ᒨᓯᓯ ᓯᕗᓪᓖᑦ 23
23
ᓵᕋᐅᑉ ᑐᖁᓂᖓ ᐂᑉᕋᕼᐋᒻᓗ ᐃᓗᕕᕐᕕᒃᓴᒥᒃ ᓂᐅᕕᕐᓂᖓ
1ᓵᕋᓗ ᐃᓅᓚᐅᕐᐳᖅ ᐊᕐᕌᒍᓂᒃ 127ᓂᒃ; ᑖᒃᑯᐊ ᑕᕝᕙ ᓵᕋᐅᑉ ᐊᕐᕌᒍᒋᓚᐅᕐᑕᖏᑦ. 2ᓵᕋᓗ ᑐᖁᓚᐅᕐᐳᖅ ᓄᓇᒥ ᑭᕆᐊᑦ-ᐊᕋᐸᒥ (ᑍᔭᐅᔪᖅ ᕼᐃᐸᕋᓐᒥᒃ) ᑬᓇᓂᒥ, ᐂᑉᕋᕼᐋᒻᓗ ᐅᐸᒃᓗᒍ ᕿᒃᓵᒍᑎᒋᕚ ᓵᕋ ᕿᐊᑦᔪᑎᒋᓪᓗᒍ.
3ᐂᑉᕋᕼᐋᒻᓗ ᒪᑭᑉᐳᖅ ᑐᖁᔨᐊᓂ ᕿᒪᒡᓗᒍ, ᕼᐃᑍᑎᓄᐊᕐᐳᖅ, ᐅᖃᑎᓪᓗᒋᓪᓗ, 4#ᐄᑉᕈᐃᓄᑦ 11:9,13; ᐋᐴᓯᑕᓖᑦ 7:16.“ᑕᒫᓂ ᓂᐅᕐᕈᐊᖑᒐᒪ ᓄᓇᖃᕐᑐᑐᖃᐅᓇᖓᓗ ᓄᓇᑦᓯᓐᓂ; ᓂᐅᕕᕈᓐᓇᕐᑎᑕᐅᔪᒪᕗᖓ ᓄᓇᒥᒃ ᐃᓗᕕᕐᕕᒃᓴᒥᒃ, ᐃᓗᕕᕐᓯᔪᓐᓇᖁᓪᓗᖓ ᑐᖁᔨᐊᕆᓯᒪᔭᓐᓂᒃ.”
5ᕼᐃᑍᑎᒥᐅᓪᓗ ᐂᑉᕋᕼᐋᒻ ᑭᐅᕚᑦ, ᐅᖃᐅᑎᓪᓗᒍ, 6“ᐅᕙᑦᑎᓐᓂᒃ ᓈᓚᓚᐅᕆᑦ ᐊᖓᔪᖅᑳᒃ; ᖃᐅᔨᒪᒐᑦᑕ ᐱᔪᓐᓇᕐᓂᖃᒻᒪᕆᒡᓗᑎᑦ ᑕᓯᐅᕐᑎᐅᒐᕕᑦ; ᑐᖁᔨᐊᑦ ᐃᓗᕕᓚᐅᕈᒃ ᐃᓗᕕᕐᕕᑦᑎᓐᓄᑦ ᐱᐅᓂᕐᐹᒧᑦ; ᓇᓪᓕᑐᐃᓐᓇᕗᑦ ᐊᓂᕈᓱᓐᖏᓚᖅ ᐃᓗᕕᕐᕕᒃᓴᒥᓂᒃ ᐃᓕᖕᓄᑦ, ᓇᓪᓕᐊᓪᓘᓐᓃᑦ ᐃᓗᕕᕐᑍᓕᑎᑦᓯᓂᐊᓐᖏᓚᖅ ᑐᖁᔨᐊᕐᓂᒃ.”
