Luke 20

Jesus di gha dune ando ꞌuntꞌoh, ꞌet hukwa huyoodulhkut

1ꞋEt ꞌoh daꞌ ꞌet ꞌilhudzin ꞌet ndúhooja. Lugliz whucho Jesus dune hodulhꞌeh whe khuni unzoo-i be bubulh yalhduk whe ꞌudedo lubretne, Moses be ꞌudustlꞌus ꞌukꞌu nunáguzne cha, ꞌalhgoh ꞌutso whudilhdzulhne hikꞌu dugháhinya. 2ꞋInkꞌez ꞌuhuyulhni, “Nedini ndai gha dune ando ꞌintꞌoh whe ndowhi ꞌutꞌen oowaina? Kꞌus mbe ntlꞌa hónꞌai whe ꞌudini?”

3ꞋEt hoontsꞌi ꞌubulhni, “Si cha ꞌilhoghun hukwa nohoodutaskut, ꞌet sudáhni, 4ntsꞌenꞌa John dune too be ꞌúlhꞌen? Mbe yutlꞌa honꞌai dune too be tilhꞌelh huba? Yakꞌuz tsꞌe tilah ha hóoltsꞌut, kꞌus ndi yun kꞌut dune tilah tsꞌu ha hóoltsꞌut?”

5Dichꞌoh lhtoh howu yahalhduk ꞌinkꞌez ꞌuhutni, “ꞋEt yakꞌuz whutsꞌun ha hóoltsꞌut tsꞌutni de, ꞋEt di ha John nohba ꞌalhaꞌ lheꞌdusni, nedóniꞌ la. 6ꞋEt hoontsꞌi dune tsꞌu ha hóoltsꞌut, tsꞌutni de, ꞌet dune tsꞌiyawh la tse be nehooghan. John ꞌen nus hooꞌen-un ꞌuntꞌoh ꞌet buba ꞌalha ꞌuhoontꞌoh ꞌet huwa.”

7ꞋInka Jesus nduhuyulhni, “ꞋAw ntsꞌez de ha hóoltsꞌut tꞌetsꞌonúszun.”

8ꞋInkꞌez Jesus ndubulhni, “Ndai be dune ando ꞌustꞌoh whe ndustꞌen, ꞌet si cha ꞌaw nohdósniꞌ ꞌaitꞌoh.”

Mai ha níyeh kꞌet whulhꞌaíne bugha whutsꞌodulꞌeh

9ꞋEt ꞌawet ꞌuyoo khuni be whútsꞌodulꞌeh-i be bubulh yawhénilhduk whe njan ndutni, “ꞋIlhoghun dune ha niyeh kꞌet tsꞌekoo tooꞌ mai ꞌananla. Ha niyeh kꞌet háꞌ nulhyehne bughu whulhꞌai, ꞌinkꞌez saꞌ wheni nilhdzaꞌ keyoh tsꞌe whinya. 10ꞋEt ꞌawet mai oontajin néwhuninzut whe ꞌilhoghun de ꞌulhna-un butsꞌú whe yalhꞌaꞌ. ꞋEt ndai mai ootsꞌí tikulh-i, ooloh highá nodzaih. ꞋEt hoontsꞌi ha níyeh kꞌet bughu whulhꞌaine, ndun ꞌulhna-un yahíyalhchus ꞌinkꞌez la za-i whe whenáhinanyoot. 11ꞋInka doo cha ꞌuyoon de ꞌulhna-un butsꞌú whilhꞌaꞌ. ꞋEn cha yahíyalhchus, ꞌinkꞌez yooya hiyulhtsi, ꞌinkꞌez ꞌen cha la za-i whe whenáhinanyoot. 12ꞋEt búlh tane dude ꞌustle-un butsꞌú whilhꞌaꞌ. ꞋEn cha ka húyulhtsi ꞌinkꞌez tenáhinino.

13ꞋEt ha níyeh kꞌet whutꞌi-un ꞌutni, ‘Daoosneh cha há la? Sichꞌoh syeꞌ ookwꞌesiꞌ-un, ꞌen butsꞌítoosꞌaꞌ. ꞋEn la hiyanꞌen de, ꞌuntꞌoh-un kꞌunꞌa néꞌyiyoolhꞌen,’ ni.

14ꞋEt hoontsꞌi ndunne bughu whulhꞌaine hitilhꞌen whe ꞌet ꞌulhodutni, ‘Ndun ꞌen ha níyeh kꞌet oochꞌeꞌ-un ꞌen ooyeꞌ ꞌútꞌen. Tsꞌuzoolhghelh! ꞋEt de la ndet la ootsꞌó tiltsꞌulh-un tsꞌiyawh ꞌet ndúwhulcho whe netsꞌó tooltsꞌit.’ 15ꞋInka njan ha níyeh kꞌet tenáhinino ꞌinkꞌez hizilhghi. ꞋEt huwa ha níyeh kꞌet oochꞌeꞌ hoonli-un, dábooleh suba?

