Juan 1

Kaꞌan apóstol Juan nau kuu maa Jnuꞌun ndaa

1Na ti saꞌa ga Yandios ñuyɨvɨ jiin taka ga iyo, ti ja iyo Ɨɨn ja kancha jiin ya ja nani Jnuꞌun. Siaꞌan ni nani chi xnaꞌan nasa kaa maa Yandios. Ti ɨɨn ni kuu Jnuꞌun un jiin maa Yandios. Ti suni siaꞌan ɨɨn nuu ini maa Yandios jiin Jnuꞌun un. 2Siaꞌan ni ja iyo kancha Jnuꞌun un jiin Yandios sa ni saꞌa ya ndɨꞌɨ ga ja iyo. 3Ti maa ɨɨn ni Jnuꞌun un ni saꞌa nava ni kachi Yandios, ni saꞌa taka ja iyo. Tu ni iyo ni ɨɨn ja tu ni saꞌa Jnuꞌun un.

4Ni saꞌa Jnuꞌun un ja taka ja iyo na kuchaku. Ti nava na kujnuni ini yɨvɨ nau kuu Yandios, chi Jnuꞌun un ni kuu nanu ɨɨn ñundijin ja na ndinchaa ichi i nava na kujnuni ini i nau ja kuu ya. Tu ka kuni kuɨtɨ i ja na ndinchaa ñuꞌun un nuu i. Vasu siaꞌan tu ka kuni i tu ni ka kundee i ndaꞌva i ñuꞌun un naa i. 5Ti vasu siaꞌan ni kuu, ko tu ni ka kujnuni ini i nau ja kuu ya, chi kanchuku i nanu ñuñaa kuɨtɨ. Ni chaa ya ti ni kuu ya nanu ɨɨn ñuꞌun ja na ndundijin nuu ñaa un. Ti vasu siaꞌan ni kuu ko tu ni ka kujnuni ini yɨvɨ nau ja ni kuu ya.

6Yukan ti sa ni nakaji Yandios ɨɨn chaa ni nani Juan, 7ti ni jaꞌa ya ɨɨn jniñu nuu da ja na kaꞌan da jnuꞌun ya nuu yɨvɨ. Ni kaꞌan da, ti ni kachi da: “¡Ja ni chaa Chaa un”! ―ni kachi da. Siaꞌan ni kaꞌan da, chi ni kachi da ja Chaa un kuu ja kuaꞌa inijnuni yɨvɨ. Chi kuu da nanu ɨɨn ñuꞌun ja xndinchaa nava na kujnuni ini yɨvɨ na ichi kinkoyo i. 8Siaꞌan ni kaꞌan Juan chi ni kachi da ja ansu maa da kuu Chaa kuu nanu ñuꞌun un, chi so kachi da ja na kandixia yɨvɨ naa i.

9Undi ni chaa Chaa un, ti sa ni ka kujnuni ini yɨvɨ naa ichi kinkoyo i, chi ni jaꞌa da inijnuni yɨvɨ ñuyɨvɨ. Ti jnuꞌun kaꞌan da un, ni kuu nanu ɨɨn nduva ja ndinchaa nuu ñuñaa. Chi ni xnaꞌan naa ichi kinkoyo yɨvɨ naa i. Ti siaꞌan na kujnuni ini i nau ja kuu maa Yandios. Jiin jnuꞌun ni kaꞌan chaa un, ni ka jini i naa ichi kinkoyo i.

10Vasu maa Chaa un ni saꞌa ñuyɨvɨ jaꞌa ti ni kuncha da nuu, ko tu ni ka jantaꞌu yɨvɨ maa da. Chi tu ni ka nakuni i nau chaa kuu da. 11Ni kuncha Chaa un nuu kanchuku yɨvɨ ñuu da, ja su ndɨꞌɨ i kuantaꞌu maa da, ja maa da kuu Seꞌe Yandios, ya kuu Cristo. 12Ti yɨvɨ ni ka jantaꞌu ya yukan, ni ka kuu i yɨvɨ ka kandixia. Ni jaꞌa ya jnundee ini yɨvɨ un, ti siaꞌan ni ka nduu i yɨvɨ Yandios. 13Ti ka kuu i yɨvɨ Yandios, chi siaꞌan ni kuu ini maa ya. Ti ansu ja ni ka kuu ini maa yɨvɨ naa i, chi ja ni kuu ini maa Yandios ni kuu ja ni ka nduu i seꞌe maa ya, ti tukaa ga kuu i nanu kuu ɨɨn seꞌe tata jiin nana.

