Matey 13
13
Jun techil tzeꞌn kyanmin xjal tiꞌj Tyol Dios
(Mr. 4:1-9; Lc. 8:4-8)
1Ax qꞌijjo tetz Jesús tojjo ja, ex kubꞌ qe ttzi nijabꞌ. 2Tej tok tkaꞌyin kypon txqan xjal tkꞌatz, bꞌeꞌx okx toj jun tal bark, ex kubꞌ qe toj. Ayetzin kyeꞌ jniꞌ xjal i bꞌaj kyij ten ttzi aꞌ.#Lc. 5:1-3. 3Ok ten xnaqꞌtzil nimku tumil noq kyukꞌa techil, ex tqꞌma: Jun maj, xiꞌ jun xjal awal triy. 4Atzin teꞌ tok tchtoꞌn, at pon chitj toj bꞌe. I tzaj pichꞌ, ex bꞌeꞌx jaw kyskꞌoꞌn. 5Ex at pon chitj kyxol abꞌj, me quꞌn tuꞌn ntiꞌxix twutz txꞌotxꞌ antza, liwey ul twiꞌ. 6Me atzaj teꞌ tok qꞌijil, bꞌeꞌx jaw tzqij, quꞌn nya nim xaꞌye tlokꞌ. 7Ex at pon chitj kyxol txꞌiꞌx. Me atzin txꞌiꞌx jun paqx tchꞌiy; atzin te triy noq jaw xkyꞌiꞌsix. 8Me anteꞌ pon chitj toj tbꞌanil txꞌotxꞌ, tbꞌanilx ele toj. At junjun tqan el jweꞌ kꞌal#13:8Jweꞌ kꞌal, 100 n-ele. twutz, ex junjuntl el ox kꞌal,#13:8Ox kꞌal, 60 n-ele. ex junjuntl el lajaj toj kaꞌwnaq.#13:8Lajaj toj kaꞌwnaq, 30 n-ele. 9Ankye taj tuꞌn tkubꞌ tbꞌiꞌn nyola, in tkubꞌ tbꞌiꞌntz, tuꞌntzintla tkubꞌ tbꞌinchin.
Nukꞌbꞌil tuꞌn Jesús tiꞌjjo t-xnaqꞌtzbꞌil
(Mr. 4:10-12; Lc. 8:9-10)
10O ul laqꞌeꞌy awoꞌy, a t-xnaqꞌtzbꞌin, tkꞌatz, ex xi qqaniꞌn te: ¿Tiquꞌn nyoliꞌn kyukꞌaxjal noq kyukꞌa techil?
11Tzaj ttzaqꞌwin Jesús qeꞌy: Ma tzaj tyekꞌin Diosjo tumil kyeꞌy, tuꞌn tel kynikyꞌa tiꞌjjo a ewintaq ojtxe tiꞌjjo Tkawbꞌil Dios, a at toj kyaꞌj; quꞌn metziꞌn kyexjal nlay tzꞌel kynikyꞌ te. 12Tuꞌnpetziꞌn, ankyeꞌ xjal at tnimbꞌil wiꞌja, ktzajil qꞌoꞌn txqantl, tuꞌntzin tchꞌiyxixjo tnimbꞌil. Ex ankyeꞌ xjal noq nkaꞌmin tkꞌuꞌj tiꞌj tnimbꞌil, kyjaꞌpe k-elil qꞌiꞌne teꞌ chꞌin at.#Mt. 25:29; Mr. 4:25; Lc. 8:18; 19:26. 13Tuꞌnpetziꞌn, nchin yoliꞌn kyukꞌa techil kyukꞌaxjal. Quꞌn nchi kaꞌyin kywutz, me mi n-el kynikyꞌ weꞌy. Ex ntbꞌiꞌn kyẍkyin, me mi n-okx toj kywiꞌ.
14Quꞌn ikytzin kbꞌajiljo tzeꞌn tqꞌma Isaías, a yolil Tyol Dios ojtxe, tej tqꞌma:
Mix tuꞌn tzꞌok kybꞌin,
mi n-okx toj kywiꞌ.
Mix tuꞌn tzꞌok kykaꞌyin,
mi n-el kynikyꞌ te.