16Ndiz unꞌa njan ndutínelh, whusanátidalh ꞌinkꞌez ndunne mai kꞌet bughu whulhꞌaine, tsꞌiyawh gak ubutilhtselh. ꞋInkꞌez dumaiꞌ ha níyeh kꞌet ꞌuyoonne gha óotalhꞌalh.” ꞋEt ndune hohodántsꞌo whe ꞌuhutni, “ꞋAw uncha ꞌet ndulhúhoonel!”

17ꞋEt Jesus ꞌubunilhꞌen ꞌinkꞌez ꞌutni, “Ndi Yakꞌusda ooghuni daja ni whe ꞌukꞌeguz,

‘Ndi tse yoh ꞌuwhulhꞌenne ꞌún hidutilhꞌuz-i,

ꞌi yoh ookꞌu whuzꞌai-un huba ꞌukꞌenus tse ꞌuntꞌoh-i suliꞌ.’

18Mbene ndi tse yikꞌiltsꞌut-un, tsꞌiyawh yahidutátih. ꞋInkꞌez mbene la ndi tse bukꞌé diltsꞌutne, musai tileh.”

19Lizwif lubret bumoodihne, ꞌinkꞌez ndunne Moses be ꞌudustlꞌus ꞌukꞌu nunáguzne cha, ꞌet soo ꞌet sadzi hunitꞌo-un, ꞌenne Jesus hiyólhchoot hukwaꞌ hutꞌen. ꞋEt hoontsꞌi dune bubé hunuljut ꞌet huwun ꞌaw ꞌuhooneh ꞌaitꞌoh. Tꞌehoninzun ndi khuni bé whutsꞌodulꞌeh-i, didut buchꞌaz yalhduk whe ꞌutni ꞌet huwa.

Yun kꞌelha huhoolhꞌi-un hukwa huyoodulhkut

20ꞋInkꞌez highunli, ꞌinkꞌez tsꞌihꞌun ꞌuntꞌoh naꞌdudilꞌi nunúlꞌiꞌne, ꞌenne hitsꞌun whílhꞌaꞌ. Khun tilah Jesus ye yalhduk-i, ꞌi gha la huyoolhgooh. ꞋEt de la yun kꞌut whutꞌenne bumoodih yutlꞌa húyoolhtelh. ꞋEn ꞌuntꞌoh hoolhtus te neꞌutꞌen, ꞌinkꞌez tsꞌiyanne kꞌuneꞌ ꞌulꞌen. 21ꞋEt nunúlꞌiꞌne huyoodulhkut, “Whunehodulhꞌeh-un tꞌetsꞌoninzun tsꞌihꞌun unꞌa yailhduk. Tsꞌiyanne mba lhgha ꞌúhintꞌoh. Tsꞌihꞌun unꞌa Yakꞌusda kꞌunꞌa dune hodilhꞌeh. 22Nedini ndi yun hikꞌelha huyilhꞌi-i, tax huyúlhni-i, tsꞌihꞌun tilah ꞌuhoontꞌoh whe lerwe Caesar ꞌen ooba ꞌukꞌelha tsꞌuyoolhtselh, kꞌus ꞌawundooh tilah?”

23ꞋEt Jesus tꞌeooninzun ꞌonilha ꞌuhutni. ꞋInkꞌez ꞌubulhni, “Di ha sóolhdzih? 24Sooneya snalhtsꞌet nahꞌa! Mbe oonin ꞌinkꞌez booziꞌ cha ookꞌusguz?” ꞋEt ꞌuhuyulhni, “Lerwe Caesar ꞌuntꞌoh.”

25ꞋEt Jesus ꞌubulhni, “Ndi la Lerwe Caesar oochꞌeꞌ, ꞌi ootlꞌa náyahle. ꞋInkꞌez Yakꞌusda oochꞌeꞌ, ꞌi cha Yakꞌusda tlꞌa náhle.”

26Khuni be dunene bubulh yailhduk, ꞌi gha ꞌaw huyoolhgooh ꞌaitꞌoh. Tsꞌiyanne nalh bubudániꞌ whe tube buba hooncha suliꞌ, ꞌinkꞌez tsꞌiyawh tꞌehudínel.

Jesus dunádutádalh-un huwun huyoodulhkut

27ꞋEt oolune Sadduceene Jesus highu nindil. ꞋEnne ꞌuhutni datsꞌúzsai ꞌinkꞌez ꞌaw natsꞌukhótnah ꞌaítꞌoh. ꞋInkꞌez huyoodulhkut, 28“Dune hodulhꞌeh-un Moses daztitꞌelh-un neba ꞌukꞌehonguz wheꞌ hoontꞌoh. ꞋEt ꞌilhoghun dune buzkeh hooloh whe dazsai ꞌinkꞌez ooꞌat khuna de, dune bulhutsin ꞌen dughe inleꞌ-un yughu naoodaꞌ hubaꞌ hoontꞌoh. ꞋInkꞌez bubuzkeh whúzdliꞌ de, tsꞌoodunne dazsai-un, ꞌen booziꞌ huyólhchoot hubaꞌ hoontꞌoh. 29ꞋEt ꞌuhoontꞌoh lhtakꞌantꞌine lhulhutsinke hoonli. ꞋEn ꞌudetso whudilhdzulh-un, ꞌat ꞌutꞌi. ꞋInkꞌez ꞌaw buzkeh hooloh whe dazsai. 30ꞋEt bulh náne ꞌen ndun tsꞌeke yughu nasda. ꞋEn cha dune buzkeh hooloh whe dazsai. 31ꞋEt bulh tane, ꞌen cha yughu nasda. ꞋEt whuz unꞌa za tsꞌiyawh lhtakꞌantꞌine, tsꞌiyawh ndun tsꞌeke highu dáltsꞌiꞌ. ꞋInkꞌez tsꞌiyawh bubuzkeh lhuhóolel whe yahadla. 32ꞋEt ꞌudekꞌez ndun tsꞌeke cha dazsai. 33ꞋEt dune dunadidil de, ndun tsꞌeke mbe ooꞌat tileh? Lhtakꞌantꞌine tsꞌiyawh tsꞌeke bughindaꞌ.”

