John 17

Jesus Christ dichꞌoh duBá tenadudli

1Jesus njan ꞌet ndudániꞌ hukwꞌelhꞌaz, ndo yakꞌuz yutanꞌen ꞌinkꞌez ꞌutni, “ꞋUBá, ꞌawet stsꞌo dizulh-un ꞌawet whusahóoltsꞌut. NYeꞌ ooba whudílhtiꞌ ꞌet whe la NYeꞌ cha mba whudólhtiꞌ. 2ꞋEt ntsꞌenꞌa whe yinka whuduneꞌne tsꞌiyawh buba ndo ootꞌeꞌ-un, ꞌet oogha óoninꞌai, ꞌet whe la mbene la sghá buninlane ꞌilhiz wheni huye khútinalh-i bugha ítasꞌalh. 3Ndi ꞌilhiz be khuna-i ꞌuntꞌoh, Nyun za tsꞌihꞌun Yakꞌusda inli, ꞌinkꞌez mbene la Jesus Christ whuz de haílhꞌaꞌ-un, ꞌen ꞌuntꞌoh whe ꞌenne bughun soo dudeni be tꞌéhoninzunne, ꞌenne ndi ꞌilhiz huye khuna-i huyutꞌi ꞌet ꞌuhoontꞌoh. 4ꞋUtꞌen sgha nínꞌai-i ꞌawet lhadúsdla whe ndi yun kꞌut mba whudástiꞌ. 5ꞋInka sBá, ndi yun kꞌut ꞌuwhutálnelh whutsodaꞌ, ndai la nyun bulh ꞌoh daꞌ bé whúdaltiꞌ-i, ꞌi be ꞌandit doo cha za sba whudílhtiꞌ. 6Mbene la ndi yun kꞌut whuduneꞌne butoh sghá buninlane, tsꞌiyawh nyun nghun whúbunistan. Nyun Nchꞌeꞌ hinli whe sghá buninla ꞌinkꞌez nghuni hikꞌúneꞌ ꞌustꞌen. 7Ndai la sgha nínla-i, ꞌi tsꞌiyawh nyun ntsꞌu haínkat-i ꞌuntꞌoh. ꞋEt ꞌandit dudeni be tꞌehonínzun. 8Ndai la khuni ꞌenne buba stlꞌa dánꞌai-i, ꞌi cha bugha ínusꞌai. Soo cho huyílhchoot ꞌinkꞌez dudeni be tꞌehonínzun, ꞌet huwa Nyun ntsꞌu hásya ꞌinkꞌez Nyun whuz de sútilhꞌaꞌ, ꞌet cha dudeni be tꞌehonínzun ꞌinkꞌez buba ꞌalha ꞌuhoontꞌoh. 9Buba tenadusdli. ꞋAw ndi yun kꞌut whuduneꞌne, ꞌenne iloh buba tenadusdli. Mbene la sghá buninlane, ꞌenne za buba tenadusdli, nyun nchꞌeꞌ hinli ꞌet huwa. 10Ndai la si schꞌeꞌ unli-i, ꞌi nyun nchꞌeꞌ ꞌuntꞌoh, ꞌinkꞌez ndai la nyun nchꞌeꞌ unli-i, si schꞌeꞌ ꞌuntꞌoh. ꞋInkꞌez ꞌenne bugha ꞌawet sba whudáltiꞌ. 11ꞋAw ꞌon ꞌun ndi yun kꞌut susda íloh ꞌinkꞌez ntsꞌun usyalh, ꞌet hoontsꞌi ndunne, ꞌenne ndi yun kꞌut ꞌuhintꞌoh. ꞋUbá, lubeshi ooghu hooloh ꞌintꞌoh, ꞌinkꞌez ndunne sghá buninlane, nyooziꞌ ꞌi be huboontun, ꞌi be la nyun si bulh ꞌilho ídli, whuz unꞌa la didut cha ꞌilho hooleꞌ. 12Mbene la sghá buninlane, ndi yun kꞌut ꞌawhuz bubulh ꞌústꞌoh daꞌ, nyooziꞌ ꞌi be hubostun ꞌinkꞌez bughosdleꞌ. ꞋEt ꞌaw kwuncho yo whuyeꞌ, ꞌen iloh, ꞌet huwa la ntsꞌoh te la ooghun ꞌukꞌuneꞌ ꞌúsguz inleꞌ-un, ꞌoh te néꞌhootꞌen. 13ꞋAndit ꞌawet ntsꞌun tisya. ꞋEt hoontsꞌi ꞌawhuz ndi yun kꞌut susda whe njan ꞌet howu yasduk, ꞌet whe la soo tsꞌihꞌun unꞌa ndai la be whúnusni-i, ꞌi be budzi doobun. 