15Quꞌn noqx ma tzꞌok naj kynabꞌljo xjal luꞌn;
jpuꞌnqe kyẍkyin, tuꞌn mi tzꞌokx toj kywiꞌ,
jpuꞌnqe kywutz, tuꞌn mi tzꞌele kynikyꞌ te tbꞌanil.
Tuꞌntzin ikyjo, mi nchi tzaj laqꞌe nkꞌatza, tuꞌn kykubꞌ nqꞌaninch.#Is. 6:9-10.
16Me kyꞌiwlinqexix kyeꞌ, tuꞌn nchi kaꞌyiꞌn kywutza, ex n-el kynikyꞌa te; ex nchi bꞌin kyẍkyiꞌn, ex n-okx toj kywiꞌy. 17Quꞌn twutzxix kxel nqꞌmaꞌn kyeꞌy, qa nimjo yolil Tyol Dios ojtxe, ex nim xjal wen kyajtaq tuꞌn kylon teꞌ a kyeꞌ ma kyli jaꞌlin, ex tuꞌn kybꞌin teꞌ a kyeꞌ ma kybꞌi jaꞌlin, me mix bꞌaje ikyjo.#Lc. 10:23-24.
Kubꞌ tchikyꞌbꞌin Jesús tiꞌjjo techil tzeꞌn kyanmin xjal tiꞌj Tyol Dios
(Mr. 4:13-20; Lc. 8:11-15)
18Kybꞌintzjiꞌy tiꞌ t-xilin tiꞌjjo jun xjal xiꞌ awal. 19Quꞌn ayetziꞌn nxi kybꞌiꞌn Tbꞌanil Tqanil tiꞌj Tkawbꞌil Dios, me mi n-el kynikyꞌ te, ikyqetziꞌn tzeꞌnku ijaj i kubꞌ tzꞌaq toj bꞌe. Jun paqx tzul tajaw il, tzeꞌnku jun pichꞌ, ex k-elil tiꞌn Tbꞌanil Tqanil, a kux awet toj kyanmin. 20Ex atzin ijaj, a kubꞌ tzꞌaq kyxol abꞌj, ikyqetziꞌn tzeꞌnqe xjal jun paqx nxi kynimin Tyol Dios ex tukꞌa tzaljbꞌil. 21Me quꞌn tuꞌn ntiꞌxix kykꞌuꞌj tiꞌj, mi nchi kujix toj kynimbꞌil. Qa akux saj jun tiꞌ toj kychwinqil, mo qa akux ẍi ok lipinxjal kyiꞌj noq tuꞌn tpajjo nyola, bꞌeꞌx kchi kꞌwel tzꞌaq toj kynimbꞌil. 22Atzin ijajjo pon tzꞌaq toj txꞌiꞌx, ikytziꞌn tzeꞌn jun xjal n-ok tbꞌiꞌn nyola. Me oꞌkx nchi bꞌisin tiꞌj tkyaqiljo tkubꞌ twutz txꞌotxꞌ. Ex kyaj tuꞌn tten tkyaqil tiꞌchaqku tiꞌ kye ex jniꞌ kyqꞌinmil. Tuꞌntzintzjo anetziꞌn, n-el naje kynimbꞌil tiꞌj Dios, ikyxsin tzeꞌnku triy njaw chꞌiy toj txꞌiꞌx. Noq n-el xkyꞌiꞌsix ex ntiꞌ toj n-el. 23Me atziꞌn ijaj, a kux awet toj tbꞌanil txꞌotxꞌ, ikytziꞌn tzeꞌnqe xjal nxi kynimin nyola, ex nkubꞌ kybꞌinchin tzeꞌnku nqꞌmaꞌn. Nchi chꞌiy toj kynimbꞌil, tzeꞌnku triy, a s-el jweꞌ kꞌal#13:23Jweꞌ kꞌal, 100 n-ele. twutz junjun, ex junjuntl el ox kꞌal,#13:23Ox kꞌal, 60 n-ele. ex junjuntl el lajaj toj kaꞌwnaq.#13:23Lajaj toj kaꞌwnaq, 30 n-ele.
