ᒨᓯᓯ ᓯᕗᓪᓖᑦ 26
26
ᐂᓴᑭᐅᑉ ᓄᓇᖃᕐᓂᖓ ᔨᕌᕆᒥ
1ᑕᕝᕙ ᑕᒫᓂ ᓄᓇᓕᒫᒥ ᑳᖕᓇᕐᑐᕐᔪᐊᖑᓕᕆᕗᖅ, ᓯᕗᓂᖓᒍᑦ ᑍᒤᓚᐅᕐᓂᕐᒥᑐᑦ ᐂᑉᕋᕼᐋᒻ ᐃᓅᑎᓪᓗᒍ. ᐂᓴᑭᓗ ᓄᓇᒧᑦ ᒋᕌᕆᒧᐊᕐᐳᖅ, ᐊᐱᒥᓕᑭᒧᐊᕐᓗᓂ ᐱᓕᔅᑍᓂᒥ ᐊᖓᔪᖅᑳᕐᔪᐊᖑᔪᒧᑦ. 2ᐊᑕᓂᖅ ᓴᖅᑭᓚᐅᕐᒪᑦ ᐂᓴᑭᒧᑦ ᐅᖃᕐᓗᓂ, “ᐄᑦᔨᑉᑎᒧᐊᕐᓂᐊᕐᓇᒃ; ᓇᔪᕐᑕᐅᖁᔭᓐᓂ ᐅᖃᐅᑎᓂᐊᕐᐸᒋᑦ ᓄᓇᒋᓂᐊᕐᑕᕐᓂᒃ. 3#ᒨᓯᓯ ᓯᕗᓪᓖᑦ 22:16-18.ᑕᒫᓂ ᓄᓇᖃᑬᓐᓇᓕᕆᑦ, ᐃᓚᒋᓂᐊᕐᐸᒋᑦ, ᓮᒻᒪᕐᑎᓪᓗᑎᓪᓗ; ᐃᓕᖕᓄᑦ ᑭᖑᕚᕐᓄᓪᓗ ᓄᓁᑦ ᑕᒪᒃᑯᐊ ᑐᓂᔪᒫᕋᒃᑭᑦ, ᐊᖏᕈᑎᒋᓯᒪᔭᕋᓗ ᑲᔪᓯᑎᑦᓱᒫᕐᐸᕋ ᐊᑖᑕᖕᓄᑦ ᐂᑉᕋᕼᐋᒧᑦ ᐅᖃᕕᒍᑎᒋᓚᐅᕐᑕᕋ. 4ᑭᖑᕚᑎᑦ ᐅᓄᕐᑐᕐᔪᐊᓐᖑᕐᑎᑦᓱᒫᕐᐸᒃᑲ ᕿᓚᐅᑉ ᐅᓪᓗᕆᐊᖏᑎᑐᑦ, ᑕᒪᒃᑯᐊᓗ ᓄᓇᒋᔭᐅᔪᓕᒫᑦ ᑐᓂᔪᒫᕐᐸᒃᑲ ᑭᖑᕚᕐᓄᑦ; ᑭᖑᕚᑎᓪᓗ ᐊᖅᑯᑎᒋᓗᒋᑦ ᐃᓅᖃᑎᒌᒡᔪᐊᑦ ᓄᓇᕐᔪᐊᕐᒥ ᓮᒻᒪᕐᑎᑕᐅᔪᒫᕐᐳᑦ; 5ᐂᑉᕋᕼᐋᒻ ᓂᐱᓐᓂᒃ ᓈᓚᓚᐅᕐᓂᖓᓄᑦ ᐊᖓᔪᖅᑳᖑᓂᓐᓂᒃ, ᐊᑐᕐᑕᐅᖁᔭᓐᓂᒡᓗ, ᒪᓕᒐᒃᓴᐅᖁᔭᓐᓂᒡᓗ ᐱᖁᔭᓐᓂᒡᓗ ᒪᓕᑦᓯᐊᓚᐅᕐᒪᑦ.”
