Luk 7
7
Zisɔs akʉs ɔnʉl wʉ ɔtʉmʉ wʉ ɔkʉnʉl wʉ ɛta wʉ Loma
1Wʉ Zisɔs âvɔlʉ kule vɛnalɛvɛ yee vimem ndalɛsɛ ɔmɔnɛmɔ aŋgwa, akiil za kɛ Kapanʉm. 2Kɛ ɔswaŋ wɔɔ, ɔmɔ ɔkʉnʉl wʉ vɛnʉl vɛ ɛta âlɛ nɛ ɔnʉl ɔna wʉ ɔtʉmʉ wʉ ateŋg kaka. Awaŋgɛ ahimbili ɔnʉl wʉ ɔtʉmʉ wɔɔ ndalɛ ákwo. 3Wʉ ɔkʉnʉl wʉ ɛta wɔɔ âŋgwa vɛnalɛvɛ yɛ Zisɔs âyele, atɛma vakʉ vedivi vɛ vɛnʉl vɛ Zu kɛ nɔnʉn ala, ɔ̃kaŋɛ Zisɔs nɛ áva-kʉs ɔnʉl ɔna wʉ ɔtʉmʉ. 4Wʉ ɔ̂va kɛ nɛ Zisɔs, ɔkɔl uno nɔnʉn ala, “Ɔnʉmbʉsʉ wee abe-kɛma, nɛ wʉ́yel ɔn ɔmanɛ kiyee. 5Ateŋg vɛnʉl vasɛvɛ; ɛcaa ɛyasɛ kpaa, ɔn ɛnɛ ama.” 6Asɔ Zisɔs aza ɔlʉŋgʉ navo.
Wʉ âbi kule ye kɛ itimbe, ɔkʉnʉl wʉ vɛnʉl vɛ ɛta, atɛma vaciam ɔnavɛ ala ɔ̃kaŋɛ Zisɔs ala, “Ɔkʉ, x-wazaa ɔmɛnɛ owuwu ɛyʉl ga, kici yɛ mɛ̂kɛma wʉ mákol otu icivili iyɔɔ ga. 7Mɛ̂kɛma wʉ máva kɛ nawe ga. Kpa kaŋɛ kɛlɛ ɛmʉ nɛ ɔnʉl wamɛ wʉ ɔtʉmʉ ákʉna. 8Kici yɛ ɛmɛ ɛŋga, mawʉ kɛ ɔnʉl wʉ agbaala obe kɛ nɛ vɛnʉl vedivi vɛ ofo mɛ. Ɛmɛ kpaa mawʉ nɛ vɛnʉl kɛ izime ɛyamɛ. Mɛkaŋā nɛ owee, ‘Va,’ nɛ áva. Mɛkaŋā nɛ ɔnʉl wamɛ wʉ ɔtʉmʉ mɛla, ‘Yeli ase,’ nɛ áyel.”
9Wʉ Zisɔs âŋgwa asɔ, kayaaŋɛ ɔn nɔnʉn. Afiil kɛ nɛ imbule yɛ vɛnʉl yɛ ɛlʉŋwa ɔn, akaŋɛ ala, “De mɛvɔl anu, mɛ̂kol man ɔnʉl wʉ alɛ nɛ otu awa-ɛsɛma wee ga, masɛ kan ɛyaŋ iyɛ Iselel.” 10Saŋ vaciam vɛ ɔkʉnʉl wɔɔ, okiil za kɛ itimbe, okol ɔnʉl wʉ ɔtʉmʉ wɔɔ sɛ akʉna.
Zisɔs ayel wanɛ wʉ ɔnʉmbʉsʉ wʉ oke-kuse alil kɛ oku
11Kayele sigh, Zisɔs aza kɛ ɔswaŋ wʉ ɔyɛla ala Nen. Vɛnʉl vɛ oyeghe nɔnʉn nɛ imbule yɛ ɛnʉlʉ yɛboona ɔza ɔlʉŋgʉ nɔnʉn. 12Wʉ Zisɔs âbii zaa kɛ ɛgalɛ yɛ ɔswaŋɛ, akol ndalɛsɛ oŋgiee sime vaa nɛ ɛkʉmʉ. Ɛkʉmʉ iyɔɔ ɛ̂lɛ kɛ wanɛ wʉ ɔnʉmbʉsʉ cas wʉ okeyi ɔmɔ. Okeyi wee kpaa âlɛ kɛlɛ oke-kuse. 13Wʉ Ɔkʉ âyeni kɛ okeyi wee, isonu ɛkɔl ɔn nɔnʉn. Akaŋɛ nɔnʉn ala, “x-Waliaa ga.”
