hawˇ-eu Ka li bi pyeuꞈ laˇ-euˬ gʼaˬ meh.”

37Beˬtuˆluˆ kʼoeˇ loꞈ-ehˇ ehˇ gaˇ tsawˇ haˬ kʼoeˇ deuˬ ya gaˬ ngeh, aˬ yawꞈ maꞈ-euˬ nui ma-ahˇ zaw dui dui leˇ-awˇ, Beˬtuˆluˆ hawˇ-eu gʼaˬ kʼehˇ kʼoeˇ deuˬ-ahˇ ehˇ-eu, “Aˬ yuiꞈ aˬ nyiˇ deuˬ-oˇ, nga maꞈ aˬ joˆ-ehˇ jahˇ paˬ nga.”

38Aˬ yawꞈ maꞈ-ahˇ Beˬtuˆluˆ ehˇ nehˬ-eu, “Naw maꞈ yawˬ gʼaˬ na luꞈ yawˬ ha-euˬ iˬ baˇ noeˬ poˆ-awˇ, Yeˬsuˇ Ka li-euˬ tsawˇ myahˇ uˬ moˆ iˇ cuꞈ shawˇ-awˬ. Kʼoeˇ loꞈ-ehˇ jahˇ naˇ, Miˬyehˇ naw maꞈ-ahˇ iˬ baˇ pyehˬ nehˬ laꞈ-awˇ, Miˬyehˇ neh biꞈ leꞈ-euˬ Muiˬ-eu shawˇ-eu Yaw sahˇ Miˬyehˇ-ahˇ naw maꞈ za tehꞈ-a. 39Aˬ jeˬ miˇ neh ehˇ naˇ, Muiˬ-eu shawˇ-eu Yaw sahˇ Miˬyehˇ biꞈ ma lehˇ Miˬyehˇ neh saˇ jaˇ dzaˬ taˬ-euˬ kʼoeˇ-aˬ, naw maꞈ hawˇ-eu naw maꞈ-euˬ zaˬ deuˬ-ahˇ dzaˬ taˬ-euˬ saˇ jaˇ pyeuꞈ-eu meh. Kʼoeˇ uˬ taꞈ, gaˇ mahˇ kaˬ gaˇ jawˇ-eu tsawˇ haˬ dawˬ tawˆ luꞈ hawˇ-eu aˬ dui-euˬ Miˬyehˇ pyeuꞈ-eu SahˬpaˬMiˬyehˇ neh aˬ yawꞈ jawˇ gaˇ kʼaˇ kuˇ taˬ-euˬ deuˬ dawˬ tawˆ luꞈ-ahˇ dzaˬ-euˬ saˇ jaˇ kʼawꞈ pyeuꞈ-eu meh.”

40Beˬtuˆluˆ-aˬ, aˬ yawꞈ maꞈ-ahˇ gʼawˬ mya jeˬ ja ja-ehˇ mehˬ nehˬ-awˇ heu loꞈ ehˇ gʼaˬ biꞈ nehˬ-euˬ meh. “Ziˇ heu ziˇ-ahˇ dehꞈ-eu haiˬ-eu tsawˇ haˬ heu deuˬ kʼoeˇ taˆ keuˆ le-eu lehˇ gʼeh-eu kʼehˬ-eu kʼaˆ-eu jeˬ laꞈ kʼoeˇ, naw maꞈ ya buˬ-iˇ ni leh jeh-awˬ.” 41Aˬ yawꞈ dawˬ mehˬ mehˬ gaˇ tsawˇ haˬ gʼawˬ mya ni jah leˇ-awˇ, iˇ cuꞈ bi shawˇ-euˬ meh. Kʼoeˇ ngeh nah tehꞈ-ehˇ, aˬ yawꞈ maꞈ-euˬ aˇ muˇ-ahˇ tsawˇ haˬ smˬ heˇ gʼaˬ lahˬ laˇ-euˬ meh. 42Aˬ yawꞈ maꞈ-aˬ, gʼaˬ kʼehˇ deuˬ neh mehˬ nehˬ-euˬ jeˬ-ahˇ yaw muiˬ paˬ-ehˇ dzaw geuꞈ-awˇ, tiˬ gʼaˬ tiˇ gʼaˬ cawˬ yaw muiˬ-ehˇ cawˬ taꞈ-eu laꞈ kʼoeˇ, tiˬ kawˆ loꞈ-ehˇ dzaˬ taꞈ dawˇ taꞈ-awˇ guiˬ lahˬ shaˇ taꞈ-euˬ meh.

Jah-eu tsawˇ haˬ deuˬ yaw dehꞈ dehꞈ-eu

43Gʼaˬ kʼehˇ deuˬ-ahˇ gʼoe-awˇ, zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu gʼawˬ mya jeˬ Miˬyehˇ jahˇ-euˬ meh. Tsawˇ haˬ yawˬ gʼaˬ na luꞈ zahˬ leˇ-awˇ guˆ-euˬ meh. 44Jah-eu tsawˇ haˬ dawˬ tawˆ luꞈ tiˬ kawˆ loꞈ-ehˇ dehꞈ taꞈ-eu laꞈ kʼoeˇ, kʼaˇ jaˆ-eu jeˬ dawˬ tawˆ luꞈ tiˬ kawˆ loꞈ-ehˇ geuꞈ-awˇ zmˬ-euˬ meh. 45Aˬ yawꞈ maꞈ yawˬ ha-euˬ myawˬ gahˬ ahˬ dzeh-awˇ, za-euˬ pyuˇ kʼoeˇ aˬ yawꞈ gʼaˬ yawꞈ kʼaˇ loˬ-eu loꞈ-ehˇ biˇ geuꞈ-euˬ meh. 46Aˬ yawꞈ nah yawꞈ Uˬ duˬ tahˬ nymˇ nymˇ ma laꞈ kʼoeˇ tahˬ dzoeˇ-awˇ, aˬ yawꞈ maꞈ-euˬ nymˇ laꞈ kʼoeˇ laˬ kʼaˬ cehˇ-awˇ nui gaˬ shaˬ coeˇ byah-eu laꞈ kʼoeˇ dzaˬ taꞈ dawˇ taꞈ-euˬ meh. 47Kʼoeˇ loꞈ-ehˇ jahˇ luꞈ ngeh, Miˬyehˇ-euˬ guiˬ lahˬ-ahˇ ja ceuˬ-awˇ, tsawˇ haˬ dawˬ tawˆ luꞈ aˬ yawꞈ maꞈ-ahˇ nui kʼahˇ shiˇ dui dui-euˬ meh. Ka kʼoꞈ-eu jeˬ za-euˬ tsawˇ haˬ deuˬ, tiˬ nah saˇ-iˬ tiˬ nah aˬ yawꞈ maꞈ-euˬ aˇ muˇ laꞈ kʼoeˇ bi lahˬ laˇ ni SahˬpaˬMiˬyehˇ mˇ luꞈ-eu meh.

Выбрано:

Gʼaˬkʼehˇ 2: AHK

Выделить

Копировать