6ᑍᒤᒻᒪᑦ ᐂᓴᑭ ᓄᓇᖃᓕᓚᐅᕐᐳᖅ ᒋᕌᕆᒥ. 7#ᒨᓯᓯ ᓯᕗᓪᓖᑦ 12:13; 20:2.ᑕᕝᕙᓂᓕ ᐊᖑᑎᓂᑦ ᓄᓇᖃᕐᑐᓂᑦ ᐊᐱᕆᔭᐅᔭᕌᖓᒥ ᓄᓕᐊᖓᑕ ᒥᒃᓵᓄᑦ ᐅᖃᖃᑦᑕᕐᐳᖅ, “ᓇᔭᒐᐅᓇ”; ᑲᑉᐱᐊᓱᓚᐅᕋᒥ ᐅᖃᕆᐊᒃᓴᖅ, “ᐅᓇ ᓄᓕᐊᕋ.” ᐃᓱᒪᓚᐅᕋᒥ, “ᐊᖑᑎᓄᑦ ᑐᖁᑕᐅᑐᐃᓐᓇᕆᐊᖃᕐᐳᖓ ᕇᐱᑲ ᐱᑦᔪᑎᒋᓗᒍ”; ᑖᓐᓇ ᐃᓂᖁᓇᕐᑐᒻᒪᕆᐅᖕᒪᑦ. 8ᐊᑯᓂ ᑕᕝᕙᓃᓯᒪᓕᕐᑎᓪᓗᒍ, ᐊᐱᒥᓕᑭ ᐱᓕᔅᑍᓂᒥᐅᑦ ᐊᖓᔪᖅᑳᕐᔪᐊᖓᑦ ᐃᒐᓛᒥᒍᑦ ᐃᑦᑐᐊᖓᓪᓗᓂ ᑕᑯᓐᓇᕐᐳᖅ ᐂᓴᑭ ᕇᐱᑲᒥᒃ ᐃᕿᒻᒥᑎᓪᓗᒍ ᓄᓕᐊᒥᑐᑦ. 9ᐊᐱᒥᓕᑭᐅᓪᓗ ᐂᓴᑭ ᕾᖁᕚ, ᐅᖃᐅᑎᓪᓗᒍᓗ, “ᑕᑯᒋᑦ, ᑖᓐᓇ ᐊᕐᓇᖅ ᓄᓕᐊᕆᕙᑦ; ᓱᒻᒪᓪᓕ ᐅᖃᖃᑦᑕᕐᐱᑦ, ‘ᐅᓇ ᓇᔭᒐ?’”
ᐂᓴᑭᐅᑉ ᑭᐅᕚ, “ᐃᓱᒪᖃᑦᑕᓚᐅᕋᒪ ᑐᖁᑕᐅᓂᐊᕋᓱᒋᓪᓗᖓ.”
10ᐊᐱᒥᓕᑭᓕ ᐅᖃᓕᕐᐳᖅ, “ᐅᕙᑦᑎᓐᓄᑦ ᖃᓄᐃᓕᐅᕋᓱᖕᓂᕐᐱᑦ? ᐊᖑᑎᑦ ᐃᓚᖓᓐᓄᑦ ᓄᓕᐊᑦ ᐃᓐᓇᖓᖃᑎᒋᔭᐅᔪᓐᓇᓚᐅᕐᐳᖅ, ᐃᓐᓇᖓᖃᑎᒋᔭᐅᓐᓂᕐᐸᑦ ᑕᕝᕙ ᐅᕙᑦᑎᓐᓂᒃ ᐸᓯᔭᒃᓴᓐᖑᕐᑎᑦᓯᒐᔭᓚᐅᕐᐳᑎᑦ.” 11ᐊᐱᒥᓕᑭᓗ ᐃᓄᓕᒫᓄᑦ ᐅᓗᕆᐊᓇᕐᑐᒥᒃ ᐅᖃᓕᕐᐳᖅ ᐃᒫᒃ: “ᓇᓪᓕᐊᑦ ᐆᒥᖓ ᐊᖑᒻᒥᒃ ᓄᓕᐊᖓᓂᒡᓘᓐᓃᑦ ᐊᒃᑐᐃᔪᖅ ᑖᓐᓇ ᑐᖁᑕᒃᓴᐅᕗᖅ.”
