Jenesis 6
6
Gölme ambazipnöŋ böliba aŋgöjörakŋinambuk aket.
1 # Job 1.6; 2.1 Ambazip gölme qakŋe malgetka qötöŋinan könahiba qariiga böraturupŋini mi mewöyök asuhuget. 2Asuhugetka nalö miaŋgöreŋ Anutugö nahönurupŋi yeŋön ambazip yeŋgö böraturupŋini eŋgeketka eksihimŋinambuk aketka eŋgek sorigeraŋgö dop mi pakpak eŋgömegetka anömurupŋini aket. 3Mewö aketka nalö miaŋgöreŋ Kembunöŋ keu kewö jiyök: “Gölme ambazipnöŋ silebuk nalö teteköŋi qahö mal öŋgömemö, yeŋön mönö kömume. Areŋini mewö al eŋgizal. Nalö kewöŋeyök könahiba malmalŋini mönö yambu 120 jaŋgö mi qahö oŋgita mal öŋgöme.” 4Anutugö nahönurupŋi yeŋön gölme ambazip yeŋgö böraturupŋini eŋgömegetka morö mem eŋgigetka nalö miaŋgöreŋ aka könaŋgep mewöyök azi weliwelipŋinambuk mönö asuhuba qariba gölmenöŋ malget. Möpŋaŋgö möpŋeyök bemurup qetbuŋaŋinambuk malgeri, yeŋön mönö mia aket.#Jaŋ 13.33
5Gölme ambazip yeŋgö bölöŋamŋini mi keta bölökŋi aiga uruŋinaŋgö mötmöt areŋini pakpak mi nalö dop qösösök (qörörök) bölöŋanök pakpak aka malgeri, mi Kembunöŋ ehök. 6Mi eka ambazip miwikŋaim eŋgiiga gölmenöŋ malgeri, miaŋgöra Anutunöŋ möt bölim aŋguiga wösöbiriknöŋ uruŋi kokolak qeiga sihimbölö möta malök. 7Mewö möta mala keu kewö jiyök: “Ambazip miwikŋaim eŋgiali, nöŋön mönö mi gölmenöhök qeteköm eŋgimam. Ambazip, mirigö sömbupŋi, yuai bapŋinan köla ölölöŋgömakzei aka könakembagö neiŋi mi miwikŋaim eŋgialaŋgöra möt bölim aŋguba mi mönö qeköm eŋgimam.” 8Mewö jiyökmö, azi Noa yaŋön Kembugö jeŋe ak-kömukömu miwikŋaiyök.#Mat 24.37; Luk 17.26, 1 Pitö 3.2 9-10Noagö gwölönarökurupŋi mieŋgö kösohotŋini mi kewö: Nahönurupŋi karöbut qetŋini Sem, Ham aka Jafet mi asuhuget. Noanöŋ ambazip sutŋine azi solanŋi köpösihitkö keuŋi qahö mala uruŋi Anutubuk jöhöba anda kaba malök.#2 Pitö 2.5 11Noanöŋ mewö malökmö, ambazip tosatŋi pakpak yeŋön Anutugö jeŋe goŋgiba bölim tekögetka ambazip ayuhum eŋgieŋgi mi gölme körek dop köla ahöyök. 12Ambazip pakpak gölmenöŋ anda kaba malmalŋini mem bölim tekögetka miri gölme pakpak yeŋgö ahakmemeŋini mi goŋgiba aŋgöjörakŋinambuk aiga Anutunöŋ gölme uba tandökŋini mi mewö ehök.
Waŋge memegö areŋi
13Mewö eka Anutunöŋ Noagöra keu kewö jii mörök: “Ambazip yeŋgöra aka ayuhum eŋgieŋgi mi gölme körek dop köla ahöza. Miaŋgöra nöŋön ambazip pakpak mem kömum teköm eŋgimamgöra mönö keuni jöhöyal. Mötnöŋ, nöŋön mönö onöŋ gölme meleŋbi geiga yuai pakpak isikusukŋinambuk mi kömum teköme. 14Miaŋgöra göŋön mönö suman ip köla miaŋön nangahöra waŋge kun meman. Miaŋgö uruŋi kutunöŋga uruŋi morömorö asuhume. Waŋgegö uruŋi aka sileŋi mi qandöŋnöŋ me gisak marasinöŋ kösiba ohom teköman. 15Waŋge mi kewö meman: köröpŋamŋi 133 mita (450 fit), andipŋi 22 mita (75 fit) aka köŋgepŋi 13 mita (45 fit) mewö meman. 16Boŋi muhungöba sel aka bo sutŋire liliköba jeŋgenaŋ tiŋi 44 sentimita (18 ins) mi mosöta kötohoman. Waŋgegö uruŋi mösöŋnöŋga uruŋi qakŋi, kembaŋi aka dutŋi karöbut asuhume. Waŋge naŋguŋi mi namŋe alman. 17Mötman! Nöŋön mönö jibiga göulu ketaŋan kota gölme jömukŋi köl turuiga ambazip aka yuai malmalgö ösumŋinambuk pakpak suep bapŋe maljei, mieŋön mönö o nemba nemulahöba kömume. Mewö kömumba gölmegö yuai pakpak mi mönö qahöwak teköme.
18Mewö asuhumapmö, nöŋön göbuk jöhöjöhö areŋ kewö akzal: Gi mönö waŋgenöŋ öŋgöman. Gi, anömgi aka nahöniranurupki eŋön mönö mohotŋe waŋgenöŋ öŋgöme. 19Öŋgöba mala yuai malmalŋinambuk pakpak mi qahöwak teköbepuköra yeŋgöreŋök yahöt yahöt aziŋi aka ambiŋi mi dopŋine eŋguaŋgitnöŋga göbuk mohotŋe waŋgenöŋ öŋgöme. 20Nei tandökŋini könaŋi könaŋi, mirigö sömbupŋi tandökŋini könaŋi könaŋi aka gölmegö mokoleŋ, lolohom yuai tandökŋini könaŋi könaŋi körek yeŋgöreŋök yahöt yahöt mi mönö kömumbepuköra eŋguaŋgitnöŋga göhöreŋ kaŋgotketka öŋgöme. 21Mewöyök nanŋini aka nei, sömbup yuai pakpak yeŋön nemeaŋgö dop mönö numbu nene könaŋi könaŋi miwikŋaiba otoŋ qezaköba waŋgenöŋ alnöŋga kahaimök ahöma.” 22#Hib 11.7Anutunöŋ Noa mewö akŋapkö jim kutum waŋgiiga miaŋgö dowök mönö tem köla mi pakpak ahök. Mewö mia aka mem teköyök.
Selectat acum:
Jenesis 6: bmu
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2013, Wycliffe Bible Translators, Inc. All rights reserved.