14Chaa ni kuu Jnuꞌun ja ni kuncha undi nuu jiin Yandios un, ni kii da ni kaku da nuu ñuyɨvɨ jaꞌa. Ni kuncha da jiin yɨvɨ naa i, ti ruꞌu naa ri ni ka jini ri ja ɨɨn ni kuñaꞌnu da jiin Tata da Yandios. Jiin jniñu ni saꞌa da ni stuu da ja kuñaꞌnu Yandios. Ti yukan sa ni ka jini ri ja maa da kuu Seꞌe Yandios, chi ɨɨn ni ka kuñaꞌnu ya jiin maa Yandios. Ni nakachi ya taka jnuꞌun ndaa vaji nuu maa Yandios. Siaꞌan ni kuu na ni chaa Jnuꞌun un nuu ñuyɨvɨ jaꞌa.

15Juan, chaa ni skuanducha un, ni kaꞌan da jnuꞌun ya nuu yɨvɨ, ti ni kachi da:

―Sɨkɨ Chaa jaꞌa ni kaꞌan ri nuu ra naa ra na, ni kachi ri ja jaa ɨɨn kɨvɨ ti chaa ɨɨn Chaa kuñaꞌnu ga, chi xnaka Chaa un iyo, ti sa ni kaku ruꞌu ―ni kachi Juan, chaa ni skuanducha un.

16Iyo xaan jnuꞌun ndee ini nuu ya nuu Yandios. Ja yukan kuu ja kundaꞌu ini ya yoꞌo naa yo, ti chindee xaan ya yoꞌo. 17Xnaka Moisés ni xnukoo ley Yandios, ti sa ni taji ya Jesús, ya kuu Cristo, ti maa ya kuu ja kundaꞌu ini yoꞌo. Ti Jesús kuu ya ni xndaku taka ga jnuꞌun vaji nuu maa Yandios nuu yo naa yo. 18Tu jaꞌi nakuni yɨvɨ nuu Yandios, chi maa ɨɨn ni seꞌe ya kuu ja kancha jiin ya. Ja yukan kuu ja ni kii ya, ni kii stuu ya nava kaa maa Tata ya.

Ni kaꞌan Juan, chaa ni skuanducha un, jnuꞌun Jesús, ya kuu Cristo

(Mt. 3.11‑12; Mr. 1.7‑8; Lc. 3.15‑17)

19Yukan ti chaa ka kuñaꞌnu nuu nación Israel, ja kanchuku ñuu Jerusalén, ni ka jaꞌa da jniñu nuu tɨjnɨ sutu jiin ndajaꞌa da ja ni ka nani levitas. Ni ka taji da chaa un nuu kande Juan ja na kajnuꞌun da, na ndenu nau sɨkɨ kuu jniñu saꞌa da un. Ti jaꞌa kuu jnuꞌun ni kaꞌan Juan jiin da. 20Tu ni nduku da ɨnga jnuꞌun ja xndaꞌu da chaa un, chi suꞌva ni kachi ndaa da:

―Ansu ruꞌu kuu maa Cristo ja ni taji Yandios ja saꞌa jniñu ñaꞌnu un ―ni kachi da.

21Yukan na ti ni ka jikajnuꞌun tuku chaa un:

―¿Nau ja kuu ra nusa? ¿Xi maa ra kuu profeta Elías ja ni kaꞌan jnuꞌun Yandios un nu? ―ni ka kachi da.

―Ansu kuu ri ―ni kachi Juan.

Ti ni ka jikajnuꞌun tuku da:

―Kii ɨɨn chaa kii kaꞌan jnuꞌun vaji undi nuu maa Yandios. ¿Xi maa ra kuu chaa un nu? ―ni ka kachi da.

Ti ni xndeokani Juan:

―Tuu ―ni kachi da.

22Yukan na ti ni ka jikajnuꞌun tuku da, ti ni ka kachi da:

―¿Nau ja kuu ra nusa? Kachi, nava siaꞌan na niꞌin ri jnuꞌun nakani ri nuu chaa ñaꞌnu ni ka taji ruꞌu un, ¿Ko na chaa kuu maa ra nusa? ―ni kachi da.

23Ti ni kachi Juan:

―Maa ri kuu ja ve kaꞌan undi nuu ñuꞌun teꞌe jaꞌa, ja na kachi ri nuu yɨvɨ: “Satuꞌva maa ra naa ra, chi ja yajni chaa Jitoꞌyo Yandios”, chi siaꞌan ni kaꞌan Isaías na ni chaa da jnuꞌun Yandios na janaꞌan―ni kachi Juan.

