Kodaku

हेना वरी ईसु बारह झन चेला कुतय राःकेड कुते भूतकू उडूंग लगड अवुर जे-निरीता रोग अवुर जे-निरीता बेमारी अवुर कमजोरी वरी चिकनकू लगड अधिकारिय ओवडकू। अवुर नेकू बारह झन परेरितकू ञुमू नआँ याःतेआ, पहला सिमोन, नेय पतरस मेनते कू कहनी वया, अवुर बोहोत अन्दिरयास; जबदी कोड़ा होपोन एकूब, अवुर नेय बोहोत एहुन्‍ना; फिलिप्पुस, अवुर बरतुलमय, थोमा, अवुर मलगुजारी तिलाअय मत्ती, हलफई होपोन एकूब, अवुर तदेय, कनान रेनिय सिमोन अवुर इस्करयोती गाँव रेनिय एहूदा, ने-नी तयोम ते, ईसुय एर पकड़ो तेडा।

नेकू बारहो झन ईसु राःकेड कुते नआँ याःतेय हुकूम वडकू तेय कुलतेड कुआ, “अनजातकू हन अलोपे सेनुऊ, अवुर सामरिकू राः सहर रेहो अलोपे सेनुऊ। लेकिन इसरायिल ओड़ाः रेनकू अडकेनकू भेंड़िकू थरे पे सेनुऊ। अवुर अपे से-ने तींग ते, ‘सरग राज आय लिघियो यना’ मेनते पे परचारे। बेमारियाकू पे चिकानू, अवुर गोजकेनकू पे जियो, कुड़गाकू पे सूधु, अवुर भूतकू लगोकेन हेंकू वरी भूतकू पे उडुंगू। अपे नआँ सक्‍ति सेथिया तेपे ञँमकेडा, सेथिया तेपे ओवाकू। बटू तपे रे सोना, चहे चाँदी अवुर तँबा अलोपे दोहोयू। होर लगड झोला, बाटंग कुरता, चहे पनही, चहे लाठी अलोपे साबे, कहेकि बनियाँर दो बनी ञँमुः चही।”
“अपे कनर सहर चहे गाँव पे सेनुः रेदो, काय अपे डेरा ओवापे लगड तयार इदानिया, हेंय पे पता। अवुर जेतना दिन पे दोहोना, हें-नी ओड़ाः रेपे दोहोनू। अवुर जे ओड़ाः रेपे सेन उतरोआ, हेंय आसीर्वाद पे ओवायू। अगर हेना ओड़ाः रेनकू आसीर्वाद लायिक इदान कू रेदो, अपे राः आसीर्वाद हेंकू थरे दोहोना, अगर हेंकू आसीर्वाद लायिक कोवाकू रेदो, हेना आसीर्वाद अपे थरे मिड़ाः मेजुआ। अगर कनय हो अपे मेने कू अपनो पे, चहे अपे राः टेबोः मेने कू अँजोमे रेदो, हेना ओड़ाः चहे सहर वरी उडूंगुः तोलोग भगवान अपे थरे खुस कोवाया मेनाआँ तिःवाकू लगड कटा पे राः धुड़ी पे कुटा अटु। इंञ अपे थरे सही मेतेंञ कहनी यडा, भगवान गोटा होड़कू रअय न्याये चेका मरित दोहो एना, सदोम अवुर अमोरा सहर रेनकू होड़कू तिमीन दंडिय ओवा कुआ, हेना वरी हो बगरा दंड अपे मेनेकू अपनोआँ हेंकुय ओवाआ।”


“अँजोम पे, इंञ अपे भेंड़िकू घयते बिगवाकू मँझर रेंञ कुलयड पेआ। हेनाते अपे बींञकू घयते चतुर अवुर परेवाँकू घयते सिधा सधा पे बनोऊ। अवुर अपे होड़कू वरी सँवचेती तेपे दोहोनू, कहेकि हेंकू अपे दरबार रेकू इदी पेआ, अवुर अकू राः पंचायत रे कोड़ा तेकू एर ञेंड पेआ। ईञाः चलते ते नेकू अपे अधिकारिकू अवुर राजाकू राः मड़ंग रेकू इदी पेआ, अवुर अपे ईञाः बारे ते गोवाही पे ए-मा। अवुर नेकू अवुर अनजातकू होपे ओवा कुआ। अपे नेकू पकड़ो पेरे, काःते अवुर ची ले कहनिआँ मेनते अलोपे पसींदे, कहेकि जे कहेक इदाना, हेना हेनेन तोलोग भगवान लाय वपेआ। कहेकि टेबोः हेंकू अपे ना लगे, लेकिन अपापे राः आत्मा अपे राः दोवारा ते टेबोआ।”
“इंञ थरे मेने बिसवासेःकू, मगत अनेज बोहोत अवुर अपत होपोन तू एर ञेंड गोजेय लगाडिय जिमाया, अवुर चोंडिजकू इंग आप कू राः खिलाप रे रिमकोः तेकू एर ञेंड गोज कुआ। अवुर इंञ ञुमू राः चलते ते सींड़ कुकू मेरंग वपेआ, लेकिन जे अखरी अँगम मेनते धीराजिय सबताआ, हें-नी बंचोआ। नेकू अपे मियाँटंग सहर रेकू सतो पे रेदो, एटाः सहर हनते पे ञींरू, इंञ सही मेते अपे थरेंञ कहनी यडा, अपे इसरायिल राः सींड़ सहर अनायिन पे होयोर हनिय ते होड़ होपोन मेजुअयू।”

