ṮAKWIIN 1
1
1Ka muŋ’kup̱ mo tani Arumgimis uḵki momis dhali mony’cesh mo. 2Dhali mony’cesh a’di ’ceṯẖki’da ’thintha/ mo dhali di bwa ’te/ mo, dhali mondhurumi’d a’di wup̱ki’da ap̱o/ mo jin ’kula’kul mo. Dhali Shi/in ma Arumgimis a’di wukurki’d ap̱owa ris ḵumma/ yi’de/ mo.
3Dhali Arumgimis ki o gwo mo ki: Dhalki moŋkush piyi’d mo. Dhali moŋkush diki’d mo. 4Dhali Arumgimis p̱arki moŋkush e ki a’di ’bora’bor mo. Dhali Arumgimis ki ḵwa/ moŋkush bwa ’peni mondhurumi’d mo. 5Arumgimis ki yuḵ moŋkush ki Montee mo dhali mondhurumi’d yuḵa a’di ki Mon’thiny mo. Dhali mom’pimpili/ diki’d mo dhali mon’thamo/ diki’d mo, a’di jin ta’da cim ’de/ mo.
6Dhali Arumgimis ki o gwo mo ki: Dhalka balany di’d mo ibwaman ḵumma/ yi’de/ mo dhali dhalki a’di ḵwa/a’da ris ḵumma/ yi’de/ bwa mo ’pena ris ḵumma/ yi’de/ mo. 7Dhali Arumgimis ki uḵa balany mmoḵwa/a ris ḵumma/ yi’de/ bwa mo, uni kun ’kokin e bwaŋ’kwariny ma balany ’pena ris ḵumma/ yi’de/ mo, uni kun ’kokina p̱owa balany mo. Dhali uni ’kokin kan mo. 8Dhali Arumgimis ki yuḵa balany ki Momis mo. Dhali mom’pimpili/ diki’d mo dhali mon’thamo/ diki’d mo, a’di jin ta’da cim su/ mo.
9Dhali Arumgimis ki o gwo mo ki: Dhalka ris ḵumma/ yi’de/, uni kun ’kokin e bwaŋ’kwariny momis mo minu tul isi monṯal ’de/ mo e mon ’de/ mo, dhali dhalki moŋḵuthu’d piyi’d mo. Dhali a’di waki’d kan mo. 10Arumgimis ki yuḵ mo jin ḵuthaḵu’th ki Mony’cesh mo, dhali aris yi’de/ gwansan kun tulu isi monṯal ’de/ mo tani yuḵkina a’di gway ki Ḵumma/ Yi’de/ mo be. Dhali Arumgimis ki p̱ar a’di e ki a’di ’bora’bor mo. 11Dhali Arumgimis ki o gwo mo ki: Dhalka ’cesh ’ka to ale/ ki ton dhii/in mo, to kun minu si kun mini dho’th maman ki emen buni mo, dhali cwa kun mini dho’th maman ki emen buni kun c̱inu uni mo, uni ’baar ka ’deṯe/ ’deṯe/ isi ki e jin ’ko uni ki she/ ki she/ kuku/ mo, ap̱o/ mony’cesh mo. Dhali a’di waki’d kan mo. 12Mony’cesh a’di dho’thki ton dhii/in kun ’kana le/ mo, to kun sinu mo kun dhodhi maman mo isi ka ḵa’bany buni kun ’kona e uni ki she/ ki she/ mo, dhali cwa kun dho’thki maman ki emen buni ki she/ ki she/ kun c̱inu uni mo, uni ’baar ki isi e kuku/ mo. Dhali Arumgimis ki p̱ar a’di e mo ki a’di ’bora’bor mo. 13Dhali mom’pimpili/ diki’d mo dhali mon’thamo/ diki’d mo, a’di jin ta’da cimi kwara mo.
14Dhali Arumgimis ki o gwo mo ki: Dhalki moŋkush uni i’kon eya balany gi momis mo mmoḵwa/ montee bwa ’peni mon’thiny mo. Dhali dhalki uni ta jamas mii mo dhali goma yir mo dhali goma tee mo dhali gom yil mo, 15dhali dhalki uni kushi mo mo ’pena balany gi momis mo mmoc̱i moŋkusha p̱o/ mony’cesh mo. Dhali a’di waki’d kan mo. 16Dhali Arumgimis ki uḵ dhan moŋkush kun caaca isu/ mo, a’di jin ta dhan moŋkush jin caaca mmoji mo jin yuḵu ki montee mo, dhali a’di jin boc̱a is ka kamu/ mmoji mo jin yuḵu ki mon’thiny mo. A’di uḵki’da risa cul si’da/ mo. 17Dhali Arumgimis ki dhu uni eya balany gi momis mo mmoc̱i moŋkush buni ap̱o/ mony’cesh mo, 18mmoji mo jin yuḵu ki montee mo dhali ap̱o/ mon’thiny mo, dhali mmoḵwa/ moŋkush bwa ’peni mondhurumi’d mo. Dhali Arumgimis ki p̱ar a’di e mo ki a’di ’bora’bor mo. 19Dhali mom’pimpili/ diki’d mo dhali mon’thamo/ diki’d mo, a’di jin ta’da cimi doŋon mo.
