Luke 23

Jesus, Pilate but néhinilhti

1ꞋEt dune ꞌilhozdilne tsꞌiyawh dunáhudidil ꞌinkꞌez Pilate but néhinilhti. 2ꞋAwet hikꞌewhehoninꞌai ꞌinkꞌez ꞌuhutni, “Ndun dune lizwifne tankꞌus úbunilhtꞌi ꞌet bulh nátsꞌuhoonꞌai. ꞋInkꞌez lerwe Caesar tsꞌun ndi yun kꞌelha huyilhꞌi-i, ꞌi tax ꞌuyulhni, ꞌet cha whuchꞌa buníyoot. ꞋInkꞌez didut lerwe Christ tsꞌutni-un, ꞌen usdli naꞌdudútni.”

3ꞋEt Pilate yoodulhkut, “Nyun eh Lizwif bulerwe inli?” ꞋEt Jesus ꞌutni, “A, ꞌalhaꞌ dini.”

4ꞋEt Pilate Lizwif bumoodihne, ꞌinkꞌez ꞌilhozdilne ꞌubulhni, “Ndun dune ꞌaw hoonli nintaꞌantꞌen-un ooghu nalhuwhusꞌal.”

5ꞋEt ꞌon nus huhunílchꞌe ꞌinkꞌez ꞌuhutni, “Yun kꞌut Judea ndulcho whe ꞌinkꞌez Galilee yun kꞌut ꞌinkꞌez njan cha, dune nohchꞌaz nehudodilh whuz unꞌa whubodulhꞌeh.”

Lerwe Herod, ꞌen cha Jesus yóolhdzih

6Pilate whudantsꞌo whe, uboodulhkut, “Ndun dune Galilee whutꞌen-un ꞌuntꞌoh?” 7ꞋEt Pilate Jesus lerwe Herod ookeyoh whuchꞌeꞌ unli tꞌeoonanzin, ꞌet ꞌaho yutsꞌu whe yálhꞌaꞌ. Ndun lerwe ꞌen cha ꞌoh daꞌ soo ꞌet Jerusalem ꞌutꞌen inleꞌ.

8Herod tube hoontꞌiꞌ whe Jesus yanꞌen. ꞋEt tube saꞌ whutsꞌun yutiꞌelh hukwaꞌ ninzun ꞌet huwa. Lhat-un whe yulh ꞌúditsꞌo inleꞌ. Khun tilah huwa ꞌítꞌen dunalh ꞌóohooleh. 9ꞋInkꞌez lhat-un hukwa yoodulhkut. ꞋEt hoontsꞌi Jesus yutsꞌu tꞌédusnih. 10ꞋUdedo lubretne ꞌinkꞌez Moses be ꞌudustlꞌus ꞌukꞌu nunáguzne, tsꞌiyawh dunahúdidil ꞌinkꞌez huske be hikꞌé hoonꞌai. 11ꞋEt Herod ꞌinkꞌez yuba lhuganne, ꞌenne bubulh tsꞌiyawh hoonliyaz buba lhíloh hinínzun ꞌinkꞌez highudloh. Lerwe nayitsꞌuz-i be húyalhti ꞌinkꞌez Pilate tsꞌun whe náhuyalhꞌaꞌ. 12ꞋEt dzin Pilate ꞌinkꞌez Herod bulh kꞌeke lhuhulhtsi. Whutsodaꞌ lhchꞌaz huditni inleꞌ.

