Zenezi 9
9
'Re ihâimana u'âsi mono, Nowéhé ma, tinhimiropisutu zahi te te i'manharĩzé wasu'u
1Tawamhã 'Re ihâimana u'âsi mono, Nowéhé ma, i'ra norĩ me, iwẽ te te tãma pisutu za'ra sina, ma tô ãne tãma nharĩ za'ra:
— Ma'ãpé atébré aba oto, asihudu norĩ wa'wa hã, uburé ti'ai mono bâ te te ropéi mono da. 2Tawamhã uburé abaze norĩ, si norĩ, di'i na 're inomro mono norĩ, duré uburé â 'rowi tepe norĩ 're ihâimana za'ra mono hã te za aima pahi na 're hâimana za'ra wa'wa. Ã norĩ hã te za duré aima wapu na asahâpâb za'ra wa'aba hã 're hâimana za'ra. 3Uburé te za abaze norĩ hã 're ihuri aba mo. Duré rob'rã norĩ sipu'u pese na 're ihâimana za'ra mono hã te za 're ihuri aba mo, asazéb da, te aima ipisutu za'ra wa'wa hã. 4Tane nherẽ, romnhi waprui ré 're huri aba mono tõ da, wa aiwi sawi pese za'ra wa'wa. E marĩ wa. Dawapru na ãma 're dahâimana za'ra mono na dâ'âsina. 5Wa hã te te 're idanhimroi mono norĩ nhimi'manharĩzé wa'rãmimhã, wa za te tãma 're awa'âbâ, ĩnhimi'manharĩzém na hã, aiwab da. Duré abaze te te 're idanhimroi mono norĩ nhimi'manharĩzé wa'rãmimhã, wa za duré te tãma 're awa'âbâ, ĩnhimi'manharĩzém na hã, aiwab da. 6Ĩsine 're dahâimana za'ra mono da, wa tô a'uwẽ hã te apoto. Tahawa, ni'wa te te da'maiwĩrĩ wamhã, te za duré wĩrĩ ni za, aiwab da.
7— Te za oto atébré 'wa, asihudu norĩ wa'wa ti'ai mono bâ te te ropéi mono da.
8Tawamhã 'Re ihâimana u'âsi mono, Nowéhé ma, i'ra norĩ me hã, te duré tãma nharĩ za'ra ãne:
9— Ĩnhimiropisutu zahi, wa za oto aima 'manharĩ za'ra wa'wa, duré niwa romhutu'õ, asihudu norĩ ma ropibu ma, 10duré uburé abaze norĩ uba're hawi asiré iwairébé norĩ ma hã, si norĩ ma hã, abaze da te 're itébré za'ra mono norĩ ma hã, duré rom na 're ihâimana za'ra mono norĩ ma hã, tô uburé pese ti'ai ãma hâiba ré 're ihâimana za'ra mono norĩ ma hã. 11Tahawa wa za ãne ĩnhimiropisutu zahi hã aima 'manharĩ za'ra wa'wa: I'â pusi mono na niwamhã ti'ai ãma hâiba ré 're ihâimana za'ra mono norĩ, te i'uprosi na isahu da hã mare di za. Duré niwamhã ti'a, i'â pusi mono na te i'uprosi na isahu da hã mare di za. 12Aima za'ra wa'aba, duré uburé abaze norĩ hâiba ré 're ihâimana za'ra mono norĩ ma, ĩnhimiropisutu waihu'uzéb da, 13wa za ĩte tãiwaipore hâiwa'a na te ãma 're ro'rahâri u'âsi. Tãiwaipore hã uburé ti'ai ãma 're idahâimana za'ra mono ma, te iropisutuzé te wasu'u. 14Tawamhã duré wa hã hâiwa 'rã na te 're hâiwa ubu mono wamhã, duré tãiwaipore na te ãma 're ro'rahâri mono wamhã, 15wa za ĩnhimiropisutu zahi te aima i'manharĩ za'ra wa'aba zém na hã, duré uburé abaze norĩ ma, te i'manharĩzém na hã ãma 're ĩsipo're pu'u za. Ãne wamhã, uburé ti'ai ãma hâiba ré 're ihâimana za'ra mono norĩ te i'uprosi na isahu da hã mare di za. 16Tawamhã duré tãiwaipore hâiwa na te te 're ro'rahâri mono wamhã, wa hã wa za uburé ti'ai ãma hâiba ré 're ihâimana za'ra mono norĩ ma, ĩnhimiropisudu te ĩ'manharĩzém na hã ãma 're ĩsipo're pu'u u'âsi. 17Tãiwaipore hã uburé ti'ai ãma hâiba ré 're ihâimana za'ra mono ma, te iropisutuzé, te wasu'u.