7ᐂᑉᕋᕼᐋᒻᓗ ᒪᑭᓪᓗᓂ ᐅᑯᕗᖅ ᕼᐃᑍᑎᓄᑦ, ᑕᒫᓂ ᓄᓇᖃᕐᑐᓄᑦ. 8ᐅᖃᐅᑎᓪᓗᒋᓪᓗ, “ᐃᓗᕕᕐᓯᔪᓐᓇᕐᑎᑦᓯᒍᑦᓯ ᑐᖁᖓᔨᐊᓐᓂᒃ ᑕᑯᓐᓇᕈᓐᓃᕐᓂᐊᕋᒃᑯ, ᐱᖁᔨᔪᓐᓇᕐᑎᓚᐅᕐᓯᐅᒃ ᐃᐸᕋᓐ ᔪᕼᐊᕆᐅᑉ ᐃᕐᓂᖓ. 9ᐅᕙᓐᓄᑦ ᑐᓂᓯᖁᓪᓗᒍ ᒪᒃ-ᐲᓚᒥᒃ ᐊᑎᓕᖕᒥᒃ ᕾᕈᓱᖕᒥᒃ, ᑖᑦᓱᒪ ᐱᒋᖕᒪᒍ; ᐱᕈᕐᓰᕕᖁᑎᖓᑕ ᑭᒡᓕᖓᑕ ᐃᓱᐊᓃᑦᑐᖅ. ᐊᑭᖓ ᐃᓗᐃᑦᑑᓗᓂ ᓂᐅᕕᐊᕆᔭᐅᖁᓚᐅᕐᓯᐅᒃ ᐃᓕᑦᓯ ᑕᑯᓐᓇᕐᑎᓪᓗᓯ ᐃᓗᕕᕐᕕᒃᑖᕆᓂᐊᕋᒃᑯ.”
10ᐃᐳᕋᓐᓗ ᑕᕝᕙᓂ ᐃᒃᓯᕙᖃᑕᐅᓚᐅᕐᐳᖅ ᕼᐃᑍᑎᓄᑦ; ᑕᕝᕙ ᐃᐸᕋᓐ ᑭᐅᓕᕐᐳᖅ ᐂᑉᕋᕼᐋᒻᒧᑦ ᕼᐃᑍᑎᑦ ᑐᓵᑎᓪᓗᒋᑦ, ᑕᒪᕐᒥᒃ ᐃᒃᓯᕙᖃᑕᐅᔪᑦ ᐃᑎᕐᑕᕐᕕᖕᒥ, 11“ᐋᒃᑲ ᐊᖓᔪᖅᑳᒃ, ᓈᓚᓚᐅᓐᖓ; ᑕᒪᓐᓇ ᐱᕈᕐᓰᕕᒃ ᑐᓂᕙᕋ ᐃᓕᖕᓄᑦ ᕾᕈᓱᒡᓗ ᑕᕝᕙᓃᑦᑐᖅ ᐃᓕᖕᓄᑦ ᑐᓂᔪᒪᕙᕋ; ᐅᑯᐊ ᐃᓅᖃᑎᒪ ᑭᖑᕚᖏᑦ ᑕᑯᓐᓇᕐᑎᓪᓗᒋᑦ ᑐᓂᕙᕋ ᐃᓕᖕᓄᑦ; ᑐᖁᔨᐊᑦ ᑕᕝᕙᓂ ᐃᓗᕕᓕᕈᒃ.”
12ᐂᑉᕋᕼᐋᒻᓕ ᐅᑯᕗᖅ ᑕᒫᓂ ᓄᓇᖃᕐᑐᓄᑦ. 13ᐃᐸᕋᓐᒧᓪᓗ ᐅᖃᕐᓗᓂ, ᓄᓇᖃᕐᑐᑦ ᑐᓵᑎᓪᓗᒋᑦ, “ᓈᓚᖕᓂᐊᕈᕕᖓ; ᑕᒪᓐᓇ ᐱᕈᕐᓰᕕᒃ ᐊᑭᓕᕈᒪᕙᕋ; ᐊᑭᓕᐅᑎᒋᔭᒃᑲ ᐃᓚᓕᐅᓚᐅᒃᑭᑦ, ᑐᖁᔨᐊᕋ ᑕᕝᕙᓂ ᐃᓗᕕᕐᓂᐊᕋᒃᑯ.”