Pilate Jesus butlꞌa yálhti datitsah ha, ꞌinkꞌez Barabbas buba yula naditni

13ꞋEt ꞌawet Pilate ꞌudedo lubretne, dune kꞌuneꞌ ꞌulꞌenne cha, tsꞌiyanne dune, tsꞌiyawh ꞌalhgoh ꞌilhubozdla, 14ꞌinkꞌez ꞌubulhni, “Ndun dune tankꞌus ubunilhtꞌi-un kꞌunꞌa sghu nulhti. ꞋEn nohbut soo tsꞌihꞌun unꞌa ooghu núnistai. ꞋEt hoontsꞌi ndet ookꞌé whahꞌai-un ꞌaw hoonli ooghu nalhuwhusꞌal. 15ꞋInkꞌez Jesus Herod tsꞌun nohbulh whésꞌaꞌ. ꞋEn cha whe tankꞌus ꞌuntꞌoh-un yughu nalhuhóoꞌal. Ndun dune ꞌaw hoonli hukwa daóotsa-un hooloh. 16ꞋInka huyootalhtsus ꞌinkꞌez oola nadutisnih.”

17ꞋEt njan butus lhuseya naꞌhutꞌalh-un ꞌet ꞌoh totsuk ꞌilhoghun ꞌadinꞌai-un lanahudutni. ꞋEt whuz unꞌa bukꞌoh tsꞌe ꞌuhoontꞌoh. 18ꞋAlhgoh hitsꞌu háyih ꞌinkꞌez ꞌuhutni, “Barabbas neba oola nadintnih, ꞌinkꞌez ndun ꞌen sulhghe!” 19Barabbas ꞌen gha lhtahuwhuntꞌai whe ꞌilhoghun dune silhghi ꞌet hukwa ꞌahuyanꞌai inleꞌ.

20ꞋEt hoontsꞌi Pilate Jesus lanadutitnih hukwaꞌ ninzun, ꞌinka ꞌilhozdilne doo cha bubulh yáilhduk. 21ꞋEt hoontsꞌi ꞌon nus hitsꞌu huyih, “Tulalhgus kꞌeílhtih! Tulalhgus kꞌeílhtih!” hutni.

22ꞋEt whulh tat ꞌubulhni, “ꞋEt di ha? Ndet dáhoontꞌoh whe hoontsiꞌ-un whe nintaꞌuntꞌen? ꞋAw hukwꞌelha daootsah-un ooghu nalhuwhúsꞌal! ꞋEt huwa huyootalhtsus ꞌinkꞌez oola nadutisnih.”

23ꞋEt hoontsꞌi ꞌaw huyoozólhtsꞌaiꞌ ꞌaitꞌoh. ꞋOn nus hitsꞌu huyih, “Tulalhgus kꞌeílhtih!” ꞋUdedo lubretne, ꞌinkꞌez ndunne cha, daja hutni ꞌet whe Pilate hichꞌaꞌ nilhde. 24ꞋInka Pilate ntsꞌenꞌa hukwaꞌ huninzun hukwꞌunꞌa ꞌuja. 25ꞋInkꞌez Barabbas ꞌen gha lhtahuwhuntꞌai whe ꞌilhoghun dune silhghi, ꞌet hukwa ꞌahuyanꞌai, ꞌen Pilate butsꞌun yula naditni. ꞋEt hoontsꞌi Jesus hukwaꞌ huninzun kꞌunꞌa ꞌuhitilelh ha butlꞌa yálhti.

Jesus tulalhgus kꞌehíyilhti

26ꞋAwet Jesus hitilhti whe ꞌilhoghun dune Simon huyulhni, Cyren whutꞌen-un, whenghoh keyoh tsꞌe hainya, Jesus ootulalhgus yuba idutootan ha hiwus kꞌehídintan. 27Lhane dune hiyuntizdil, tsꞌekoo cha. ꞋEn tsꞌodi hinli ꞌinkꞌez hutso. 28ꞋInkꞌez Jesus butsꞌu nalhꞌa ꞌinkꞌez ꞌubulhni, “Nohni Jerusalem whutsꞌekooꞌ, si sghahtso iloh, nohnichꞌoh khunahtso, ꞌinkꞌez nohuzkehke cha ghahtso. 29ꞋAlha dzin whuz de hóokulh wheꞌ hoontꞌoh, ꞌet la ꞌuhudooniꞌ, ‘Buzkeh hoolohne, ꞌaw lheꞌílhtsilne, ꞌinkꞌez mbene la chalhtsꞌul ꞌulheꞌílhtꞌukwne, ꞌon nus buba sooꞌ whutatꞌelh.’ 30ꞋEt dune ꞌuhudooniꞌ ‘Dzulh ꞌi uncha nekꞌénitꞌai ꞌinkꞌez shusyaz ꞌi cha be nekꞌenáhokat.’