“चेला अपन गुरू वरी बडे मेनेय दोहोना। अवुर हरवाह अपन मुँवर तू वरी बडे कोवाया। चेला अपन गुरू घयते बनोऊ, अवुर हरवाह अपन मुँवर तू घयते बनोऊ, बहुत गिआ। जब हेंकू ओड़ाः मुँवर घलि सयतान मेनते कू कहनी वडिया, दो हेंय ओड़ाः रेनकू केयिन गोटंग ते ची लगड एरो कू कहनी वडकुआ?”


“हेनाते मनवाँकू अलोपे बोरो वकू; कहेकि मेने ञेंलुआ, हेना सींड़ टिपाआ; अवुर दलंग राः सींड़ कुकू ञें-लेआ। इंञ अपे अंधरा ओत रेंञ कहनी वपे तना, हेना मरसल रेपे लाये; अवुर लुतूर पेतेपे अँजोमेआँ, हेना सड़ीम अगस वरी पे परचारे। देंह भर कू ञेंड गो-जा, लेकिन आत्मा दो एरो कू ञेंड गोजतेडा, हेंकू अलोपे बोरो वकू; लेकिन देंह अवुर आत्मा बनर नरक रेय नास सकोआ, हे-नी पे बोरोवा। पेयसा ते बाटंग गोरेला कींञ मेने कींञ केजाआ किदो? हेंडे रेहो नेकू अपापे राः इक्छा बिगर ते, ओतेत रे मियाँटंग हो मेने कू लोजोरुआ। अपे भोःपे राः सींड़ उबपे होय लेखा केडा। हेनाते अलोपे बो-रू; अपे गोरेलाकू वरी हो अखीर किमती गिआपे।”


कनय हो होड़कू मड़ंग रे ईंञिय अपनो रेदो, हेंय इंञ हो सरग रेनिय अपुंञ मड़ंग रेंञ अपनो विया। लेकिन कनय हो होड़कू मड़ंग रे ईञिय नहकारा, हेंय इंञ हो सरग रेनिय अपुंञ मड़ंग रेंञ नहकारिया।


अपे अलोपे पसींदे जहानू इंञ धरती रे मेल मिलाप कू लगाडिंञ मेजकेना मेनते, इंञ मेल मिलाप कू लगड मेने, लेकिन तरवार एर चलो लगाडिंञ मेजकेना। इंञ कोड़ा होपोन तू अपत वरी अवुर कोड़ी होपोन तू इंगत वरी अवुर किमीन तू हनहाँर तू वरी अलग अलग कू लगाडिंञ मेजकेना। होड़ रेनकू मुदेयकू हेंय ओनोड़ाः रेनकू होयाआ।
“जे इंञ वरी बगरा ते अपन इंग आप कीञिंय परेमा, हेंय इंञ लायिक कोवाया, अवुर जे इंञ वरी बगरा ते होन होपोन कुय परेमा, हेंय हो इंञ लायिक कोवाया; अवुर जे अनेज राः कुरूस रिमकेते, इंञ तयोम ते मेनेय से-ने रेदो, हेंय हो इंञ लायिक कोवाया। जे अपन जीव बंचो लगाडिय पसींदेआ, हेंय जिनगी तयिय गँवों वेआ, अवुर जे ईञाः चलते ते अपन जीविय गँवोंआ, हेंय जिनगिय ञाँमा।”


“जे अपेकू अपनोआँ, हेंकू इंञ कू अपनोआँ; अवुर जे इंञ कू अपनोआँ, हेंकू ईञिंय कुलकेडा, हेंय कू अपनोआँ। जे होड़ कनय भविस्यवक्‍ता, भविस्यवक्‍ता हवे मेनते पसींद केतेय अपनो विया, हेंय भविस्यवक्‍ता राः फालिय ञाँमा, अवुर जे होड़ कनय धरमी, धरमी हवे मेनते पसींद केतेय अपनो विया, हेंय धरमी राः फालिय ञाँमा। अगर कनय हो नेकू होड होडिंञकू मेंडे ईञाअय चेला हवे मेनते पसींद केते, मियाँ गिलास लेयेड़ दाईय ओवायू, इंञ अपे थरे सही मेतेंञ कहनी यडा, हेंय कनर घयते अनेज राः प्रतिफल एरोय गँवों तेडा।”

Слушайте मत्ती 10