Jun techil kyiꞌjjo kꞌul nya wen kyxol triy
24Ex xi tqꞌmaꞌn Jesús juntl techil. Chiꞌ kyjaluꞌn: A Tkawbꞌil Dios, a at toj kyaꞌj, ikytziꞌn tzeꞌnku jun ichin xiꞌ awal triy toj ttxꞌotxꞌ. 25Tej tok bꞌaj, bꞌeꞌx ajtz. Me tej qok yupj, ul jun ajqꞌoj, ex xi tchtoꞌntl jun wiq kꞌul toj triy, ex bꞌeꞌx oq. 26Me atzaj teꞌ chꞌiy triy, ex tbꞌaj weꞌje tunin, antza ele tnikyꞌtzajiltz qa attaq juntl wiq kꞌul toj.
27Ayetziꞌn taqꞌniljo tajaw awal bꞌeꞌx i xiꞌ qꞌmalte, ex xi kyqꞌmaꞌn: Tata, ¿Mixsin ja tskꞌoꞌn toj tijaja, tej tok tawaꞌn? Quꞌn ¿Jaꞌtzin saje jun wiq kꞌul toj ikyjo tzeꞌnku triy?
28Atzin te tajaw aqꞌuntl xi tqꞌmaꞌn: Atla jun ajqꞌoj xkubꞌ bꞌinchin teꞌ ikyjo wiꞌja.
Xi kyqꞌmaꞌn taqꞌnil te: ¿Mej qa ma qoꞌxa xbꞌoqil teꞌ maꞌ kꞌul toj triy? chi chiꞌ.
29Me ante tajaw aqꞌuntl xi tqꞌmaꞌn: Mina, quꞌn qa ma jatz xbꞌoqitjo nya wen kꞌul jaꞌlin, aku jatz lipe triy tiꞌj. 30Qalaꞌ kyqꞌonkja ax tzqijkuj junx tukꞌa triy, tzmaxi kꞌaꞌ jatz skꞌetjo, aj tjaw joyit. Atzin te triy kxel kꞌuꞌyit teꞌ toj txꞌutxꞌ. Atzin teꞌ maꞌ kꞌul, kjawil kꞌlet, exsin kꞌwel patit tuꞌn qꞌaqꞌ.
Jun techil tiꞌj twutz mistas, ex tzeꞌn nchꞌiye Tkawbꞌil Dios
(Mr. 4:30-32; Lc. 13:18-19)
31Ex kubꞌ tqꞌoꞌn Jesús juntl techil kyjaluꞌn: A Tkawbꞌil Dios toj kyaꞌj, ikytziꞌn t-xilin tzeꞌnku jun tal twutz mistas, aj tkux tawaꞌn jun xjal toj txꞌotxꞌ. 32Quꞌn twutzxix a tal netzꞌxix kywutzjo txqantl twutz ijaj, me ajtzin tchꞌiy, jun tijx n-oke kywutzjo txqantl. Chꞌime njapin tzeꞌnku jun tze, a jaꞌ n-okxi kybꞌinchin pichꞌ kypaqbꞌil kyxol tqꞌobꞌ.
Juntl techil tiꞌj tzeꞌn nchꞌiye Tkawbꞌil Dios tzaluꞌn twutz txꞌotxꞌ
(Lc. 13:20-21)
33Ex kubꞌ tqꞌoꞌn Jesús juntl techil kyjaluꞌn: A Tkawbꞌil Dios toj kyaꞌj, ikytziꞌn tzeꞌnkuꞌ ttxꞌamil wabꞌj, a nkux tqꞌoꞌn jun qya toj oxe malbꞌil jarin. Ex ajtzin tbꞌaj tsmoꞌn, tkyaqiljo tqꞌotjil wabꞌj ktxꞌamixil, ex nchꞌiy wen.
Tiquꞌn nyolin Jesús kyukꞌa techil
(Mr. 4:33-34)
34Bꞌaj tqꞌmaꞌn Jesús tkyaqiljo lo kyexjal, noq kyukꞌa techil. Quꞌn ntiꞌtaq jun tiꞌ bꞌaj tqꞌmaꞌn, qa nya tukꞌa techil. 35Bꞌajjo ikyjo, tuꞌntzin tjapiꞌn a qꞌumj tuꞌn yolil Tyol Dios ojtxe, tej tkubꞌ ttzꞌibꞌin:
Kchin yolila noq kyukꞌa techil.