14Nghuni bugha ídisꞌai ꞌinkꞌez ndi yun kꞌut whuduneꞌne butsꞌu hudutni. Ntsꞌenꞌa la si ꞌaw ndi yun kꞌut whuduneꞌne bubundulh lhuztꞌoh ꞌet whuz unꞌa ꞌenne cha ꞌaw ndi yun kꞌut whuduneꞌne bubundulh lhúhiltꞌoh. 15ꞋAw ndi yun kꞌut whuchꞌa nabónlelh-un, ꞌet iloh ntsꞌu húkwaꞌ dusni, ꞌet hoontsꞌi ntsiꞌ-un, ꞌen chꞌa soo cho bughonleꞌ, ꞌet ntsꞌu húkwaꞌ dusni. 16Ntsꞌenꞌa la si ꞌaw ndi yun kꞌut whuduneꞌne bubundulh lhuztꞌoh, ꞌet whuz unꞌa ꞌenne cha ꞌaw si skꞌunꞌa ndi yun kꞌut whuduneꞌne bubundulh lhulhusdloh. 17Khuni ꞌalhaꞌ ꞌuntꞌoh-i ntsꞌu ha díltsꞌut, ꞌi be nyunchꞌoh mba ꞌudun nébuninle. Nghuni ꞌi khuni ꞌalhaꞌ ꞌuntꞌoh-i ꞌuntꞌoh. 18Ntsꞌenꞌa la nyun ndi yun kꞌut whuduneꞌne butsꞌun whusalhꞌaꞌ, ꞌet whuz unꞌa ꞌenne ndi yun kꞌut whuduneꞌne butsꞌun whebisꞌaꞌ. 19ꞋInkꞌez ꞌenne bugha si ꞌudun neꞌdunuzti, ꞌet whuz unꞌa la ꞌenne cha nyun mba ꞌudun nebuninlane hooleꞌ. 20ꞋAw ndunne, ꞌenne za iloh buba tenadusdli, mbene la bughuni gha si sghun ooba ꞌalhaꞌ ꞌuwhutatꞌelhne, ꞌenne cha buba tenadusdli. 21ꞋEt de la soo tsꞌiyanne ꞌilhoh ꞌudulhne hooleꞌ. ꞋUBá ntsꞌenꞌa la nyun syudínda, ꞌinkꞌez si cha nyudúsda, ꞌet whuz unꞌa za neyó ꞌuhootꞌeꞌ. ꞋEt whe la yinka whuduneꞌne soo tsꞌihꞌun unꞌa buba ꞌalhaꞌ ꞌuhotꞌeꞌ nyun whuz de sútilhꞌaꞌ. 22ꞋInkꞌez ndi be dustiꞌ sgha nínꞌai-i, ꞌon ꞌun bugha ínusꞌai. ꞋI be la Nyun si bulh da ítꞌoh whe la ꞌilho idli, whuz unꞌa za ꞌilho hooleꞌ. 23Si buyoghi usdli ꞌinkꞌez Nyun si syoghi inli, ꞌet whuz unꞌa la ndunne ꞌilho hinli whe lhahádootneh. ꞋEt huwa la yinka whuduneꞌne soo dudeni be tꞌéhonózin Nyun whuz de sútilhꞌaꞌ. ꞋInkꞌez ntsꞌenꞌa la skꞌeinsiꞌ, whuz unꞌa ꞌenne cha bukꞌeinsiꞌ. 24ꞋUBá ndi yun kꞌut ꞌuwhutálnelh whutsodaꞌ skꞌeinsiꞌ, ꞌinkꞌez bé dustiꞌ-i sgha nínꞌai ínleꞌ, ꞌet soo cho huwhutiꞌelh hukwaꞌ nuszun. ꞋEt huwa ndunne sghá buninlane, ꞌandit ntsꞌe ꞌustꞌoh ꞌet sulh ꞌúhootꞌeꞌ hukwaꞌ nuszun. 25ꞋUBá Nyun tsꞌihꞌun ꞌuntꞌoh-un inli. ꞋEt yinka whuduneꞌne Nyun nghun ꞌaw dudeni be tꞌényonúszun. ꞋEt si tꞌényunúszun ꞌinkꞌez ndunne sulh ꞌútꞌenne cha tꞌéhonínzun Nyun whuz de sútilhꞌaꞌ. 26ꞋInkꞌez Nyun nghun soo cho dudeni be tꞌehonózin ubuzúsi. ꞋInkꞌez Nyun nghun ꞌon ꞌun cha soo cho tꞌéhontázin ubutíselh. ꞋEt huwa la ndai la be skꞌensiꞌ-i buyo doꞌaꞌ, ꞌinkꞌez si cha buyo dutisdalh.”

Selectat acum:

John 17: crx

Evidențiere

Partajează

Copiază