12ᐂᓴᑭᓗ ᑕᕝᕙᓂ ᓄᓇᒥ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᕗᖅ, ᑕᒪᑐᒪᓂᓗ ᐊᕐᕌᒍᒥ ᐱᕈᕐᑐᓂᒃ ᑲᑎᕐᓱᐃᓚᐅᕐᐳᖅ 100ᐃᕐᑐᓪᓗᐊᕐᑐᓂᒃ ᐅᓄᕐᓂᕐᓴᓂᒃ, ᐊᑕᓂᐅᑉ ᓮᒻᒪᕐᑎᓚᐅᕐᒪᒍ. 13ᐊᖑᓪᓗ ᐊᒃᓗᐃᑦᑑᐊᓘᓕᓚᐅᕐᐳᖅ, ᐱᑖᕐᐸᓪᓕᐊᑐᐃᓐᓇᕐᓗᓂ ᐊᔪᕐᓴᖏᑦᑐᕐᔪᐊᖑᓂᕐᒧᑦ ᐊᒡᓛᑦ ᑎᑭᓪᓗᓂ. 14ᐆᒪᔪᖁᑎᖃᓚᐅᕐᒪᑦ ᐅᓄᕐᑐᒻᒪᕆᐊᓗᖕᓂᒃ ᓰᐱᓂᒃ ᐃᒻᒧᒃᓯᐅᒐᕐᓂᒡᓗ, ᐱᔨᖃᕐᓗᓂᓗ ᐅᓄᕐᑐᓂᒃ, ᐱᓕᔅᑍᓂᒥᐅᓂᓪᓗ ᐊᒡᓛᑦ ᓱᒐᓗᓗᐊᕆᔭᐅᓕᓚᐅᕐᐳᖅ. 15ᑍᒤᒻᒪᑦ ᐃᒥᕐᑕᕐᕕᓕᒫᑦ ᐱᓕᔅᑍᓂᒥᐅᓂᑦ ᓄᓇᒥᒃ ᐃᓗᓪᓕᕐᓱᕐᑕᐅᓚᐅᕐᐳᑦ ᑕᑕᓪᓗᒋᑦ ᐂᓴᑭᐅᑉ ᐊᑖᑕᖓᑕ ᐂᑉᕋᕼᐋᒻ ᐱᔨᖏᓐᓄᑦ ᐃᑎᕐᓴᓕᐅᕐᑕᐅᓯᒪᔪᑦ ᓱᓕ ᐂᑉᕋᕼᐋᒻ ᐃᓅᑎᓪᓗᒍ.
16ᑕᕝᕙ ᐊᐱᒥᓕᑭ ᐅᖃᓕᕐᐳᖅ ᐂᓴᑭᒧᑦ, “ᓄᓇᑦᑎᓐᓂᑦ ᐊᐅᓪᓚᓕᕆᑦ; ᐅᕙᑦᑎᓐᓂᑦ ᐊᒡᓛᑦ ᐱᔪᓐᓇᕐᓂᕐᓴᐅᓕᕋᕕᑦ.” 17ᑍᒤᒻᒪᑦ ᐂᓴᑭ ᑕᕝᕙᓐᖓᑦ ᓄᓇᒥᑦ ᐊᐅᓪᓚᕐᐳᖅ, ᑕᖕᒫᕐᓗᓂᓗ ᒋᕌᕆᐅᑉ ᓇᕐᓴᖓᓂ, ᑕᕝᕙᓂᓗ ᓄᓇᖃᓕᕐᓗᓂ. 18ᑕᕝᕙ ᑕᒫᓂ ᐃᒥᕐᑕᕐᕕᖕᓂᒃ ᐃᑎᕐᓴᓕᐅᕆᒋᕗᖅ ᐂᑉᕋᕼᐋᒻ ᐃᓅᑎᓪᓗᒍ ᐃᒥᕐᑕᕐᕕᓕᐊᕆᔭᐅᓚᐅᕐᑐᓂᒃ; ᑖᒃᑯᐊ ᐱᓕᔅᑍᓂᒥᐅᓂᑦ ᓄᓇᒥᒃ ᐃᓗᓪᓕᕐᓱᕐᑕᐅᓚᐅᕐᒪᑕ ᐂᑉᕋᕼᐋᒻ ᑐᖁᖓᑕ ᑭᖑᓂᖓᓂ; ᐂᓴᑭᐅᓪᓗ ᑍᒫᑦᓮᓐᓇᖅ ᐊᑎᖃᕐᑎᑉᐰᑦ ᐊᑖᑕᖓᑕ ᐊᑎᖃᕐᑎᓚᐅᕐᑕᖏᑎᑐᑦ.