Ex kxel nqꞌmaꞌn nimku tiꞌ,
a ewintaq, atxix teꞌ tkubꞌku tbꞌinchin Dios twutz txꞌotxꞌ.#Sal. 78:2.
Nxi tchikyꞌbꞌin Jesús kye t-xnaqꞌtzbꞌin techil tiꞌjjo kꞌul toj triy
36Tbꞌajlinxiꞌ ikyjo, bꞌeꞌx i aj tchqꞌoꞌn Jesús xjal kyja. Ex okx tuja, a jaꞌ o tzaja laqꞌeꞌy tkꞌatz, a awoꞌy t-xnaqꞌtzbꞌin, ex xi qqꞌmaꞌn te: Chikyꞌbꞌintzjiy techil tiꞌjjo kꞌul nya wen toj triy.
37Ex tzaj ttzaqꞌwin Jesús qeꞌy: Atziꞌn awal triy, ayin wejiꞌy, a Tkꞌwal Ichin. 38Ante txꞌotxꞌ ayetziꞌn xjal tkyaqil. Atzin triy, ayetziꞌn nimil tiꞌj Tyol Dios. Ex atziꞌn kꞌul, ayetziꞌn xjal nya nimil, ayeꞌ ncheꞌx lipe tiꞌj tajaw il. 39Ex atzin te ajqꞌoj, a xi chtonte tyajil kꞌul toj triy, ax tajaw il. Atzin teꞌ joꞌj triy, atzin teꞌ aj tbꞌaj twutz txꞌotxꞌ te jun majx. Ex ayetziꞌn aqꞌnil mo joꞌl triy, ayetziꞌn t-angel Dios.
40Ikytziꞌn tzeꞌn kꞌul aj tjaw noq tuꞌn tokx toj qꞌaqꞌ tuꞌn ttzꞌeꞌy, ikytzin kbꞌajiljo, aj tbꞌaj tkyaqil twutz txꞌotxꞌ. 41Ex ayiꞌn, a Tkꞌwal Ichin, chi xel nchqꞌoꞌn n-angela, tuꞌn kyetz xbꞌoqitjo toj Tkawbꞌil Dios kykyaqiljo nchi bꞌinchin il, ex ayeꞌ nchi xmoxin kyiꞌj junjuntl tuꞌn tkubꞌ kybꞌinchin il. 42Ex kchi okix toj jun patbꞌil ma tij, ja njuline qꞌaqꞌ wen, ex antza okx chi juꞌchꞌilx kyste tuꞌn kyixkꞌoj, a mix kbꞌajilx. 43Me ayetzin kyeꞌ, a kubꞌ kybꞌinchin tzeꞌnkuxjo ntqꞌmaꞌn Dios, ok kchi qoptzꞌajiyil kye tzeꞌnku tqan qꞌij toj Tkawbꞌil Dios, a kyTata. Ankyeꞌ at tẍkyiꞌn tuꞌn tok tbꞌiꞌn, in tok tbꞌiꞌn, ex in tkubꞌ tbꞌinchin tzeꞌnkuxjo ntqꞌmaꞌn.
Jun techil tiꞌjjo Tkawbꞌil Dios tzeꞌnku jun qꞌinimil noq ewin
44A Tkawbꞌil Dios, a at toj kyaꞌj, ikytziꞌn tzeꞌnku jun qꞌinimil ewin toj jun txꞌotxꞌ. Jun ichin, qa ma knetjo qꞌinimil tuꞌn, bꞌeꞌx aku meltzꞌaj ewilte axsa. Maꞌx tzeꞌjix tiꞌj wen, ex noq tuꞌn ttzyetkuꞌ txꞌotxꞌ tuꞌn anetziꞌn, kbꞌaj xel tkꞌayin tkyaqiljo at te, tuꞌn ttzaj tlaqꞌoꞌn.
Jun techil tiꞌjjo tal abꞌj, a wiꞌyilxix
45Ex ikyxjo, a Tkawbꞌil Dios, a at toj kyaꞌj, tzeꞌnku jun kꞌayil njyoꞌn tiꞌj jun tal abꞌj tbꞌanilxix. 46Ajtzin tknet jun tuꞌn, a wiꞌyilxix wen, kbꞌaj xel tkꞌayin tkyaqiljo at te, noq tuꞌn tlaqꞌetku tal abꞌj tuꞌn.