14Saŋ Zisɔs aza-pel fɛ ɛtalana, vɛnʉl vɛ oŋgiee ɛtalana wɔɔ ocoolu. Akaŋɛ ala, “Wanɛ-osombu, mɛkaŋɛ nawe mɛla wʉ̃mʉwa ɛsɛla.” 15Saŋ ɛpʉmb, ɔnʉl wʉ akwo wɔɔ amʉwa ɛsɛla, ahee ɛtɔwana. Zisɔs ana ɔn kɛ nɛ ɛŋgwan ɔna.
16Ɛyʉlʉ ɛcia vo omwem, ocivili Ofilikpamɛ wʉ ɔkaŋa ala, “Ɔnʉl wʉboona wʉ atɔwa kici yɛ Ofilikpamɛ, âva kan nɛ asu, wʉ ákpend asu.” 17Ɔtɛlɛ wʉ ɔmanɛ kɛɛ Zisɔs âyeli, ozend za kɛ ɛswaŋ iyɛ ɛlɛ kɛ ɛyaŋ iyɛ Zudiya imem, zwaŋ nɛ ɛswaŋɛ iyidi iyɛ ɛtaŋ fini.
Zɔnɛ atɛma vɛnʉl vɛ oyeghe nɔnʉn kɛ nɛ Zisɔs
18Vɛnʉl vɛ oyeghe nɛ Zɔnɛ ɔvɔl Zɔnɛ vɛnalɛvɛ yee vimem. Ayɛla vo ɔfaalɛ, 19saŋ atɛma vo kɛ nɛ Ɔkʉ ala nɛ õfii ɔn ala, “Kɛlɛ owe nɛ wʉlɛ wʉ wáva aka sɛ̃kɛ-kʉla ɔnʉl wudi?”
20Wʉ vɛnʉl vɛ oyeghe nɔnʉn vɔɔ ɔ̂za kɛ nɛ Zisɔs, ɔkaŋɛ ala, “Zɔnɛ wʉ Abaptaisa Vɛnʉl atɛma asu ala sɛ̃fii we, ‘Kɛlɛ owe nɛ wʉlɛ wʉ wáva aka sɛ̃kɛ-kʉla ɔnʉl wudi?’”
21Kɛ ɔkalaka ɔnawɔɔ, Zisɔs akʉs vɛnʉl cɛŋ vɛ ɔlɛ nɛ vawaŋgɛ itu-itu, asimi kpaa mʉndʉ vacɔcɔ kɛ ayʉlʉ ayɛ vɛnʉl cɛŋ, avuu kpaa vapilesi asi cɛŋ. 22Asɔ, agɔl navo ala, “Kiil za, nɛ nɛ́za-vɔl Zɔnɛ ɔmanɛ kɛɛ nɛyen nɛ kɛɛ nɛŋgwa: vapilesi oyenē aŋgiee, vɛwan ozendē, vɛnʉl vɛ ɛmanda oceeli, vɛmama ɔŋgwaā aŋgiee, vɛnʉl vakwoonavɛ ôkiil ɔyɛmavɛ, ɔvɔlā kpaa vɛnʉl vɛ ɛcianɛvɛ ɔtɛlɛ wʉsɛɛ. 23Vicowenavɛ ayɛ kɛ nɛ ɔnʉl ɔmɔnɛmɔ wʉ aka-yaaŋɛ otu ɔnʉlʉ wʉ mɛlɛ ga.”
24Wʉ vɛnʉl vɛ oyeghe nɛ Zɔnɛ ɔ̂mʉwa, Zisɔs ahee ɛtɔwana kɛ nɛ imbule yɛ ɛnʉlʉ kɛ ito kɛ Zɔnɛ. Akaŋɛ ala, “Ini nɛsime za kɛ owemi wʉ náza-yen? Vɛhʉŋgʉvʉ yɛ ofofu ofuwe kɔ nɛ kan? 25Ikil yɛ kalɛ asɔ ga, ini nɛsime za wʉ náza-yen? Ɔnʉl wʉ awa akʉndʉ ayasɛvana? Eey! Vɛnʉl vɛ ɔwa akʉndʉ ayasɛvana nɛ vɛnʉl vɛ ɔlɛ nɛ vɛnalɛvɛ cɛŋ ɔlɛɛ̄ kɛlɛ kɛ aca ayɛ mɛfʉwa vaboonavɛ. 26Kpa ini ɛnɛ nɛsime za wʉ náza-yen? Ɔnʉl wʉ atɔwa kici yɛ Ofilikpamɛ? Mɛvɔl anu, afo nɛ ɔnʉl wʉ atɔwa kici yɛ Ofilikpamɛ. 27Kɛlɛ itoghu ɛnaghɛ ɛnɛ ɔlɛ-saŋgɛ ala,
“‘Yene, mátɛma ɔmgbɛla ɔwamɛ wʉ ɔ́mbaa we,
nɛ ɔ́malɛ ɔwaa owuwu bem-bem saŋ nɛ wʉ́va.’