31Duchun ꞌawhuz duli whe ꞌet hoontsꞌi nduhútꞌen. Duchun disuz de, dahootꞌen suba?”#23:31 Duchun duli-i, ꞌi Jesus Christ ndi yun kꞌut useya-un ꞌuwhulhni. ꞋInkꞌez duchun disuz-i, ꞌi lhdijizne ꞌubulhni. ꞋInkꞌez Jesus Christ yakꞌuz whenája de, tube hoontsiꞌ-un butsꞌu hóoltsꞌulh, ni whe ꞌutni.

32ꞋEt nane untsiꞌne, ꞌenne cha, huyulh bubotuzilhghelh. 33ꞋInkꞌez shusyaz Calvary, ꞌutsin tsꞌun nizꞌai huwhutni-un, whuz huyoolhti whe, ꞌ tulalhgus kꞌehuyilhti. Nyoonne dune ntsiꞌne, ꞌilhoghun nailhni tsꞌe ꞌinkꞌez ꞌilhoghun ꞌintlꞌus tsꞌe, tulalhgus kꞌébihilhti. 34ꞋEt Jesus ꞌutni, “ꞋUBá buba whunaoodilnoh. ꞋAw dahútꞌen-un tꞌehonuszun, ꞌet huwa ꞌuhutꞌen.” Hina lhkꞌehuyilya ꞌinkꞌez higha ꞌaínlih.

35Dunene ꞌet nódilhya ꞌinkꞌez honilhꞌen. Bumoodihne cha buzih nodilhya ꞌinkꞌez highudloh whe nduhutni, “ꞋUyoonne, bulhyis inleꞌ. ꞋEt huwa ndun Christ, Yakꞌusda ꞌutahayálhti-un ꞌuntꞌoh de, dichꞌoh ꞌududoolyih da!”

36Lhuganne cha highudloh. Hizih neníndil ꞌinkꞌez tsꞌekoo tooꞌ duninkꞌoz-i, ꞌi hitsꞌu dúhidinkai. 37ꞋInkꞌez ꞌuhúyulhni, “Lizwifne bulerwe inli de, nyunchꞌoh ꞌududílyih!”

38Dzihtelyaz hikꞌu neꞌúzguz, ꞌudechoo Greek, Latin, ꞌinkꞌez Hebrew bughuni kꞌunꞌa hiyandus tsꞌe tulalhgus ꞌuhidunilhtꞌo. Ndiz unꞌa njan ndutni:

NDUN ꞋEN LIZWIFNE BULERWE ꞋUNTꞋOH

39ꞋEt untsiꞌne, hizih tulalhgus kꞌut hulhti, ꞌilhoghun hichꞌá ꞌutsꞌun ꞌutni whe ꞌet ndúyulhni, “Nyun Christ inli de, ꞌet nyunchꞌoh ꞌududílyih ꞌinkꞌez wheni cha neílhyih!”

40ꞋEt ꞌilhoghun unsiꞌ-un hukwa yudániꞌ whe uyúlhni, “ꞋAw eh Yakꞌusda bé lhniljut whe eh ꞌudini? Ooba nahisda, whuz unꞌa za wheni cha neba nahisda. 41ꞋInkꞌez wheni tsꞌihꞌun unꞌa neba nahisda. Daítꞌen la, ꞌet huwa ꞌandit tulalhgus kꞌut sílti. ꞋEt huwa neba ꞌukꞌelha whuzdliꞌ. ꞋEt hoontsꞌi ndun dune ꞌaw hoonliyaz whe ninta lheꞌítꞌel.”