24-25Ti chaa vekoyo nuu chaa fariseo un ni ka jikajnuꞌun da Juan, ti ni ka kachi da:

―¿Ti ndoo skuanducha ra yɨvɨ, ti nu tu kuu ra maa Cristo, ni Elías, ni ɨnga profeta ja kaꞌan jnuꞌun vaji undi nuu maa Yandios nusa? ¿Ndoo kuu ja saꞌa ra un nusa? ―ni ka kachi da.

26Ti ni kachi Juan jiin da naa da:

―Saña chi skuanducha na jiin nducha, ko iyo ɨnga Chaa ja chaa nuu ni naa ni, ti niꞌin, tu ka nakuni ni chaa un. 27Xnaka saña ni chaa, sa chaa Chaa un. Ko vanuxia kuñaꞌnu ga da ja kuu saña. Kuñaꞌnu xaan ga da ja tu kuu kandu na nuu da, ni ansu jniñu na kuu jakuitandijin na ti tava na ndijña da ―ni kachi Juan.

28Siaꞌan ni kaꞌan Juan na ni kunde da yajni ñuu Betábara, ja kande ɨnga yuꞌu yucha Jordán nu ni skuanducha da yɨvɨ un.

Kaꞌan Juan, chaa skuanducha un, ja Jesús kuu maa Lelu Yandios

29Ɨnga kɨvɨ ti ni jini Juan nuu Jesús ja vaji ya nuu kande da, ti ni kachi da jiin yɨvɨ:

―Ndeꞌe naa ra, jaꞌa vaji maa Lelu Yandios, ti kuu ya nanu lelu ni ka jaꞌni yɨvɨ Israel ja ni ka soko i ja na kencha kuachi i. Ti maa ya kuu Lelu Yandios, chi siaꞌan ni chaa ya ja na kencha ya kuachi yɨvɨ ñuyɨvɨ jaꞌa. 30Undi nuu ni kaꞌan ri jnuꞌun ya ja ni kachi ri: “Xnaka ruꞌu, ni kenda ti sa kenda maa Chaa kuñaꞌnu ga un. Kuñaꞌnu ga ya chi ja iyo ya, ti sa ni kaku ruꞌu. 31Undi na sa ti kuni ga ri nau kuu maa ya. Ko xnaka ni kenda ri skuanducha ri jiin nducha nava siaꞌan na stuu ri maa ya nuu yɨvɨ Israel. Yukan na ti sa na nakuni yɨvɨ Israel nau kuu ya” ―ni kachi Juan.

32Yukan na ti ni jani Juan jnuꞌun, ti ni kachi da:

―Ni jini ri ni kuun Espíritu Yandios vaji ya undi andɨvɨ, vaji ya nanu ɨɨn sata, ni jinu ya ti ni kendo ya jiin Jesús. 33Undi sa ti kuni ga ri nau kuu ya, ko vijna ti ja ni jini ri chi maa Yandios ni taji ya ruꞌu. Ni jaꞌa ya jniñu nuu ri ja na skuanducha ri yɨvɨ jiin nducha. Ni kaꞌan ya jiin ri, ti ni kachi ya: “Nu ni jini ra ni kuun Espíritu Yandios ti jinu ya sɨkɨ ɨɨn chaa un. Ti Chaa yukan kuu ja taji Espíritu Yandios ja na kuncha ya jiin yɨvɨ naa i”, ni kachi Yandios jiin ri. 34Ruꞌu Juan, na kachi ri ja, ja ni jini ri Chaa un, ti jaꞌa ri jandaa ja maa ndixia da kuu maa Seꞌe Yandios. Ti jandaa kuɨtɨ kuu ja Chaa un kuu maa Seꞌe Yandios ―ni kachi Juan.

35Ɨnga kɨvɨ ti kande tuku Juan jiin uu chaa ka jika jiin da. 36Ni jini da nuu Jesús ni yaꞌa ya yukan, ti ni kachi da:

―Ndeꞌe naa ra, Chaa un kuu maa Lelu Yandios ―ni kachi da.

37Ni ka jinisoꞌo chaa ka jika jiin Juan ja siaꞌan ni kaꞌan da, ti ni ka chindikun chaa un jata Jesús kuankoyo da. 38Ni ndeokoto Jesús, ni jini ya ja ka ndikun chaa un kuankoyo da jata ya. Ni kaꞌan ya, ti ni kachi ya:

―¿Ndoo ka nduku ra naa ra? ―ni kachi ya.