28Mɛvɔl anu mɛla, kɛ vɛnʉl omwem vɛ okevi ɔmal, ɔmɔ awʉ wʉ afo Zɔnɛ ga. Masɛ asɔ, ɔnʉl wʉ amasɛ ɛtɔ kɛ Ɔtʉlʉ vɛ Ofilikpamɛ âbo âfo Zɔnɛ.”
29Vɛnʉl omwem, masɛ vɛnʉl vɛ ɔgbaala ɔkpanɛvɛ, ikil yɛ ɔŋgwa amʉ ayee, ɔvɔl gbaŋgaŋ ala Ofilikpamɛ awʉ gel-gel, kici yɛ ɔlɛ-gɔlʉ ala, Zɔnɛ abaptais vo. 30Kpa vɛ Falasi nɛ vɛnʉl vɛ otee obe, ɔtɛna wʉ váyel ɔmanɛ kɛɛ Ofilikpamɛ ɔkaŋɛ, kici yɛ Zɔnɛ alɛ-baptaisɛ vo ga.
31Saŋ Zisɔs aza isi kɛ ɛvɔlana ala, “Mákal la vɛnʉl vɛ aŋgiee wee kɛ nɛ ini ɔmanɛ? Avɛ la kɛlɛ ndalɛ ini? 32Avɛ kɛ ndalɛ ɔvɔnʉ vɛ ɔcaala kɛ ise, ɔyɛlā valindi ala,
“‘Sɛtɔŋg anu ɛmalɛ yɛ ovini,
kpa nɛ̂vine ga.
Sɛgbel anu ɛciamɛ iyɛ oku,
kpa nɛ̂lia ga.’
33Kici yɛ Zɔnɛ wʉ Abaptaisa Vɛnʉl âva, ayaa masɛ ɔyɛ ga, aŋwaa masɛ mɛsɔlʉmʉ ga, kpa nɛkaŋɛ anu ala, ‘Awʉ nɛ mʉndʉ wʉcɔcɔ.’ 34Aŋgiee ɛmɛ Wanɛ wʉ Ɔnʉlʉ mɛ̂va, wʉ mɛyaa, mɛŋwaa, kpa nɛkaŋā anu ala, ‘Yene ɔnʉl wee: awʉ kɛlɛ ɔnʉl wʉ ayaa ɔyɛ cɛŋ. Aŋwaa mɛsɔlʉmʉ kaka nɛ ágba ɛzɔw. Awʉ kɛlɛ ɔciam wʉ vɛnʉl vɛ ɔgbaala ɔkpanɛvɛ nɛ vɛnʉl vɛ oyele ɛcɔcɔɔ.’ 35Ayʉmʉ ayɛ Ofilikpamɛ ɔna vɛnʉl, ateē ɔmɛnɛ ɔna kɛ vɛnalɛvɛ yɛsɛɛ yɛ oyele.”
Zisɔs kɛ ɔswaŋ wʉ ɔnʉl wʉ Falasi
36Ɔnʉl ɔmɔ wʉ Falasi, abɛ Zisɔs ala ãza-ya ɔyɛ kɛ itimbe ɛna. Wʉ âza kini, acaal ɛyaŋ wʉ áya ɔyɛ. 37Kɛ ɔswaŋ wɔɔ, okeyi ɔmɔ âlɛ fini wʉ ɛyɛma ɛna ɛ̂lɛ kɛ yɛcɔcɔ. Aŋgwa ala Zisɔs awʉ kɛ ɛyaana ɔyɛ kɛ itimbe iyɛ ɔnʉl wʉ Falasi wɔɔ. Asɔ, ava nɛ iyili iyɛ iyuŋgwe sɛva kɛ ɔkpʉm wʉtavana iseghi, wʉ oyel kɛ agon. 38Saŋ ava-ŋgul kɛ izime yɛ Zisɔs kɛ ɛliaana, ahee ɛfɔɔna Zisɔs akasɛ nɛ alia ana, saŋ ahee ɛpɛsana anɛ nɛ inyu ɛna. Alɛ ipelena ɔtʉnʉ-uno ɔna kɛ akasɛ ayɛ Zisɔs, awule iyili iyɛsɛvana kɛ anɛ. 39Ɔkambɛlɛ wʉ ɔnʉl wʉ Falasi wʉ abɛ Zisɔs âyeni asɔ, ates kɛ ɛsɛma ɛna ala, “Alɛ kɛ ndalɛ ɔnʉl wee abe-lɛ kɛ ɔnʉl wʉ atɔwa kici yɛ Ofilikpamɛ, nɛ ácil ɔnʉl wʉ apele ɔn nɛ otu okeyi wʉ alɛ, nɛ ácil ala awʉ kɛlɛ ɔnʉl wʉcɔcɔ.”