19ᐂᓴᑭᐅᓪᓗ ᐱᔨᖏᑦ ᐃᒥᕐᑕᕐᕕᒃᓴᒥᒃ ᐃᑎᕐᓴᓕᐅᕆᕗᑦ ᑕᒫᓂ ᓇᕐᓴᒥ ᓇᓂᓯᓪᓗᑎᒡᓗ ᐃᒥᕐᒥᒃ ᓄᓇᐅᑉ ᐃᓗᐊᓂᑦ ᑰᒃᑐᒥᒃ. 20ᓰᐱᓕᕆᔩᓪᓗ ᑕᒫᓂ ᒋᕌᕆᒥᐅᑦ ᐂᕙᖃᑎᖃᓕᓚᐅᕐᐳᑦ ᐂᓴᑭᐅᑉ ᓰᐱᓕᕆᔨᖁᑎᖏᓐᓄᑦ ᐅᖃᕐᓗᑎᒃ, “ᐅᓇᓕ ᐃᒪᖁᑎᕗᑦ.” ᑍᒤᒻᒪᑦ ᐂᓴᑭᐅᑉ ᑖᓐᓇ ᐃᒥᕐᑕᕐᕕᒃ ᐊᑦᓯᕐᐹ ᐃᓰᒃᒥᒃ, ᑕᒫᓂ ᐂᕙᖃᑎᒋᔭᐅᓚᐅᕋᒥᒃ.
21ᐃᒥᕐᑕᕐᕕᒃᓴᒥᒡᓗ ᐃᑎᕐᓴᓕᐅᕆᒃᑲᓐᓂᕆᕗᑦ, ᑖᓐᓇᓕᑦᑕᐅᖅ ᓱᓕ ᐂᕙᑦᔪᑕᐅᓕᕆᕗᖅ, ᑍᒤᒻᒪᑦ ᐊᑦᓯᕆᕚ “ᓯᑦᓇᒥᒃ.” 22ᑕᕝᕙᓐᖓᓪᓗ ᓄᓇᒥᑦ ᓅᓐᓇᒥ ᐊᓯᐊᓄᑦ ᐃᒥᕐᑕᕐᕕᒃᓴᒥᒃ ᐃᑎᕐᓴᓕᐅᕆᒃᑲᓐᓂᕆᕗᖅ, ᑖᓐᓇᓕ ᐂᕙᑦᔪᑕᐅᓐᖏᓚᖅ, ᑍᒤᒻᒪᑦ ᐊᑦᓯᕐᐹ “ᕆᕼᐅᐳᑎᒥᒃ.” ᐅᖃᕐᓗᓂ, “ᒫᓐᓇ ᐊᑕᓂᐅᑉ ᐃᓂᑖᕐᑎᑉᐹᑎᒍᑦ, ᑕᒫᓂᓗ ᐱᕙᓪᓕᐊᑦᓯᐊᕈᓐᓇᕐᓂᐊᓕᕐᐳᒍᑦ.”