42ꞋEt ndun unsiꞌ-un ꞌet Jesus ꞌulhni, “SMoodihti ntsꞌe la whulerwe inli, whuz naoozinja de, snaoolnih!”

43ꞋEt Jesus uyúlhni, “Tsꞌihꞌun unꞌa nyudusni, ꞌukꞌenus hoonzoo-un, ꞌet ꞌandit dzin sulh ꞌútantꞌelh.”

Jesus tulalhgus kꞌut ye khuna-i yula ditni

44Dzetniz hukwꞌelhꞌaz 3:00 atꞌen whutsꞌun yun kꞌut ndúwhulcho 6:00 whutsꞌun whe tsahólhgus inleꞌ. 45Sa cha ꞌaw lhistꞌen suliꞌ. ꞋInkꞌez lugliz whucho dutai-i hukwa dímbal-i, ꞌi cha lhulcho lhkꞌenchꞌul. 46ꞋInkꞌez ꞌet Jesus tube cho ꞌudija, “ꞋUBá, syughi ꞌi ntsꞌo la disni.” ꞋInkꞌez ꞌet dúdija ꞌet ꞌawet ꞌudekꞌez ha nájiz.

47ꞋEt dahooja la lhuganne bumoodih whunalhꞌen whe Yakꞌusda yudilhtiꞌ whe ꞌutni, “Ndun ꞌalhaꞌ tsꞌihꞌun dune ꞌazi ꞌuntꞌoh.” 48ꞋInkꞌez ꞌilhozdilne tsꞌiyawh ꞌet nenindilne huwhunalhꞌen whe, dáhooja la huwhunalhꞌen, tsꞌodi kꞌet dudzi kꞌut hoohoolhchis ꞌinkꞌez whusanáhidil. 49Mbene la tꞌeininzunne, ꞌinkꞌez tsꞌekoo Galilee whutsꞌun hiyuwhusanándilne, nilhdzaꞌyaz highu núdilhya daootꞌen-un huwhunilhꞌen.

Joseph Jesus ꞌayalhti

50ꞋEt ꞌilhoghun dune Joseph huyulhni-un, ꞌen cha Lizwifne ookꞌúneꞌ whutꞌenne, ꞌilhoghun ꞌuntꞌoh, dune unzoo ꞌinkꞌez tsꞌihꞌun dune unli. 51Nyoonne ookꞌúneꞌ whutꞌenne, dahuja-un, ꞌaw ooba tsꞌihꞌun lheꞌhootꞌoh. Joseph ꞌen Arimathea whutꞌen-un ꞌuntꞌoh. Lizwifne bukeyoh, ꞌilhoghun ꞌuhoontꞌoh. Joseph ꞌen cha Yakꞌusda whe lerwe unli-un huba sulhꞌi. 52Ndun dune Pilate tsꞌu whinya ꞌinkꞌez Jesus oozi yutsꞌu yúkaꞌ daniꞌ. 53Oozi nanáyalhti whe naih diztiꞌ-i, layin huyulhni-i, ꞌi be yughaꞌ ozduz. ꞋEt tse be ha huhontsel-un, whutsꞌo daꞌ, ꞌuyoonne ꞌalhdílhtoh, ꞌet ꞌayalhti. 54ꞋEt dzin wheni lhahúdutneh-un ꞌuhoontꞌoh. Lizwifne natsꞌulyis dzin yutilhkai.

55ꞋInkꞌez tsꞌekoo Galilee whutsꞌun yuwhusanándilne, ꞌenne Joseph hiyuntizdil whe ꞌet oozi ꞌayulhtih whe hinilhꞌen. 56ꞋEt whenáhidil. Yoo sooltsun-i, khe sooltsun-i cha lhahídinla. ꞋEt natsꞌulyis dzin, Yakꞌusda dughuni be bubaꞌ hóonla, ꞌet nahilyiz.

Selectat acum:

Luke 23: crx

Evidențiere

Partajează

Copiază