Ti ni ka kachi da naa da:

―Maestro, ¿Nanu nchaa ni? ―ni ka kachi da.

39Ti ni kachi Jesús:

―Ñaꞌan na choꞌo, ti kuni ra ―ni kachi ya.

Kuankoyo da jiin ya naa da ti ni ka jini da nuu kancha ya. Ti yukan ni ka kendo da jiin ya kɨvɨ un, chi ja ni kuu kaa kuun ja ini.

40Ɨɨn chaa un ni kuu Andrés, ñani Simón Pedro. Ni jini da ja siaꞌan ni kaꞌan Juan, ti ni chindikun da jata Jesús. 41Yukan na ti ni jan nunduku Andrés ñani da Simón Pedro, ti ni kachi da jiin da:

―Ni nakejnaꞌan ri jiin Cristo, ya ni taji Yandios ja saꞌa jniñu ñaꞌnu un ―ni kachi da.

42Yukan na ti kuaꞌan da jiin ñani da nuu kancha Jesús. Nu ni jini Jesús nuu Simón, ti ni kachi ya:

―Maa ra kuu Simón, seꞌe yɨɨ Jonás. Undi vijna ti kendo ra konani ra Cefas ―ni kachi ya.

(Cefas kuni kaꞌan Pedro nuu saꞌan ni ka kaꞌan yɨvɨ un.)

43Ɨnga kɨvɨ ti ni kiꞌin Jesús ichi kuaꞌan ya ichi ñuu Galilea. Yukan ni ndejnaꞌan ya jiin Felipe. Ni kachi ya jiin da:

―Ñaꞌan na choꞌo ―ni kachi ya.

44Ti Felipe ni kuu da ɨɨn chaa ñuu Betsaida, nu kuu ñuu Andrés jiin Pedro. 45Ni nanduku Felipe Natanael, ti ni kachi da jini da:

―Ja jini ra nava ni chiso Moisés jiin taka ga profeta ni ka kaꞌan da jnuꞌun Yandios na janaꞌan. Ni ka kaꞌan da ja chaa ɨɨn chaa kuñaꞌnu ja kuu ɨnga kuiya. Ni ka ndejnaꞌan ri jiin chaa un, ti maa da kuu Jesús, seꞌe yɨɨ José, chaa ñuu Nazaret ―ni kachi Felipe.

46Ti ni kachi Natanael jiin Felipe:

―Ti va nu iyo ɨɨn chaa vaꞌa kenda nuu ñuu Nazaret ―ni kachi da.

Ti ni kachi Felipe jini da:

―Na choꞌo, ndeꞌe ti kuni ra ―ni kachi da.

47Ni jini Jesús ja kuaja Natanael, ti ni kachi ya jiin da:

―Jaꞌa vaji ɨɨn maa chaa ñuu Israel ja tu jini da xndaꞌu ñaꞌan da ―ni kachi ya.

48Ti ni kachi Natanael jiin Jesús:

―¿Nasa ni nakuni ni saña? ―ni kachi da.

Ti ni kachi Jesús jiin da:

―Na ti kana ga Felipe xini ra, ti ja ni jini ri roꞌo kande ra ndatɨ nutɨchɨ vixi un ―ni kachi ya.

49Ti ni kachi Natanael:

―Maestro, maa ni kuu Seꞌe Yandios. Ti maa ni kuu rey taꞌu jniñu nuu nɨ tuꞌu nación Israel ―ni kachi da.

50Ti ni kachi Jesús jiin da:

―Ni kandixia ra ruꞌu chi ni kachi ri jiin ra ja, ja ni jini ri kande ra ndatɨ yujnu un. Ko ndeꞌe ra ti kuni ra ja suꞌva naꞌnu ga jniñu saꞌa ri, chi suꞌva nduñaꞌnu ga ri ―ni kachi ya.

51Ni siin Jesús kaꞌan ya jiin da, ti ni kachi ya:

―Jandaa na kachi ri nuu ra ja vijna na ti kuni ra nuña andɨvɨ, ti ndeꞌe ra chakoyo ndajaꞌa Yandios (ja ka nani ángel), ti ka ndaa ka nuu i nuu kancha ruꞌu, ja kuu ri seꞌe Yɨvɨ Ñuyɨvɨ jaꞌ ―ni kachi Jesús.

Ni jaꞌan Jesús ɨɨn viko nandaꞌa

Selectat acum:

Juan 1: mpm

Evidențiere

Partajează

Copiază