23ᑕᒫᓐᖓᓪᓗ ᐱᓪᓗᓂ ᐱᐊᕐᓯᐸᒧᐊᕐᐳᖅ. 24ᑕᒪᑐᒪᓂᓗ ᐅᓐᓄᐊᒥ ᐊᑕᓂᖅ ᓴᖅᑭᑉᐳᖅ ᑖᑦᓱᒧᖓ ᐅᖃᕐᓗᓂᓗ, “ᐊᑖᑕᕕᑦ ᐂᑉᕋᕼᐋᒻ ᒎᑎᒋᕚᖓ; ᑲᑉᐱᐊᓱᖕᓂᐊᕐᓇᒃ, ᐃᓚᒋᕙᒋᑦ ᓮᒻᒪᕐᑎᓐᓂᐊᕐᐸᒋᓪᓗ ᑭᖑᕚᑎᓪᓗ ᐅᓄᕐᓯᑎᑦᓱᒫᕐᐸᒃᑲ ᐱᔨᒐ ᐂᑉᕋᕼᐋᒻ ᐱᑦᔪᑎᒋᓪᓗᒍ.” 25ᑕᕝᕙᓂᓗ ᐂᓴᑭ ᑐᓂᕐᕈᓯᕐᕕᓕᐅᕐᐳᖅ ᑐᒃᓯᐊᕐᓗᓂᓗ ᐊᑕᓂᕐᒧᑦ, ᑕᕝᕙᓂᓗ ᑕᖕᒫᕐᑎᕐᓗᓂ, ᐱᔨᖏᓪᓗ ᐃᒥᕐᑕᕐᕕᒃᓴᒥᒃ ᐃᑎᕐᓴᓕᐅᕆᕗᑦ.
ᐂᓴᑭᐅᑉ ᐊᐱᒥᓕᑭᐅᓪᓗ ᐊᖏᖃᑎᒌᖕᓂᖏᒃ
26 #
ᒨᓯᓯ ᓯᕗᓪᓖᑦ 21:22. ᐊᐱᒥᓕᑭᓗ ᒋᕌᕆᒥᓐᖔᕐᓗᓂ ᑎᑭᑉᐹ ᐃᓚᖃᕐᓗᓂ ᐊᕼᐅᔮᑎᒥᒃ ᐃᓱᒪᓕᐅᕐᑎᒥᓂ ᐱᑰᓕᒥᒡᓗ ᐅᓇᑕᕐᑐᒃᓴᖁᑎᖏᓐᓄᑦ ᐊᖓᔪᖅᑳᖑᔪᒥᒃ. 27ᑕᕝᕙ ᐂᓴᑭᐅᑉ ᐊᐱᕆᕔᑦ, “ᓱᖕᒪᑦ ᐅᕙᓐᓄᑦ ᑎᑭᑉᐱᓯ, ᖃᐅᔨᓚᐅᕋᒪ ᐆᒥᒋᓪᓗᖓ ᐊᐅᓪᓚᕐᑎᓚᐅᕋᑦᓯᓐᖓ?”