14ᐃᐸᕋᓐᓗ ᑭᐅᕗᖅ ᐂᑉᕋᕼᐋᒻᒧᑦ, 15“ᐊᖓᔪᖅᑳᒃ ᓇᓛᓚᐅᓐᖓ, ᓄᓇ ᐊᑭᖃᑐᐃᓐᓇᕐᐳᖅ 400ᓂᒃ ᓯᐅᓪᕕᕆᓂᒃ, ᑕᒪᓐᓇᓕ ᐅᕙᑦᑎᖕᓄᑦ ᐊᒡᕕᐊᕈᑕᐅᓐᖏᓚᖅ, ᑐᖁᔨᐊᑦ ᐃᓕᔭᕐᑐᓕᕈᒃ.” 16ᐂᑉᕋᕼᐋᒻᓗ ᐃᐸᕋᓐ ᐊᖏᖃᑎᒋᒐᒥᐅᒃ; ᐅᖁᒤᓐᓂᕐᓯᐅᑎᒃᑯᑦ ᐋᖅᑭᒃᓱᐃᓕᕐᐳᖅ ᐃᐸᕋᐅᑉ ᐊᑭᒋᖁᓪᓗᒋᑦ ᐅᖃᐅᓯᕆᖅᑲᐅᔭᖏᓐᓂᒃ ᓯᐅᓪᕕᕆᓂᒃ ᕼᐃᑍᑎᒥᐅᑦ ᑕᕝᕙᓃᑦᑐᑦ ᑐᓵᑎᓪᓗᒋᑦ, 400ᓂᒃ ᓯᐅᓪᕕᕆᓂᒃ, ᑍᑦᓱᒪᓂᐅᑎᓪᓗᒍ ᐅᖁᒤᓐᓂᕐᓯᐅᑕᐅᓪᓗᑎᒃ ᓂᐅᕕᕐᑎᑦᓯᕙᒃᑐᓂᑦ ᐊᑐᕐᑕᐅᕙᒃᑐᑦ ᐊᑐᕐᓗᒋᑦ.
17ᑍᒫᒃ ᑕᕝᕙ ᐃᐸᕋᓂᐅᑉ ᓄᓇᖁᑎᒋᓚᐅᕐᑕᖓ ᒪᒃ-ᐲᓚᒥᒃ ᐊᑎᓕᒃ ᒪᒻᕆᐅᑉ ᑕᓕᕐᐱᐊᓃᑦᑐᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ, ᐱᕈᕐᓰᕕᒃ ᕾᕈᓱᒡᓗ ᑕᕝᕙᓃᑦᑐᖅ ᐱᖃᓯᐅᑎᒋᓪᓗᒍ, ᓇᐹᕐᑐᐃᓪᓗ ᑕᒪᕐᒥᒃ ᐱᕈᕐᓰᕕᖕᒦᑦᑐᑦ, ᖃᓂᒋᔭᓕᒫᖓᓗ ᑐᓂᔭᐅᕗᖅ. 18ᐂᑉᕋᕼᐋᒻᒧᑦ ᓇᖕᒥᓂᕐᑖᕆᔭᐅᑎᑕᐅᕗᖅ ᕼᐃᑍᑎᒥᐅᑦ ᖃᐅᔨᑎᓪᓗᒋᑦ, ᐃᒡᓗᒐᓮᑦ ᐃᑎᕐᑕᕐᕕᖓᓄᑦ ᕾᓚᐅᕐᑐᓕᒫᑦ.
19ᑭᖑᓂᖓᒍᑦ, ᐂᑉᕋᕼᐋᒻ ᓄᓕᐊᓂ ᓵᕋ ᑕᕝᕗᖓ ᕾᕈᓱᖕᒧᑦ ᐃᓗᕕᕐᐹ ᐱᕈᕐᓰᕕᖕᒥ ᒪᒃ-ᐲᓚᒥ ᒪᒻᕆᐅᑉ ᓯᕿᓂᐊᑕ ᓇᓛᓃᑦᑐᒥ ᕼᐃᐸᕋᓐᒥ ᑬᓇᓂᐅᑉ ᓄᓇᖓᓃᑦᑐᒥ. 20ᑕᕝᕙ ᐱᕈᕐᓰᕕᒃ ᕾᕈᓱᒡᓗ ᑕᕝᕙᓃᑦᑐᖅ ᑐᓂᔭᐅᓚᐅᕐᐳᖅ ᐂᑉᕋᕼᐋᒻᒧᑦ, ᐃᓗᕕᕐᓯᕕᒃᓴᕐᑖᕆᓪᓗᒍ ᕼᐃᑍᑎᒥᐅᓂᑦ.
Selectat acum:
ᒨᓯᓯ ᓯᕗᓪᓖᑦ 23: EAIB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Eastern Arctic Inuktitut Bible © Canadian Bible Society, 2012, 2021-2023.