20Dhali Arumgimis ki o gwo mo ki: Dhalka ris yi’de/ dhodhona risa waambuhany to/e kun uḵu mo, dhali dhalka ris ’dii p̱ena ap̱o/ mony’cesh mmo’ciṯẖ ka ’ciṯẖan dhul ap̱owa balany gi momis mo. 21Wakan Arumgimis ki uḵ dhan to kun ’kon e ḵumma/ yi’de/ kun caaca mo dhala ris to kun ’kon ki e kun ḵalki ya ka bor mo, uni kun ’tu’dki yi’de/ isi ki em buni kun ’ko uni kuku/ mo, dhala ris ’dii kun ’kan ma bi mo isi ki em buni kun ’ko uni kuku/ mo. Dhali Arumgimis ki p̱ar a’di e mo ki a’di ’bora’bor mo. 22Dhali Arumgimis ki ’bor uni mii mo, mmo/o gwo mo ki: Dhodhi maman mo, dhali mari is mo dhali ’tu’di aris yi’de/ ki piny piny mo e bwam uni kun ta ḵumma/ yi’de/ mo, dhali dhalka ris ’dii mar is ap̱o/ mony’cesh mo. 23Dhali mom’pimpili/ diki’d mo dhali mon’thamo/ diki’d mo, a’di jin ta’da cim ma mudhe’d mo.
24Dhali Arumgimis ki o gwo mo ki: Dhalki mony’cesh dhodho’da ris to kun ’kon ki e kun uḵu mo isi ki em buni kun ’ko uni kuku/ mo: bip̱ dhali to kun parana ’cesh mo dhali tombwaasho mo kun ’kon e mony’cesh mo isi ki em buni kun ’ko uni ki she/ ki she/ kuku/ mo. Dhali a’di waki’d kan mo. 25Dhali Arumgimis ki uḵ tonycuḵ kun ’kon e mony’cesh mo isi ki em buni kun ’ko uni ki she/ ki she/ kuku/ mo dhali bip̱ isi ki em buni kun ’ko uni ki she/ ki she/ kuku/ mo, dhali aris to kun parana p̱o/ mony’cesh isi ki em buni kun ’ko uni ki she/ ki she/ kuku/ mo. Dhali Arumgimis ki p̱ar a’di e ki a’di ’bora’bor mo.
26Dhali yan’ko’d Arumgimis ki o gwo mo ki: Dhalki ana uḵa wathi/ en’thi/ mo ki jamas bana mo, mmowa e ki jamas bana mo, dhali dhalki uni ta gi mom’bi’th mo ap̱o/ yi’de/ kun ’kon e bwaŋ ḵumma/ yi’de/ mo, dhali ap̱owa ris ’dii kun p̱en e mis mo, dhali ap̱o/ bip̱ mo, dhali ap̱owa ris mony’ceshi ’baar mo, dhali ap̱owa ris to/e kun parana ’cesh mo, uni kun parkin ap̱o/ mony’cesh mo. 27Wakan Arumgimis uḵki wathi/ en’thi/ mo ki jamas pitiŋ gana/ mo, ki jamas ma Arumgimis gana/ mo tani a’di i/uḵkina a’di a’di mo. A’di jin ta wathiŋ gwaṯẖ mo dhali a’di jin ta wathim ’bomi mo, uni i/uḵkina a’di mo. 28Dhali Arumgimis ki ’bor uni mii mo, dhali Arumgimis ki o uni gwo mo ki: Dhodhi maman mo, dhali mari is mo, dhali ’tu’di mony’cesh mo, dhali dili a’di abora ’cesh mo, dhali tayi gi mom’bi’th ap̱o/ to yi’de/ gi ḵumma/ yi’de/ mo dhali ap̱owa ris ’dii kun p̱en e mis mo, dhali ap̱owa ris to kun ’kon ki e kun ḵalki ya ap̱o/ mony’cesh mo. 29Dhali Arumgimis ki o gwo mo ki: Hili mo mo ma, aha/ c̱ikina um aris emen to kun minu si mo kun mini dho’th mo uni kun ’kokin ap̱o/ bwam/e gi mony’cesh ’baar mo, dhali arisa ḵa’bany cwa ki maman buni ki she/ ki she/ mo. Um mini bu’th uni haali/ uni mini ta tonṯe/ gom um mo. 30Dhala ris tonycuḵ gi mony’cesh mo dhali aris ’dii kun p̱en e momis mo dhala ris to kun parana p̱o/ mony’cesh mo, dhali aris to kun shi/irin kun ’kon ki e mo tani aha/ c̱ikina aris ton dhii/in kun minu si gom tonṯe/ mo. Dhali a’di waki’d kan mo. 31Dhali Arumgimis p̱arki aris to/e kun uḵkina a’di mo, dhali hili mo mo ma, a’di ’bora e ki ’bor mo. Dhali mom’pimpili/ diki’d mo, dhali mon’thamo/ diki’d mo, dhali a’di ta’da cim ma pe’de/ mo.
Selectat acum:
ṮAKWIIN 1: Udk
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
©Society for International Ministries, 2013