28ᑖᒃᑯᐊ ᑭᐅᕚᑦ, “ᒫᓐᓇ ᓇᓗᓇᖏᑦᑐᒥᒃ ᖃᐅᔨᒐᑦᑕ ᐊᑕᓂᐅᑉ ᐃᓚᒋᖕᒪᑎᑦ; ᐅᖃᓕᕐᐳᒍᑦ, ᐅᖃᕕᖃᑎᒌᒋᐊᖃᕋᑦᑕ ᐃᓕᖕᓄᑦ ᐅᕙᑦᑎᓐᓄᓪᓗ, ᐊᖏᖃᑎᒌᒍᑎᓕᐅᓚᐅᕐᑕ ᐃᓕᖕᓄᑦ. 29ᐅᕙᑦᑎᓐᓂᒃ ᖃᓄᐃᓕᓯᖁᓇᒃ, ᑍᒫᒃᑕᐅᖅ ᐃᓕᑦᓯᓐᓂᒃ ᐊᒃᑐᕐᓯᓚᐅᖏᓐᓇᑦᑕ ᖃᓄᐃᓕᓯᓚᐅᕋᑕᓗ ᐱᐅᔪᒥᒃ ᐱᓂᐊᕐᓂᖃᕐᓗᑕ ᓮᒪᓇᕐᑐᒥᒃ ᐊᐅᓪᓚᕐᑎᑦᓯᓚᐅᕐᐳᒍᑦ. ᒫᓐᓇᓗ ᐊᑕᓂᐅᑉ ᓮᒻᒪᕐᑎᓯᒪᕚᑎᑦ.” 30ᑍᒤᒻᒪᑦ ᓂᕆᓂᐊᕐᑕᖏᓐᓂᒃ ᐊᑐᐃᓐᓇᕈᕐᑎᕆᕗᖅ, ᑖᒃᑯᐊᓗ ᓂᕆᕗᑦ ᐃᒥᕐᓗᑎᒡᓗ. 31ᖃᐅᑎᓪᓗᒍᓕ ᐅᓪᓛᒻᒪᕆᒃᑯᑦ ᑖᒃᑯᐊ ᐊᑐᓂᑦ ᐅᖃᕕᒍᑎᓕᐅᕐᐳᑦ ᐃᒻᒥᖕᓄᑦ; ᐂᓴᑭᐅᓪᓗ ᐊᐅᓪᓚᕐᑎᑉᐰᑦ, ᐊᕕᓕᕐᓗᑎᒡᓗ ᐃᓚᓐᓇᕇᑦᓯᐊᕐᓗᑎᒃ.
32ᐅᓪᓗᒥᓗ ᑖᑦᓱᒪᓂ ᐂᓴᑭᐅᑉ ᐱᔨᖏᑕ ᐅᐸᒡᓗᒍ ᐃᒥᕐᑕᕐᕕᒃᓴᒥᒃ ᐃᑎᕐᓴᓕᐅᕐᑕᒥᖕᓂᒃ ᐅᖃᐅᑎᕚᑦ, “ᐃᒥᕐᒥᒃ ᓇᓂᓯᕗᒍᑦ.” 33ᑖᓐᓇᓗ ᐃᒥᕐᑕᕐᕕᒃ ᐊᑦᓯᕐᐹ “ᓯᐸᒥᒃ.” ᑍᒫᒃ ᑕᕝᕙ ᐃᒡᓗᒐᓮᑦ ᐱᐊᕐᓯᐸᒥᒃ ᐊᑎᖃᓕᕐᐳᑦ ᐅᓪᓗᒥᒧᑦ ᑎᑭᓪᓗᒍ.
ᐄᓴᐅᑉ ᐃᓅᖃᑎᒃᓴᔭᕆᓐᖏᑕᒥᓂᒃ ᓄᓕᐊᕐᑖᕐᓂᖓ ᒪᕐᕉᖕᓂᒃ
34ᐄᓴᓕ ᐊᕐᕌᒍᖃᓕᕐᓗᓂ 40ᓂᒃ, ᓄᓕᐊᓂᓚᐅᕐᐳᖅ ᔫᑎᑕᒥᒃ ᐲᕆᐅᑉ ᐸᓂᖓᓂᒃ ᕼᐃᑍᑎᒥᐅᑕᒥᒃ, ᐸᓯᒫᑎᒥᒡᓗ ᐃᓘᓂᐅᑉ ᐸᓂᖓᓂᒃ ᕼᐃᑍᑎᒥᐅᑕᐅᖕᒥᔪᒥᒃ. 35ᑖᒃᑯᐊᒡᓕ ᐂᓴᑭᐅᑉ ᕇᐱᑲᐅᓪᓗ ᐃᓅᓯᖏᖕᓂᒃ ᖁᕕᐊᓇᕐᑎᑦᓯᓚᐅᓐᖏᓚᒃ.
Selectat acum:
ᒨᓯᓯ ᓯᕗᓪᓖᑦ 26: EAIB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Eastern Arctic Inuktitut Bible © Canadian Bible Society, 2012, 2021-2023.