Jun techil tiꞌjjo jun pa te tzuybꞌil kyiẍ
47Ex ikyxjo, a Tkawbꞌil Dios, a at toj kyaꞌj, tzeꞌnku jun pa te tzuybꞌil kyiẍ. Aj t-xi xoꞌyit toj aꞌ, tkyaqil wiq kyiẍ ntzyet tuꞌn. 48Ajtzin tnoj, aye kyiẍil kjawitz kyiꞌn tzma ttzi aꞌ. Antza, kchi kꞌwele qeye skꞌol teꞌ kyiẍ. Ayetziꞌn wen, kchi xel kꞌuꞌyit toj chiꞌl; ex ayetziꞌn mina, chi xel kyxoꞌn. 49Ikytzin kbꞌajiljo, aj tjapin bꞌaj tkyaqil twutz txꞌotxꞌ. Kchi elitz t-angel Dios paꞌl kyeꞌ nya wenqe kyiꞌjjo a wen. 50Ayetziꞌn nya wenqe kchi xel xoꞌyit toj jun tij kꞌachbꞌil qꞌaqꞌ, a mixla kbꞌajilx, jaꞌ kchi oqꞌile, ex kchi juꞌchꞌile kyste tuꞌn kyixkꞌoj.
Ajo ojtxe qꞌinimil exsin akꞌaj qꞌinimil
51Tzaj tqanin Jesús qeꞌy, a awoꞌy t-xnaqꞌtzbꞌin: ¿Tzuntzin n-el kynikyꞌa tiꞌj tkyaqiljo lo? chiꞌ.
Exsin xi qtzaqꞌwiꞌn: Tzun, qAjaw, qo chijiꞌy.
52Ex tzaj tqꞌmaꞌnl Jesús qeꞌy: Tuꞌnpetziꞌn, jun xnaqꞌtzil tiꞌj ojtxe kawbꞌil, aj qa ma txi lipe tiꞌjjo Tkawbꞌil Dios, a at toj kyaꞌj, k-okil tzeꞌnku jun tajaw ja, a at kabꞌe wiq tqꞌinimil, jun ojtxe qꞌinimil ex jun akꞌaj.
Tej t-xiꞌ Jesús toj ttanim, a Nazaret
(Mr. 6:1-6; Lc. 4:16-30)
53Tej kybꞌaj tqꞌmaꞌn Jesús kykyaqiljo techil, bꞌeꞌx xiꞌ 54tzma toj ttanim. Antza xi xkye tuꞌn t-xnaqꞌtzin kyoj muꞌẍ ja te kꞌulbꞌil. Ex tkyaqilxjal bꞌaj jaw kaꞌylaj, ex kyqꞌma: ¿Jaꞌtzila xbꞌaje t-xnaqꞌtzin xjaljo tkyaqiljo bꞌaꞌn tuꞌn? ¿Ex tzeꞌntzin tten nbꞌantjo tbꞌanil techil tipin tuꞌn ikyjo? 55¿Ma nyapetzila a ttata, a jsol tzꞌlan? ¿Ma nya tnana, a Mariy? ¿Ma nyaqetzin titzꞌin Santyaw, Jse, Simun, ex Judas? 56¿Ma nyaqetzin tanebꞌjo najleqe qxol? ¿Jaꞌtzin xbꞌante tkyaqiljo luꞌn tuꞌn? chi chiꞌ.
57Quꞌn tuꞌn kyojtzqiꞌntaq, mix xi kynimine.
Me xi tqꞌmaꞌn Jesús kye: Jaꞌchaqx taꞌ jun yolil Tyol Dios twutz txꞌotxꞌ, nxi qꞌoꞌnx toklin. Me qa tojx ttxꞌotxꞌ ex tojx tja ntiꞌx toklin.#Jn. 4:44.
58Nya nimku yekꞌbꞌil tipin bꞌant kyxol t-xjalil, quꞌn tuꞌn mix xi kynimine Tyol.
Selectat acum:
Matey 13: mamC
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2003, Wycliffe Bible Translators, Inc. All rights reserved.