34ꞋEt Jesus ꞌubulhni, “Dune ꞌinkꞌez tsꞌekoo te ndi yun kꞌut tsꞌiyawh lhgho dilhtsꞌi ꞌinkꞌez lhgha ba hanla. 35ꞋEt ndet la ꞌoh de de whusawhútiltsꞌulh whe mbene la Yakꞌusda ba hoonzoo whe bughá whultsꞌutne yaidlane toh dunahudutádulh ꞌinkꞌez yakꞌuz hutidulh. Whuz ꞌaw dune lhghu lhdíltsꞌih wheꞌ hoontꞌoh. 36ꞋAw doo cha yahódlah ꞌaitꞌoh. Yakꞌusda buzkeh huzdliꞌ ꞌinkꞌez lizasne bubulh hulhgha ꞌuhintꞌoh. ꞋEnne dujihne ꞌuhintꞌoh. 37ꞋInkꞌez Moses ꞌen tsꞌihꞌun newhuninꞌai yaidlane dunahudutádulh wheꞌ hoontꞌoh. ꞋEt ꞌoh daꞌ dilhtan-i toh whudizkꞌun ꞌet hoontsꞌi ꞌaw whudókꞌun ꞌaitꞌoh. ꞋEn Moodihti ghu yalhduk whe njan ndutni, ‘Abraham ooYakꞌusda, Isaac cha ooYakꞌusda, ꞌinkꞌez Jacob cha ooYakꞌusda ꞌuntꞌoh,’ ni. 38ꞋAw yaidlane buYakꞌusda lhiloh, khunane buYakꞌusda ꞌuntꞌoh. ꞋEn be tsꞌiyanne hukhuna.”

39ꞋInkꞌez whulohne Moses be ꞌudustlꞌus ꞌukꞌu nunáguzne ꞌuhuyúlhni, “Dune hodulhꞌeh-un tube sooꞌ dinja!” 40ꞋEt whe hunilhjoot. ꞋAw ꞌon ꞌun huyoodolhkut ꞌaitꞌoh.

Ntsꞌenꞌa Christ ꞌen David ootsꞌuhainzut-un ꞌuntꞌoh?

41ꞋInkꞌez ꞌubulhni, “Ntsꞌenꞌa oolohne nduhutni, Christ dahni-un, David ootsꞌuhainzut-un ꞌuntꞌoh? 42David dichꞌoh ꞌet ndutni Yakꞌusda ooghuni Shun be ꞌudustlꞌus kꞌut,

‘Moodihti ꞌen SMoodihti ꞌuyulhni,

Snailhni tsꞌunkꞌus sinda,

43nchꞌaz ditnine bukꞌut nke naóolhyis mba ubooselh.’

44ꞋEt huwa David, ‘SMoodihti,’ yulhni, ntsꞌenꞌa suba Christ ꞌen ootsꞌuhainzut-un ooleꞌ?”

Jesus dune ubúlhni, “Moses ooghuni ꞌukꞌu nunáguzne buchꞌa kháhdli”

45ꞋEt tsꞌiyanne dune huyoozilhtsꞌai whe Jesus yugha hodulꞌehne ꞌet ndúbulhni, 46“Moses be ꞌudustlꞌus ꞌukꞌu nunáguzne, naih nyiz-i be húdilhtsꞌi, ꞌinkꞌez tꞌalh-i be ꞌóoket-un, ꞌet tsꞌiyanne hubodílhtiꞌ whe hadih ꞌuhútni, ꞌet huhóontꞌiꞌ. ꞋInkꞌez lizwif bulugliz soo kꞌus hoonzoo-un hudutáltsꞌilh hukwaꞌ huninzun. ꞋInkꞌez dune ghunuda-un, kꞌus hoonzoo-un hutidalh hukwaꞌ huninzun. Nduntꞌohne soo cho buka tse hoohli! 47Tsandilhne buyoh bugha ha hódunitꞌah ꞌinkꞌez bughu huhoolhchuk. ꞋInkꞌez ꞌonilha saꞌ cho tenahududli hoohoolhꞌi. ꞋEnne ꞌon nus ꞌuwhulcho whe buba nahutideh.”

Selectat acum:

Luke 20: crx

Evidențiere

Partajează

Copiază