Nowéhé 'ra norĩ wasu'u
18Nowéhé 'ra norĩ, uba're hawi isiré iwairébé norĩ hã, Sẽ, Cã, duré Zafé (Cã hã, Cana'ã na isisi mama.). 19Ã norĩ si'ubdatõ hã Nowéhé 'ra norĩ. Tawamhã taha nhihudu norĩ hã ma tô uburé ti'ai mono bâ te te ropé.
20Tawamhã Nowé rob're na romhuri'wa na te 're hâimana. Ta hã ma tô imorĩ'rata uptabi na uwa dama a're na'rata. 21Tawamhã nimahã bâtâ na uwa'ru 'rãi wa'u isé na ma tô ãma si'rãiwamna. Tahawa ai'uréiwi, romhâ 'manharĩ na tinhorõwa 'remhã ma tô nomro. 22Taha ré Cã, Cana'ã mama hã ma tô timama ai'uréiwi nomro ré 'madâ. Tahawa 'ripara hawimhã ma tô rob u watobro, tisisãnawã norĩ ma, te te tãma wasu'u zahuré da. 23Tawamhã Sẽ norĩ Zaféhé me, ma tô dasi'ubuzé 'mai'âri zahuré. Duré tawamhã tinhisé na te te sima hiri zahuré wamhã, ma tô ba niwĩ unhiniwĩmhã itẽme tineb zahuré, te te ãma ubu zahuré da, timama hã. Tawamhã timama ai'uréiwi nomro ré, te te 'madâ'â zahuré tõ da, ma tô u'rata sina te te rob'madâ'â zahuré. 24Tawamhã Nowé, si'rãiwamnarĩ pari oto apâ tãma romnho'a wamhã, ma tô i'ra danhobabati te te tãma i'manharĩzé hã sina waihu'u. 25Tahawa te ãne isimi'manharĩzé ma hã tinha:
“Wẽ bâ Cana'ã! Iwẽ'õ hã wa za te tãma 're apisutu. Ta hã te za tisisãnawã norĩ ma, pawa'âbâ ãna te te tãma 're romhuri u'âsi za'ra, ta norĩ ma pawa'âbâ ãna te te tãma 're iromhuri za'ra mono norĩ zahâpâmhã.”
26Te duré tinha ãne, Nowé hã:
“Uburé Danhib'apito ãma 're wawata za'ra wa'aba mono, Sẽhẽ nhib'apito ãma. Cana'ã hã pawa'âbâ õ nherẽ, isib'a'uwẽ na tãma 're hâimana mono.
27'Re ihâimana u'âsi mono, ma'ãpé Zaféhé ma, isipti'a sa'ẽtẽ na tãma 're hâimana mono da tãma apraba. Duré isihudu norĩ hã Sẽhẽ nhorõwa ãma romhâ 'manharĩ na 'ri nhoré wa, iwa 're hâimana za'ra mono da, tãma aza'ré za'ra na.
Tawamhã duré Cana'ã, Zaféhé#9.27 Zafé hã hebreu norĩ mreme na “dama rob're za'ẽne” aiwa prã na ne iwapari na hã. ma pawa'âbâ ãna romhuri'wa na hã tãma 're hâimana mono.”
28Nowé hã â pusi mono parimhã, ma tô duré 350 na ãma iwahum na hã 're hâimana. 29Tawamhã 950 na ãma iwahub ãma, ma tô oto dârâ.
Selectat acum:
Zenezi 9: xavBP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2011, Wycliffe Bible Translators, Inc.All rights reserved.