40Zisɔs agɔl nɔnʉn ala, “Saimʉn, mawʉ nɛ ɔmanɛ kɛɛ mávɔl we.”
Akaŋɛ ala, “Ɔkʉ, vɔlʉ mɛ.”
41Zisɔs aza isi kɛ ɛvɔlana ala, “Vɛnʉl ɔfaalɛ ɔlɛ-kɔla ɔnʉl wʉ apɔla ɛŋgɔl ifofu. Ɔnʉl ɔmɔɔ akɔla ɔn ɛŋgɔl wʉ ayel ɔtʉmʉ anyʉmʉ afaalɛ sɛnɛ ákɔl. Wudi wɔɔ, akɔla ɔn ɛŋgɔl yɛ ayel ɔtʉmʉ ivolu ɛfaalɛ sɛnɛ ákɔl.#7:41 Ɛŋgɔl yee kɛ ɛyamɛ yɛsisi ayɛ danali 500 nɛ danali 50. 42Vo omwem ɔma-lɛ nɛ ɛŋgɔl yɛ vákɔl ɔn ga, asɔ ade vo omwem ifofu iyɔɔ. Asɔ wʉ fɛna ɔnʉl ɛnɛ áteŋg ɔn nɛ afo?”
43Saimʉn agɔl ala, “Mɛ̂tes mɛla ɔnʉl wʉ ɛna ifofu ibo ifo saŋ ôde ɔn wɔɔ, ɛnɛ áteŋg ɔn nɛ afo.”
Zisɔs avɔl nɔnʉn ala, “Wʉ̂kaŋɛ gel-gel.”
44Ayen okeyi wɔɔ, saŋ akaŋɛ nɛ Saimʉn ala, “Wʉ̂yen okeyi wee? Mɛ̂va kan itimbe iyuwu, wʉ̂na mɛ ɛzɔl wʉla mɛ̃wʉʉ akasɛ ga, kpa âfɔ akasɛ ayamɛ nɛ alia ana, âpɛsa anɛ nɛ inyu ɛna. 45Wʉ̂bɛ wʉ̂gambɛs mɛ ga, kpa hee kɛ ɔkalaka wʉ mɛnyɔl fan, okeyi wee âde ipelena ɔtʉnʉ-uno ɔna kɛ akasɛ ayamɛ ga. 46Wʉ̂wule mɛ iyili kɛ ito wʉ katee ala wʉteŋg mɛ ga, kpa okeyi wee âlemi mɛ akasɛ nɛ iyili iyɛ iyuŋgwe sɛva. 47Asɔ mɛkaŋɛ we mɛla, Ofilikpamɛ ôgife ɛcɔcɔɔ ɛna iyɛ ayel cɛŋ, asɔ nɛ ateŋg cɛŋ. Kpa ɔnʉl wʉ ogife ɔn cɔɔ, áteŋg kɛ cɔɔ.”
48Zisɔs akaŋɛ nɔnʉn ala, “Ôgife ɛcɔcɔɔ iyuwu.”
49Asɔ vɛnʉl vedivi vɛ ɔyaa ɔyɛ nɔnʉn, ohee ɛtɔwana nɛ valindi ala, “Ɔnda ɛnɛ alɛ owee, wʉ agife ɛcɔcɔɔ?”
50Saŋ Zisɔs akaŋɛ nɛ okeyi wɔɔ ala, “Awa-ɛsɛma wuwu âwal we, zaa makun.”
Selectat acum:
Luk 7: Iceve-Maci
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
©️2024 Luke Initiative for Scripture Translation
